Elda Michael Cziesla

Elda Michael Cziesla i tingbaot gud ol hadtaem blong 2017. Long wan Tiusdei long Jenuware, hem i bin lusum wok blong hem long wan bisnis blong intanasonol loa taem kampani i bin brok daon. Long nekis dei haos blong hem i fulap long wota taem wan paep i bin brok. Ol stilman oli bin stil long haos blong hem mo long nambatri dei, oli traem blong tekem ol samting blong famli blong hem we oli gat bigfala valiu. Long sam dei nomo, laef blong hem i nogud evriwan.

“Mi smael olsem oltaem long Sandei taem mi sidaon antap olsem stek presiden,” hem i talem. “Nogat wan i save wanem i stap gohed. Be insaed, mi stap harem nogud bigwan. Mi bin stap long wan ples we i tudak tumas.”

Afta long miting, wan kwaet mo gudfala man long wod i askem long hem wanem i rong. “Hem i bin lisin nomo, afta hem i haggem mi,” Elda Cziesla i talem. “Mi filim se Lod i stap haggem mi, se Hem i save hadtaem blong mi, mo evri samting bae i oraet.”

Michael Cziesla i bon i kam long wol long Neumünster, Germany, long 26 Julae, 1972. Papa mo mama blong hem i, Armin Ludwig mo Irmtraut Hanna. Hem i groap long Schleswig-Holstein mo afta i givim seves long Utah Ogden Misin. Waef blong hem, Margret Anne Rauh, i bin givim seves long Temple Square Misin. Tufala i bin mared long Frankfet Jemani Tempol long 4 Epril, 1997. Long taem we oli bin givim koling ia long hem, oli stap laef long Griesheim, Germany wetem ol faef pikinini blong tufala, mo oli laekem blong stap wokbaot long ol bigfala bus mo holidei long wan aelan long Denmark.

Elda Cziesla i winim wan loa digri long Yunivesiti blong Mainz long 2000. Hem i bin finisim wok blong hem long loa olsem wan senia koperet patna long McDermott Will & Emery.

Bifo long koling blong hem olsem wan Jeneral Atoriti Seventi, Elda Cziesla i bin givim seves olsem wan Eria Seventi long Europe Central Eria, i bin stap olsem interim misin presiden long Germany Frankfurt Misin, i bin stap olsem wan stek presiden, wan hae kaonsela, mo wan kaonsela long bisoprik.