Elda Kevin G. Brown

Taem Kevin Brown i gat 12 yia, wan sista misinari i bin jalenjem hem blong ridim Buk blong Momon. Mekem se evri moning, bae hem i prea, rid, mo afta prea bakegen. Evri taem hem i prea, hem i askem Papa long Heven sapos Buk blong Momon i tru.

Hem i tingbaot wan moning taem hem i stap prea, hem i “no nidim blong askem kwestin ia. Ansa blong Lod i bin kam long wan wei we i tajem hem bigwan.” Hem i filim Lod i talem long hem se: “Mi save yu, mo mi lavem yu. Yu yu boe blong mi.”

Stret long taem ia, Tabu Spirit i bin konfemem long hem se: “Hemia i trutok blong God. Buk blong Momon i tru. Josef Smit i wan profet.” Eksperiens ia i bin jenisim laef blong hem.

Elda Brown i luksave hamas sista misinari ia i bin gat paoa blong jenisim laef blong hem mo ol narawan from ples we hem i stap long hem naoia. Taem hem i wan yangfala nomo, i bin gat plante memba blong Jos we oli bin helpem hem bigwan long laef—stat long distrik presiden blong hem go kasem ol Praemeri tija blong hem, stat long ol yang misinari go kasem ol senia misinari, mo speseli waef blong hem, Nadine, we i bin helpem hem bigwan long saed blong Lod.

Kevin G. Brown i bon i kam long wol long 1 Mei, 1976, long Manchester, Jamaica. Papa mo mama blong hem i, Desmond Holness mo Patsy Williams Brissett. Hem i bin maredem Nadne Lezanne Carter long 1999. Tufala i gat faef pikinini.

Elda Brown i kasem wan digri long Yunivesiti blong Technology, Jamaica, long 2008. Hem i kasem wan masta digri long saed blong gavman mo pablik polisi long Yunivesiti blong West Indies long 2012. Stat long 2001 hem i bin wok blong Ol Seminari mo Institiut blong Relijin blong Jos.

Long taem we hem i bin kasem koling blong hem, Elda Brown i bin stap givim seves olsem wan Eria Seventi long Utah Eria.