Lav blong Mi long Sevya Hem I “From Wanem” blong Mi

?Yufala i no luk save se dia profet blong yumi, Presiden Russell M. Nelson, i gohed blong stap givim invitesen long yumi? Hem i no wan sapraes se hem i bin invaetem yumi blong stadi mo tingting hevi long ol mesej we oli bin serem long las tu(2) konfrens. Long Epril 2024, hem i se, “Mi hop bae yufala i ripitim mo stadi ol mesej blong konfrens ia truaot long ol manis we i stap kam.” Afta, long Oktoba 2024, hem i se “Mi askem strong long yufala blong stadi long ol mesej blong olgeta. Yusum ol toktok ia olsem wan tes blong save wanem i stret, mo wanem i no stret, long taem blong nekis sikis manis ia.”

Ol invitesen ia yumi save ademap wetem ol invitesen blong ol profet we yumi bin kasem truaot long laef blong yumi, speseli olgeta we yumi kasem long ol yia we i jes pas. Ating bae yumi filim o tingting se ol invitesen ia oli ol nara samting we yumi nidim blong ademap long lis blong ol samting blong mekem from nomo se oli invaetem o askem yumi blong mekem. ?Be i save minim moa long hemia?

Taem mi stap tingting hevi long hemia mo evri invitesen we yumi kasem, mi tingbaot wan samting we mi bin lanem mo disaed long hem longtaem finis. Mi stap traem blong mekem ol samting ia, we oli impoten long mi from mi lavem Hem. Mi lavem Sevya blong yumi. Hemia i bigfala risen from wanem mi mekem wanem mi stap mekem, mo hemia i semmak wetem lav blong mi long yufala, ol dia brata mo sista blong mi.

Olsem brata blong yu, mi hop bae yu tingting long ol toktok blong mi olsem wan invitesen we i kam long hat blong lukaot blong andastanem janis ia blong joenem evri samting we yumi mekem wetem lav blong yumi long Sevya.

Blong mekem olsem bae i helpem yumi andastanem stret from wanem” biaen long evri samting we yumi mekem olsem ol disaepol blong Sevya. Hemia bae i helpem yumi mekem kavenan we i konektem yumi wetem God i kam strong moa, andastanem tabu trutok blong Hem we i no save finis—trutok we i no save finis mo i stret gud we bae i neva save jenis. Trutok we i no save finis olsem “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”

Hem i intresting se samtaem from yumi mekem semmak samting go go we i kam olsem ol tradisen, mo yumi letem ol tradisen ia o ol aktiviti ia blong kontrolem wok blong yumi blong bildimap fet long Jisas Kraes. I luk olsem se yumi mekem ol samting from yumi stap mekem finis blong plante yia mo no luksave paoa blong hem long kavenan we i konektem yumi wetem Sevya.

Long wol blong yumi, oltaem yumi lukluk moa long wanem we yumi mekem mo blong stap finisim gol blong yumi. Long wan ples we yumi save filim spirit, yumi gat janis blong go moa bitim we blong mekem ol samting o kasem ol gol taem yumi andastanem from wanem yumi stap mekem olgeta. Taem yumi tekem gud saed blong ol janis ia, bae yumi save andastanem mo mekem koneksen long risen biaen ol aksen blong yumi we i go wetem lav blong yumi from Sevya mo Papa blong yumi long Heven., Bae yumi andastanem se nomata we yumi stap mekem stret mo gud fasin, olsem blong gat Jos aktiviti o tradisen, hem i wan gud samting nomo taem yumi mekem long stret fasin, yet, taem yumi mekem koneksen blong ol aksen ia, wetem kwestin ia “from wanem,” bae i wan blesing blong andastanem risen ia. Bae i no blong mekem gud samting nomo o mekem i stret; bae yumi kasem i stret.

Eksampol, taem yu putum wan gol blong ridim ol skripja, givim wan prea we i kam long hat, o rere long wan aktiviti blong ol famli o wod blong yu, ?hemia i stret gol ia blong komplitim ol wok ia nomo? ?O ol aksen ia oli ol wei, ol tul we i stap, blong komplitim ol tru gol ia? ?Stamba tingting i blong gat wan aktiviti nomo from yumi bin mekem plante yia finis mo afta tikim bokis blong soem se yumi bin komplitim? ?O, bakegen, hemia i ol wei we yumi yusum blong lanem, filim, mo konektem yumi wetem Sevya?

Plis no tekem rong poen blong mi blong gat ol aktiviti mo tradisen o putum ol gol mo wokhad blong komplitim olgeta; i nogat wan samting i rong wetem hemia. Be, mi invaetem yufala blong openem ol hat mo maen blong yufala long janis mo blesing blong andastanem from wanem yumi mekem ol samting ia mo hao yumi praktisim relijin blong yumi.

Wan gudfala eksampol blong ol tradisen we Kraes i stap long medel, i wan jalenj we Presiden Dallin H. Oaks i bin givimaot long yumi evriwan long bihaf blong Fas Presidensi. Presiden Oaks i talem, “Taem yumi statem niu yia ia, bae yumi rere long wan Ista selebresen blong Atonmen mo Sakrifaes blong Jisas Kraes. Nomata wanem ol naraman oli bilivim o mekem, yumi sud selebretem Resureksen blong Sevya blong yumi we i stap laef taem yumi stap stadi ol tijing blong Hem mo helpem blong gat Ista tradisen long sosaeti blong yumi fulwan, speseli wetem famli blong yumiwan.” Olsem yu save luk, i no wan invitesen nomo blong gat ol tradisen. Be, yumi yusum ol tradisen ia olsem wan wei blong lanem moa abaot Sevya mo tingbaot Resureksen blong Hem.

Moa yumi joenem risen ia wetem lav blong yumi blong Sevya, moa bae yumi save kasem wanem we yumi nidim o stap lukaotem. Presiden Nelson i talem, “Nomata wanem ol kwestin o problem we yu gat, oltaem ansa i stap long laef mo ol tijing blong Jisas Kraes.” Mo afta hem i givimaot invitesen ia: “Lanem moa abaot Atonmen blong Hem, lav, sore, doktrin blong Hem, mo gospel blong hiling, mo fasin blong gro. !Tanem yu i go long Hem! !Folem Hem!”

Tingting hevi long hemia insaed long hat mo maen blong yu: ?Yu ting se invitesen blong Presiden Nelson i blong helpem yumi rere long wan jeklis we bae yumi kasem moa save mo finisim ol wok mekem se yumi save tikim long invitesen long lis blong samting blong mekem? O ?hem i stap invaetem yumi blong tingting long ol defren lukluk blong trutok mo prinsipol ia we i no save finis olsem wan janis blong andastanem kwestin ia “from wanem” mo joenem yumi tru long kavenan from lav blong Sevya blong yumi long wokbaot blong yumi long wol ia olsem wan disaepol?

Bae mi soem prinsipol ia we mi stap traem blong tokbaot. Wan wei, we hem i gud tumas, hem i blong ridim ol toktok we i kam long konfrens, mo taem mi finis, bae mi lukluk long invitesen we i stap long lis blong ol samting blong mekem mo no mekem jenis long wanem we mi bin ridim. Mi andastanem se hemia i wan bigfala wok ia, be hemia i no tru. Ating plante oli stap mekem olsem o folem stret fasin.

Invitesen, i blong stadi mo tingting hevi long ol mesej blong jeneral konfrens mo yusum olgeta blong kasem mo andastanem wanem wanwan i save mekem blong kam moa gud.

Taem yumi akseptem invitesen ia, mo andastanem “from wanem” kwestin biaen long hem, bae yumi save gat moa janis blong kam moa klosap long Sevya. Bae yumi stat blong andastanem hemia from mi lavem Sevya, mi wantem lanem moa abaot Hem taem mi stadi long olgeta toktok blong ol profet we i stap laef. Mo from mi lavem ol nara man tu, bae mi serem ol tijing blong ol profet, ol sia, mo ol reveleta wetem olgeta, statem wetem olgeta we mi lavem tumas.

Long tugeta eksampol, yu stap mekem wan stret mo gud fasin. Long wan, i luk olsem gol ia i blong yusum wei we Papa long Heven mo Sevya i bin givim long yumi, we hem i ol mesej we oli serem long taem blong jeneral konfrens. Long seken pat, i givim moa ol bigfala blesing blong kasem moa save tru long ol risen biaen, mo i soem rod blong andastanem ol trutok we i no save finis mo ol promes blesing long evriwan we i mekem ol tijing mo laef blong Sevya blong yumi Jisas Kraes, olsem stamba samting long laef blong olgeta.

Ol dia brata mo sista, mi hop yufala i save filim mo luk olsem wanem i impoten blong joenem ol aksen blong yumi wetem lav blong yumi long Sevya. Long wan bisi wol, we plante voes bae i traem blong winim yu o, oli save lidim yu blong bilivim se i no nid blong gat sam stamba trutok blong gospel blong Jisas Kraes we i kambak. Ol voes ia i stat wetem stamba trutok ia blong i mas gat wan restoresen long ol las dei ia, tekem tu blong gat kingdom blong God long wol ia, we Jos ia blong blong Jisas Kraes blong Ol Lata-dei Sent i kambak mo i representem.

Yu save harem ol voes we i talem se blong gat wan rilesensip o andastaning blong yuwan wetem Sevya i inaf ia nao mo we i no nid blong gat relijin o wan Jos we i kambak bakegen. Mi invaetem yu blong tekem taem o no letem ol rong tingting i fulumap yu mo stap kwik blong tingbaot wanem Sevya i bin talem mo stap tijim yumi stat long taem bifo—stat wetem lav blong Papa long Heven mo Jisas Kraes long yumi mo joenem lav blong yumi from Tufala olsem risen blong folem Tufala.

God Papa mo Pikinini blong Hem, Tufala i bin kam mo toktok wetem Josef Smit blong putumbak Jos Ia blong Jisas Kraes mo mekem evri wok blong Hem i kamtru long Kingdom blong Hem long wol ia. Mekem se, Jos Ia blong Jisas Kraes blong Ol Lata-dei Sent i wei ia nao we Papa long Heven i givim i kam blong yumi save kasem ol kavenan we i letem yumi blong save gobak hom. Be, yumi nidim moa bitim wan rilesensip blong yumiwan wetem Papa long Heven mo Pikinini blong Hem; yumi nidim ol impoten odinens blong prishud we tru long olgeta, yumi mekem ol kavenan wetem Tufala. Hemia i givim wan kavenan koneksen wetem Tufala mo yumi save kasem kavenan from lav blong Tufala, mekem se yumi save kasem hae kingdom blong glori we oli rere long hem blong olgeta we oli stap tru mo fetful long ol kavenan blong olgeta.

Wetem evri paoa blong sol blong mi, mi stap talem witnes blong mi se Sevya Jisas Kraes i tru mo i tabu. Hem i lavem yu. Hem i save evri samting we i stap hapen long laef blong yu. Ol han blong Hem i open bigwan, mo i stap givim invitesen ia, [“Kam long mi, … mo bae mi mekem yufala i spel gud.”]

Mi lavem Sevya, mo lav blong mi long Hem, hem i from kwestin ia “from wanem” . Long nem blong Jisas Kraes, amen.