Elda Eduardo F. Ortega

Aot long ol plante yia we hem i stap givim seves long Jos, Elda Eduardo F. Ortega i bin lanem wan lesen we i gat plante valiu. Long eni koling, sapos hem i olsem wan bisop o olsem wan givhan brata, taem yumi save se yumi ripresentem Lod, hem i mekem koling blong yumi i kam moa isi.

“Sapos yumi tingting abaot olsem wanem bae Hem i mekem samting, bae ol samting i kam moa isi,” hem i talem mo i kwot aot long Jekob 5:71–72 insaed long Buk blong Momon. “Mi bin filim we Lod i stap givim seves wetem mi long saed blong mi plante taem long plante koling, from se hem i plantesen blong Hem, be i no blong yumi.”

Eduardo Franciso Ortega i bon i kam long wol long Godoy Cruz, Mendoza, Argentina, long namba 10 Julae, 1977. Papa mo mama blong hem i Fernando Daniel Ortega mo Irma Elvira Endstorfer. Hem i maredem Gabriela Alejandra Cappi Franzia long Mondevidio Yurugwe Tempol long 3 Septemba, 2002. Tufala i papa mo mama blong faef pikinini mo oli stap laef long Mexico City, Mexico, taem hem i bin kasem koling blong hem ia.

Elda Ortega i winim wan digri long saed blong disaenem ol bilding long John F. Kennedy Yunivesiti , Ajentina long 2008, mo i kasem wan masta digri long Yunivesiti blong Belgrano long 2016. Long 2017, hem i bin kasem wan diploma blong lidasip long Harvard Bisnis Skul. Hem i bin wok long wan konstraksen projek maneja, fastaem blong SBA Kampani mo afta blong Argentine branj blong Village Roadshow Entertainment Group. Hem i bin wan ril estet daerekta blong American Express Company long 2014, wan bod memba blong Arch Royale Projects Ltd. long 2023, mo wan bod memba blong CorNet Global long 2024.

Taem oli singaotem hem long koling ia, Elda Ortega i stap givim seves olsem wan Eria Seventi. Hem i bin givim seves tu olsem wan stek presidensi kaonsela, wan bisop, wan kaonsela blong bisop, wan presiden blong kworom blong ol elda, wan grup lida blong ol hae pris, mo wan fultaem misinari long Colombia Cali Misin.