Mo Mifala I Tokbaot Kraes

Long en blong wan longfala asaenmen ovasi, mi mo waef blong mi Lesa i go insaed long wan eapot blong jekin mo rere long wan moa flaet—blong no slip gud—i go hom. Taem mitufala i stap stanap wetem plante narawan mo stap muvmuv sloslo folem longfala laen, mitufala i save filim fraet blong olgeta we mifala i travel tugeta we oli wari blong no mestem flaet, blong go tru long paspot mo riviu blong visa, mo long en pas tru gud long sekiuriti.

Mitufala i laen kasem wan stesen we ol ofisa blong kastom oli stap bisi blong wok long hem, mo i luk olsem se oli no luksave bigfala wari insaed long rum ia. Woman ia i karem ol dokumen blong mi hariap nomo, i no iven luk mi, i konfemem pikja blong mi, i go tru long wan pej afta narawan, mo long en hem i stampem paspot blong mi wetem wan strong saon.

Afta hem i karem ol pepa blong Lesa. Hem i gohed long wok blong hem, hed blong hem i stap daon mo stap lukluk nomo long ol wok blong hem, hem i lukluk gud mo tanem pej i go long narawan olsem wan we i gat eksperiens long wok blong hem, hem i stap lukluk nomo long ol ditel blong ol dokumen we oli stap long fored blong hem. Mitufala i bin sapraes taem hem i stop, i leftemap hed blong hem, mo i luk Lesa long wan gudfala mo kaen lukluk. Wetem wan kaen smael, hem i stampem gud paspot blong Lesa wetem kea mo givimbak ol dokumen blong hem. Waef blong mi i smael long hem, mo akseptem ol dokumen, mo tufala i talem ol naes toktok bitwin tufala bifo mitufala i aot.

?Wanem i jes hapen? Mi askem hem wetem sapraes.

Lesa i soem long mi wanem we woman ia i bin luk—wan smol kad wetem pikja blong Sevya. Smol kad ia i bin foldaon aot long paos blong Lesa mo i go insaed long paspot blong hem. Hemia nao wanem we ofisa blong kastom ia i bin faenem. Hemia nao wanem we i jenisim fulwan fasin blong hem.

Gladhat mo trutok, i kam long Simon Dewey, courtesy of altusfineart.com, © 2025, oli bin askem blong yusum

Smol pikja ia blong Sevya i joenem hat blong tu strenja. I jenisim fasin blong nogat wan gudfala filing i go long gudfala filing, kasem naesfala, merikel ia, mo tru Laet blong Jisas Kraes. Long dei ia mo afta evri taem, mi stap tingbaot swit, simpol taem ia wetem sapraes mo glad long naesfala Laet blong Jisas Kraes long ol pikinini blong God.

Yumi ol man blong folem Jisas Kraes, mo yumi lukaotem blong kasem mo serem laet blong Hem. Nem blong Jos i soemaot bilif blong yumi se “Jisas Kraes Hemwan i kona ston.” Long taem blong ol olfala profet mo profet we i stap laef, Papa long Heven i talem long yumi blong “harem Hem!” mo blong “kam long Kraes.” “Mifala i tokbaot Kraes, mifala i glad long Kraes, mifala i prij long saed blong Kraes, [mo] mifala i profesae long saed blong Kraes.”

Yumi tijim se Jisas Kraes i Pikinini blong God, mo long taem blong ministri blong Hem long wol ia, Jisas i tijim gospel blong Hem mo stanemap Jos blong Hem.

Yumi testifae se long en blong laef blong Hem, Jisas i ded from ol sin blong yumi taem Hem i stap long garen blong Getsemane, oli bin krusifaem Hem long kros, mo afta Hem i bin girap bakegen long ded.

Yumi glad from atonmen mo sakrifaes blong Sevya, yumi save kasem fogivnes mo kam klin aot long ol sin blong yumi taem yumi sakem sin. Hemia i givim pis mo hop long yumi taem, Hem i mekem i posibol blong yumi gobak long ples we God i stap long hem mo kasem glad we i fulwan.

Yumi profesae se from Resureksen blong Jisas, ded i no en blong evri samting be i wan impoten step i go fored. “Bae yumi evriwan i laef bakegen long ded afta we yumi ded. Hemia i minim se wanwan spirit mo bodi blong man o woman bae oli joen bakegen mo laef blong oltaem.”

Ol profet long taem blong yumi tedei—we oli kasem revelesen blong God blong tijim mo lidim yumi—oli stap invaetem yumi blong kam moa long Kraes. Oli helpem yumi blong putum Hem i stap long medel blong hat blong yumi, ol sora, mo ol ae we lukluk fulwan long Hem. Yumi save talem plante eksampol blong ol jenis mo mekem ol samting i kam moa gud we ol Fas Presidensi oli talemaot we i blong helpem yumi blong lukluk nomo long Jisas Kraes. Sam long ol wok ia i gat:

• Desisen ia blong nomo talem nem ia “Momon Jos” mo talem stret nem blong Jos we i, Jos Ia blong Jisas Kraes blong Ol Lata-dei Sent.

• Ol niufala peinting we i givim insperesen Jisas Kraes we oli stap blong presentem long ol miting haos.

• Ol stamba toktok blong Yang Woman mo Kworom blong Aronik Prishud mo ol miusik we oli lukluk nomo long Jisas Kraes, olsem, “Mi wan Disaepol blong Jisas Kraes” mo “Lukluk long Kraes.”

• Lukluk moa long Atonmen mo Resureksen blong Jisas Kraes olsem wan long ol naesfala selebresen long histri.

• Selebresen blong Ista i no wan dei nomo be i wan sisen blong stap lukluk long Jisas Kraes.

• Fas toktok blong aedentiti blong Jos blong Jisas Kraes mo ol dip mining blong hem.

Letem yumi lukluk moa kolosap long ol jenis blong sam long olgeta. Faswan, simbol blong Jos.

Long 2020, Presiden Russell M. Nelson i introdiusum wan niu aedentiti blong Jos. Simbol ia i soem trutok se Kraes i stap long medel blong Jos blong Hem mo i mas stap long medel blong laef blong yumi. Naoia yumi stap luk simbol ia we yumi save gud, long ol tempol rekomen, long ol websaet blong Jos mo ol magasin, olsem aekon blong Gospel Laebri ap, mo iven long ol ID tag blong ol memba blong Jos we oli stap wok long ami. Simbol ia i tekem tu, nem ia blong Jos we i gat wan konaston insaed, wan rimaenda se Jisas Kraes Hem i Jif Konaston, we oli soem long Kambodia mo oli yusum long 145 lanwis.

Long medel blong simbol ia i gat wan Christus statiu we oli mekem long waet ston we i kam long Bertel Thorvaldsen mo i joen gud wetem Jos mo yumi save luk long ol visita senta mo long ol tempol graon raon long wol. Hem i impoten long simbol blong Jos we i soemaot se Kraes i mas stap long medel blong evri samting we yumi mekem. I semmak olsem we Sevya i openem ol han blong Hem we i soemaot promes blong Hem blong akseptem evriwan we bae i kam long Hem. Simbol ia i wan ripresentesen blong lav blong Sevya Jisas Kraes mo i wan rimaenda we i no save finis abaot Kraes ia we i stap laef.

From mi wantem tumas blong save, mi bin askem plante famli mo fren abaot wan impoten samting blong simbol blong Jos. Wetem sapraes, plante long olgeta i no save wanem tabu simbol ia i ripresentem. Jisas Kraes i stanap andanit long wan ak[ston]. Hemia i ripresentem Sevya we i laef bakegen mo i kamaot long tumb. Yumi stap selebretem tru resureksen blong Kraes we i stap laef, iven yumi yusum long Jos Simbol.

Nao letem yumi luk mining blong Ista. Long mesej blong Fas Presidensi we i jes pas abaot Ista, oli givim jalenj ia blong “yumi mas selebretem Resureksen blong Sevya blong yumi we i stap laef taem yumi stap stadi ol tijing blong Hem mo help blong gat Ista tradisen long sosaeti blong yumi fulwan, speseli insaed long famli blong yumiwan.” Long sot toktok, oli leftemap tingting blong yumi blong muv long wan hae mo tabu wei blong selebretem Ista.

Mi laekem ol revelesen we oli stap gohed blong kam abaot Ista mo mi glad long plante hadwok we yufala i mekem blong mekem Ista i kam wan tabu mo spesel taem. Blong ademap wetem wan aoa sakramen miting long Ista Sandei, ol narafala eksampol blong ol klin aktiviti we i tekem tugeta wod mo ol stek divosen mo ol aktiviti long Pam Sandei olsem long taem blong Tabu Wik. Ol tingting ia i tekem tu ol aktiviti wetem ol pikinini mo ol yut, mo plante taem i karem ol man blong defren fet i kam tugeta blong singsing kwaea. Ol narawan oli holem ol open haos blong “Kraes We I Stap Laef” blong ol memba mo fren mo oli bin tekpat long ol selebresen blong Ista we i tekem ol defren relijin blong komuniti.

Ol kaen aktiviti ia oli semmak long ol pipol long taon blong Jerusalem we oli joenem ol voes blong olgeta blong presem Sevya long viktri wokbaot blong Hem. I semmak gud long ol ripot blong ansa blong yufala i go long invitesen blong Fas Presidensi blong wosip long hom olsem famli blong tingbaot mo soem respek long bigfala mo impoten holidei ia.

Mi biliv se famli wosip long taem blong Ista i stap kam antap bigwan. Tu yia i pas, mi bin tokbaot strong tingting we famli blong mifala i bin gat blong mekem fasin blong ona long Ista i kam moa antap. I tru, hemia i wan wok we i gohed yet. Oltaem mifala i glad blong kakae wan spesel Ista Kaekae, Ol Ista basket, mo wan gem blong lukaotem Ista eg, mo mifala i gohed blong mekem hemia. Be, blong stap ademap wan lukluk long saed blong spirit we i lukluk nomo long Jisas Kraes mo Atonmen blong Hem long selebresen blong mifala, i karem wan swit balens blong givim ona long bigfala tabu selebresen ia.

Long yia ia bae hem i nambatri taem we mifala i mekem Kraes i stamba blong Ista blong mifala. Olsem Krismes stori, pleiplei blong famli blong mifala long Ista dei ia i tekem tu ol simpol klos we mifala i werem, ridim ol skripja blong Niu Testeman mo Buk blong Momon, miusik, ol Ista pikja, ol lif blong Pam tri, mo mo blong talem tru i bin gat smol toti. Ol pikinini mo apu pikinini oli stap ridim mo talem baehat ol pres blong Pam Sandei “Hosana … Blesem hem we bae i kam long nem blong Lod; Olgeta long heven oli presem nem blong yu” mo, “Hemia hem i Jisas blong Galili” i semmak olsem “Pis long wol, gud wok blong man” hemia long Krismas taem.

Yumi glad naoia long wan miks blong ol dekoresen. Wanem i bin wan taem ol rabet mo Ista eg naoia i go wetem Christus mo ol pikja blong emti tumb, Sevya we i laef bakegen i kamaot long garen aotsaed long tumb, mo kamaot blong Sevya long Ol Man blong Nifae. Yumi stap traehad tu blong no mekem Ista long wan dei nomo be blong wan sisen. Yumi stap traem blong andastanem moa, tingting, mo selebresen blong Pam Sandei mo Gud Fraedei mo ol tabu selebresen we oli tekem ples long Tabu wik ia.

Ista i letem yumi blong ona long tabu sakrifaes blong Jisas Kraes mo blong stap glad long Resureksen blong Hem. Hat blong yumi i hevi taem yumi stap tingbaot safaring blong Sevya long garen mo long Kalvari, be hat blong yumi i save glad taem yumi stap pikjarem emti tumb mo folem oda blong heven, “Hem i Laef bakegen!”

Toktok blong Fas Presidensi we i jes pas oli leftemap tingting blong yumi blong “stap wet wetem glad long Ista mo Resureksen blong Jisas Kraes—bigfala mo naesfala mesej we i go long ol man” we i poenemaot bigfala sisen ia. Nomata se hem i wan Kristin fasin we i stap kam antap long ol defren relijin blong luk Resureksen long semmak fasin, yumi talemaot doktrin blong yumi “Resureksen i minim se evriwan we oli bin laef bae oli laef bakegen long ded mo Resureksen i ril.” “Olgeta man we oli joen long Adam oli save ded, mo long [semmak] fasin, olgeta man we oli joen long Kraes oli save laef bakegen long ded.” Jisas Kraes i brekem ol rop blong ded blong evriman we oli stap laef.

I tru yumi sapraes long gladhat blong Jisas Kraes we i givim long yumi. Yumi akseptem ol toktok blong Hem we i se “i no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.”

C.S. Lewis i talem se “blong prijim Fasin blong Stap Olsem wan Kristin man i minim [long ol Aposol] se Resureksen i stamba toktok blong prijim. … Long buk blong Ol wok i talem se Resureksen i wan stamba toktok blong evri tijing blong ol Kristin man. Resureksen, mo ol ansa blong hem, oli ‘gospel’ o gud nius we i kam long ol Kristin man.”

Mi talemaot se “i gat wan laef bakegen long ded, from hemia nao gref i no win, mo harem nogud blong ded i lus long Kraes.”

Blong endem, mi testifae se evriwan we oli akseptem ol invitesen blong profet blong yumi we i stap laef mo ol kaonsela blong hem blong tingbaot mo givim ona long tabu selebresen se wanem nao Ista i ripresentem mo bae oli faenem rilesensip blong olgeta long Jisas Kraes i gro i kam moa strong.

Long ol dei we i bin pas, mi bin lanem abaot wan apu woman we i talem stori blong Ista long smol 4 yia pupu boe blong hem, taem i yusum ol simpol pleiplei blong tumb, ston we i kavremap tumb, Jisas, Meri, ol disaepol mo enjel. Smol boe ia i bin wajem mo lisin gud taem apu woman blong hem i serem abaot taem oli berem, oli stap klosem mo openem tumb, mo wanem we i hapen long garen long taem blong Resureksen. Afta wetem sapraes hem i ripitim gud stori ia long papa mo mama blong hem taem hem i muvum ol pleiplei ia folem wanem hem i save. Afta long swit taem ia, oli bin askem hem sapos hem i save from wanem yumi gat Ista. Smol boe ia i luk i go antap mo ansa long fasin blong wan smol pikinini mo talem “From Hem i laef bakegen.”

Mi ademap testemoni blong mi wetem hem—mo hemia blong yufala mo hemia blong ol enjel mo profet—se Hem i laef bakegen long ded mo we Hem i laef i stap, from hemia mi testifae, long nem blong Jisas Kraes, amen.