2025
Gat Tras long Fored blong God
Mei 2025
11:59

Gat Tras long Fored blong God

I Kam long Presiden Russell M. Nelson

Presiden blong Jos Ia blong Jisas Kraes blong Ol Lata-dei Sent

Taem yumi traehad blong gat bigfala lav mo klin fasin long ol laef blong yumi, tras blong yumi blong kam kolosap long God bae i kam antap.

Ol dia brata mo sista, Mi glad tumas blong toktok long yufala tedei long impoten jeneral konfrens ia. Ae blong mi i gohed blong stap go olfala. Tangkyu from andastaning blong yufala taem mi stap givim mesej blong mi.

Yumi laef long wan taem we i gat bigfala paoa insaed long Jos Ia blong Jisas Kraes blong Ol Lata-dei Sent. Mi mi fulap wetem glad taem mi luk plante samting i stap kam antap.

Mi kasem insperesen speseli tru long ol yut blong yumi. Oli stap kam plante blong givim seves. Oli stap lukaotem ol bubu blong olgeta we oli ded finis mo mekem ol odinens blong olgeta long tempol. Ol yang man mo yang woman blong yumi oli stap putum ol aplikesen pepa blong olgeta blong misinari wok we namba blong olgeta i bigwan. Jeneresen ia we i stap kam antap oli stap ansa long koling ia blong stap strong blong Jisas Kraes.

Presiden Nelson wetem smol apugel blong hem

I no longtaem mi mitim wan niufala smol apugel we i jes bon. Taem mi stap lukluk long ol jalenj we bae hem i go tru long laef blong hem, mi filim wan strong tingting long hat blong help bildim fet blong hem long Jisas Kraes. Stap laef folem gospel i wanem we hem i nidim blong stap glad long fiuja.

Olsem yumi, hem tu bae i go tru ol jalenj. Yumi evriwan bae i gat eksperiens blong sik, harem nogud, temtesen, mo ded. Ol jalenj ia i save mekem yumi lusum tras long yumiwan. Be, ol disaepol blong Jisas Kraes, oli save kasem wan defren kaen tras bakegen.

Taem yumi mekem mo kipim ol kavenan wetem God, yumi save gat tras se i kam long Spirit. Lod i bin talem long Profet Josef Smit se tras blong yumi i save “gro i kam strong long fored blong God.” !Tingbaot filing blong kamfot, we i blong gat tras long fored blong God!

Taem mi tokbaot tras long fored blong God, mi stap minim blong gat tras taem yu stap kam kolosap long God naoia! Mi stap minim blong stap prea wetem tras ia se Papa long Heven i stap harem yumi, mo we Hem i andastanem ol nid blong yumi, moa bitim we yumi andastanem. Mi stap minim blong gat tras se Hem i lavem yumi moa bitim we yumi save andastanem, mo we Hem i stap sendem ol enjel blong stap wetem yumi mo olgeta we yumi lavem. Mi stap minim blong gat tras se Hem i wantem tumas blong helpem wanwan long yumi blong kasem ples we yumi wantem kasem.

?Olsem wanem nao yumi kasem kaen tras ia? Lod i ansarem kwestin ia wetem ol toktok ia: “Yu mas letem ol insaed long yu i fulap long bigfala lav i go long ol man, … mo yu mas letem klin fasin i flasem ol tingting blong yu oltaem; afta nao, tras blong yu bae i gro i kam strong long fored blong God.”

!Hemia nao ki! Long toktok blong Lod Hemwan, bigfala lav mo klin fasin i openem rod blong gat tras long fored blong God! !Ol brata mo sista, yumi save mekem hemia! !Tras blong yumi bae i save gro i kam strong long fored blong God, naoia nomo!

Tingting long bigfala lav mo klin fasin.

Faswan, bigfala lav. Tu yia i pas, mi bin singaotem yumi, olsem ol kavenan pipol we i folem Jisas Kraes, blong stap ol man blong putum pis. Bae mi ripitim wanem we mi bin talem long taem ia: “Fasin blong kros i neva save win. Fasin blong no akseptem wan tingting i no save mekem wan i kam moa gud. Fasin blong raorao i neva givim wan gud ansa wetem insperesen.”

!Fasin blong gat tru mo bigfala lav long evri man i fasin ia nao blong wan man we i putum pis! Hem i impoten se yumi stap kaen taem yumi toktok long o abaot ol narafala man, tugeta long pablik o praevet. Mi talem tangkyu long yufala we i bin folem kaonsel blong mi wetem ful hat blong yu. Be, yumi save mekem gud moa.

Fasin blong no akseptem wan tingting long pablik toktok mo long sosol media i stap kam bigwan. Ol rabis toktok oli ol tul we i save kilim man. Fasin blong raorao i stopem Tabu Spirit blong stap olsem wan kompanion oltaem.

Olsem ol man blong Jisas Kraes, yumi mas soem eksampol olsem ol man blong putum pis. Taem bigfala lav i kam pat blong laef blong yumi, bae yumi lusum paoa blong putumdaon ol narafala man. Bae yumi stop blong jajem ol narafala man. Bae yumi gat bigfala lav long evri man raon long yumi. Yumi nidim blong gat bigfala lav long evri man blong mekem se yumi save gro. Bigfala lav i fandesen blong ol gudfala fasin.

Bae yumi askem strong long Papa blong yumi long Heven blong fulumap ol hat blong yumi wetem bigfala lav—speseli olgeta we i had blong givim lav long olgeta—from bigfala lav i wan presen we i kam long Papa long Heven long olgeta we oli ol man blong Jisas Kraes. Sevya i Prins ia blong Pis. Yumi mas stap olsem ol tul blong Hem blong putum pis.

Ale, naoia bae yumi tokbaot klin fasin. Lod i talem long yumi blong flasem ol tingting blong yumi oltaem wetem klin fasin. Tingbaot hamas nao bae yumi kam antap long hem sapos yumi gat eni gud tingting, taem yu gohed blong gat klin fasin. Klin fasin i mekem evri samting i kam moa gud mo moa hapi! Long narasaed, tingbaot wanem bae i hapen taem yumi putum moa klin fasin long wan tingting we i no klin, wan had tingting, o wan tingting we i trabol. Klin Fasin bae i ronemaot ol tingting ia . Klin Fasin bae i mekem yumi fri aot long ol tingting we i fulap long wari mo trabol.

Ol brata mo sista, taem we wol i stap gro moa i kam moa nogud, yumi nidim blong gro i kam klin gud. Yumi mas gat klin fasin tru long ol tingting, ol toktok, mo ol aksen blong yumi, mo i fulmap olgeta wetem lav blong Kraes we i klin gud we Hem i gat long evri man. Bigfala janis we i stap long fored blong yumi i blong kam ol pipol we God i wantem yumi blong kam olsem.

Taem yumi wosip oltaem long haos, blong Lod i mekem yumi gat moa klin fasin mo moa lav. I mekem se, taem we yumi spendem long tempol i mekem tras blong yumi long fored blong Lod i kam moa bigwan. Spendem moa taem long tempol, bae i helpem yumi rere from Seken Kaming blong Sevya blong yumi, Jisas Kraes. Yumi no save dei o aoa we bae Hem i kam long hem. Be mi save se Lod i pusum mi blong talem strong long yumi blong rere from “bigfala dei we man bae i fraet long hem.”

Taem yumi traehad blong gat bigfala lav mo klin fasin long ol laef blong yumi, tras blong yumi blong kam kolosap long God bae i kam antap. Mi invaetem yu blong tekem ol impoten step blong bildimap tras blong yu long fored blong Lod. Afta, taem yumi go long Papa blong yumi long Heven wetem moa tras, bae yumi glad moa, mo fet blong yumi long Jisas Kraes bae i kam antap. Bae yumi stat blong eksperiensem paoa ia long saed blong spirit we bae i bitim bigfala ol hop we yumi gat.

Yumi talem tangkyu long Lod from fasin ia blong bildim kwik plante tempol long ol yia we i jes pas. Anda long daereksen blong Hem, tedei yumi mekem anaonsmen long ol plan blong bildim wan tempol long ol 15 ples ia:

  • Reynosa, Mexico

  • Chorrillos, Peru

  • Rivera. Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Yuma, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Mi testifae se Jisas Kraes, Ridima blong Isrel i stap lidim Jos ia, Jos blong Hem. Hem i stap rere blong kambak bakegen. Bae yumi tu yumi rere long Hem. From hemia, mi prea, long nem blong Jisas Kraes, amen.

Ol Not

  1. Smol ston we profet Daniel i bin luk long drim blong hem blong ol las dei ia i rol i go long evri ples, kasem taem i fulumap ful wol (luk long Daniel 2:31–45; Doktrin mo Ol Kavenan 65:2).

  2. Doktrin mo Ol Kavenan 121:45.

  3. “Mo bambae mi go fastaem long yufala. Bambae mi stap long raet han blong yufala, mo long lef blong yufala,mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala” (Doktrin mo Ol Kavenan 84:88).

  4. Doktrin mo Ol Kavenan 121:45;oli ademap italik; luk tu long ves 46.

  5. Russell M. Nelson, “I Nidim Ol Man blong Putum Pis,” Liahona, Mei 2023, 98.

  6. Jusum blong stap agensem ol narafala man i olsem yu jusum blong no laef folem givhan blong Tabu Spirit.

  7. Yumi mas gat bigfala lav “i go long ol man, mo long haos we i gat fet” (Doktrin mo Ol Kavenan 121:45).

  8. Hemia i minim blong prea “wetem evri paoa blong hat” (Moronae 7:48).

  9. Luk long Moronae 7:48.

  10. Luk long Aesea 9:6.

  11. Olsem Josef Smit i tijim se, sapos [yumi] wantem blong go long ples we God i stap long hem, [yumi] mas kam olsem God o gat ol prinsipol we God i gat” (Teachings of Presidents of the Church: Joseph Smith [2007], 72). Semmak, Aposol Paul i komandem yumi blong “kam long fes blong God we hem i stap givhan long yumi long gladhat blong hem, nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol” (Hibrus 4:16).

  12. Luk long Matiu 24:36–37.

  13. Malakae 4:5; luk tu long Sefanaea 1:14–18.

  14. Lod i talem long yumi blong “tingbaot blong gat fet, klin fasin, save, fasin blong kontrolem yufalawan, fasin blong save wet longtaem, kaen fasin long brata blong yufala, fasin olsem hemia blong God, bigfala hat, fasin blong gat tingting i stap daon, mo fasin blong wok strong wetem strong tingting” (Doktrin mo Ol Kavenan 4:6). Taem yumi mekem olsem, tras blong yumi bae i kam antap, mo afta, long toktok blong Hemwan, taem yumi askem, bae yumi kasem. mo sapos yumi noknok, bambae i open long yumi. (Luk long Doktrin mo Ol Kavenan 4:7.)

  15. Bae yumi save gat eksperiens long wanem ol pipol blong King Benjamin i bin mekem: “Oli bin fulap long glad, from oli bin kam klin aot long ol sin blong olgeta, mo oli bin kasem pis long tingting from bigfala fet we oli bin gat long Jisas Kraes” (Mosaea 4:3).