Elda Ozani Farias

Blong stap prea abaot ol desisen long saed blong ol jalenj i bin wan strong fandesen blong Elda Ozani Farias taem hem i yangfala nomo. Elda Farias i bin prea afta we hem i bin mitim ol misinari taem hem i gat 15 yia. Hem i bin prea abaot wan fultaem misin, edukesen, mared, mo ol janis blong wok.

Mo iven taem ol samting oli no klia long hem, hem i save wanem hem i mas mekem.

“Oltaem God i kam faswan,” hem i talem. “Wok blong Hem faswan. Mifala i bin luk ol blesing blong stap mekem olsem.”

Blong stap folem voes blong Tabu Spirit, i neva lidim hem mo waef blong hem i go rong, hem i talem. “Mi bin lanem paoa blong revelesen blong yuwan. God i stap toktok long ol pikinini blong Hem. Mo God i gat wan plan blong yumi.”

Ozani Barboza Marques Farias i bon i kam long wol long Recife, Brazil, long 19 Oktoba, 1969. Papa mo mama blong hem i, José Osanã Farias mo Severina Barbosa Marques. Hem mo waef blong hem, Giovanna de Medeiros Prata Farias, tufala i mared mo sil long Sao Pauloa Brasil Tempol long 18 Jenuware, 1994. Tufala i gat tri pikinini.

Elda Farias i winim wan digri long akaonting long Catholic University of Pernambuco, mo wan pos graduet digri long faenens long University of Pernambuco, mo tu wan masta digri blong bisnis administresen long Getulio Vargas Foundation. Hem i bin wok blong Jos long ol defren posisen we i tekem tu, faenens maneja, yuman risos maneja, mo i no longtaem i pas, daerekta blong temporol afea blong Brasil Eria.

Elda Farias i stap givim seves naoia olsem misin presiden blong Georgia Atlanta Misin. Hem i bin stap givim seves tu olsem wan kaonsela long stek presidensi, stek klak, hae kaonsela, bisop, kaonsela long bisoprik, mo Praemeri tija.