Stap Tru long Fet We Ol Paren blong Yumi Oli Holemtaet

Taem mi stap visitim Nasvil Tenesi Tempol blong wan tempol riviu, mi gat janis ia blong mekem wan tua olsem pat blong asaenmen ia, blong lukluk long naesfala haos ia blong Lod. Mi laekem tumas peinting blong Mary Wanlass we oli singaotem Carry On [Gohed Nomo] we i hang long ofis blong matron.

Hemia i stori biaen long peinting ia:

“Long 1862 long Misuri, Mary Wanlass we i gat 14 yia i mekem wan promes long step mama blong hem se bae hem i mekem evri wei posibol blong helpem papa blong hem wetem disabiliti [mo fo long ol smol brata mo sista blong hem oli kasem] Vale blong Bigfala Sol Lek. Mary i draevem bul mo skwisim melek blong kao we i pulum kat we papa [blong hem i stap silip long hem, mo] i lukaot long ol smol brata mo sista blong hem. Evri dei afta long wokbaot blong olgeta, hem bae i go lukaotem ol plan, ol flaoa, mo ol beri we oli save kakae blong fidim famli blong hem long hem. Kampas blong hem i instraksen we hem i kasem blong gohed blong travel i go long wes kasem taem we oli kam kasem ol maonten.

Oli kasem Yuta Vale long Septemba, oli travel ful spring mo ful sama. I no longtaem afta we famli blong hem i stap gud long Yuta Kaonti papa blong hem i ded, afta Mary i mared mo i lukaotem famli blong [hemwan].”

Naesfala stori ia blong fet mo paoa long tingting blong wan yang woman we i gat 14 yia i save helpem wanwan long yumi blong “stap gohed nomo.”

“Stap gohed nomo,” o olsem we oli transletem long mama lanwis blong mi Dutch , Gewoon Doorgaan—hemia i stamba toktok blong mama mo papa blong mi blong longtaem.

Ol paren blong mi mo ol balika blong mi oli ol paeonia long famli blong mifala. Olgeta oli gat “ol jalenj” blong olgetawan, olsem olgeta we oli stap kam insaed long Jos evri dei, long yad blong Lod. Ol stori blong olgeta i no semmak long ol bigfala buluk mo ol kat be i gat semmak paoa long ol fiuja jeneresen.

Oli lavem gospel mo oli kasem baptaes long yang adalt yia blong olgeta. Tugeta paren blong mi oli gat wan hadtaem taem oli stap groap i kam antap. Papa blong mi i groap long aelan blong Java Indonesia. Long taem blong Wol Wo 2 oli fosem hem blong i seperet long famli blong hem mo oli putum hem long wan kalabus, we hem i fesem plante hadtaem long yang taem blong hem.

Mama blong mi i bin groap long wan hom we i no stap gud mo hem i safa from hanggri mo plante hadtaem blong Wol Wo 2. Samtaem hem i iven go kakae ol stamba blong tulip [flaoa]. From ol aksen blong papa blong hem, mo afta we i divos wetem mama blong hem, i mekem samtaem i had blong hem i luk Papa long Heven olsem wan Papa we i gat lav.

Papa mo mama blong mi tufala i mit long wan Jos aktiviti mo sot taem afta, tufala i disaed blong mared mo sil insaed long Bern Switzerlan Tempol. Taem oli stap wet long tren stesen, afta we oli spenem evri seving we oli gat blong tempol trip ia, oli stap tingting se hao nao bae oli save mekem afta long mared be oli tingting strong se bae evri samting i oraet. !Mo i bin hapen!

Oli statem blong resemap famli blong olgeta long wan smol singgel rum antap long wan apatmen long medel blong Amsterdam. Sam yia afta we oli stap wasem ol klos blong olgeta long han, naoia nao oli sevem inaf mane blong pem wan wasing masin. Bifo oli go pem, bisop i visitim olgeta, mo askem wan kontribusen blong bildim wan miting haos long Amsterdam. Olgeta i disaed blong givim evri mane we oli sevem blong pem wasing masin, mo gohed blong wasem ol klos long han.

Olsem wan famli mifala i go tru long ol hadtaem olsem nara famli nomo. Ol samting ia i mekem mifala i strong moa mo i mekem fet blong mifala long Lod Jisas Kraes i kam moa strong, olsem we Alma i bin serem stori blong hem wetem pikinini boe blong hem Hileman,taem oli stap fesem ol defren kaen hadtaem from hem i putum tras blong hem long Lod Jisas Kraes.

?Olsem wanem nao tu pipol we i eksperiens long plante hadtaem long yang taem blong olgeta oli kam ol gud paren we mi wantem tumas blong gat? Ansa i simpol:!tufala i lavem gospel mo oli laef folem ol kavenan blong olgeta kasem tedei!

Afta long moa long 65 yia blong mared, mama blong mi, i safa long sik blong foget, mo i ded long Febwari. Long taem ia papa blong mi we i gat 92 yia mo i stap laef yet long haos, i visitim hem oltaem long nesing hom kasem taem we hem i lusum laef blong hem. Sam taem i pas, hem i talem long ol smol brata mo sista blong mi ol rabis eksperiens blong hem long kalabus long Indonesia long taem blong Wol Wo 2, we i mekem hem i rere blong lukaotem gud waef blong hem blong plante yia long taem we hem i sik mo bodi blong hem i stap kam nogud from rabis sik ia go kasem dei we hem i letem ol narawan i lukaotem hem mo hem i nomo save stap long saed blong hem. Stamba tingting blong tufala oltaem i blong “Stap gohed nomo,” gat wan strong bilif long Kraes blong Hem i leftemap olgeta long las dei blong stap wetem Hem long glori blong oltaem.

Fet mo ol testemoni blong tufala oli ol strong tingting we oli givim paoa long plante jeneresen we i stap kam.

Long vilej we waef blong mi i groap long hem, papa mo mama blong hem, oli ol gudfala pipol blong stap go long jos olsem wan yang mared kapol wetem waef blong mi olsem pikinini gel blong tufala we i gat tu yia mo wan pikinini ia nomo long taem ia. Desisen blong tufala blong kam olsem ol memba blong Jos Ia blong Jisas Kraes blong Ol Lata-Dei Sent i mekem wan bigfala jenis long laef blong olgeta taem ol man blong vilej mo famli blong olgeta oli tok agensem olgeta. I tekem plante yia, ol naes leta i go long ol famli memba, mo seves i go long komuniti bifo oli kam blong akseptem olgeta.

Long wan taem papa blong waef blong mi long taem ia i stap givim seves olsem wan bisop, mo oli giaman se hem i mekem wan samting i no stret mo long stret taem ia nomo oli rilisim hem. Bubu woman blong mi i harem nogud tumas mo i askem hasban blong hem sapos bae oli gohed blong go long jos. Hem i ansa mo talem se yes bae oli gohed blong go long jos from hem i no jos blong man, be hemia i Jos blong Jisas Kraes.

I bin tekem sam taem bifo trutok i kamaot mo oli bin talem sore. Wanem we bae i save kam olsem poen we bae oli save givap long hem, i bin ademap paoa mo bilif blong olgeta.

?From wanem sam long yumi oli no luksave fet mo ol testemoni blong ol paren blong yumi we oli gotru long hadtaem long ful laef blong olgeta be oli gohed blong stanap strong? ?Yumi ting se oli nogat wan klia save long ol samting? !Oli gat save mo oli no lusum rod! Oli gat tumas eksperiens nomo wetem Spirit mo oli save talem wetem Profet Josef “mi save hemia, mo mi no save talem se i no tru.”

?Yu laekem singsing ia abaot ol ami blong Hileman, we oli faenem insaed long Children’s Songbook?

I no mata we hem i no semmak, olsem we mama blong mi i gat eksperiens long hem olsem wan pikinini, yu save kam olsem wan long ol “gudfala papa mo mama we i lavem Lod” mo soem wan gud eksampol long ol narafalawan.

?Yumi filim hemia i tru taem yumi singsing long hem? ?Yu filim se yu yu “olsem ami blong Hileman” mo bae yu “kam olsem ol misinari blong serem gospel long wol”? Mi bin filim hemia plante taem, taem mi stap singsing long singsing ia long taem blong BYS mo ol narafala kam tugeta blong ol yut.

?O olsem wanem nao yu filim taem yumi singsing long hym ia “Stap tru long Fet?

I go long jeneresen we i stap kam antap wea ples yu stap long hem mo wanem situesen yu stap long hem, plis lanem mo kasem strong paoa long fet mo ol testemoni blong olgeta we oli kam bifo yu. Bae hem i helpem yu andastanem se blong kasem o mekem wan testemoni i gro, i nidim blong mekem ol sakrifaes mo “ol sakrifaes we i karem ol blesing blong heven.”

Tingbaot wan sakrifaes we bae blesem laef blong yu, plis tingting long hemia mo prea from invitesen we profet blong yumi we yumi lavem, Presiden Nelson taem hem i askem, “evri yang man, we i klin inaf mo i save mekem, blong hem i rere from mo givim seves long wan misin. Long ol Lata-dei Sent yang man, misinari seves i wan prishud responsabiliti. …

Long … ol yang sista we i save mekem, wan misin i wan strong janis, be, i no wan mas.,be i wan janis

Oli save singaotem yu olsem wan seves o wan tijing misinari. Tufala kaen misinari ia oli gat pat long semmak gol ia blong karem ol sol i kam long Kraes, wanwan long olgeta i gat wei mo paoa long hemwan.

Long tufala kaen seves ia, bae yu soem long Lod se yu lavem Hem, mo se yu wantem blong kam blong save Hem moa gud. Tingbaot, “?From olsem wanem nao wan man i save wan masta we hem i no bin wok blong hem, mo we i wan man we hem i no save mo i longwe long ol tingting mo ol plan blong hat blong hem?”

Yumi evriwan, i no mata se yu yu fas o namba faef jeneresen blong gospel, askem yuwan ?Wanem ol stori blong fet, paoa, mo selestial komitmen bae mi pasem i go long nekis jeneresen?

Letem yumi i gohed long ol traehad blong yumi blong kam blong save moa gud Sevya blong yumi, Jisas Kraes, mo mekem Hem i stap long medel blong ol laef blong yumi. Hem i ston ia we yumi mas bild long hem mekem se taem we ol hadtaem i kam, yumi save stanap strong.

Letem yumi stap “tru long fet we ol paren blong yumi oli holemtaet, tru long trutok we oli kilim man from, long komanmen blong God, sol, hat, mo han, fetful mo tru bae yumi stanap oltaem.” Long nem blong Jisas Kraes, amen.