Lukaot long Nambatu Temtesen

Sam yia i pas, taem mi kasem 12 yia blong mi, oli bin invaetem mi blong atendem fas Aronik Prishud kworom kamp naet blong mi. Hemia i bin wan invitesen we mi bin stap wet from longtaem i kam, taem papa i bin stap wan kworom lida, oltaem i stap go long kamp wetem ol boe blong wod mo mi bae mi stap long haos.

Taem we dei ia i kam, mi bin glad tumas. Mo mi mas admitim se mi rili wantem blong stap insaed long grup blong ol bigfala boe. Mi gat strong tingting ia blong pruvum miwan. Wetem tingting ia, i no longtaem nating mi go tru wan tes blong luk sapos mi save gohed blong pleiplei mo stap pat long grup.

Wok we oli givim long mi i blong karem ki blong trak blong papa blong mi blong plei wan trik long ol lida. Mi no save wanem stret mi talem long papa blong mi blong winim tingting blong hem, be mi ron i go long grup blong ol boe wetem ol ki long han blong mi, mi praod long wanem mi mekem.

Afta wan nara asaenmen i kam. Blong mi openem doa blong trak mo putum wan stik bitwin jea blong draeva mo pipip blong trak. Mo mi mas lokem doa blong mekem se pipip bae i on go kasem naet mo bae i no gat wan wei blong ol lida blong fiksim smol problem ia.

Nao long ples ia nao stori ia i mekem mi sem mo harem nogud. Taem mi putum stik long ples blong hem, mi lokem doa mo mi ron kwik blong go haed long wan smol bus we i stap kolosap. Taem mi sidaon i go daon long graon, mi filim wan soa we i strong tumas. Long tudak ia mo from we mi hariap tumas, mi sidaon long ol nidel blong kaktes.

Mi singaot strong from mi harem i soa, be from noes blong pipip mekem se oli no save harem mi, mi nomo save mekem wan nara samting, mi wokbaot nogud mo sloslo nomo gobak long trak, mo talemaot ol sin blong mi, mo wetem filing blong sem mo olsem wan smol pikinini mi askem wan medikol tritmen.

Long haf blong naet ia, mi bin ledaon long bel blong mi insaed long tenet taem papa blong mi i stap pulumaot ol nidel blong kaktes long … yes, bae mi talem nomo se mi no bin sidaon gud samfala dei afta long hemia.

Mi stap luklukbak long eksperiens ia plante taem. Naoia mi save stap laf long krangke blong mi olsem wan yut, taem mi kam blong luksave sam long ol besik prinsipol ia.

Plante fasin we evriwan long wol oli folem hem i fasin blong man blong wol—wantem blong stap pat blong wan grup, wantem blong pruvum hemwan, fraet blong no stap pat, mo strong tingting blong haed from ol risal blong ol fasin ia. Hem i lasfala fasin ia nao we mi wantem blong tokbaot tudei—stap haed afta we yumi mekem wan samting we yumi no nid blong mekem.

Nao, mi no mekem plei blong mi i luk semmak long wan bigfala sin, be yumi save lanem semmak lesen aot long storian ia we i save helpem yumi long laef ia.

Long Garen blong Iden, Adam mo Iv tufala i stap long wan taem we i naes tumas—i fulap long kaekae, garen ia i naes tumas —garen ia i no naes nomo be wan garen we i no gat gras nil o kaktes long hem.

Be yumi save tu se, garen ia i holemtaet tufala blong no save gro. Garen ia i no hom blong tufala be hem i wan tes, faswan long plante we bae i pruvum, mekem rere, mo mekem olgeta i gro kasem ples we oli nid blong gobak, ples we Papa mo Pikinini i stap long hem.

Bae yu tingbaot se i gat fasin blong go agens insaed long garen. Oli letem Lusifa blong traem Adam mo Iv. Hem i temtem Adam faswan blong kakae long frut ia blong tri blong save gud mo nogud. From Adam i tingbaot komanmen blong no kakae long frut ia, hem i no wantem kakae. Mo afta Iv i kam mo i jusum blong kakae long frut ia, mo winim tingting blong Adam blong kakae tu.

Afta long hemia, Adam mo Iv i bin talemaot se wanem tufala i bin jusum blong mekem i mekem plan blong Papa i kam tru. Be taem oli kakae long frut, oli brekem loa—wan loa we Papa i givim i kam stret long tufala. From ansa blong brekem loa i mekem tufala i kam blong save gud mo nogud i mas wan harem nogud we i soa bigwan taem tufala i harem voes blong Papa i stap talem blong Hem i kambak long garen. Tufala i luksave se tufala i neked, from se oli bin stap olsem ia nao oli no save se oli no bin werem klos. Long taem ia, tufala i maet harem nogud moa from fasin blong brekem loa bitim we tufala i luksave save se tufala i no werem klos. Tufala i no save difendem tufala mo bae tufala i mas aot long garen ia. Long toktok ia neked i minim se oli nomo gat wan samting nating.

From Lusifa i save se oli stap long klia ples mo we oli no strong, i temtem olgeta bakegen—be naoia blong tufala i haed long God.

Bae mi singaotem temtesen ia—“nambatu temtesen,”—i wan temtesen we sapos yumi foldaon long hem risal blong hem bae i bigwan tumas. I tru,gudfala joes i blong no foldaon long evri fas temtesen, brekem loa blong God, be yumi save bae yumi evriwan bae i foldaon long plante defren fas temtesen long wol ia. Taem yumi stap gro kam moa olfala mo gat moa save, yumi hop se paoa blong yumi blong no foldaon long ol fas temtesen bae i gohed blong kam moa gud taem yumi stap traehad blong kam moa olsem Sevya blong yumi, Jisas Kraes.

Samfala bae oli wantem blong haed long God from se oli no wantem blong oli faenem olgeta o kamaot long klia ples, mo oli filim sem mo gilti. Nomata long hemia, plante skripja oli tijim yumi se yumi no save haed long God. Bae mi serem samfala nomo,

Lod i tijim Jeremaea tru long ol kwestin ia: “I no gat man i save haed, we mi mi no save luk hem. Yufala i mas save se long olgeta ples long heven mo long wol ya, be mi mi stap long hem.”

Mo Job i bin tijim:

“Hem i stap wajem ol man long evri ples we oli pas long hem.

“There is no darkness, nor shadow of death, where the workers of iniquity may hide themselves.”

Long toktok blong ol sam, David i talem:

“Hae God. Yu yu lukluk gud long mi finis, mo yu savegud mi.

“Yu yu save evri samting we mi stap mekem. Yu stap longwe, be yu save olgeta tingting blong mi.

“Nating we mi no tok yet, be yu yu save finis ol samting ya we bambae mi talem. …

“?Weples bambae mi save go haed long hem blong yu no luk mi?

“Sipos mi go long heven, be yu yu stap long ples ya, bambae yu luk mi, mo sipos mi go ledaon long Hom* blong ol Dedman, be yu yu stap long ples ya tu, bambae yu faenem mi.”

Ol Niu Konvet

Blong olgeta we oli jes stap joenem Jos Ia blong Jisas Kraes blong Ol Lata-dei Sent, nambatu temtesen i maet had lelebet long yu. Tru long baptaes blong yu, yu bin mekem kavenan blong tekem nem blong Jisas Kraes long yuwan, we blong plante long yufala i nidim blong jenisim laef stael. Blong jenisim laef stael blong wan i no isi. Oltaem i nidim yu blong jenisim ol fasin mo ol samting we yu stap praktisim mo ol asosiesen we yu pat long hem, blong yu save gro i go kasem Papa long Heven we i gat lav.

Enemi i save se yu save kasem ol trik blong hem we bae i sakem i kam long yu. Bae hem i mekem yu wantem blong gobak long olfala laef blong yu we long plante wei yu no glad long hem nating. Man blong agens, olsem we oli singaotem long buk blong Revelesen, bae i temtem yu wetem ol tingting we bae i saon olsem: “Yu yu no strong inaf blong jenisim laef blong yu; yu no save mekem hemia; yu no pat blong ol pipol ia; bae oli neva akseptem yu; yu slak tumas.”

Sapos yu we yu jes stap mekem kavenan mo stap harem ol kaen tingting olsem i stap kam long yu, mifala i talem long yu blong no harem voes blong man blong agens. Mifala i lavem yu; yu save mekem; mifala i akseptem yu; mo, wetem Sevya, bae yu gat paoa blong mekem evri samting ia. Long taem ia we yu nidim lav mo sapot blong mifala, yu no lisin long ol giaman tingting mo tingting se bae mifala i sakemaot yu sapos yu tekem wan step i go bak long olfala laef blong yu. Tru long paoa blong Atonmen blong Jisas Kraes we yumi no save komperem long eni samting, bae yu save kam gud bakegen. Be sapos yu haed long Hem mo go longwe long komuniti blong fet we yu jes stap faenem, yu stap kipim yu longwe long stret ples ia we i save givim paoa long yu blong winim man blong agens.

Wan dia fren blong mi wan niu konvet, i bin serem olsem wanem i faenem i had blong stanap long fet long ples we yu stanap yuwan. I gat bigfala paoa blong kam pat mo gohed blong stap pat blong wan komuniti we i sapotem—evriwan we oli stap mekem mistek be yet oli stap gohed blong gro tru long blesing blong lav blong Jisas Kraes.

Presiden Russell M. Nelson i bin tijim se “blong winim wol i no wan taem o samting we i tekem ples long wan dei o tu(2). Hemia i hapen truaot long laef, taem yumi stap ripitim blong laef folem doktrin blong Kraes. Yumi mekem fet blong yumi long Jisas Kraes i gro taem yumi sakem sin evri dei mo kipim ol kavenan we i kavremap yumi wetem paoa. Yumi stap long rod blong kavenan mo yumi kasem blesing blong paoa long saed blong spirit, revelesen blong yumiwan, fet we i gro i kam antap, mo givhan blong ol enjel.”

Sapos yu kasem wan kil long saed blong bodi, bae situesen blong yu i kam nogud mo i save tekemaot laef, sapos yu no go pas long dokta blong karem tritmen. Hemia i tru tu sapos yu kasem kil long saed blong spirit. Ol kil long saed blong spirit we oli no kasem tritmen, bae oli save stopem yu blong kasem laef we i no save finis. Yu no haed long olgeta we bae oli lavem mo sapotem yu; be yu ron i go long olgeta. Ol gudfala bisop, ol branj presiden, mo ol lida oli save helpem yu kasem hiling paoa blong Atonmen blong Jisas Kraes.

Long olgeta we oli maet stap haed, mifala i askem strong long yufala blong kambak. Yu nidim wanem we gospel mo Atonmen blong Jisas Kraes i givim, mo mifala i nidim wanem we yu givim. God i save ol sin blong yu, yu no save haed long Hem. Yu stretem yuwan wetem Hem.

Olsem Ol Sent blong Hem, wanwan long yumi i mas laef folem wan kalja, blong stap pat long Jos we hem i, lav, stap akseptem, mo leftemap tingting blong evriwan we i wantem blong wokbaot folem rod blong Hem.

!Lukaot long nambatu temtesen ia! Folem toktok blong ol profet blong bifo mo naoia mo save se yu no save haed long wan Papa we i gat lav.

Yu mekem yuwan rere blong kasem hiling paoa blong Atonmen blong Jisas Kraes. Hemia i stret stamba tingting blong yumi kam long laef ia—blong gat wan bodi we i no strong mo i save ded we i “save kasem evri kaen fasin blong no strong” mo i save foldaon long plante fasfala temtesen; blong mekem se yumi save gro, mo lukaotem help blong God afta we yumi foldaon, blong mekem se yumi save kam moa olsem Sevya blong yumi mo Papa blong yumi long Heven. Hemia hem i rod blong Hem. Hem i wan rod ia nomo. Long ol trutok ia mi testifae long nem blong Jisas Kraes, amen.