Elda Ronald M. Barcellos

Taem Elda Ronald M. Barcellos i gat 12 yia, hem i bin ridim Buk blong Momon blong fas taem. Taem hem i finis blong ridim, hem i go luk seminari tija blong hem long wod mo askem sapos hem i save stat blong kam long ol seminari klas.

“Mi stat blong go long seminari taem mi gat 12 kasem 18 yia blong mi from se mi laekem tumas blong go long hem mo stap lisin long ol stori blong Baebol mo Buk blong Momon,” hem i talem. “Mi bin oltaem filim lav from gospel ia, mo oltaem mi bin filim se hem i tru.”

Afta taem hem i bin go long misin, fet blong hem i bin kam moa strong, mo hem i promes blong oltaem hem i putum gospel i kam faswan long laef blong hem.

“Stap kolosap long [Papa long Heven], respektem ol kavenan blong yu mo bae ol plan we Hem i gat blong yu bae oli kam tru,” hem i talem.

Ronald Maldonado Barcellos i bon long São Paulo, Brazil, long 4 Novemba, 1975. Papa mo mama blong hem i Sérgio Barcellos Silveira mo Marcia Maldonado Barcellos Silveira. Hem i maredem Karin Spat Albino Barcellos Silveira long São Paulo Brasil Tempol long 4 Disemba, 1999. Tufala i papa mo mama blong tri pikinini.

Elda Barcellos i stadi bisnis administresen long São Marcos Yunivesiti long São Paulo. Long profesonol wok blong hem, hem i bin wok blong sam kampani long saed blong salem samting, ol posisen blong maketem ol samting mo olsem wan bisnis ona. Hem i bin setemap sam bisnis we i tekem tu GreenMile, LLC, taem hem i bin jif eksekutiv ofisa blong sam yia.

Elda Barcellos i bin finisim misim blong hem i no longtaem i pas olsem misin presiden blong Portugal Lisbon Misin. Hem i bin givim seves tu olsem wan kaonsela long stek presidensi, hae kaonsela, stek Yang Man presiden, bisop, kaonsela long bisoprik, grup lida blong ol hae pris, presiden blong kworom blong ol elda, mo seminari tija.