Elda Aaron T. Hall

Elda Aaron T. Hall i tingbaot taem we oli set apat long hem mo waef blong hem Kimberly, olsem ol misin lida blong Texas Houston South Misin. Tufala i talem long David A. Bednar blong Kworom blong Olgeta Twelef Aposol, se tufala i filim se i wan bigfala koling be long semmak taem tufala i glad tumas. Elda Bednar i talem se tufala i mas stap glad mo talem tangkyu.

“Wanem we hem i bin tijim long mitufala long dei ia, i neva kamaot long ol tingting blong mi taem mi kasem eni koling, mo toktok ia hem i, ‘Mifala i jes glad tumas nomo,’” hem i talem. “Yu stap askem yuwan se olsem wanem nao Lod i bin jusum yu, be mifala i witnes se Hem i jusum yu ia nao. Mo from se yumi wantem mo yumi save mekem, bae Hem i givim paoa long yumi blong mekem ol samting ia.”

Aaron Tracy Hall i bon i kam long wol long 4 Maj 1971, long Provo, Yuta, mo hem i pikinini blong Alan Eugene Hall mo Paula Jeanne Nowak Hall. Hem i bin givim seves long wan fultaem misin long Chile Osorno Misin, mo afta hem i bin maredem Kimberly Wade Hall long 28 Disemba, 1993 long Logan Yuta Tempol. Tufala i papa mo mama blong fo pikinini.

Long taem we hem i bin kasem koling blong hem, Elda Hall i stap givim seves olsem wan Eria Seventi long Yuta Eria. Hem i bin givim seves tu olsem wan kaonsela long stek presidensi, hae kaonsela, stek eksekutiv sekretari, bisop, presiden blong kworom blong ol elda, mo wod presiden blong Ol Yang Man.

Elda Hall i bin kasem wan digri long saed blong salem ol samting long Weber State Yunivesiti mo wan masta digri long saed blong bisnis administresen long Yunivesiti blong Yuta. Fastaem hem i bin wan eksekutiv blong sam teknoloji mo praevet bisnis, mo i no long taem i pas, hem i bin wok olsem wan daerekta insaed long Misinari Dipatmen blong Jos.