Yu Yu Mesaea Ya
(Matiu 16:16)
Yumi wantem ol pikinini blong yumi blong oli bilif long Jisas Kraes, blong akseptem Jisas Kraes mo kam pat blong Jos blong Hem tru long kavenan, mo traehad blong kam olsem Jisas Kraes.
Taem boe blong mitufala Eli i stap long klas 4, klas blong hem i setemap wan rolplei wok blong wan gavman mo ol studen long klas blong hem, oli bin jusum Eli blong givim seves olsem jaj blong klas. Wan dei, wan we i wok olsem man blong jaj blong Yuta Seken Distrik Kot, i visitim olgeta, hem i putum yunifom blong hem long Eli, mo afta i bin givim wan promes blong ofis long klas blong olgeta. Hemia i givim interes long yang sol blong Eli blong i stadi loa, mo Man Blong Loa Hemwan, Jisas Kraes.
Afta plante yia blong hadwok, Eli i bin kasem wan invitesen blong gat wan intaviu wetem wan long ol top loa skul we hem i laekem. Hem i talem, “Mama, oli bin askem 10 kwestin long mi. Las kwestin hem i, ‘Wea ples nao yu go blong kasem save long saed blong wanem we i gud mo nogud?’ Mi bin talem se truaot long histri ol man oli bilif mo folem eksampol blong wan man we oli laekem tumas. Man we mi stap traehad blong folem eksampol blong hem long laef blong mi, hem i Jisas Kraes. Mi bin talem se sapos evri man oli folem ol tijing blong Jisas Kraes long Tijing blong Hem antap long Hil, wol ia bae i kam wan gudfala ples we i gat moa pis.” Afta intaviu i finis, mo hem i tingting long hemwan, “Drim blong mi taem mi stap olsem pikinini, bae i no save kam tru. I no gat wan insaed long skul ia i wantem blong harem abaot Jisas Kraes.”
Tu wik afta, oli bin givim wan skolasip long Eli . Bifo skul i stat, mifala i bin visitim kampas ia. Skul blong loa ia, i olsem wan haos blong king mo i bin stap antap long wan hil we yu save lukluk i go long wan naesfala reva. Wetem sapraes, taem mifala i wokbaot i go tru long holwe blong wan naesfala laebri, mifala i luk ol flag mo ol tijing blong Jisas Kraes we oli raetem antap long ston.
I tru se Ol Tijing Blong Jisas Kraes long taem ia oli bin impoten tumas, . I no gat wan nara tijing i save helpem yumi andastanem moa gud fasin blong Jisas Kraes, ol tabu fasin blong Hem, mo stamba tingting blong yumi blong kam olsem Hem, bitim ol niufala tijing ia we Jisas Kraes i bin givim.
Fasin blong stap olsem wan disaepol blong Jisas Kraes blong ful laef i stat long ol hom blong yumi—mo long praemeri, stat long 18 manis olsem. Yumi wantem ol pikinini blong yumi blong oli biliv long Jisas Kraes, blong oli akseptem Jisas Kraes mo kam pat long Jos blong Hem tru long kavenan, mo traehad blong kam olsem Jisas Kraes.
Biliv long Jisas Kraes.
Nambawan, biliv long Jisas Kraes.
Afta long tijing blong bred blong laef, “plante long ol disaepol blong [Lod]” oli faenem i had blong akseptem ol tijing mo doktrin blong Hem, mo plante “oli gowe long hem, mo oli nomo biaen long hem bakegen. Afta Jisas i tanem Hem i go long Olgeta Twelef mo askem wan kwestin we i stikim hat: “?Yufala tu i wantem gowe long mi?”
Pita i ansa:
“Masta, ?Bambae mifala i save go long hu? Yu nomo yu gat ol tok blong laef ia we i no save finis.
“… Mifala i bilif finis long yu. Mifala i save finis we yu yu Tabu Man blong God.”
Olsem Pita i bin mekem i klia se, bilif hem i “blong gat fet long wan man o blong akseptem samting olsem we i tru.” Mo blong fet blong yumi, i tekem yumi i go long fasin blong sevem man, yumi mas mekem Jisas Kraes i stamba blong fet blong yumi. “Yumi soem fet long [Jisas] Kraes taem yumi gat wan strong tingting se Hem i laef, wan [andastaning] abaot [tru] fasin [mo wok] blong Hem, mo wan save se yumi stap traehad blong laef folem wanem we Hem i wantem.”
Profet blong yumi we yumi lavem tumas, Presiden Russell M. Nelson, i bin talem, “Fet long Jisas Kraes i fandesen blong evri bilif mo i wanem we i tekem tabu paoa i kam.”
?Olsem wanem nao yumi save helpem ol pikinini blong mekem bilif blong olgeta i kam strong moa long Jisas Kraes mo kasem tabu paoa blong Hem? Yumi no nid blong lukluk i go longwe bitim Sevya Hemwan.
“[Lod] i bin toktok long ol pipol, i talem:
“Luk, mi mi Jisas Kraes. …
“Girap mo Kam fored. …
“… Mo i bin hapen se grup blong ol pipol ia oli go fored, mo oli putum han blong olgeta insaed long saed blong hem, mo oli filim ol mak blong ol nil long ol han blong hem mo long ol leg blong hem; mo samting ia oli mekem, oli go fored wan afta narawan kasem taem we evriwan i go, mo oli luk wetem ol ae blong olgeta mo oli filim wetem ol han blong olgeta, mo oli save gud mo oli talemaot, se hem i Hem.”
Mi invaetem yufala blong tingting hevi long olsem wanem hemia i save aplae long laef blong ol smosmol pikinini. ?Olgeta oli stap harem ol testemoni blong Jisas Kraes mo gospel blong Hem? ?Olgeta oli stap luk wetem fasin blong respek, ol tabu pikja blong ministri blong Hem mo ol fasin blong Hem olsem hemia blong wan God? ?Olgeta oli filim mo luksave Tabu Spirit i stap testifae se Hem i laef, i tru mo i tabu? ?Olgeta oli save abaot mesej mo misin blong Hem?
Yu Yu blong Jisas Kraes mo Jos blong Hem
Nambatu, yu yu blong Jisas Kraes mo Jos blong Hem.
Ol pipol blong king Benjamin oli bin eksperiensem wan bigfala jenis blong hat mo tru long kavenan oli givim laef blong olgeta blong mekem tingting blong God. From kavenan we oli bin mekem wetem God mo Jisas Kraes, oli “singaotem [olgeta] ol pikinini blong Kraes, ol boe, mo gel blong Hem.” Olsem ol memba blong Jos Ia blong Jisas Kraes blong Ol Lata-dei Sent, yumi gat wan kavenan responsabiliti blong bildim kingdom blong Hem mo stap rere from taem we bae Hem i kambak.
?Olsem wanem nao yumi save helpem ol pikinini blong mekem mo kipim ol tabu kavenan? Long apendiks A mo B blong Kam Folem Mi lesen buk, yumi faenem ol wei blong statem wan storian mo ol lesen we i givim paoa long ol famli mo sapotem ol tija mo ol lida long tabu wok blong olgeta blong stap mekem rere ol pikinini blong ful laef blong olgeta blong stap long rod blong kavenan blong God.
Kam olsem Jisas Kraes
Nambatri, kam olsem Jisas Kraes.
Long Buk blong Momon, Sevya i bin givim woning long ol niu disaepol blong Hem, blong folem gud ol eksampol blong Hem olsem we i posibol: “?yufala i mas kam ol wanem kaen man? I tru mi talem long yufala, i olsem we mi stap.”
?Olsem wanem yumi save help blong baptaesem mo konfemem ol pikinini, blong oli mekem ol kavenan responsabiliti blong olgeta mo karem i kam tugeta olgetawan mo ol narawan oli kam long Jisas Kraes? Blong stap olsem wan disaepol blong ful laef yumi nidim blong “kam ol man blong mekem folem toktok, be i no ol man blong harem toktok nomo.”
Taem yu givim aot ol invitesen i go long ol smolsmol disaepol blong Lod, plis tekem evri janis blong lidim olgeta, gaedem olgeta, wokbaot long saed blong olgeta, mo helpem olgeta i faenem Rod ia. Toktok wetem ol naesfala smolsmol pikinini ia taem oli stap rere blong tij, testifae, prea, o givim seves blong mekem se oli gat strong tingting mo eksperiensem glad taem oli mekem ol responsabiliti blong olgeta. Lukaotem ol wei we i givim insperesen blong helpem olgeta blong kam blong save se hemia i Jos blong olgeta mo oli gat wan impoten wok blong stap rere from taem we bae Sevya i kambak.
Taem yumi mekem Jisas Kraes i faswan long laef blong yumi, wanem we yumi wantem, mo olsem wanem yumi wantem, bae i nomo semmak. !Fasin blong jenisim laef i jenisim evri samting! Hem i jenisim fasin blong yumi “mekem se yumi nomo wantem blong mekem nogud fasin, be blong gohed blong mekem gudfala fasin oltaem.” Hem i jenisim olsem wanem yumi spenem taem blong yumi, ol risos we yumi gat; wanem we yumi ridim, wajem, lisin long hem, mo serem. Mo iven i jenisim olsem wanem yumi ansa long ol impoten kwestin blong laef.
Yumi nid blong fulumap Laet blong Jisas Kraes long evri samting we yumi stap mekem long laef blong yumi. Sapos yumi no stap testifae long trutok ia se Hem i gat ol fasin we i olsem wan God long laef bifo laef long wol ia, tabu misin blong Hem, mo long Resureksen blong Hem we i mekem i posibol blong evri man i girap bakegen long ded long ol hom blong yumi mo long evri miting blong Jos ia, bae ol mesej blong yumi blong lav, seves, stap ones, gat tingting we i stap daon, fasin blong talem tangkyu, mo fasin blong gat sore i save kam ol mesej we i givim advaes nomo be i nogat paoa. Sapos i no Jisas Kraes, bae i nogat paoa blong jenis, nogat stamba tingting blong givim hop long laef, mo ol hadtaem long laef bae oli no save kam isi. Sapos yumi no series long fasin blong yumi blong stap olsem disaepol blong Jisas Kraes, bae i save kam wan disasta long ol pikinini blong yumi.
Taem yumi talem long ol pikinini blong yumi se yumi lavem olgeta, ?yumi stap talem tu long olgeta se Papa long Heven mo Sevya Jisas Kraes i lavem olgeta? Lav blong yumi i save givim insperesen mo kamfot, be lav blong Tufala i save mekem ol pikinini ia i kam tabu, kam olsem wan God, mo hilim olgeta.
Jisas ia bae i no wan Jisas we i stap nomo long ol stori, o wan Jisas we i had blong andastanem, o wan Jisas we i nogat bodi , o wan Jisas blong tedei nomo, o wan Jisas we yumi no save Hem, be wan Jisas we i gat glori, i gat olgeta paoa i laef bakegen long ded, i wan God we, yumi wosipim, i gat olgeta paoa, Stret Pikinini blong God, we i strong blong sevem yumi. Mo olsem wan smol pikinini long Filipin i bin testifae wan dei long mi se, “!Yumi evriwan i impoten blong oli sevem yumi!” Long tabu mo holi nem blong Hem “we God i givim blong hem i [ded] from yumi,” Jisas Kraes, amen.