Elda Brik V. Eyre

Elda Brik V. Eyre i tokbaot eksperiens blong hem taem hem i stap givim seves olsem misin presiden long Arizona Phoenix Misin, se hem i wan eksperiens we i “naes tumas.”

Taem hem i stap givim seves wetem waef blong hem Susan long saed, hem i talem se, “Yu serem yok blong yu i semmak long kompanion blong yu, … mo mekem se mitufala i wok tugeta oltaem.” Mo taem tufala i stap givim seves tugeta wetem handred blong ol fultaem misinari, hem i talem se, “Mi no save sapos mi save eksplenem naesfala blesing ia we i blong spendem evri dei wetem ol pipol we oli givim raet long olgeta blong ripresentem Jisas Kraes blong tri yia.”

Brik Vern Eyre i bon i kam long wol long 17 Jenuware, 1964, long Logan, Utah. Papa mo mama blong hem oli Vern Bingham Eyre mo Emma Rae Anderson Eyre. Hem i gat faef bigfala sista mo sam bubu we oli ded finis we olgeta tu oli bin sam fas memba blong Jos.

Elda Eyre i bin givim seves long Guatemala Guatemala City Misin. Hem i maredem Susan Zari Rahimzadeh long Logan Yuta Tempol long 27 Jun, 1987. Papa blong Sista Eyre i kamaot long wan laen blong ol Muslim, mo mama blong hem i kamaot long wan laen blong Ol Lata-dei Sent. Elda mo Sista Eyre, oli stap laef long Park City, Yuta, taem hem i kasem koling blong hem olsem wan Seventi, mo tufala i gat faef pikinini we oli ol adalt finis.

Elda Eyre i kasem digri long faenens long Utah State Yunivesiti mo wan masta digri blong bisnis administresen long Yunivesiti blong Tulsa. Hem i bin wok long indastri blong ol medikol prodak, we i tekem tu Baxter International taem hem i wok olsem senia vaes presiden mo presiden blong kampani long Amerika, mo i no longtaem i pas, hem i wok olsem wan bod memba blong HemaSource.

Taem oli singaotem hem long koling ia, Elda Eyre i stap givim seves olsem wan Eria Seventi. Hem i bin givim seves tu olsem wan stek presiden, kaonsela blong stek presidensi, hae kaonsela, bisop, wod presiden blong Ol Yang Man, mo eli moning tija blong seminari.