Elda B. Corey Cuvelier

Taem Elda B. Corey Cuvelier i anaonsem se bae hem i stap lego wok blong hem blong kam wan misin presiden blong Jos Ia blong Jisas Kraes blong Ol Lata-dei Sent, ol fren blong hem long wok oli talem se, “?Yu stap krangke?”

Elda Cuvelier i talem se ol fren blong hem long wok, oli gat hadtaem blong andastanem from wanem hem i wantem kamaot long wan gudfala wok we i stap gro gud blong tri yia nao. Be Elda Cuvelier i talem se, ol kwestin blong olgeta oli ol janis, “blong serem from wanem yumi stap mekem wanem we yumi stap mekem mo from wanem yumi stap biliv long wanem we yumi biliv long hem mo huia yumi biliv long hem. Hemia i Jisas Kraes.”

Brian Corey Cuvelier i bon i kam long wol long 12 Jenuware, 1969, long Los Angeles, California, long ples we oli adoptem mo lukaotgud long hem. Papa blong hem, Heinz Joachim Cuvelier, i wan polis ofisa. Mama blong hem, JoAnn Leslie Jarnecke Cuvelier, i stap lukaot long haos. Hem i fasbon blong fo pikinini.

Olsem wan yang misinari, Elda Cuvelier i bin givim seves long Brazil São Paulo South Misin. Hem i graduet long Brigham Yang Yunivesiti long 1994 wetem wan digri long saed blong mekem ol wok wetem pablik. Hem i bin joenem Shell Oil Company long 1996, mo long ples ia hem i wok long ol defdefren bisnis yunit long Not Amerika.

Elda Cuvelier i maredem Wendi Sue Manwaring long 18 Julae, 1992, long Los Angeles Kalifonia Tempol. Tufala i papa mo mama blong fo boe. Elda mo Sista Cuvelier i bin givim seves olsem ol misin lida long Brazil Curitiba South Misin stat long 2016 kasem 2019 mo tufala i stap laef long Katy, Texas, taem oli givim koling ia long tufala.

Bifo, Elda Cuvelier i bin stap givim seves olsem wan Eria Seventi long North America Southwest Eria, hem i bin wan stek presiden, wan kaonsela blong stek presidensi, hae kaonsel man, bisop, kaonsela blong bisoprik, mo wod presiden blong Ol Yang Man.