Elda Clement M. Matswagothata

Taem Elda Clement M. Matswagothata i wan pikinini long Botswana, bae hem i stap ridim Baebol laod long apu woman blong hem. Hem i kam blong ridim 1 Samuel 3, taem God i stap toktok long Samuel, we afta bae oli singaotem hem olsem wan profet.

“Simpol kwestin blong mi hem i we, ‘?God i stap mekem semmak samting yet naoia?’”

Kwestin ia i statem wokbaot blong hem blong stap traem blong faenem wan God we i stap toktok yet. Hem i bin mitim sam Lata-dei Sent misinari taem hem i gat 16 yia, afta hem i ridim flatem Buk blong Momon long sam dei nomo, mo afta hem i ringim olgeta long 3 klok moning blong talem long olgeta se hem i wantem baptaes.

Afta, hem i kam fas stek presiden we oli singaotem long Botswana, afta hem i kam fas Eria Seventi, mo naoia hem i kam fas Jeneral Atoriti Seventi.

“Mi gat wan strong testemoni se God i stap laef mo i stap toktok long yumi long ol las dei ia, mo we yumi stap laef long wan dei mo taem we ol profet oli stap laef mo wokbaot long wol ia,” hem i talem.

Clement Mosiame Matswagothata i bon i kam long wol long Middlepits, Botswana, long 8 Jenuware, 1980. Papa mo mama blong hem i Bojotlhe J. mo Rachel M. Matswagothata. Afta we hem i givim seves long South Africa Cape Town Misin, hem i mitim waef blong hem, Novelty Busisiwe Buthelezi, long wan yang singgel adalt konvensen blong eria. Tufala i bin mared long Joanesbeg Saot Afrika Tempol long 28 Febwari, 2004. Tufala i gat tri pikinini.

Hem i kasem wan digri long stadi blong save. Hem i bin wok long indastri blong ol trak wetem ol defdefren mak blong trak, hem i bin holem sam lidasip posisen we i tekem tu maneja blong salem ol samting, jeneral maneja, mo kantri maneja blong Barloworld Motor.

Long taem we hem i bin kasem koling blong hem, Elda Matswagothata i bin stap givim seves olsem wan tempol odinens wokman long Joansbeg Saot Afrika Tempol mo olsem wan indipenden laef speselis long eria.