“Bigfala Wok We Yumi No Luk: Intepretesen mo Seves blong Ol Ges,” Liahona, Mei 2025.
Bigfala Wok We Yumi No Luk: Intepretesen mo Seves blong Ol Ges
Wan wiken long evri sikis manis, yumi glad blong save gat jeneral konfrens. Be long ol wok we yumi no stap luk, taosen blong ol volontia mo ol wokman blong Jos oli stap wok blong plante manis blong mekem konfrens ia i hapen.
Oli putum evri samting i redi blong brodkas long ol mesej blong ol profet long milian blong ol man raon long wol. Hemia wan smol lukluk long bigfala wok we i stap tekem ples.
Ol Seves blong Intepretesen
Wan handred mo foti tri tim blong ol lanwis raon long wol, oli stap intepretem ol toktok blong jeneral konfrens long stret taem we konfrens i stap hapen, blong mekem se ol memba oli save lisin long konfrens long mama lanwis blong olgeta mo no wet longtaem blong harem ol mesej ia. 57 nomo long ol tim ia oli intepret stret long ol hedkwota blong Jos long Sol Lek Siti.
Intepretesen i defren long translesen, we i tekem tu blong stap raetem ol toktok i go long wan nara lanwis. Long intepretesen, ol tim blong lanwis oli mas redi blong intepretem ol las minit jenis mo toktok we ol spika oli stap mekem long pulpit. Ol intepreta oli helpem ol memba raon long wol blong harem gospel long mama lanwis blong olgeta (luk long Doktrin mo Ol Kavenan 90:11).
Ol Seves blong Ol Ges
Sapos yu bin go long jeneral konfrens long Sol Lek Siti, USA, bae yu luksave se i gat ol man we oli stap daerektem yu i go long jea blong yu sidaon long hem. I gat abaot 400 misinari long Tempol Skwea we oli volontia blong 9,000 aoa long taem blong ful jeneral konfrens, blong helpem ol ges blong stap muv gud i go insaed mo aotsaed long Konfrens Senta.
Oli daerektem 20,000 visita blong evri sesen blong jeneral konfrens. Taem wan sesen i finis, oli wok blong mekem evri visita i go aotsaed hariap blong mekem se oli save klinim ol ples blong ol narawan blong oli kam long nekis sesen.