Welkam long Jos Ia blong Glad

From se tru long plan ia blong Papa blong yumi long Heven we i gat lav from wanwan long ol pikinini blong Hem, mo tru long laef blong Hem we i pemaot yumi mo misin blong Sevya blong yumi, Jisas Kraes, yumi save—mo mas—!stap ol pipol we oli stap glad bigwan long wol ia! Nomata ol hadtaem blong laef we oltaem bae i mekem yumi stap harem nogud bigwan, yumi save wokhad blong gat glad we i gohed blong stastap mo pis, tru hop blong yumi long Kraes mo save ia abaot ples blong yumiwan long naesfala plan blong hapines.

Olsem wan longtaem Aposol blong Lod, Presiden Russell M.Nelson, i bin tokbaot glad we i kam long wan we i gat Jisas Kraes long laef blong hem, kolosap long evri toktok we hem i bin stap givim stat long taem we hem i kam Presiden blong Jos. Hem i mekem toktok blong hem i sot mo klia se:“Glad i kam long Hem mo from Hem. … Blong Ol Lata-dei Sent, !Glad ia hem i Jisas Kraes !”

Yumi, ol memba blong Jos Ia blong Jisas Kraes. !Yumi, ol memba blong Jos Ia blong glad! Mo i nogat wan ples we glad blong yumi olsem ol pipol i moa klia i bitim taem we yumi kam tugeta long evri Sabat long evri sakramen miting blong yumi blong wosipim JIsas Kraes we i stamba blong evri glad ia! Long ples ia yumi kam tugeta wetem ol famli long wod mo branj blong selebretem sakramen blong Las Kakae blong Lod, we i mekem yumi kam fri long sin mo ded mo !bigfala paoa blong gladhat blong Sevya!. Long ples ia yumi kam blong kasem eksperiens blong stap glad, stap sef, fasin blong fogiv mo talem tangkyu, mo filing ia blong stap pat tru long !Jisas Kraes!

?Hemia nao wanem yufala i faenem tru long fasin blong glad tugeta long Kraes? ?Hemia nao wanem yu tekem i kam long jos? Maet yu ting se hemia i no abaot yu, o maet long yu i oraet nomo, from ol samting i stap hapen semmak nomo Be yumi evriwan i save givhan, i nomata long yia o koling blong yumi, blong mekem se ol sakramen miting blong yumi i fulap long glad, i lukluk nomo long Kraes, wan taem blong welkam, i kam laef wetem spirit blong glad wetem respek.

?Fasin blong Stap Glad wetem Respek? Yu save askem, ?“Hemia wan tru samting”?. !Yes, i tru! Yumi lavem tumas, givim ona, mo respektem God blong yumi, mo respek blong yumi i kam taem yumi stap glad long bigfala lav blong Kraes, sore mo !fasin blong sevem man! Glad mo respek ia we i go long Lod, i mas soem hamas ol sakramen miting blong yumi oli tabu.

Be, blong fulap man, fasin blong soem respek i minim nomo long olgeta se: foldem ol han blong yumi tugeta kolosap long jes, benem hed blong yumi, sarem ol ae blong yumi mo stap kwaet—!blong long taem! Maet, hemia i wan gudfala wei blong tijim ol smol pikinini we oli no save stap kwaet, be taem yumi stap kam antap mo stap lanem samting, letem yumi luksave se fasin blong soem respek i moa long hemia. ?Hemia nao wanem bae yumi mas mekem sapos Sevya i stap wetem yumi? No, from se “long ples we [Hem] i stap long hem, i fulap wetem glad”!

Be, blong plante long yumi jenis ia long ol sakramen seves blong yumi bae i nidim plante praktis.

Yumi no kam tugeta long Sabat nomo blong atendem sakramen miting mo tikim long wan lis. Yumi kam tugeta blong wosip. I gat wan impoten samting we i mekem tufala i defren. Blong atendem jos i minim blong stap long jos. Be blong wosip i blong wantem presem, mo wosipim God blong yumi, !long wan wei we i jenisim yumi!

Sapos yumi stap kam tugeta blong tingbaot Sevya blong yumi mo fasin blong pemaot man we Hem i mekem i posibol, !ol fes blong yumi i mas soemaot glad ia mo fasin blong talem tangkyu! Elda F. Enzio Busche, i bin talem wan stori abaot wan taem we hem i bin stap olsem wan branj presiden mo wan yangfala boe we i stap sidaon long kongregesen i luk hem long fored mo i askem long wan laod voes se, “?Man ia we i stap strong fes ia i stap mekem wanem antap ia?” Olgeta we oli sidaon antap long fored—ol spika, ol lida, ol kwaea—mo olgeta we oli kam tugeta long kongregesen oli talemaot long wanwan long olgeta !“welkam long jos blong glad” tru long wanem we oli soem long fes blong olgeta!

Taem yumi singsing, ?yumi stap joen tugeta blong presem God mo King blong yumi, nomata long kwaliti blong voes blong yumi, o yumi stap singsing be ol toktok i no kamaot klia o yumi no stap singsing nomo? Skripja i rekodem se “ol singsing blong ol man we i stret mo gud i olsem wan prea i go long [God]” from we sol blong hem i glad tumas long singsing we i kam long hat. !Letem yumi singsing! !Mo presem Hem!

Yumi mas mekem Papa God mo Jisas Kraes i stamba blong ol toktok mo ol testemoni blong yumi mo ol blesing blong stap laef folem gospel blong Tufala wetem wan tingting we i stap daon, oli ol frut we i moa “swit bitim evri samting we i swit.” Mo mifala i “kakae gud …kasem taem we [mifala] i fulap, mekem se [mifala] i nomo hangre, mo tu nomo … wantem dring wota,” mo ol samting we oli hevi long mifala oli kam isi tru long glad blong Pikinini.

Naesfala impoten pat blong ol seves blong yumi hem i blesing mo stap tekpat long sakramen hemwan, bred mo wota i ripresentem presen ia blong Atonmen blong Lod blong yumi, mo ful stamba tingting ia blong stap kam tugeta. Hemia i wan “tabu taem blong stap riniu ol kavenan,” taem yumi mekem i kam niu witnes blong yumi blong tekem long yumi nem blong Jisas Kraes , mo mekem ol kavenan bakegen blong oltaem tingbaot Hem mo blong kipim ol komanmen blong Hem.

Long sam situesen blong laef, yumi save kam long sakramen wetem hevi hat mo wetem tumas samting long maen. Long nara taem, yumi save kam fri mo nogat ol wari mo trabol. Taem yumi jus blong lisin gud long blesing blong bred mo wota mo stap tekpat long tabu saen, bae yumi save gat filing ia blong lukluk bak long sakrifaes blong Sevya, mo ol harem nogud blong Hem long Gethsemane, safaring blong Hem long kros, mo ol bigfala harem nogud mo ol soa blong bodi we Hem i go tru long hem wetem strong paoa kasem en. Hemia bae i wanem we bae i mekem sol blong yumi bae i nomo hevi, taem yumi joenem ol harem nogud blong yumi wetem blong Hem. Long ol narafala taem, bae yumi filim blong gat tingting ia wetem bigfala tangkyu long “naesfala mo swit glad” from bigfala mo gudfala presen blong Jisas we i mekem long laef blong yumi mo blong taem we i no save finis! Bae yumi glad long wanem we i stap kam yet—naesfala taem blong kam tugeta blong yumi wetem Papa we yumi lavem mo Seyva we i girap aot long ded.

Maet tingting blong yumi se stamba tingting blong sakramen i blong sidaon long jea mo tingbaot nomo ol wei we yumi mekem samting we i no gud long wik we i pas. Be i no olsem. Long kwaet taem ia, yumi save tingting hevi long plante wei we yumi bin luk !Lod i no stop blong folem yumi wetem bigfala lav blong Hem long wik ia! Yumi save lukluk bak long wanem hem i minim blong “lukaotem glad tru long fasin blong sakem sin evri taem.” Yumi save talem tangkyu from ol taem we Sevya i kam insaed long taem blong ol hadtaem, ol sakses, mo ol taem we yumi filim gladhat blong Hem, fogivnes mo paoa we i mekem yumi strong blong winim ol hadtaem blong yumi mo karemaot ol hevi samting wetem fasin blong save wet longtaem iven wetem gudfala glad.

Yes, yumi tingting hevi long ol safaring mo ol fasin nogud we Ridima i bin go tru from ol sin blong yumi, mo mekem se yumi mas tekem i series mo tingting plante. Be samtaem yumi fasfas long ples ia—long garen (Getsemane), long kros, insaed long tumb. Yumi mestem blong muv i kam antap from glad ia we i stap from tumb i open, from Hem i winim ded mo viktri blong Kraes ova long evri samting we maet i stap blokem yumi blong kasem pis mo blong gobak long hom blong yumi long heven. Nomata yumi serem ol wora blong ae blong harem nogud o ol wora blong ae blong talem tangkyu long taem blong sakramen, !letem i wan gudfala nius from presen blong Papa from Pikinini blong Hem!

Naoia, blong ol papa mo ol mama blong ol pikinini we oli yang o oli gat ol spesel nid, i no gat wan taem we i kwaet olsem kwaet taem mo kwaet tingting long taem blong sakramen. Be long ol smosmol taem truaot long wik, yu save tij tru long eksampol blong lav, fasin blong talem tangkyu mo glad we yu filim long mo blong Sevya, taem yu gohed blong lukaot long ol smol sipsip blong Hem. Wanem we yu stap mekem i no blong nating. God i luksave gud ol hadwok blong yu.

Semmak long hom, mo long jos yumi save stat blong mekem hop mo filing blong wanem yumi wantem i kam antap. Long ol famli kaonsel, !yumi save toktok raon long hao wanwan i save help long ol wei we i gat mining blong welkamem evriwan long jos ia blong glad! Yumi save mekem plan mo gat filing blong wantem eksperiensem glad long Jos.

Wod kaonsel i save givim tingting mo krietem wan fasin blong stap glad wetem respek long taem blong sakramen, taem oli faenemaot ol aksen we oli save folem o yusum ol pikja, mo ol raeting we man i save luk blong help.

Glad i defren blong ol defren pipol. Blong sam, bae hem i ol bigfala welkam toktok long doa. Long ol narawan, maet i wan kwaet wei blong helpem pipol i filim gud taem oli smael mo sidaon kolosap long olgeta, wetem wan kaen mo open hat. Long olgeta we oli filim se oli no pat o stap long laen, fasin blong welkam i wan impoten samting. Long en, yumi save askem yumi wanwan se, ?olsem wanem nao bae Sevya i wantem yumi blong gat sakramen? ?Olsem wanem nao bae Hem i wantem blong yumi welkamem, kea mo lukaot long wanwan long ol pikinini blong Hem? ?Wanem filing nao Hem i wantem yumi blong filim taem yumi kam blong riniu taem yumi wosipim Hem?

Taem mi statem wokbaot blong fet blong mi, glad long Jisas Kraes i bin fas mo bigfala samting we mi kam blong faenemaot, mo i jenisim wol blong mi. Sapos yu stap yet blong kam blong faenemaot glad ia, folem rod ia. Hemia i wan invitesen blong kasem presen blong kasem pis, laet mo glad blong Sevya—blong stap hapi long hem, mo sapraes long hem mo stap glad fromlong evri sabat.

Amon long Buk blong Momon i talemaot ol filing blong hat blong mi taem hem i talem se:

“Naoia, ?yumi gat wan stamba tingting blong glad from? Yes, mi talem long yufala, i neva bin gat [wan pipol] we oli gat wan bigfala stamba tingting olsem, blong glad from, olsem yumi, stat long taem we wol i bin stat; yes, mo glad blong mi i tekem mi i go bitim mak, i go kasem we mi presem God blong mi; from hem i gat evri paoa, evri waes tingting, mo evri haremsave; hem i haremsave evri samting, mo hem i wan Man we i gat sore, i go kasem we hem i sevem olgeta we oli sakem sin mo biliv long nem blong hem.

“Nao sapos samting ia hem i blong stap tokflas, olsem ia nao bae mi tokflas; from hemia i laef blong mi mo laet blong mi, … glad blong mi mo bigfala tangkyu blong mi.”

!Welkam long Jos Ia blong Glad! Long nem blong Jisas Kraes, amen.