Doktrin blong Jisas Kraes i Simpol

Yumi evriwan i gat ol famli we yumi lavem we oli stap kasem temtesen mo ol paoa blong Setan i stap traem olgeta oltaem, hem we i stap spolem evri samting mo bae i mekem evri pikinini blong God i filim nogud. Plante long yumi oli gat ol naet we oli no stap slip gud. Yumi traem blong mekem evri gudfala paoa i raonem ol pipol we oli stap long denja. Yumi bin krae long prea from olgeta. Yumi bin lavem olgeta. Yumi bin soem moa gud eksampol we yumi save mekem.

Alma, wan waes profet long taem bifo, i bin go tru ol semmak tes. Plante taem wan strong enemi i stap atakem ol pipol we hem i stap lidim, be yet, oli stap traem blong resemap ol pikinini we oli stret mo gud long wan wol we i fulap long nogud fasin. Alma i filim se hop blong hem blong viktri i wan fos we, samtaem, yumi stap ting daon long hem mo yusum smol nomo. Hem i krae from help blong God.

Alma i save se blong kasem help blong God, i nidim blong ol pipol we hem i lidim mo olgeta we oli agensem hem, oli mas sakem sin. Mekem se, hem i jusum wan nara wei blong faet.

Buk blong Momon i tokbaot long wei ia: “Mo nao, from we trutok we oli prijim i lidim ol man blong mekem wanem we hem i stret—yes, hem i gat moa bigfala paoa long tingting blong ol pipol bitim naef blong faet, o eni narafala samting, we i bin hapen finis long olgeta—from hemia, Alma i ting se i gat nid se oli mas traem paoa blong toktok blong God.”

Tok blong God hem i doktrin we Jisas Kraes i tijim tru long ol profet blong Hem. Alma i save se ol toktok blong doktrin i gat bigfala paoa.

Long seksen 18 blong Doktrin mo Ol Kavenan, Lod i bin soem fandesen blong doktrin blong Hem:

“From luk, mi komandem evri man long evri ples blong oli mas sakem sin. …

“From luk, Lod Ridima blong yufala, i bin safa long ded blong bodi; taswe, hem i bin safa long sobodi blong evri man, blong mekem se evri man i save sakem sin mo kam long hem.

“Mo hem i bin girap bakegen long ded, blong mekem se hem i save mekem evri man i biliv long hem, sapos oli sakem sin.”

“Mo bambae yufala i bodaon mo wosipim Papa long nem blong mi.

“… Yufala i mas sakem sin mo kasem baptaes, long nem blong Jisas Kraes.”

“Askem Papa long nem blong mi, wetem fet mo stap bilivim se bambae yutufala i kasem, mo bambae yutufala i gat Tabu Spirit.”

“Mo nao, afta we yutufala i kasem hemia, yutufala i mas stap obei long ol komanmen blong mi long saed blong evri samting.”

“Tekem long yutufala nem blong Kraes, mo tokbaot trutok wetem ful tingting.

“Mo hamas bambae oli sakem sin mo oli kasem baptaes long nem blong mi, we i Jisas Kraes, mo i stanap strong kasem en, olgeta ia bambae mi sevem olgeta.”

Long sam pat blong ol skripja ia, Sevya i givim long yumi eksampol we i stret gud evriwan long olsem wanem yumi mas tijim doktrin blong Hem. Doktrin ia hem i fet long Lod Jisas Kraes, fasin blong sakem sin, kasem baptaes, kasem presen we i Tabu Spirit, mo stap strong kasem en, i blesem evri pikinini blong God.

Taem yumi tijim ol prinsipol ia long olgeta we yumi lavem, Tabu Spirit bae i helpem yumi blong save trutok. From se yumi nidim ol kwaet voes blong Tabu Spirit, yumi no mas stap mekemap ol tingting o stap gat ol andastaning blong yumiwan we i go bitim fasin blong stap tijim tru doktrin.

Hemia i save had blong mekem taem yu lavem man we yu stap traem blong helpem. Maet hem i no wantem akseptem doktrin we oli bin tijim. Hem i wan temtesen oltaem blong traem wan niu samting o wan samting we i gud tumas. Be Tabu Spirit bae i soem spirit blong trutok nomo taem yumi lukaot blong no bitim fasin blong stap tijim tru doktrin. Wan long ol wei we i stret gud blong stopem blong kam kolosap long ol giaman doktrin, hem i blong jusum blong stap tij long simpol wei. I gat sefti taem samting i simpol, mo plante samting i no lus.

Blong stap tij simpol i letem yumi blong serem doktrin we i sevem man eli taem ol pikinini oli no kasem yet ol temtesen we bae oli go tru long hem afta, mo bifo, noes blong sosol media, ol fren, mo ol hadtaem blong olgetawan i draonem ol trutok we oli nidim blong lanem. Yumi mas tekem evri janis blong serem ol tijing blong Jisas Kraes wetem ol pikinini. Ol taem ia blong tijing oli gud tumas mo oli smol nomo taem yu komperem wetem ol bigfala traehad blong paoa blong enemi. Blong evri aoa we oli spendem blong stap draonem doktrin i go insaed long laef blong wan pikinini, bae i gat plante aoa blong oposisen we i fulap long ol mesej mo pikja we bae i jalenjem o no luksave ol trutok ia blong sevem man.

Maet sam long yufala i stap tingting se bae i moa gud blong pulum ol pikinini blong yu i kam moa kolosap taem yufala i stap gat gud taem, o blong askem sapos pikinini blong yu i stat blong filim se ol tijing blong yu i tumas. Be, yumi sud tingting se “Wetem smol taem ia mo smol janis ia nomo, ?wanem ol toktok blong doktrin we mi save serem we bae i mekem olgeta i kam strong moa agensem ol jalenj blong fet blong olgeta we oli no save ronwe long hem?” Ol toktok we yu serem tedei oli save stap olsem ol toktok we bae oli holemtaet wetem olgeta, mo tedei bae i pas i no longtaem.

Oltaem mi laekem hamas bigfala apu woman blong mi Mary Bommeli, i givim taem blong hemblong stap serem doktrin blong Jisas Kraes. Ol misinari oli bin tijim famli blong hem long Switzerland taem hem i gat 24 yia.

Afta we hem i baptaes, Mary i wantem blong joenem Ol Sent long Amerika, mekem se hem i aot log Switzerland i go long Berlin mo i faenem mo wok blong wan woman blong stap mekem klos blong famli ia. Mary i stap long rum blong ol wokman mo i putum tul blong hem blong stap mekem klos long salong.

Long taem ia, i agensem loa blong tijim doktrin blong Jos Ia blong Jisas Kraes blong Ol Lata-dei Sent long Berlin. Be Mary i filim se hem i no save stopem hemwan blong serem ol samting we hem i bin lanem. Woman blong haos ia mo ol fren blong hem, bae oli kam tugeta raon long tul blong somap blong Mary mo harem hem i tij. Hem i tokbaot taem we Papa long Heven mo Jisas Kraes i kamkamaot long Josef Smit, ol enjel we oli visitim Josef, mo Buk blong Momon. Hem i tingbaot ol storian blong Alma, mo hem i tij abaot doktrin blong Resureksen. Hem i testifae se ol famli oli save kambak wan long selestial kingdom.

I no long taem, glad blong Mary blong stap serem doktrin blong gospel we i kambak, i mekem trabol. I no long taem nomo afta, we ol polis oli karem Mary i go long kalabus. Taem oli stap go, hem i askem nem blong jaj we bae i jajem hem long nekis moning, long polisman. Hem i askem tu abaot famli blong hem mo sapos hem wan gudfala papa mo hasban. Polisman i tokbaot jaj ia olsem wan man blong wol.

Taem Mary i stap long kalabus, hem i askem wan pensel mo sam pepa. Hem i spendem naet ia blong stap raetem wan leta i go long jaj, mo hem i serem witnes blong hem abaot Jisas Kraes we i Laef bakegen long Ded olsem we oli tokbaot long Buk blong Momon, mo hem i tokbaot spirit wol mo i eksplenem fasin blong sakem sin. Hem i givim tingting ia se jaj bae i nidim taem blong lukluk bak long laef blong hem bifo we bae hem i go tru long las jajmen. Hem i raetem se hem i save se jaj ia i gat fulap samting blong sakem sin from, plante samting we bae i mekem famli blong hem mo hem i harem nogud. Long moning, taem hem i finisim leta blong hem, hem i givim long polisman mo askem hem blong givim leta long jaj, mo hem i agri blong mekem.

Afta, jaj i singaotem polisman ia i go long ofis blong hem. Leta we Mary i bin raetem i strong pruf se hem i stap tijim doktrin blong gospel we i kambak long wol, mo hem i stap brekem loa taem hem i stap mekem olsem. Be, i no longtaem afta we, polisman ia i gobak long rum blong Mary. Hem i talem long Mary se oli karemaot evri jaj agensem hem mo hem i fri blong go. From we hem tijim doktrin blong gospel blong Jisas Kraes we i kambak, i mekem oli sakem hem long kalabus. Mo from hem i talemaot doktrin blong fasin blong sakem sin long jaj, i mekem oli sakemaot hem long kalabus.

Tijing blong Mary Bommeli i no finis taem oli rilisim hem. Rekod blong ol toktok blong hem i bin pasem tru doktrin i go long ol jeneresen we bae oli bon yet i kam long wol. Bilif blong hem se iven wan niu konvet i save tijim doktrin blong Jisas Kraes, i mekem ol laen blong hem oli sua se bae oli kam moa strong tru long ol faet blong olgetawan.

Taem yumi stap mekem bes blong yumi blong tijim olgeta we yumi lavem abaot doktrin blong Jisas Kraes, maet sam bae oli no ansa. Ol tu tingting i save kam long maen blong yu. Maet bae yu kwestinim yuwan sapos yu yu save gud doktrin blong Sevya blong mekem yu se yu save tijim gud. Mo sapos yu bin traem finis blong tijim, maet bae yu tingting se from wanem yu no save luk klia ol paoa blong hem. No lisin long ol tu tingting ia. Tanem yu i go long God from help.

“Yes, mo askem long God blong givim evri sapot long yu; … letem ol filing blong hat blong yu i stap long Lod blong oltaem.”

“Mo nao mi wantem se bae yufala i putum tingting blong yufala i stap daon, mo stap lisin long ol man mo gat kaen fasin; yufala i isi blong tijim; yufala i fulap long fasin blong wet longtaem mo blong gotru long hadtaem wetem longfala tingting; yufala i kontrolem yufala long evri samting; yufala i wok strong wetem strong tingting blong obei ol komanmen blong God long evri taem; yufala i askem eni samting we yufala i gat nid long hem, tugeta long saed blong spirit mo long saed blong laef ia; oltaem, yufala i talem tangkyu long God from wanem samting we yufala i kasem.”

Sapos yu prea, sapos yu toktok long God, mo sapos yu krae from help blong Hem from wan we yu lavem, mo sapos yu talem tangkyu long God, i no from help nomo be from fasin blong save wet longtaem, mo stap kaen taem yu no kasem evri samting we yu wantem hariap, o maet yu neva kasem, nao mi promes long yu, se bae yu kam moa kolosap long Hem. Bae yu kam strong wetem strong tingting mo fasin blong gat longfala tingting long hadtaem. Afta nao, yu save save se yu bin mekem evri samting we yu save mekem blong helpem olgeta we yu lavem mo olgeta we stap prea from blong oli faenem rod blong olgeta long paoa blong Setan mo kamaot long hem.

“Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta, i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”

Yu save faenem hop insaed long ol skripja rekod blong ol famli. Yumi rid abaot olgeta we oli bin tanem olgeta aot long wanem we oli bin tijim long olgeta o oli stap faet wetem God from fogivnes, olsem Yangfala Alma, ol boe blong Mosaea, mo Inos. Long hadtaem blong olgeta, oli tingbaot ol toktok blong ol papa mo mama blong olgeta, ol toktok blong doktrin blong Jisas Kraes. Oli tingbaot ol toktok ia mo ol toktok ia i sevem olgeta. Bae oli tingbaot tijing blong yu abaot tabu doktrin ia.

Mi serem witnes blong mi abaot tabu wok blong stap tijim ol pikinini blong Papa long Heven abaot simpol doktrin blong Jisas Kraes, we i letem yumi blong kam klin long saed blong spirit mo blong yumi save stap long fes blong God, blong laef wetem Hem mo Pikinini blong Hem long glori wetem ol famli blong oltaem. Long nem blong Jisas Kraes, amen.