Stap Tabu long Lod, Evri Dei long Laef

Long wan kam tugeta we i jes pas blong famli Gong, mifala i gat wan talen so we i en wetem wan fani kompetisen blong papa.

Be kompetisen ia i defren smol. Long wan tim i gat apu man (mi) mo tu(2) apu pikinini we oli gat 12 mo 11 yia. Long nara tim i gat wan kompiuta robot (AI) program we wan kasen i putum tugeta finis i stap blong i talem ol fani toktok blong papa long wei blong Gerrit W. Gong. Apu man Gerrit Gong i kompit wetem kompiuta robot ia, AI Gerrit Gong.

Mi mo ol apu pikinini, mifala i go faswan.

?Wanem nem blong wan daenoso we i smasem nogud trak blong hem? Taeranosoras Rekta.

Oli givim instraksen long AI Gerrit Gong —blong i tingting olsem Gerrit W. Gong. Toktok olsem hem.

AI Gerrit Gong: “Hemia wan fani toktok blong wan papa olsem we Gerrit W. Gong nao i stap talem folem gudfala stael blong hem blong toktok: ?From wanem wan tri we tingting blong hem i stap daon i mekem pipol oli smael? From se ol rus blong hem oli gro long lav mo ol branj blong hem oli stap givimaot fasin blong stap kaen. Olsem tri ia yumi tu, i save faenem paoa long ol rus mo glad taem yumi stap givimaot kaen fasin long ol narawan.”

?Oke, wanem nao tingting blong yu? Hemia nao from wanem oli singaotem ol fani toktok blong papa.

Evri ples raon long yumi i gat ol janis blong laf, blong stap glad, lukluk wetem ol ae blong talem tangkyu. Gospel ia we yumi gat i blong stap glad mo stap tabu long evri dei laef. Stap tabu, i mekem yumi luksave wanem i tabu. Be blong stap tabu i mekem tu se laef blong yumi evri dei i kam tabu—i mekem yumi gat blesing evri dei long wol blong ol hadtaem. Blong wokabaot wetem Lod, yumi mas kam tabu, from se Hem i tabu, mo blong helpem yumi kam tabu, Lod i invaetem yumi blong wokabaot wetem Hem.

Yumi wanwan i gat wan stori. Taem sista Gong mo mi i mit wetem yufala—Ol memba blong Jos mo ol fren long plante ples mo plante situesen—Ol stori blong yufala blong stap tabu long Lod long evri dei laef i givim insperesen long mitufala. Yufala i laef long ol prinsipol ia: wosip long God, laef long komuniti mo gat sore wetem wanwan long yufala, komitmen mo kavenan wetem God, famli, mo ol fren—wei lukluk nomo long Jisas Kraes.

Plante samting we i hapen i soemaot tru se: ol man we oli biliv long relijen, kolosap haf blong olgeta oli moa hapi, moa helti, mo mekem plante gud samting bitim olgeta we oli no gat komitmen o koneksen long saed blong spirit. Fasin blong stap hapi mo laef we i gud, helt long saed blong tingting mo bodi, mining mo stamba tingting, fasin mo klin fasin, ol sosol rilesensip we oli kolosap, iven fasin blong independen long saed blong mane mo ol samting we yu gat—long wanwan long olgeta we oli praktisim relijin oli kam gud moa long evri samting ia.

Oli gat wan gudfala helt long saed blong bodi mo tingting mo wan hapi laef nomata wanem grup blong yia mo namba blong pipol we oli gat.

Wanem we ol man blong stadi oli singaotem “laef folem relijin” i givim wan klia save, stamba tingting, mo insperesen long medel blong ol fasin blong tedei. Haos blong fet mo komuniti blong ol Sent oli faet agensem fasin blong stap yuwan mo grup blong pipol we oli stap olgetawan. Stap tabu long Lod i talem no long fasin blong nogat respek, no long fasin blong stap jikim narafala man, no long fasin blong yusum sosol media blong spolem man tru long ol post blong pikja mo toktok blong save mekem mane aot long hem. Stap tabu long Lod i talem yes long tabu fasin mo respek, yes blong yumi save kam moa fri, moa hapi, kam moa gud long ol bilif blong yumi taem yumi folem Hem wetem fet.

I luk olsem wanem blong stap tabu long Lod evri dei long laef?

Stap tabu long Lod evri dei long laef i olsem tu(2) fetful yang adalt we i mared blong wan yia, stap serem gospel kavenan wetem stret fasin mo tu,ol narawan oli lukluk tufala long nogud wei, sakrifaes, mo givim seves long wanem we i stap hapen long laef blong tufala.

Gel i toktok, “Long hae skul, laef blong mi bin stap long tudak. Mi filim olsem se God i no stap long ples ia blong mi. Wan naet, wan teks we i kam long wan fren i talem se, ‘Hei, yu yu rid long Alma 36 finis?’

“Taem mi stat blong ridim,” hem i talem se, “mi bin gat pis mo lav. Mi bin filim olsem oli givim wan bigfala hag long mi. Taem mi ridim Alma 36:12, mi save se Papa long Heven i luk mi mo save stret wanem mi stap filim.”

Gel i gohed, “Bifo mitufala i mared, mi bin ones wetem man we bae mi maredem se mi no gat wan strong testemoni blong taeting. ?From wanem God i nidim yumi blong givim mane, taem ol narawan oli gat tumas samting blong givim? Man we bae mi maredem i help blong eksplenem se hem i no abaot mane, be blong folem wan komanmen we Hem i askem yumi blong mekem. Hem i givim jalenj long mi blong stat pem taeting blong mi.

“I tru mi bin luk testemoni blong mi i gro,” hem i talem. “Samtaem mane i no inaf, be from mifala i luk plante blesing, mo i mekem se salari i inaf.”

Mo, “insaed long nesing klas blong mi,” hem i talem, “miwan nomo mi memba blong Jos mo miwan nomo mi mared. Plante taem mi kamaot long klas, mi harem nogud o krae from mi filim se ol fren blong mi blong klas oli go agensem mi mo talem ol nogud toktok abaot ol bilif blong mi, ol gamen we mi werem, o we mi bin mared yang tumas.”

Hem i gohed, “Long semesta we i pas mi lanem olsem wanem blong talemaot gud ol bilif blong mi mo stap wan gud eksampol blong gospel. Save mo testemoni blong mi i bin gro from mi go tru long tes ia blong mi save stanap miwan mo stap strong long wanem we mi biliv long hem.”

Yangfala hasban ia i ademap, “Bifo misin blong mi oli bin askem mi blong plei long kolej besbol. Mi bin mekem wan had joes blong putum tingting blong plei besbol i stap mo go wok blong Lod. Bae mi no save givimaot tufala yia ia from eni samting.

“Kambak long hom,” hem i talem, “mi bin ting se bae mi faenem i had blong plei be mi luk se mi kam moa strong, mi gat moa spid, mo mi helti moa. Mi bin stap ston long balong ia moa strong bitim bifo. Plante skul oli bin askem mi blong plei bitim bifo, wetem drim skul blong mi. Mo, moa impoten long hemia,” hem i talem, “mi dipen long Lod moa bitim oltaem.”

Hem i endem toktok blong hem se, “Olsem wan misinari mi bin tijim se Papa long Heven i promesem yumi paoa long ol prea blong yumi, be samtaem miwan mi fogetem promes ia”

Ples we yumi kipim ol blesing we oli tabu long Lod long taem blong misin i fulap gud. Ol faenans, taem, mo ol nara situesen plante taem oli no ol isi samting. Be taem ol misinari blong bifo, blong naoia mo olgeta we bae oli go yet mo blong evri bakgraon oli komitim olgeta blong stap tabu long Lod, ol samting i save hapenlong taem mo long wei blong Lod.

Wan olfala misinari i bin serem eksperiens we i bin hapen 48 yia i pas, “Papa blong mi i wantem mi blong kasem wan kolej edukesen, be i no blong go long wan misin. Sot taem afta long hemia, hem i bin gat wan hat atak mo hem i ded taem hem i gat 47 yia nomo. Mi filim mi gilti. ?Olsem wanem nao bae mi save stretem ol samting wetem papa blong mi?

Hem i gohed,“afta samtaem,” “afta mi bin disaed blong go long wan misin, mi bin luk papa blong mi long wan drim. Hem i gat pis mo i glad, hem i bin hapi se mi mekem misinari wok.”

Olfala misinari ia i gohed, “Olsem Doktrin mo Ol Kavenan seksen 138 i tijim, mi biliv se papa blong mi i save mekem misinari wok long spirit wol. Mi gat pikja long maen sepapa blong mi i stap helpem bigfala bubuman blong mifala, we i bin lego Jemani taem hem i gat 17 yia mo hem i bin lus long famli, mo hem i faenem hem bakegen.”

Waef blong senia misinari i talem bakegen, “Long medel blong evri faev brata long saed blong hasban blong mi, fo long olgeta we oli go long misin hem i olgeta we oli kasem kolej digri.”

Stap tabu long Lod long evri dei laef i olsem wan yang misinari we i jes finisim misin we i lanem blong letem God i win long laef blong hem. Bifo, taem oli askem misinari ia blong blesem wan we i sik tumas, misinari ia i talem, “mi gat fet, bae mi blesem hem blong hem i oraet bakegen. Be,” riten misinari ia i talem, “mi bin lanem long taem ia blong no prea from wanem mi wantem be from wanem Lod i save man o woman ia i nidim. Mi blesem brata ia wetem pis mo kamfot. Samtaem afta hem i ded wetem pis.”

Stap tabu long Lod long evri dei laef i filim olsem wan smol aksen we i go tru long vel blong joenem, kamfotem, mo mekem i kam strong moa. Wan administreta long wan bigfala yunivesiti i talem se hem i filim wanwan long olgeta we hem i save tru long ol narawan se oli stap prea from hem. Wanwan long olgeta ia oli gohed blong stap givim laef blong olgeta long yunivesiti ia mo gohed blong stap kea abaot misin mo ol studen blong yunivesiti ia.

Wan sista i mekem wanem hem i save mekem evri dei we i moa gud, afta we hasban blong hem i lego hem mo ol pikinini. Mi respektem hem bigwan mo ol narawan olsem sista ia. Wan dei taem hem i stap foldem ol klos we oli wasem, han blong hem i fas long ol gamen, hem i pulum gud win mo talem, “?Wanem stamba tingting blong gamen ia?” Hem i filim wan sopsop voes i kamfotem hem, “Ol kavenan blong yu i stap wetem Mi.”

Blong 50 yia, wan nara sista i wantem tumas blong bildim gud rilesensip wetem papa blong hem. “Taem mi stap gro kam antap,” hem i talem, “i gat ol brata blong mi mo papa blong mi, mo afta i gat mi—wan gel ia nomo. Aot long evri samting mi mekem, mi wantem stap wan gudfala gel blong papa blong mi.

“!Afta mama blong mi i bin ded! Hem nomo nao i joenem mi mo papa blong mi.

“Wan dei,” sista ia i talem, “mi harem wan voes i talem, ‘Invaetem papa blong yu mo tekem hem i go long tempol wetem yu.’ Hemia i bin stat blong taem we mi mo papa blong mi i stap go long wan deit tu taem long wan manis long haos blong Lod. Mi bin talem long papa blong mi, mi lavem hem. Hem i talem long mi hem i lavem mi tu.

“Blong stap spendem taem insaed long haos blong Lod i bin hilim mitufala. Mama blong mi i no save helpem mifala long wol ia. Mekem se hem i mas stap long narasaed blong vel blong helpem mo mekem wanem i bin brok i kam gud bakegen. Tempol i komplitim wokabaot blong yumi i kam fulwan olsem wan famli we i no save finis.”

Papa ia i talem, “Tempol dedikesen i wan gudfala eksperiens long saed blong spirit long mi mo gel blong mi. Naoia mifala i go tugeta mo filim lav blong mifala i kam strong moa.”

Blong stap tabu long Lod evri dei long laef i tekem tu, ol spesel taem we yumi lusum olgeta we yumi lavem. Eli long yia ia mama blong mi Jean Gong, i bin ded long wan wei we i kwaet mo swit bifo hem i kasem 98 yia.

Sapos yu askem mama blong mi, “?Yu wantem roki rod, waet joklet jinja, o stroberi aeskrim?” Mama bae i ansa, “Yes, plis, ?mi save testem wanwan long olgeta?” ?Huia bae i talem no long mama blong yu, speseli taem hem i laekem evri fleva blong laef?

Wantaem mi bin askem mama blong mi, wijwan long ol desisen nao i bin jenisim laef blong hem bigwan.

Hem i talem, “Blong kasem baptaes mo kam wan memba blong Jos Ia blong Jisas Kraes blong Ol Lata-dei Sent mo stap muvaot long Hawae i go long Amerika, ples ia we mi bin mitim papa blong yu.”

Hem i bin baptaes taem hem i gat 15 yia, hemwan nomo long wan bigfala famli i joenem Jos blong yumi, mama blong mi i bin mekem kavenan wetem fet mo tras long Lod we i blesem laef blong hem mo evri famli blong jeneresen blong mifala. Mi misim mama blong mi, olsem we yu yu misim ol memba blong famli blong yu. Be mi save se mama blong mi i no lus. Hem i no stap ia nomo. Mi givim ona long hem mo evriwan we i pas i go olsem ol gudfala eksampol blong stap tabu long Lod long evri dei laef blong olgeta.

Hem i tru, blong stap tabu long Lod evri dei long laef, i tekem tu, blong go oltaem long tabu haos blong Lod. Hemia i tru nomata se yumi ol memba blong jos o ol fren.

Tri fren oli bin kam long open haos blong Bangkok Thailand Tempol.

“Ples ia wan gud ples blong kasem hiling,” wan i talem.

Long ples blong baptaes, narawan i talem, “Taem mi stap long ples ia, mi wantem blong Hem i wasem mi kam klin mo blong mi neva sin bakegen.”

Namba tri man i talem, “?Yu save filim paoa long saed blong spirit?”

Wetem seven tabu toktok, ol tempol blong yumi oli invaetem yumi mo talemaot:

“Stap tabu long Lod.

“Haos blong Lod.”

Blong stap tabu long Lod i mekem evri dei laef i tabu. Hem i karem yumi i go moa kolosapmo kam moa hapi long Lod mo wanwan long yumi mo mekem yumi rere mo gobak stap wetem God, Papa blong yumi, Jisas Kraes, mo olgeta we yumi lavem.

Olsem fren blong mi i bin mekem, yu maet askem yuwan sapos Papa blong yu long Heven i lavem yu. !Ansa hem i wan klia, yes! Yumi save filim lav blong Hem taem yumi stap tabu long Lod, wanwan dei long laef blong yumi mo blong oltaem stap hapi. Bae yumi mekem olsem, mi prea long tabu nem blong Jisas Kraes, amen.