Stap Lukluk Nomo long Jisas Kraes mo Gospel blong Hem

Long 1996, tim blong futbol long Naejeria i winim gol medel long Olimpik Gem we i bin tekem ples long Atlanta, long Yunaeted Stet. !Taem gem i finis, plante pipol we oli fulap wetem glad oli fulumap evri rod blong evri siti mo taon, long kantri blong Nigeria we i gat 200 milian pipol we oli kam tugeta mo mekem wan bigfala selebresen long 2 klok long moning! Glad ia i pas long wan i go long nara man, hapines mo glad ia i raonem evri ples taem ol pipol oli kakae, singsing, mo danis. Long taem ia, Naejeria i kam wan, mo evri man Naejeria oli glad se oli ol man Nigeria.

Bifo Olimpik i stat, tim ia i bin fesem plante jalenj. Taem tunamen i stat, sapot blong olgeta long saed blong mane i stop blong kam. Tim i gohed blong kompit long tunamen nomata se oli no gat ol stret samting blong spot, ol ples blong trening, kaekae, o seves blong wasem klos.

Jerome Prevost/Getty Images

Long wan taem ia, we hamas minit nomo i stap, bae oli save lusum gem blong olgeta long kompetisen ia, be tim blong Naejeria i winim gem blong olgeta nomata we i no bin isi long las minit ia. Impoten taem ia i bin jenisim lukluk we oli gat long olgeta bakegen. Wetem wan niufala tras, mo hadwok blong wanwan tim memba mo blong gohed wetem strong tingting nomata i had o denja, tugeta oli kam wan mo no lukluk long ol samting we i blokem olgeta, be lukluk nomo blong win. Lukluk ia nomo blong win i mekem oli winim ol gol medol, mo ol man Nigeria oli singaotem olgeta “Drim Tim.” Drim Tim long 1996 Olimpik gem, oli gohed blong tokbaot olgeta long ol spot blong Nigeria.

David Cannon/Allsport/Getty Images

Taem tim blong futbol blong Nigeria i lanem blong no lukluk long plante samting we i blokem olgeta mo lukluk nomo long gol blong olgeta, oli go bitim wanem we oli ting se bae oli save mekem—mo gat wan eksperiens blong bigfala glad. (!Olsem mifala we i stap long Nigeria i mekem!)

Long semmak wei, blong no lukluk long plante samting we i blokem yumi mo lukluk nomo long Kraes mo gospel blong Hem, yumi kasem promes blong gat sakses we i bitim lukluk blong yumi, mo filim bigfala glad. Presiden Russell M. Nelson i bin tijim, “Taem laef blong yumi i stap lukluknomo long … Jisas Kraes mo gospel blong Hem, yumi save filim glad nomata long wanem i stap hapen—o i no stap hapen—long ol laef blong yumi.”

Mi prea se Tabu Spirit bae i helpem wanwan long yumi blong folem invitesen blong Presiden Nelson blong mekem laef blong yumi i lukluk nomo long “Jisas Kraes mo Gospel blong Hem” mekem se yumi save gat eksperiens blong stap glad long Kraes “nomata wanem i stap hapen—o i no stap hapen—long laef blong yumi.”

I gat sam stori insaed long Buk blong Momon we i tokbaot wanwan man we oli bin jenisim laef blong olgeta taem oli stap lukluk nomo long Jisas Kraes mo Gospel blong Hem.

Tingbaot Yangfala Alma. Hem i go agens mo faet agensem Jos. Papa blong hem, Alma, i bin prea mo livim kakae. Wan enjel i bin kamaot mo singaotem Yangfala Alma blong sakem sin. Long taem ia, Alma i stat blong safa “ol soa blong wan sol we devel i stap kontrolem.” Long taem blong bigfala harem nogud ia, hem i tingbaot ol tijing blong papa blong hem se Kraes bae i kam mo pem praes blong ol sin blong wol. Taem hem i tingabaot ol tingting ia, hem i krae long God blong sore. Glad hem i ansa blong hem !wan glad olsem we hem i tokbaot i naes tumas! Sore mo glad i bin kam long Alma from hem mo papa blong hem i lukluk nomo long Sevya.

I go long ol paren wetem ol pikinini we oli stap longwe long gospel, !gat strong tingting! Blong stap tingting from wanem wan enjel i no kam daon blong helpem pikinini blong yu blong sakem sin, save se Lod i putum wan enjel blong wol ia long rod blong hem: bisop o wan narafala Jos lida o ol givhan brata o sista. Sapos yu gohed blong livim kakae mo prea, sapos yu no putum wan taemtebol o wan taem blong God, mo sapos yu trastem Hem se i givim han blong Hem blong help—naoia o afta—bae yu faenemaot se God i tajem hat blong pikinini blong yu taem hem i jusum blong lisin. Hemia from se, Kraes Hem i glad—Kraes hem i hop; Hem nao Hem i promes blong “ol gudfala samting we i stap kam.” So, trastem Jisas Kraes wetem pikinini blong yu, from Hem i paoa blong evri papa mo mama mo blong evri pikinini.

Yangfala Alma i laef wetem glad ia, afta we hem i bin gat eksperiens blong stap glad long Kraes. ?Be, olsem wanem nao hem i gohed blong gat glad ia tru long ol hadtaem mo tes? Hem i talem:

“Mo stat long tetaem ia go kasem naoia, mi no stop nating long wok, blong mi save tekem ol sol oli kam blong sakem sin, blong mi save tekem olgeta blong testem bigfala glad we mi bin testem

“Yes, mo nao luk, O boe blong mi, Lod i stap givim bigfala glad long mi from frut blong ol wok blong mi

“Mo mi bin kasem sapot long ol tes mo ol trabol long evri kaen.”

Alma i stat blong gat Glad long Kraes taem hem i yusum fet blong hem long Kraes mo krae from sore. Afta, Alma i yusum fet blong hem long Kraes taem hem i stap wok mo helpem ol narawan blong testem semmak glad ia. Ol wok ia we i stap gohed i mekem Alma i glad bigwan, iven long ol tes mo evri kaen trabol. Yu luk, “Lod i lavem hadwok,” mo hadwok we i lukluk nomo long Hem i karem ol blesing i kam. Iven ol tes we i had tumas, “glad blong Kraes i save kavremap olgeta.”

Wan narafala grup insaed long Buk blong Momon we oli mekem ol laef blong olgeta i lukluk nomo long Jisas Kraes mo gospel blong Hem lmo faenem glad, hem i ol pipol we oli statem Siti blong Helam—wan ples we oli save lukaotem mo tijim ol pikinini blong olgeta mo stap glad long fridom blong olgeta blong relijin. Ol stret mo gud pipol ia we oli stap laef long wan gudfala laef, wan grup blong ol rabis man oli atakem olgeta mo mekem oli kam slef mekem se oli no save praktisim relijin blong olgeta. Samtaem ol nogud samting oli hapen long ol gudfala pipol:

“Be Lod i luk se i stret blong stretem ol pipol blong hem; yes, hem i testem fasin blong olgeta blong save wet long taem mo fet blong olgeta.

“Be—eni man we i putum tras blong hem long Lod, semfala man ia bae Lod i leftemap hem long las dei. Yes, mo i olsem ia nao wetem ol pipol ia.”

?Olsem wanem nao ol pipol ia oli stanap strong tru ol tes mo safaring blong olgeta? Taem lukluk nomo long Kraes mo gospel blong Hem. Ol trabol blong olgeta i no talem huia olgeta, be wanwan long olgeta i tanem hem i go long God from oli luk olgeta wanwan olsem wan pikinini blong God, wan pikinini blong kavenan, mo wan disaepol blong Jisas Kraes. Taem oli tingbaot se huia olgeta mo oli singaot i go long God, oli kasem pis, paoa mo bigfala glad long Kraes:

“Alma mo ol pipol blong hem oli no leftemap ol voes blong olgeta i go long Lod, God blong olgeta, be oli bin kapsaetem hat blong olgeta long hem; mo hem i save ol tingting blong hat blong olgeta.

“Mo i bin hapen se voes blong Lod i kam long olgeta long ol hadtaem blong olgeta, i talem se: Leftemap hed blong yufala mo yufala i glad, from mi save kavenan we yufala i bin mekem wetem mi; mo bae mi mekem kavenan wetem ol pipol blong mi mo mekem olgeta oli go fri, oli aot long fasin blong stap slef.”

Olsem ansa, Lod “bae [i] mekem ol hevi samting long solda blong [olgeta] i nomo hevi. … Mo nao i bin hapen se ol hevi samting we oli putum long Alma mo ol brata blong hem oli nomo hevi; yes, Lod i mekem olgeta oli kam strong moa blong mekem se oli save karem ol hevi samting blong olgeta isi nomo, mo oli bin, wetem bigfala glad mo fasin blong save wet longtaem, folem evri wok blong Lod.” !Mas save se Ol Sent ia oli letem glad blong Kraes i kavremap ol trabol, ol harem nogud mo ol tes blong olgeta! Afta, long stret taem blong Lod, Hem i soem long Alma olsem wanem bae oli ronwe, mo Alma—wan profet blong God—i lidim olgeta i go long sefti.

Taem yumi stap lukluk nomo long Kraes mo folem profet blong Hem, yumi tu bae oli lidim yumi i go long Kraes mo glad blong gospel blong Hem. Presiden Nelson i tijim se: “glad i gat moa paoa, mo blong lukluk nomo long glad bae i karem paoa blong God i kam insaed long laef blong yumi. Semmak long evri samting, Jisas Kraes i stamba eksampol blong yumi, ‘taem hem i go blong i ded long kros, hem i luksave finis we bambae i save harem gud’ [Hibrus 12:2].”

Mama blong mi i jes ded nomo, mi no bin ting se bae i hapen. Mi lavem mama blong mi mo mi no plan blong lusum hem we hem i yang nomo. Be truaot long taem we hem i ded, mi mo famli blong mi i stap eksperiensem harem nogud mo glad. Mi save hemia from Kraes, !mama blong mi i no ded—hem i laef! Mo mi save hemia from Kraes mo ol prishud ki we i kambak long Jos ia, tru long profet Josef Smit, i mekem se bae mi stap wetem hem bakegen. !Glad blong Kraes i kavremap harem nogud ia blong lusum mama blong mi! Mi stap lanem se blong “tingting selestial” mo blong “letem God i win” hem i blong lukluk moa tu long glad we i gat blong Kraes.

Wetem lav Hem i invaetem yumi: “Kam long mi, nao mi bambae mi tekemaot ol hevi samting ya, mi mekem we yufala i spel gud.” Long nem blong Jisas Kraes, amen.