Hem We God I Lavem Moa

Bifo mi stat, bae mi mas talem long yu se tu long ol pikinini blong mi ae blong tufala i dak taem tufala i stap toktok antap long pulpit, mo mi filim se bae mi semmak long tufala. Mi gat fulap samting long maen blong mi naoia.

Famli blong mifala i gat sikis pikinini we samtaem oli jikim wanwan long olgeta se hem ia nao papa mo mama i lavem hem moa. Wanwan long olgeta i gat defren risen from wanem papa mo mama i lavem wan long olgeta moa. Lav blong mitufala long wanwan long ol pikinini blong mitufala i klin, mo i fulwan. Mitufala i no save lavem moa wan bitim wan narawan—wetem wanwan pikinini i bon i kam lav blong mifala i gro bigwan. Mi andastanem lav blong Papa long Heven long mi tru long lav we mi filim long ol pikinini blong mi.

Taem wanwan long olgeta i stap ripitim se hem nao mitufala i lavem moa, ating bae yu ting se wanwan bedrum long haos blong mifala i klin oltaem. Ol problem insaed long wan rilesensip bitwin wan papa mo mama mo pikinini i go daon taem lukluk nomo long lav.

Samtaem, mi save luk olsem wanem hemia i save lid i go long wan famli raorao, afta bae mi talem wan samting olsem “Oke, mi taet nao, be bae mi no talem long yufala huia nao mitufala i lavem moa, yufala i save finis se huia nao mitufala i lavem moa.” Gol blong mi i blong mekem se olgeta sikis pikinini ia i filim se olgeta evriwan i win mo bae i nomo gat filing ia blong huia i gud moa—!bae i olsem kasem nekis taem!

Long Gospel blong hem, Jon i tokbaot hemwan olsem wan disaepol we “Jisas i lavem hem tumas,” i olsem se lav ia i blong hem nomo. Mi laekem blong tingting se from hemia Jon i filim se Jisas i lavem hem fulwan. Nifae i givim semmak tingting taem hem i raetem,“mi glad from Jisas blong mi .” Yes i tru, Sevya i no blong Nifae o Jon nomo, be yet tabu fasin mo rilesensip blong Nifae wetem Jisas blong “hem” i lidim hem i go olsem we hem i tokbaot Sevya.

?Hemia i no naes tumas se i gat ol taem we yumi save filim se oli luksave yumi mo lavem yumi fulwan? Nifae i save singaotem Hem, Jisas blong “hem”, yumi tu yumi save singaot olsem ia. Lav blong Sevya blong yumi i “kaen lav ia we i moa hae, i moa tabu, i moa strong,” mo bae Hem i givim kasem taem we bae yumi “fulap.” Tabu lav i fulap oltaem, mo Hem i lavem wanwan long yumi moa. Lav blong God i blong yumi evriwan, olsem tu sekol we tufala i krosem tufala (Venn diagram), i olsem yumi evriwan i joen tugeta. Iven sapos yumi defren long sam pat, lav blong Hem i stap long evri ples we yumi kam tugeta.

?Hem i no wan sapraes se bigfala komanmen hem i blong lavem God mo lavem olgeta raon long yumi? Taem mi stap luk ol pipol oli stap soem fasin blong Kraes blong lavem wanwan long olgeta, long mi, mi filim se lav ia i moa long lav blong olgeta ; hem i gat lav ia we i kam long God. Taem yumi lavem wanwan long yumi long wei ia fulwan, olsem we yumi nid blong mekem, bae yumi filim lav we i kam long heven tu .

Mekem se sapos wan we yumi kea long hem i stap longwe long tabu lav ia, yumi save folem paten ia—taem yumi mekem ol samting we bae i mekem yumi kam moa kolosap long God yumiwan mo afta mekem ol samting we i mekem yumi kam kolosap moa long olgeta—hem i ol aksen we oli no soem blong talem blong kam long Kraes.

Mi wantem tumas se mi save sidaon wetem yu mo askem yu wanem nao i mekem yu blong yu filim lav blong God. ?Ol wanem ves long skripja?, ?wanem ol stret fasin blong givim seves? ?Bae yu stap wea? ?Wanem miusik? ?Long kampani blong huia? Jeneral konfrens i wan gudfala ples blong lanem olsem wanem blong joenem yumi wetem lav blong heven.

Be ating yu filim se yu stap longwe long lav blong God. Ating bae i gat ol kores blong ol voes blong pulum daon tingting, mo tudak i fulumap ol tingting blong yu, ol mesej we oli stap talem long yu se yu no harem nogud mo konfius, yu wik tumas mo oli no wantem save long yu, yu defren o yu lus blong gat raet ia blong kasem stret lav ia blong heven. Sapos yu harem ol tingting ia plis harem hemia: ol voes ia oli rong evriwan. Wetem tras yumi save karemaot eni samting we i blokem yumi blong kasem lav blong heven—evri taem yumi singsing long hym ia i rimaenem yumi se Sevya blong yumi we yumi lavem mo i stret evriwan, Hem i jusum blong oli “kilim, brekem, [mo] [terem] hem from yumi,” evri taem we yu kakae bred we oli brekem. Yes i tru, Jisas i tekemaot ol sem long olgeta we oli harem nogud. Tru long kil we Hem i bin kasem, Hem i kam stret gud evriwan, mo Hem i save mekem yumi kam stret gud evriwan nomata we yumi harem nogud. Brok, stap Hemwan, brokbrok, mo Hem i kasem kil—mo yumi save filim olsem—be hemia bae i no seperetem yumi long lav blong God. “Pipol i harem nogud; lav i stret evriwan,” olsem we oli singsing long hem.

Maet yu save wan sikret abaot yuwan we i mekem yu filim se no gat man i lavem yu. Nomata wanem samting yu mekem long laef blong yu, hem i rong blong talem se bae yu no save kasem lav blong God. Samtaem yumi kros mo nogat fasin ia blong save wet longtaem wetem yumi bakegen bitim we yumi mekem long ol narawan. I gat plante moa samting blong yumi mekem long laef ia, be blong no laekem yuwan mo putum yuwan daon i no stap long lis ia. Nomata yumi filim se yumi olsem ia, ol han blong Hem i stap oltaem. No. I stap oltaem “[kasem] wea ples i nid blong i kasem” mo i haggem wanwan long yumi.

Taem we yumi no filim tabu lav ia blong heven, i no minim se lav ia i lus. Ol toktok blong God se “ol bigbigfala hil bambae oli stap brokbrok gogo, oli kam asis nomo, be fasin ya we [Hem i] lavem [yumi] neva bambae hem i save finis samtaem.” blong mekem i klia, hem i no wan posibol eksplenesen blong gat tingting ia se God i stop blong lavem yumi long laef ia !semmak olsem we i no posibol blong ol bigbigfala hil oli kamaot!

Mi rili laekem saen ia blong hil olsem pruf blong lav blong God. Saen ia, hem i bigfala paoa we i joenem ol stori blong olgeta we oli go long ol hil blong kasem revelesen mo wetem wanem we Aesea i tokbaot “hil ya we i haos blong mi” we “bambae i kam hae moa.” Haos blong Lod i hom blong ol naesfala kavenan blong yumi mo wan ples blong yumi evriwan i go long hem mo blong stretem gud mo gat lav blong Papa blong yumi raon long yumi . Mi laekem kamfot ia we i kam long sol blong mi taem mi givim ona fulwan long kavenan we mi mekem long taem blong baptaes mo faenem wan we i stap krae from wan i ded o harem nogud from wan samting mo traem blong helpem olgeta long wanem oli stap gotru long hem. ?Hemia nao ol wei we yumi save draon fulwan long naesfala kavenan lav ia, hesed (lav)?

Sapos lav blong God i no lego yumi, ?from wanem nao yumi no stap filim oltaem? Blong letem yufala i save nomo: Mi no save. Be blong gat lav i no semmak nating blong stap filim lav, mo ating bae mi gat sam tingting we bae i helpem yu blong yu go faenem ol ansa long ol kwestin blong yu.

Ating yu stap traehad wetem harem nogud, tingting tumas, giaman long yu, stap yuwan, no hapi o eni nara samting we bae i stopem blong filim lav blong God long yu. Sapos hemia i tru, ol samting ia i save mekem yumi no filim wan samting. Blong samtaem, maet bae yu nomo save filim lav mo save blong Hem bae hem i inaf. Be mi stap tingting se yu save traem—wetem fasin blong save wet longtaem—wetem ol defren wei blong soem mo kasem lav ia blong heven. ?Yu save tekem step i gobak biaen long wanem i stap long fored blong yu afta ating wan nara step mo wan nara step i gobak biaen bakegen kasem taem we yu luk se spes i bigwan inaf sapos i nidim, kasem taem we yu “tingting selestial” from se taem yu stap lukluk long ol sta mo tingbaot ol wol we i nogat namba mo tru long Man we i Krietem olgeta?

Blong harem ol pijin oli singsing, blong filim san o win, o blong filim ren long skin blong mi, mo evri samting ia i mekem mi filim moa respek long God—wanwan long olgeta i joenem mi wetem heven. ?Maet kamfot blong ol fren we oli stap fetful bae i help? ?Maet miusik? ?O givim seves? ?Yu bin kipim wan rekod o jenol blong ol taem we joenem yu wetem God i klia long yu? Maet yu save invaetem olgeta we yu trastem blong serem wetem yu paoa we oli kasem long God we i joenem olgeta taem yu lukaotem blong kasem save mo stap sef.

?Mi stap tingting se, sapos Jisas i jusum wan ples we yu mo Hem bae i mit long hem, wan praevet ples we bae yu lukluk nomo long Hem, maet Hem i jusum ples we hem i blong yuwan nomo, wan ples we yu stap go long hem taem yu harem nogud o stap long bigfala nid? ?Wan ples we yu filim se yu stap yuwan be i tru se yu no stap yuwan, wan ples we maet bae Hem nomo i save travel i go long hem be Hem i rere finis blong mitim yu long ples ia taem yu kam? ?Sapos yu stap wet long Hem blong i kam, maet Hem i stap finis long ples ia, o i save kasem yu?

Sapos yu filim lav blong Hem long laef blong yu naoia, plis traem blong no holemtaet blong yuwan, be serem long evriwan. Serem lav ia long evri ples we yu go. Wan long ol merikel insaed long plan blong God hem i taem we yumi traem blong serem lav blong Jisas, olsem we yumi faenem long semmak prinsipol ia, “be man we i lusum laef blong hem from mi, hem bambae i kasem laef blong hem.”

Blong gat lav blong God, i protektem yumi long ol strong win blong laef be tu i mekem ol taem ia i moa hapi—ol dei blong stap glad tugeta, taem san i saen long skae, i saen moa tru long san we i saen long sol blong yumi.

Bae yumi kam olsem “rus blong tri we i holemtaet graon” long Jisas blong yumi mo lav blong Hem. Letem yumi lukaotem mo lavem eksperiens ia blong filim lav mo paoa blong Hem long ol laef blong yumi. Glad blong gospel i stap blong yumi evriwan, hem i no jes blong olgeta we oli no hapi, oli sakemaot olgeta. Glad i stamba tingting blong yumi, hem i no wan presen nomo taem yumi winim ol hadtaem blong yumi. Yumi gat ol gudfala risen blong “save hapi mo kam fulap long lav long God mo long evri man.” Letem yumi fulap wetem lav blong God. Long nem blong Jisas Kraes, amen.