Ol Toktok blong Kraes mo Tabu Spirit Bae I Lidim Yumi i Go long Trutok
Blong save naesfala plan ia, bae i helpem yumi save se yumi ol pikinini blong God mo yumi save kam olsem Hem.
God i Papa blong yumi long Heven. Yumi ol spirit Pikinini blong Hem, mo oli krietem yumi folem pikja blong Hem nomo. Taswe, wanwan long yumi, olsem wan pikinini blong God, i gat wan tabu paoa blong kam olsem Hem.
Yumi bin stap wetem Hem olsem ol spirit bifo yumi kam long wol ia. Papa long Heven, olsem spirit papa blong yumi, i wantem wanem i moa gud blong yumi, mo Hem i bin rere long wan plan blong yumi kasem ol bigfala blesing blong Hem, we i blong yumi nomo ded mo kasem laef we i no save finis. Folem plan ia, yumi, olsem ol spirit pikinini, bae oli givim ejensi long yumi blong jusum plan blong Hem. Blong kam long wol ia, bae yumi livim ples blong God, fogetem laef blong yumi bifo laef long wol ia, kasem wan bodi blong mit mo bun, kasem ol eksperiens blong yumiwan, mo mekem fet i kam antap. Wetem ol bodi blong yumi blong mit mo bun, olsem ol man we oli folem fasin blong wol, yumi save foldaon long temtesen, mo no kam klin mo stap longwe long God, mo no save gobak long tabu ples blong Hem. From lav blong Papa long Heven we i nogat en long yumi, Hem i sendem Pikinini blong Hem, Jisas Kraes, blong i kam Sevya blong yumi. Tru long Sakrifaes blong Hem, Atonmen, blong Jisas Kraes i mekem i posibol blong yumi, taem Hem i pemaot ol sin blong yumi mo Hem i girap bakegen long ded mo kasem laef we i no save finis.
Mi glad tumas from ol naesfala trutok—wanem we yumi singaotem plan blong Papa blong fasin blong sevem man, plan blong sore, o bigfala plan blong Hem blong fasin blong stap glad. Blong stap lanem ol trutok ia i helpem mi blong luksave huia mi mo ol gudfala blesing blong kam olsem wan god mo laef we i no save finis we God i rere blong yumi. Profet Nifae i bin tijim long yumi rod ia: yumi mas “Taswe, … kakae gud long ol toktok blong Kraes; from luk, ol toktok blong Kraes bae i talem long yumi evri samting we yumi mas mekem.” Hem i gohed “Sapos yufala i go tru long rod, mo kasem Tabu Spirit, bae hem i soem long yufala evri samting we bae yufala i mas mekem.” Tedei, mi laekem blong serem hao ol toktok blong Kraes mo Tabu Spirit i bin helpem mi blong faenem ol impoten trutok blong pis long yang taem blong mi.
Ol Toktok blong Kraes Bae Oli Talem long [Yu] Evri Samting We [Yu] Mas mekem.
Olsem we Nifae i talem long ves 1 long Fas buk blong Nifae, mi tu mi bin “bon long wan gudfala papa mo mama.” Mi bin groap long Nagano, Japan, long wan hom we oli mekemsua se kastom ia blong gat fasin ia blong stap ones, wok strong wetem strong tingting, mo putum tingting i stap daon, i mas stap oltaem. Papa blong mi i bin wan man blong relijin. Mi stap wajem hem i prea long tebol blong wosip blong Shinto mo Buda evri moning mo evri naet. Nomata se mi no save se hem i stap prea long hu mo hem i stap prea from wanem, be mi biliv se sam paoa we mi no luk o God bae i “gat bigfala paoa blong sevem man” o helpem yumi sapos yumi prea wetem truhat.
Olsem ol nara yangfala, mi bin eksperiensem plante hadtaem. Mi stap traehad blong tingting, se laef i no fea mo i gat plante gud samting mo ol samting we oli nogud. Mi filim se mi lus mo no gat wan samting blong lidim mi long laef blong mi. Laef i sot tumas from long en bae mi ded. Laef bae i konfius taem yumi no save abaot plan ia blong fasin blong sevem man.
I no long taem afta we mi stat blong lanem Inglis long sekendri skul, evri studen long skul blong mi oli kasem wan kopi blong Niu Testeman. Nomata we mifala i no statem yet blong lanem Inglis, tija blong mifala i talem long mifala se bae mifala i mas lanem Inglis taem mifala i ridim Niu Testeman. Mi openem mo go tru ol samting we i stap insaed. Ol toktok insaed long Niu Testeman oli had tumas long mi. Ol toktok blong Niu Testeman long Japanis i had i semmak. Be, lis blong ol toktok mo kwestin blong sol we oli putum insaed long baebol bifo vesen blong Gideon Bible.ia i pulum tingting blong mi—ol kwestin abaot yu filim se yu stap yuwan, yu no save mekem wan samting, yu konfius, stap fesem ol hadtaem, mo plante moa. Wanwan long ol kwestin ia i gat ol skripja refrens blong ol ves mo ol pej insaed long Niu Testeman. Toktok we i pulum tingting blong mi hem i “Taem yu taet.” Refrens ia i lidim mi blong openem skripja long Matiu 11:28–30; long hemia we Jisas i talem long ol disaepol blong Hem:
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan abaot mi, nao bambae yufala i save faenem pis long laef blong yufala.
“Yok ya we mi putum long yufala, wok blong hem i isi nomo, mo ol samting we mi givim oli no hevi.”
Hemia i fas taem we mi tingbaot we mi bin ridim ol toktok blong Jisas Kraes. Iven we mi no andastanem gud evri toktok we Hem i talem, ol toktok blong Hem i givim kamfot long mi, leftemap sol blong mi, mo givim mi hop. Moa mi ridim ol toktok blong Hem, moa mi filim se bae mi mas traem laef folem paoa blong toktok blong Hem. Mi neva bin filim olsem we mi filim long dei ia. Mi filim se oli lavem mi. Mi filim se Jisas Kraes i wan man we mi bin save.
Taem mi stap gohed blong stadi, mi filim se Hem i stap toktok stret long mi taem Hem i talem: “Olgeta we oli wantem tumas blong mekem ol samting we God i wantem, oli save harem gud, from we God bambae i givhan long olgeta blong mekem ol samting ia.”
Ol toktok blong Hem i fulumap hat blong mi long taem ia mi no save tokbaot gud ol filing blong mi long taem ia. Nomata we Jisas Kraes i laef plante handred yia i pas long wan kantri we mi no save gud long hem, mi ting se mi save trastem ol toktok blong Hem wetem ful hat blong mi. Mi hop sam dei long fiuja bae mi lanem moa abaot Jisas Kraes.
Tabu Spirit Bae I Soem long Yufala Evri Samting We Bae Yufala I Mas Mekem
Sam dei long fiuja ia i bin kam afta sam yia nomo i pas. Mi bin mitim wan hadwok fultaem misinari blong Jos Ia blong Jisas Kraes blong Ol Lata-dei Sent. Mo i no longtaem afta, mi bin mitim wan smol grup we i kaen mo stap glad blong Ol Lata-dei Sent we oli stap traehad blong folem Jisas Kraes. Nomata i tekem mi longtaem blong trastem olgeta fulwan, mi kam blong luk gospel ia we i kambak wanem we mi wantem tumas taem mi stap stadi long Niu Testeman—ol toktok blong Jisas Kraes mo hop, mo pis we i kam long ol toktok ia.
Wan spesel tabu eksperiens i bin taem ol misinari oli bin tijim mi blong prea. Mi lanem se yumi mas talem nem blong God. Taem yumi prea, yumi mas talemaot ol toktok we i kam long ol hat blong yumi, mo talem tangkyu mo serem hop mo wanem yumi wantem. Taem yumi talem evri samting we yumi wantem talem, yumi endem ol prea blong yumi wetem toktok ia, “Long nem blong Jisas Kraes, amen.” Yumi mekem hemia from Jisas i i givim komanmen ia long yumi blong prea long Nem blong Hem. Blong stap prea long Papa long Heven i helpem mi blong save huia Hem mo rilesensip blong mi wetem Hem—se mi wan spirit pikinini boe blong Hem we Hem i lavem. Mi lanem se, from Papa long Heven i save mo lavem mi, bae Hem i wantem toktok long miwan nomo, long wan spesel wei mo long plante narafala wei we bae mi andastanem tru long Tabu Spirit.
I gat wan taem we mi no luksave nating Tabu Spirit. Mi no bin andastanem, wetem tingting ia se, wanem nomo mi nidim blong mekem i blong folem ol step blong prea mo bae wan bigfala samting bae i hapen. Wan dei, long taem blong lesen wetem ol misinari, mi go aot long lesen blong mi spel smol taem. Mi stap konfius yet long wanem bae mi mekem wetem laef blong mi sapos gospel blong Jisas Kraes we i bin kambak, i tru.
Taem mi stap rere blong gobak insaed long rum we ol misinari oli stap wet long hem, mi harem voes blong wan long ol misinari. Mi harem nem blong mi. Mi no openem doa, mi stanap mo lisin long voes narasaed doa. Mi bin sapraes. Olgeta oli stap prea long Papa long Heven. Hemia we i stap prea i stap krae long God blong Hem bae i ansarem prea blong mi. Nomata we Japanis blong hem i no gud tumas, mi harem prea blong hem we i kam long hat i mekem hat blong mi i sopsop. Mi stap tingting, from wanem oli kea tumas long mi. Afta mi luksave se prea blong olgeta long bihaf blong mi i soemaot lav blong Papa long Heven mo lav blong Sevya Jisas Kraes long mi. Lav ia i givim mi hop, mo afta mi bin askem God wetem fet mo tru paoa long tingting. Taem mi mekem olsem, mi filim wan glad mo gudfala filing blong pis, yes, i tru se mi wan pikinini blong God mo we mi gat wan tabu paoa mo ples. Plan blong fasin blong sevem man i draon gud insaed long hat blong mi.
Presiden Russell M. Nelson i talem: “Wei we yu tingting abaot huia yu … bae i soem long evri desisen we yu mekem.” Long mi, hemia i tru tumas. Desisen ia blong folem Sevya Jisas Kraes taem mi kasem baptaes mo kasem presen ia we i Tabu Spirit i blesem laef blong mi bitim we mi save tingbaot. Taem yumi mekem kavenan blong baptaes blong yumi wetem God, yumi promes se bae yumi tekem long yumi nem blong Jisas Kraes, kipim olgeta komanmen blong God, mo givim seves long Hem long ful laef blong yumi. Papa blong yumi long Heven i promes long yumi se long en bae oltaem yumi gat Spirit blong Hem i stap wetem yumi—Tabu Spirit bae i gohed blong i lidim yumi.
Mi invaetem yu blong gat fet long mesej we Nifae i bin tijim long yumi—se ol toktok blong Kraes mo Tabu Spirit bae i soem “evri samting we [yu] mas mekem.” !Evri samting! Hem i wan naesfala presen we i kam long God.
Ol brata mo sista, mi glad mo talem tangkyu long Papa long Heven from plan ia blong fasin blong sevem man. From se Hem i lavem yumi, Hem i rere long wan wei blong yumi gobak long ples blong Hem tru long wan Stret Pikinini Ia Nomo blong Hem, Jisas Kraes. Taem yumi save naesfala plan ia bae i helpem yumi save se yumi ol pikinini blong God mo yumi save kam olsem Hem. Mi glad tumas from impoten trutok ia. Mi talem witnes blong mi se ol toktok blong Jisas Kraes mo Tabu Spirit bae i lidim yumi blong kasem laef we i no save finis. Mi save se ol samting ia oli tru. Long tabu nem blong Jisas Kraes, amen.