“ເຈົ້າຮັກເຮົາບໍ?”
ຖ້າເຮົາຢາກສະແດງຄວາມຮັກຂອງເຮົາຕໍ່ພຣະເຈົ້າ, ເຮົາຄວນເຂົ້າໃຈວິທີທີ່ພຣະອົງຮູ້ຈັກຄວາມຮັກຂອງເຮົາ.
ໃນຄຳອຸປະມາເລື່ອງລູກຊາຍທີ່ເສຍ, ໃນຕອນຕົ້ນຜູ້ເປັນອ້າຍບໍ່ສະບາຍໃຈເມື່ອນ້ອງຊາຍຂອງລາວໄດ້ກັບບ້ານຫລັງຈາກໄດ້ຕັດສິນໃຈຜິດ ແລະ “ໄດ້ຜານຊັບຂອງຕົນ [ດ້ວຍການໃຊ້ຊີວິດແບບຟຸມເຟືອຍ].” ຄວາມທະນົງຕົວ ແລະ ຄວາມຖືໂຕຂອງຜູ້ເປັນອ້າຍໄດ້ເຮັດໃຫ້ລາວບໍ່ຍອມຮັບເອົາຄວາມຊື່ນຊົມຈາກການກັບໃຈຂອງນ້ອງຊາຍຂອງລາວ. ເຮົາຍັງອາດປ່ອຍໃຫ້ໂອກາດຜ່ານໄປໂດຍບໍ່ບອກຄົນທີ່ເຮົາຮັກໃຫ້ຮູ້, ຜ່ານທາງຄຳເວົ້າ ແລະ ການກະທຳຂອງເຮົາ, ເຖິງຄວາມຮັກທີ່ຈິງໃຈຂອງເຮົາຕໍ່ເຂົາເຈົ້າ.
ມີຕົວຢ່າງທີ່ມີພະລັງຢ່າງຫລວງຫລາຍໃນພຣະຄຳພີກ່ຽວກັບການແບ່ງປັນ ແລະ ການຮັບດ້ວຍຄວາມຮັກທີ່ຈິງໃຈ ເຊັ່ນ: ນາງນາໂອມີ ແລະ ນາງຣຸດ, ອຳໂມນ ແລະ ກະສັດລາໂມໄນ, ລູກຊາຍທີ່ເສຍ ແລະ ພໍ່ຂອງລາວ, ພຣະຜູ້ຊ່ວຍໃຫ້ລອດ ແລະ ສານຸສິດຂອງພຣະອົງ.
ເມື່ອຄວາມຮັກທີ່ຖືກມອບໃຫ້ຢ່າງເສລີ ແລະ ໄດ້ຮັບຢ່າງຈິງໃຈ, ວົງຈອນແຫ່ງຄຸນນະທຳຈະຕາມມາດ້ວຍຄວາມຮັກ ທີ່ເພີ່ມຂຶ້ນລະຫວ່າງຜູ້ໃຫ້ ແລະ ຜູ້ຮັບ.
ຄວາມຮັກຂອງພຣະເຈົ້ານັ້ນສົມບູນແບບ, ບໍ່ມີທີ່ສິ້ນສຸດ, ຍືນຍົງ, ແລະ “ຫວານທີ່ສຸດ.” ມັນເຕີມເຕັມຈິດວິນຍານດ້ວຍ “ຄວາມຊື່ນຊົມຢ່າງໃຫຍ່ຫລວງ.” ເຖິງຢ່າງໃດກໍຕາມ, ບາງຄັ້ງເຮົາອາດພົບວ່າ ມັນຍາກທີ່ຈະຮັບຮູ້ຄວາມຮັກຂອງພຣະເຈົ້າໃນຊີວິດຂອງເຮົາ. ເຖິງຢ່າງໃດກໍຕາມ, ພຣະບິດາເທິງສະຫວັນທີ່ເຕັມໄປດ້ວຍຄວາມຮັກຢ່າງສົມບູນແບບປາດຖະໜາຢ່າງເລິກເຊິ່ງໃຫ້ເຮົາໄດ້ປະສົບກັບຄວາມຮັກຂອງພຣະອົງ ຈົນວ່າພຣະອົງ “ຮັບສັ່ງກັບ [ເຮົາ] ຕາມ … ຄວາມເຂົ້າໃຈ [ຂອງເຮົາ].” ພຣະອົງ ຈະ ສະແດງຄວາມຮັກຂອງພຣະອົງທີ່ມີຕໍ່ເຮົາໃນວິທີທີ່ ເຮົາ, ແຕ່ລະຄົນ, ສາມາດ ຮູ້ຈັກ. ເຮົາອາດປະສົບກັບຄວາມຮັກຂອງພຣະເຈົ້າທີ່ມີຕໍ່ເຮົາ ເມື່ອເຮົາສັງເກດເບິ່ງຄວາມງາມໃນທຳມະຊາດ, ຫລື ໄດ້ຮັບຄຳຕອບຕໍ່ຄຳອະທິຖານ, ຫລື ມີຄວາມຄິດໃນຈິດໃຈຂອງເຮົາໃນຊ່ວງເວລາທີ່ຕ້ອງການ, ຫລື ປະສົບກັບຊ່ວງເວລາແຫ່ງຄວາມຊື່ນຊົມອັນຫວານຊື່ນ. ການສະແດງໃຫ້ປະຈັກທີ່ຍິ່ງໃຫຍ່ທີ່ສຸດ ທີ່ພຣະບິດາເທິງສະຫວັນມີຕໍ່ເຮົາ ທີ່ກ້ອງກັງວານທັງໃນຈິດໃຈ ແລະ ຫົວໃຈ ຄືເມື່ອພຣະອົງຍອມໃຫ້ພຣະບຸດທີ່ຮັກຂອງພຣະອົງມອບພຣະອົງເອງໃຫ້ເປັນຜູ້ໄຖ່ບາບ.
ເຊັ່ນດຽວກັບຜູ້ເປັນອ້າຍໃນລູກຊາຍທີ່ເສຍ, ຄວາມສົນໃຈຂອງເຮົາມັກຈະຈົດຈໍ່ຢູ່ທີ່ຕົວເຮົາເອງ. ເຮົາໝົກໝຸ້ນຢູ່ກັບການສະແຫວງຫາຫລັກຖານເຖິງຄວາມຮັກຂອງພຣະເຈົ້າທີ່ມີຕໍ່ ເຮົາ ແລະ ເຮົາກໍເກີດຫງຸດຫງິດໃຈເມື່ອເຮົາບໍ່ເຫັນມັນ. ແຕ່ຄວາມຂັດແຍ້ງທີ່ງົດງາມຄື ຍິ່ງເຮົາຈົດຈໍ່ຢູ່ກັບ ການສະແດງຄວາມຮັກຂອງເຮົາ ຕໍ່ພຣະເຈົ້າຫລາຍເທົ່າໃດ, ເຮົາຍິ່ງຈະ ຮູ້ຈັກ ເຖິງຄວາມຮັກຂອງພຣະອົງທີ່ມີຕໍ່ເຮົາຫລາຍຂຶ້ນເທົ່ານັ້ນ. ບາງທີນີ້ອາດເປັນເຫດຜົນທີ່ພຣະຜູ້ຊ່ວຍໃຫ້ລອດໄດ້ຕອບຄຳຖາມ “ໃນກົດບັນຍັດແມ່ນຂໍ້ໃດ ທີ່ເປັນຂໍ້ໃຫຍ່ສຳຄັນທີ່ສຸດ?” ດ້ວຍຄຳເຊື້ອເຊີນທີ່ລຽບງ່າຍ ແລະ ສຳຄັນທີ່ວ່າ: “ຈົ່ງຮັກພຣະຜູ້ເປັນເຈົ້າ ພຣະເຈົ້າຂອງເຈົ້າດ້ວຍສຸດໃຈ, ດ້ວຍສຸດຈິດ, ແລະ ດ້ວຍສຸດຄວາມຄິດຂອງເຈົ້າ.”
ບາງເທື່ອວິທີທີ່ເຮົາສະແດງຄວາມຮັກຂອງເຮົາຕໍ່ຄົນທີ່ເຮົາຮັກຫລາຍທີ່ສຸດ ອາດບໍ່ແມ່ນວິທີທີ່ເຂົາເຈົ້າຮູ້ຈັກຄວາມຮັກສະເໝີໄປ. ສິ່ງນີ້ອາດເຮັດໃຫ້ທັງຜູ້ໃຫ້ ແລະ ຜູ້ຮັບຫງຸດຫງິດໃຈ. ອາດເປັນປະໂຫຍດທີ່ຈະຖາມຄົນທີ່ເຮົາຮັກວ່າເຂົາເຈົ້າຮູ້ຈັກການສະແດງຄວາມຮັກໄດ້ແນວໃດ. ເຊັ່ນດຽວກັນ, ຖ້າເຮົາຢາກສະແດງຄວາມຮັກຂອງເຮົາຕໍ່ພຣະເຈົ້າ, ເຮົາຄວນເຂົ້າໃຈວິທີທີ່ພຣະອົງຮູ້ຈັກຄວາມຮັກຂອງເຮົາ. ໂຊກດີທີ່, ພຣະອົງໄດ້ລະບຸວິທີຕ່າງໆໄວ້ໃນພຣະຄຳພີ ທີ່ເຮົາສາມາດສະແດງຄວາມຮັກຂອງເຮົາຕໍ່ພຣະອົງ.
ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?
ໃນການແລກປ່ຽນທີ່ເປັນບົດຮຽນລະຫວ່າງເປໂຕກັບພຣະຜູ້ເປັນເຈົ້າທີ່ຟື້ນຄືນພຣະຊົນແລ້ວຢູ່ທີ່ທະເລຕີເບເຣຍ, ເຮົາຮຽນຮູ້ວິທີທີ່ເຮົາສາມາດສະແດງຄວາມຮັກຂອງເຮົາຕໍ່ພຣະຜູ້ເປັນເຈົ້າ.
“ພຣະເຢຊູໄດ້ກ່າວແກ່ຊີໂມນເປໂຕ, ຊີໂມນ, ລູກຂອງໂຢນາເອີຍ, ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ? ໂດຍ ພຣະອົງເຈົ້າເອີຍ; ພຣະອົງຮູ້ຈັກວ່າຂ້ານ້ອຍຮັກພຣະອົງ.”
ຄຳຖາມສຳຄັນໃນຂໍ້ນີ້ ທີ່ຖາມໂດຍພຣະຜູ້ເປັນເຈົ້າແມ່ນ “ເຈົ້າຮັກເຮົາ ຫລາຍ ກວ່າ ສິ່ງເຫລົ່ານີ້ບໍ?” ເຮົາສະແດງຄວາມຮັກຂອງເຮົາຕໍ່ພຣະຜູ້ເປັນເຈົ້າ ເມື່ອເຮົາຍົກພຣະອົງໄວ້ເໜືອ “ສິ່ງເຫລົ່ານີ້,” ແລະ “ສິ່ງເຫລົ່ານີ້” ສາມາດເປັນໃຜກໍໄດ້, ກິດຈະກຳໃດກໍໄດ້, ຫລື ສິ່ງໃດກໍຕາມທີ່ເຮັດໃຫ້ພຣະອົງບໍ່ສາມາດມີອິດທິພົນສຳຄັນທີ່ສຸດໃນຊີວິດຂອງເຮົາ.
ຈະບໍ່ມີເວລາພຽງພໍໃນແຕ່ລະວັນ, ອາທິດ, ເດືອນ, ຫລື ປີ ເພື່ອເຮັດທຸກສິ່ງທີ່ເຮົາຕ້ອງການ ຫລື ຈຳເປັນໃຫ້ສຳເລັດ. ພາກສ່ວນໜຶ່ງຂອງການທົດສອບໃນຊ່ວງມະຕະແມ່ນການໃຊ້ຊັບພະຍາກອນອັນລ້ຳຄ່າຂອງເວລາສຳລັບສິ່ງທີ່ສຳຄັນທີ່ສຸດ ເພື່ອຄວາມດີນິລັນດອນຂອງເຮົາ ແລະ ປະຖິ້ມສິ່ງທີ່ບໍ່ສຳຄັນ.
ປະທານຣະໂຊ ເອັມ ແນວສັນ ໄດ້ກ່າວວ່າ: “ຄຳຖາມສຳລັບເຮົາແຕ່ລະຄົນ … ແມ່ນຄືກັນ. … ທ່ານ ເຕັມໃຈທີ່ຈະໃຫ້ພຣະເຈົ້າເປັນອິດທິພົນທີ່ສຳຄັນທີ່ສຸດໃນຊີວິດຂອງທ່ານບໍ່? ທ່ານຈະອະນຸຍາດໃຫ້ພຣະຄຳຂອງພຣະອົງ, ພຣະບັນຍັດຂອງພຣະອົງ, ແລະ ພັນທະສັນຍາຂອງພຣະອົງມີອິດທິພົນໃນສິ່ງທີ່ທ່ານເຮັດແຕ່ລະວັນບໍ່? ທ່ານຈະອະນຸຍາດໃຫ້ສຸລະສຽງຂອງພຣະອົງມີຄວາມສຳຄັນກວ່າສິ່ງອື່ນໆບໍ່? ທ່ານ ເຕັມໃຈ ທີ່ຈະເຮັດສິ່ງໃດກໍຕາມທີ່ພຣະອົງປະສົງໃຫ້ທ່ານເຮັດ ມີຄວາມສຳຄັນກວ່າຄວາມທະເຍີທະຍານທຸກຢ່າງຂອງທ່ານບໍ່? ທ່ານ ເຕັມໃຈ ທີ່ຈະໃຫ້ຄວາມປະສົງຂອງທ່ານຖືກກືນລົງໄປໃນພຣະປະສົງຂອງພຣະອົງບໍ່?” ເຮົາສະແດງການເປັນສານຸສິດ ແລະ ຄວາມຮັກຂອງເຮົາຕໍ່ພຣະເຈົ້າ ເມື່ອເຮົາໃຫ້ພຣະອົງມີຄວາມສຳຄັນອັນດັບໜຶ່ງ.
ຈົ່ງລ້ຽງຮັກສາແກະຂອງເຮົາເດີ
ໃນຂໍ້ຕໍ່ໄປຂອງການສົນທະນາດຽວກັນນີ້ລະຫວ່າງເປໂຕກັບພຣະຜູ້ຊ່ວຍໃຫ້ລອດ, ເຮົາຮຽນຮູ້ເຖິງອີກວິທີໜຶ່ງທີ່ພຣະຜູ້ເປັນເຈົ້າຮູ້ຈັກການສະແດງຄວາມຮັກຂອງເຮົາ: “[ພຣະຜູ້ເປັນເຈົ້າ] ໄດ້ກ່າວກັບເພິ່ນອີກເປັນຄັ້ງທີສອງ, ຊີໂມນ, ລູກຂອງໂຢນາເອີຍ, ເຈົ້າຮັກເຮົາບໍ? ເພິ່ນໄດ້ກ່າວກັບພຣະອົງວ່າ, “ໂດຍ, ພຣະອົງເຈົ້າເອີຍ; ພຣະອົງຮູ້ຈັກວ່າຂ້ານ້ອຍຮັກພຣະອົງ. ພຣະອົງໄດ້ກ່າວກັບເພິ່ນວ່າ, ຈົ່ງລ້ຽງຮັກສາແກະຂອງເຮົາເດີ.”
ເຮົາສະແດງຄວາມຮັກຂອງເຮົາຕໍ່ພຣະບິດາເທິງສະຫວັນ ເມື່ອເຮົາຮັບໃຊ້, ຮັບຟັງ, ຮັກ, ຍົກລະດັບ, ຫລື ປະຕິບັດສາດສະໜາກິດຕໍ່ລູກໆຂອງພຣະອົງ. ການຮັບໃຊ້ນັ້ນອາດລຽບງ່າຍ ເຊັ່ນ ການເບິ່ງ ຄົນອື່ນປາດສະຈາກການຕັດສິນ. ໃນ ພາກທີ 76 ຂອງຄຳສອນ ແລະ ພັນທະສັນຍາ, ເຮົາໄດ້ເຫັນແວັບໜຶ່ງເຖິງລັກສະນະຂອງຜູ້ທີ່ຈະສືບທອດລັດສະໝີພາບຊັ້ນສູງ: “ພວກເຂົາເຫັນດັ່ງທີ່ພວກເຂົາຖືກເຫັນ, ແລະ ຮູ້ດັ່ງທີ່ພວກເຂົາຖືກຮູ້.” ພວກເຂົາເຫັນຄົນອື່ນດັ່ງທີ່ພຣະເຈົ້າເຫັນ, ແລະ ພຣະອົງເຫັນພວກເຂົາດັ່ງທີ່ພວກເຂົາສາມາດກາຍເປັນ, ດ້ວຍສັກກະຍະພາບແຫ່ງລັດສະໝີພາບຂອງສະຫວັນ.
ຫລັງຈາກໄດ້ກັບບ້ານຈາກການເຜີຍແຜ່ຂອງຂ້າພະເຈົ້າ, ຂ້າພະເຈົ້າໄດ້ຮັບເອົາທຸລະກິດດູແລສະໜາມຫຍ້າ ທີ່ຂ້າພະເຈົ້າກັບນ້ອງຊາຍໄດ້ເລີ່ມເຮັດຕັ້ງແຕ່ຍັງເປັນໄວລຸ້ນ. ຂ້າພະເຈົ້າຍັງຫຍຸ້ງນຳການສຶກສາທີ່ມະຫາວິທະຍາໄລນຳອີກ. ອາທິດໜຶ່ງໃນລະດູໃບໄມ້ປົ່ງ, ຝົນທີ່ຕົກໜັກ ແລະ ການສອບຈົບຊັ້ນທີ່ໃກ້ເຂົ້າມາ ໄດ້ເຮັດໃຫ້ຂ້າພະເຈົ້າໜັກໃຈ ແລະ ເຮັດວຽກຕັດຫຍ້າບໍ່ທັນ.
ກາງອາທິດ ທ້ອງຟ້າໄດ້ແຈ່ມໃສຂຶ້ນ, ແລະ ຂ້າພະເຈົ້າໄດ້ວາງແຜນທີ່ຈະເຮັດວຽກຕັດຫຍ້າໃຫ້ທັນຫລັງເລີກຮຽນ. ແຕ່ເມື່ອຂ້າພະເຈົ້າໄປເຖິງບ້ານ, ລົດບັນທຸກ ແລະ ອຸປະກອນຂອງຂ້າພະເຈົ້າໄດ້ຫາຍໄປ. ດ້ວຍຄວາມແປກໃຈ, ຂ້າພະເຈົ້າໄດ້ໄປເບິ່ງເດີ່ນຕາມຕາຕະລາງ; ແຕ່ລະບ່ອນໄດ້ຖືກຕັດແຕ່ງຢ່າງສວຍງາມແລ້ວ. ບ່ອນສຸດທ້າຍໃນຕາຕະລາງ, ຂ້າພະເຈົ້າໄດ້ເຫັນນ້ອງຊາຍຂອງຂ້າພະເຈົ້າກຳລັງຕັດຫຍ້າຢູ່. ລາວເຫັນຂ້າພະເຈົ້າ, ຍິ້ມ, ແລະ ໂບກມື. ດ້ວຍຄວາມຊາບຊຶ້ງໃຈ, ຂ້າພະເຈົ້າໄດ້ໂອບກອດ ແລະ ຂອບໃຈລາວ. ການຮັບໃຊ້ທີ່ມີຄວາມໝາຍຂອງລາວໄດ້ເຮັດໃຫ້ຄວາມຮັກ ແລະ ຄວາມຈົງຮັກພັກດີທີ່ຂ້າພະເຈົ້າມີຕໍ່ລາວເລິກເຊິ່ງຍິ່ງຂຶ້ນ. ການຮັບໃຊ້ຊຶ່ງກັນແລະກັນເປັນວິທີທີ່ຊັດເຈນໃນການສະແດງຄວາມຮັກຂອງເຮົາຕໍ່ພຣະເຈົ້າ ແລະ ພຣະບຸດທີ່ຮັກຂອງພຣະອົງ.
ສາລະພາບພຣະຫັດຂອງພຣະອົງຢູ່ໃນທຸກສິ່ງທັງປວງ
ເຮົາຍັງສະແດງຄວາມຮັກຂອງເຮົາຕໍ່ພຣະເຈົ້າ ໂດຍການມີຫົວໃຈທີ່ກະຕັນຍູນຳອີກ. ພຣະຜູ້ເປັນເຈົ້າໄດ້ກ່າວວ່າ, “ບໍ່ມີສິ່ງໃດທີ່ມະນຸດຈະເຮັດໃຫ້ພຣະເຈົ້າຂຸ່ນເຄືອງ, … ຍົກເວົ້ນແຕ່ຜູ້ທີ່ບໍ່ສາລະພາບວ່າ ພຣະຫັດຂອງພຣະອົງຢູ່ໃນທຸກສິ່ງທັງປວງ.” ເຮົາສະແດງຄວາມຮັກຂອງເຮົາຕໍ່ພຣະເຈົ້າ ໂດຍການຍອມຮັບພຣະອົງວ່າເປັນແຫລ່ງຂອງທຸກສິ່ງທີ່ດີໃນຊີວິດຂອງເຮົາ.
ໃນຕອນຕົ້ນຂອງການເປີດບໍລິສັດ, ຄູ່ຮ່ວມທຸລະກິດຂອງຂ້າພະເຈົ້າ ແລະ ຂ້າພະເຈົ້າໄດ້ອະທິຖານຢ່າງພາກພຽນກ່ອນການປະຊຸມສຳຄັນ, ທູນຂໍຄວາມຊ່ວຍເຫລືອຈາກພຣະບິດາເທິງສະຫວັນ. ຄັ້ງແລ້ວຄັ້ງເລົ່າ, ພຣະເຈົ້າໄດ້ຕອບຄຳອະທິຖານຂອງພວກເຮົາ, ແລະ ການປະຊຸມຂອງພວກເຮົາໄດ້ເປັນໄປດ້ວຍດີ. ຫລັງຈາກການປະຊຸມຄັ້ງໜຶ່ງ, ຄູ່ຮ່ວມທຸລະກິດຂອງຂ້າພະເຈົ້າໄດ້ຊີ້ໃຫ້ເຫັນວ່າ ພວກເຮົາມັກຈະຂໍຄວາມຊ່ວຍເຫລືອຢ່າງວ່ອງໄວ ແຕ່ກັບຊ້າໃນການຂອບພຣະຄຸນ. ຈາກເວລານັ້ນມາ, ພວກເຮົາໄດ້ສ້າງນິໄສໃຫ້ອະທິຖານດ້ວຍຄວາມກະຕັນຍູຢ່າງຈິງໃຈ, ໂດຍຍອມຮັບວ່າພຣະຫັດຂອງພຣະຜູ້ເປັນເຈົ້າໄດ້ຢູ່ໃນຄວາມສຳເລັດຂອງພວກເຮົາ. ພວກເຮົາສະແດງຄວາມຮັກຂອງພວກເຮົາຕໍ່ພຣະອົງດ້ວຍ “ທັດສະນະແຫ່ງຄວາມກະຕັນຍູ.”
ຖ້າພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ
ອີກວິທີໜຶ່ງທີ່ເຮົາສະແດງຄວາມຮັກຂອງເຮົາຕໍ່ພຣະບິດາເທິງສະຫວັນ ແລະ ພຣະບຸດທີ່ຮັກຂອງພຣະອົງ ຄືການເລືອກທີ່ຈະເຊື່ອຟັງພວກພຣະອົງ. ພຣະຜູ້ຊ່ວຍໃຫ້ລອດໄດ້ກ່າວວ່າ, “ຖ້າພວກເຈົ້າຮັກເຮົາ ພວກເຈົ້າກໍຈະເຊື່ອຟັງກົດບັນຍັດຂອງເຮົາ.” ການເຊື່ອຟັງແບບນີ້ບໍ່ແມ່ນການຕາບອດ ຫລື ການບັງຄັບ ແຕ່ເປັນການສະແດງອອກເຖິງຄວາມຮັກທີ່ຈິງໃຈ ແລະ ເຕັມໃຈ. ພຣະບິດາຜູ້ສະຖິດໃນຢູ່ໃນສະຫວັນປະສົງໃຫ້ເຮົາ ຕ້ອງການ ທີ່ຈະເຊື່ອຟັງ. ຊິດສະເຕີ ທາມາຣາ ດັບເບິນຢູ ຣູເນຍ ໄດ້ເອີ້ນສິ່ງນີ້ວ່າ “ການເຊື່ອຟັງເພາະຄວາມຮັກ.” ເພິ່ນໄດ້ກ່າວວ່າ, “ເຖິງແມ່ນວ່າເຮົາບໍ່ໄດ້ມີການເຊື່ອຟັງທີ່ດີພ້ອມໃນເວລານີ້ ເທື່ອ, ແຕ່ເຮົາພະຍາຍາມເຊື່ອຟັງໃນ ເວລານີ້, ເພາະຄວາມຮັກ, ເລືອກທີ່ຈະຄົງຢູ່, ເທື່ອແລ້ວເທື່ອອີກ, ເພາະວ່າເຮົາຮັກພຣະອົງ.”
ພຣະບິດາເທິງສະຫວັນໄດ້ປະທານອຳເພີໃຈໃຫ້ເຮົາ ເພື່ອດົນໃຈເຮົາໃຫ້ ຕ້ອງການ ທີ່ຈະເລືອກພຣະອົງ. ວຽກງານ ແລະ ລັດສະໝີພາບຂອງພຣະອົງບໍ່ແມ່ນພຽງແຕ່ນຳຊີວິດນິລັນດອນມາໃຫ້ເທົ່ານັ້ນ ແຕ່ຍັງລວມທັງຄວາມຫວັງທີ່ວ່າ ຄວາມປາດຖະໜາສູງສຸດຂອງເຮົາຄືການກັບໄປຫາພຣະອົງນຳອີກ. ເຖິງຢ່າງໃດກໍຕາມ, ພຣະອົງຈະບໍ່ບັງຄັບໃຫ້ເຮົາເຊື່ອຟັງ. ໃນເພງສວດ “Know This, That Every Soul Is Free [ຈົ່ງຮູ້ເຖີດວ່າທຸກດວງວິນຍານເປັນອິດສະລະ],” ເຮົາຮ້ອງວ່າ:
ໃນຖານະຜູ້ນຳເຜີຍແຜ່, ພັນລະຍາຂອງຂ້າພະເຈົ້າ, ຄຣິສຕີນາ, ແລະ ຂ້າພະເຈົ້າໄດ້ຮັບແຮງບັນດານໃຈຈາກຜູ້ສອນສາດສະໜາຢ່າງຫລວງຫລາຍທີ່ເລືອກຈະເຊື່ອຟັງ ບໍ່ພຽງແຕ່ຍ້ອນວ່າມັນເປັນມາດຕະຖານຂອງຜູ້ສອນສາດສະໜາເທົ່ານັ້ນ ແຕ່ຍ້ອນວ່າເຂົາເຈົ້າຢາກສະແດງຄວາມຮັກຂອງເຂົາເຈົ້າຕໍ່ພຣະຜູ້ເປັນເຈົ້າ ໂດຍການເລືອກເປັນຕົວແທນຂອງພຣະອົງຢ່າງຖ່ອມຕົນ.
ແອວເດີ ແດວ ຈີ ເຣັນລັນ ໄດ້ກ່າວວ່າ: ເປົ້າໝາຍຂອງພຣະບິດາເທິງສະຫວັນໃນການເປັນພໍ່ແມ່ ບໍ່ແມ່ນຈະໃຫ້ລູກໆຂອງພຣະອົງ ເຮັດ ສິ່ງທີ່ຖືກຕ້ອງ; ແຕ່ແມ່ນໃຫ້ລູກໆຂອງພຣະອົງ ເລືອກ ທີ່ຈະເຮັດສິ່ງທີ່ຖືກຕ້ອງ ແລະ ໃນທີ່ສຸດກາຍເປັນເໝືອນດັ່ງພຣະອົງ. ຖ້າຫາກວ່າພຣະອົງພຽງແຕ່ປະສົງໃຫ້ເຮົາເຊື່ອຟັງເທົ່ານັ້ນ, ພຣະອົງຈະໃຊ້ລາງວັນ ແລະ ການລົງໂທດທັນທີ ທີ່ຈະມີອິດທິພົນຕໍ່ພຶດຕິກຳຂອງເຮົາ.” ເຮົາສະແດງຄວາມຮັກຂອງເຮົາຕໍ່ພຣະເຈົ້າ ເມື່ອເຮົາເລືອກທີ່ຈະເຊື່ອຟັງ ແລະ ຕິດຕາມພຣະອົງ.
ພຣະບິດາເທິງສະຫວັນຂອງເຮົາ ແລະ ພຣະຜູ້ຊ່ວຍໃຫ້ລອດຂອງເຮົາຮູ້ຈັກການສະແດງອອກເຖິງຄວາມຮັກຂອງເຮົາທີ່ມີຕໍ່ພວກພຣະອົງ ເມື່ອເຮົາໃຫ້ພວກພຣະອົງເປັນອັນດັບໜຶ່ງໃນຊີວິດຂອງເຮົາ, ຮັບໃຊ້ຊຶ່ງກັນແລະກັນ, ຮັບຮູ້ພອນທຸກປະການຈາກພວກພຣະອົງຢ່າງກະຕັນຍູ, ແລະ ເລືອກທີ່ຈະເຊື່ອຟັງ ແລະ ຕິດຕາມພວກພຣະອົງ.
ຂ້າພະເຈົ້າເປັນພະຍານວ່າ ເຮົາແຕ່ລະຄົນເປັນລູກຂອງພຣະເຈົ້າແທ້ໆ, ແລະ ພຣະອົງຮັກເຮົາຢ່າງສົມບູນແບບ. ຂ້າພະເຈົ້າເປັນພະຍານວ່າ ພຣະອົງປາດຖະໜາໃຫ້ເຮົາໄດ້ປະສົບກັບຄວາມຮັກຂອງພຣະອົງ ໃນວິທີທີ່ເຮົາຮູ້ຈັກ ແລະ ເຂົ້າໃຈ. ແລະ ຄວາມຂັດແຍ້ງທີ່ງົດງາມຄື ເຮົາຈະປະສົບກັບຄວາມຮັກຂອງພຣະອົງທີ່ມີຕໍ່ເຮົາຢ່າງເລິກເຊິ່ງຍິ່ງຂຶ້ນ ເມື່ອເຮົາສະແດງຄວາມຮັກຂອງເຮົາຕໍ່ພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.