ເຂົາຄືຜູ້ຕັດສິນຕົວເຂົາເອງ
ຖ້າເຮົາໄດ້ໃຊ້ສັດທາໃນພຣະເຢຊູຄຣິດ, ໄດ້ເຮັດ ແລະ ຮັກສາພັນທະສັນຍາກັບພຣະເຈົ້າ, ແລະ ໄດ້ກັບໃຈຈາກບາບຂອງເຮົາ, ແລ້ວບ່ອນພິພາກສາກໍຈະເປັນທີ່ພໍໃຈ.
ພຣະຄຳພີມໍມອນໄດ້ຈົບລົງດ້ວຍຄຳເຊື້ອເຊີນຈາກໂມໂຣໄນໃຫ້ “ມາຫາພຣະຄຣິດ,” “ຖືກເຮັດໃຫ້ດີພ້ອມໃນພຣະອົງ,” “ປະຕິເສດ [ເຮົາເອງ] ຈາກຄວາມບໍ່ເປັນເໝືອນດັ່ງພຣະເຈົ້າທຸກຢ່າງ,” ແລະ “ຮັກພຣະເຈົ້າດ້ວຍສຸດພະລັງ, ຄວາມນຶກຄິດ, ແລະ ກຳລັງ [ຂອງເຮົາ].” ໜ້າສົນໃຈທີ່, ປະໂຫຍດສຸດທ້າຍຂອງຄຳແນະນຳຂອງເພິ່ນແມ່ນລວມທັງການຟື້ນຄືນຊີວິດ ແລະ ການພິພາກສາຄັ້ງສຸດທ້າຍ.
ພຣະອົງໄດ້ກ່າວວ່າ, “ໃນບໍ່ຊ້ານີ້ຂ້າພະເຈົ້າຈະໄປພັກຢູ່ໃນທີ່ສຸຂະເສີມຂອງພຣະເຈົ້າ, ຈົນກວ່າວິນຍານ ແລະ ຮ່າງກາຍຂອງຂ້າພະເຈົ້າຈະເຂົ້າຮ່ວມກັນອີກ, ແລະ ຂ້າພະເຈົ້າຈະຖືກນຳອອກມາດ້ວຍໄຊຊະນະທາງອາກາດ, ເພື່ອມາພົບທ່ານຕໍ່ໜ້າບ່ອນພິພາກສາອັນໜ້າ ພໍພຣະໄທ ຂອງພຣະເຢໂຮວາຜູ້ຍິ່ງໃຫຍ່, ຜູ້ພິພາກສາຜູ້ສະຖິດນິລັນດອນຂອງທັງຄົນເປັນ ແລະ ຄົນຕາຍ.”
ຂ້າພະເຈົ້າສົນໃຈກັບການໃຊ້ຄຳຂອງໂມໂຣໄນ ທີ່ວ່າ “ພໍພຣະໄທ” ເພື່ອບັນຍາຍເຖິງການພິພາກສາຄັ້ງສຸດທ້າຍ. ສາດສະດາຄົນອື່ນໆໃນພຣະຄຳພີມໍມອນກໍໄດ້ບັນຍາຍເຊັ່ນດຽວກັນເຖິງການພິພາກສາວ່າເປັນ “ວັນອັນຮຸ່ງເຮືອງເຫລືອງເຫລື້ອມ” ແລະ ເປັນວັນທີ່ເຮົາຄວນ “ຄອຍຖ້າດ້ວຍຕາແຫ່ງສັດທາ.” ແຕ່ສ່ວນຫລາຍເມື່ອເຮົາຄອຍຖ້າວັນແຫ່ງການພິພາກສາ, ຄຳອະທິບາຍຂອງສາດສະດາຈະເກີດຂຶ້ນໃນໃຈ, ເຊັ່ນຄວາມ “ອັບອາຍ ແລະ ຮູ້ສຶກຜິດອັນເປັນຕາຢ້ານ,” “ສະທ້ານຢ້ານກົວ,” ແລະ “ຄວາມທຸກທໍລະມານອັນບໍ່ມີບ່ອນສຸດ.”
ຂ້າພະເຈົ້າເຊື່ອວ່າ ຄວາມແຕກຕ່າງຢ່າງຊັດເຈນໃນພາສານີ້ ບົ່ງບອກວ່າຄຳສອນຂອງພຣະຄຣິດໄດ້ເຮັດໃຫ້ໂມໂຣໄນ ແລະ ສາດສະດາຄົນອື່ນໆຄອຍຖ້າວັນທີ່ຍິ່ງໃຫຍ່ນັ້ນ ດ້ວຍຄວາມກະຕືລືລົ້ນ ແລະ ດ້ວຍຄວາມຫວັງ ແທນທີ່ຈະຢ້ານກົວດັ່ງທີ່ພວກເພິ່ນເຕືອນໄວ້ສຳລັບຜູ້ທີ່ບໍ່ໄດ້ກຽມພ້ອມທາງວິນຍານ. ໂມໂຣໄນເຂົ້າໃຈຫຍັງແດ່ທີ່ທ່ານ ແລະ ຂ້າພະເຈົ້າຕ້ອງຮຽນຮູ້?
ຂ້າພະເຈົ້າອະທິຖານຂໍຄວາມຊ່ວຍເຫລືອຈາກພຣະວິນຍານບໍລິສຸດ ຂະນະທີ່ພວກເຮົາພິຈາລະນາແຜນແຫ່ງຄວາມສຸກຂອງພຣະບິດາເທິງສະຫວັນ ແລະ ຄວາມເມດຕາ, ບົດບາດການຊົດໃຊ້ຂອງພຣະຜູ້ຊ່ວຍໃຫ້ລອດໃນແຜນຂອງພຣະບິດາ, ແລະ ວິທີທີ່ເຮົາຈະ “ຮັບຜິດຊອບຕໍ່ບາບ [ຂອງເຮົາ] ເອງໃນວັນແຫ່ງການພິພາກສາ.”
ແຜນແຫ່ງຄວາມສຸກຂອງພຣະບິດາ
ຈຸດປະສົງຫລັກຂອງແຜນຂອງພຣະບິດາແມ່ນເພື່ອໃຫ້ລູກໆທາງວິນຍານຂອງພຣະອົງມີໂອກາດທີ່ຈະໄດ້ຮັບຮ່າງກາຍທີ່ເປັນເນື້ອໜັງ, ຮຽນຮູ້ “ຄວາມດີຈາກຄວາມຊົ່ວ” ຜ່ານທາງປະສົບການໃນຊ່ວງມະຕະ, ເຕີບໂຕທາງວິນຍານ, ແລະ ກ້າວໜ້າຊົ່ວນິລັນດອນ.
ສິ່ງທີ່ຄຳສອນ ແລະ ພັນທະສັນຍາອ້າງເຖິງວ່າເປັນ “ອຳເພີໃຈທາງສິນທຳ” ເປັນຈຸດໃຈກາງໃນແຜນຂອງພຣະເຈົ້າ ທີ່ຈະນຳມາສູ່ຄວາມເປັນອະມະຕະ ແລະ ຊີວິດນິລັນດອນຂອງບຸດ ແລະ ທິດາຂອງພຣະອົງ. ຫລັກທຳທີ່ຈຳເປັນນີ້ຍັງຖືກບັນຍາຍຢູ່ໃນພຣະຄຳພີ ວ່າເປັນອຳເພີໃຈ ແລະ ອິດສະລະພາບທີ່ຈະເລືອກ ແລະ ກະທຳ.
ຄຳວ່າ “ອຳເພີໃຈທາງສິນທຳ” ແມ່ນຄຳແນະນຳ. ຄຳສັບຄ້າຍຄືກັນຂອງຄຳວ່າ “ສິນທຳ” ແມ່ນລວມທັງ “ຄວາມດີ,” “ຄວາມສຸດຈະຫລິດ,” ແລະ “ຄຸນນະທຳ.” ຄຳສັບຄ້າຍຄືກັນຂອງຄຳວ່າ “ອຳເພີໃຈ” ແມ່ນລວມທັງ “ການກະທຳ,” “ກິດຈະກຳ,” ແລະ “ວຽກງານ.” ດັ່ງນັ້ນ, “ອຳເພີໃຈທາງສິນທຳ” ຈຶ່ງສາມາດເຂົ້າໃຈໄດ້ວ່າເປັນຄວາມສາມາດ ແລະ ສິດທິພິເສດທີ່ຈະເລືອກ ແລະ ກະທຳເພື່ອຕົວເອງ ໃນທາງທີ່ເປັນຄວາມດີ, ຄວາມສຸດຈະຫລິດ, ຄຸນນະທຳ, ແລະ ຄວາມຈິງ.
ການນິລະມິດສ້າງຂອງພຣະເຈົ້າແມ່ນລວມທັງ “ທຸກສິ່ງທີ່ໄດ້ກະທຳ ແລະ ທຸກສິ່ງທີ່ຈະຖືກກະທຳ.” ແລະ ອຳເພີໃຈທາງສິນທຳແມ່ນ “ອຳນາດແຫ່ງການກະທຳທີ່ເປັນເອກະລາດ” ທີ່ຖືກອອກແບບຈາກສະຫວັນ ເພື່ອໃຫ້ອຳນາດແກ່ເຮົາໃນຖານະລູກໆຂອງພຣະເຈົ້າ ໃຫ້ກາຍເປັນຕົວແທນ ເພື່ອປະຕິບັດ ແລະ ບໍ່ແມ່ນເປັນພຽງວັດຖຸທີ່ຖືກກະທຳ.
ແຜ່ນດິນໂລກຖືກສ້າງເພື່ອເປັນສະຖານທີ່ ຊຶ່ງລູກໆຂອງພຣະບິດາເທິງສະຫວັນຈະໄດ້ຮັບການພິສູດວ່າ ພວກເຂົາຈະ “ກະທຳ ທຸກສິ່ງທັງປວງ ສິ່ງໃດກໍຕາມທີ່ພຣະຜູ້ເປັນເຈົ້າອົງເປັນພຣະເຈົ້າຂອງພວກເຂົາຈະບັນຊາພວກເຂົາຫລືບໍ່.” ຈຸດປະສົງຕົ້ນຕໍຂອງການສ້າງ ແລະ ການເປັນຢູ່ໃນຊ່ວງມະຕະຂອງເຮົາ ແມ່ນເພື່ອເປີດໂອກາດໃຫ້ເຮົາໄດ້ກະທຳ ແລະ ກາຍເປັນສິ່ງທີ່ພຣະຜູ້ເປັນເຈົ້າເຊື້ອເຊີນໃຫ້ເຮົາກາຍເປັນ.
ພຣະຜູ້ເປັນເຈົ້າໄດ້ແນະນຳເອນົກວ່າ:
“ຈົ່ງເບິ່ງ ອ້າຍເອື້ອຍນ້ອງເຫລົ່ານີ້ຂອງເຈົ້າ; ພວກເຂົາເປັນຝີມືຈາກມືຂອງເຮົາເອງ, ແລະ ເຮົາໄດ້ມອບຄວາມຮູ້ຂອງພວກເຂົາໃຫ້ແກ່ພວກເຂົາ, ໃນມື້ທີ່ເຮົາໄດ້ສ້າງພວກເຂົາ; ແລະ ໃນສວນເອເດນ, ເຮົາໄດ້ມອບອຳເພີໃຈໃຫ້ມະນຸດ;
“ແລະ ກັບອ້າຍເອື້ອຍນ້ອງຂອງເຈົ້າເຮົາໄດ້ກ່າວ, ແລະ ໄດ້ປະທານບັນຍັດໃຫ້, ວ່າພວກເຂົາຈະຮັກກັນແລະກັນ, ແລະ ວ່າ ພວກເຂົາຄວນເລືອກເອົາເຮົາ, ພຣະບິດາພວກເຂົາ.”
ຈຸດປະສົງພື້ນຖານສຳລັບການໃຊ້ອຳເພີໃຈແມ່ນໃຫ້ຮັກກັນແລະກັນ ແລະ ເລືອກພຣະເຈົ້າ. ແລະ ຈຸດປະສົງທັງສອງຢ່າງນີ້ສອດຄ່ອງກັບພຣະບັນຍັດຂໍ້ທຳອິດ ແລະ ທີສອງ ວ່າໃຫ້ຮັກພຣະເຈົ້າດ້ວຍສຸດໃຈ, ຈິດວິນຍານ, ແລະ ຄວາມຄິດຂອງເຮົາ, ແລະ ໃຫ້ຮັກເພື່ອນບ້ານຂອງເຮົາເໝືອນຮັກຕົນເອງ.
ໃຫ້ພິຈາລະນາວ່າເຮົາໄດ້ຮັບບັນຊາ—ບໍ່ແມ່ນແຕ່ການຕັກເຕືອນ ຫລື ແນະນຳ ແຕ່ໄດ້ຮັບບັນຊາ—ໃຫ້ໃຊ້ອຳເພີໃຈຂອງເຮົາເພື່ອຮັກກັນແລະກັນ ແລະ ເລືອກພຣະເຈົ້າ. ຂ້າພະເຈົ້າຂໍແນະນຳວ່າ ໃນພຣະຄຳພີ, ຄຳວ່າ “ສິນທຳ” ທີ່ຂະຫຍາຍຄວາມ ບໍ່ໄດ້ເປັນພຽງແຕ່ຄຳຄຸນນາມເທົ່ານັ້ນ ແຕ່ອາດເປັນພຣະບັນຊາຈາກພຣະເຈົ້າກ່ຽວກັບວິທີທີ່ເຮົາຄວນໃຊ້ອຳເພີໃຈຂອງເຮົານຳອີກ.
ເພງສວດທີ່ຄຸ້ນເຄີຍເພງໜຶ່ງຖືກຕັ້ງຊື່ໃຫ້ວ່າ “ເລືອກສິ່ງຖືກຕ້ອງ” ເພາະເຫດຜົນບາງຢ່າງ. ເຮົາບໍ່ໄດ້ຮັບພອນດ້ວຍອຳເພີໃຈທາງສິນທຳເພື່ອໃຫ້ເຮັດອັນໃດກໍໄດ້ຕາມໃຈຊອບ ເມື່ອໃດກໍໄດ້. ແທນທີ່, ອີງຕາມແຜນຂອງພຣະບິດາ, ເຮົາໄດ້ຮັບອຳເພີໃຈທາງສິນທຳເພື່ອໃຫ້ສະແຫວງຫາ ແລະ ປະຕິບັດຕາມຄວາມຈິງນິລັນດອນ. ໃນຖານະ “ເປັນຕົວແທນ [ຂອງຕົວເຮົາເອງ],” ເຮົາຄວນມີສ່ວນຮ່ວມຢ່າງກະຕືລືລົ້ນໃນອຸດົມການດີ, “ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈ [ຂອງເຮົາເອງ], ແລະ ເຮັດໃຫ້ເກີດຄວາມຊອບທຳຢ່າງຫລວງຫລາຍ.”
ຄວາມສຳຄັນນິລັນດອນຂອງອຳເພີໃຈທາງສິນທຳແມ່ນເນັ້ນໃສ່ເລື່ອງລາວພຣະຄຳພີກ່ຽວກັບສະພາກ່ອນເກີດ. ລູຊິເຟີໄດ້ກະບົດຕໍ່ແຜນຂອງພຣະບິດາສຳລັບລູກໆຂອງພຣະອົງ ແລະ ໄດ້ສະແຫວງຫາທີ່ຈະທຳລາຍອຳນາດແຫ່ງການກະທຳທີ່ເປັນເອກະລາດ. ທີ່ສຳຄັນ, ການຕໍ່ສູ້ຂອງມານຮ້າຍໄດ້ສຸມໃສ່ຫລັກທຳແຫ່ງອຳເພີໃຈທາງສິນທຳໂດຍກົງ.
ພຣະເຈົ້າໄດ້ອະທິບາຍວ່າ, “ດັ່ງນັ້ນ, ເພາະວ່າຊາຕານໄດ້ກະບົດຕໍ່ເຮົາ, ແລະ ໄດ້ສະແຫວງຫາທີ່ຈະທຳລາຍອຳເພີໃຈຂອງມະນຸດ, … ເຮົາຈຶ່ງໄດ້ເຮັດໃຫ້ມັນຖືກໂຍນລົງໄປ.”
ແຜນການທີ່ເຫັນແກ່ຕົວຂອງຜູ້ປໍລະປັກແມ່ນເພື່ອຖອດຄວາມສາມາດໃນການກາຍເປັນ “ຕົວແທນຂອງຕົນເອງ” ໄປຈາກລູກໆຂອງພຣະເຈົ້າ ຜູ້ທີ່ສາມາດກະທຳໃນຄວາມຊອບທຳ. ຈຸດປະສົງຂອງມັນຄືການມອບໝາຍໃຫ້ລູກໆຂອງພຣະບິດາເທິງສະຫວັນເປັນພຽງວັດຖຸທີ່ຖືກກະທຳເທົ່ານັ້ນ.
ການເຮັດ ແລະ ການກາຍເປັນ
ປະທານດາລິນ ເອັຈ ໂອກສ໌ ໄດ້ເນັ້ນໜັກວ່າ ພຣະກິດຕິຄຸນຂອງພຣະເຢຊູຄຣິດ ເຊື້ອເຊີນເຮົາໃຫ້ ຮູ້ ບາງສິ່ງ ແລະ ກາຍເປັນ ບາງສິ່ງ ຜ່ານທາງການໃຊ້ອຳເພີໃຈທາງສິນທຳຢ່າງຊອບທຳ. ເພິ່ນໄດ້ກ່າວວ່າ:
“ພຣະຄຣິສຕະທຳຄຳພີ ແລະ ພຣະຄຳພີສະໄໝໃໝ່ຫລາຍເຫລັ້ມກ່າວເຖິງການພິພາກສາຄັ້ງສຸດທ້າຍ ຊຶ່ງທຸກຄົນຈະໄດ້ຮັບລາງວັນຕາມການກະທຳ ຫລື ວຽກງານ ຫລື ຄວາມປາດຖະໜາຂອງໃຈເຂົາ. ແຕ່ພຣະຄຳພີອື່ນໆຂະຫຍາຍຄວາມເລື່ອງນີ້ ໂດຍອ້າງເຖິງການທີ່ເຮົາຖືກພິພາກສາໂດຍ ສະພາບ ທີ່ເຮົາໄດ້ບັນລຸ.
“ສາດສະດານີໄຟບັນຍາຍການພິພາກສາຄັ້ງສຸດທ້າຍໃນແງ່ຂອງສິ່ງທີ່ເຮົາ ໄດ້ກາຍເປັນ: ‘ແລະ ຖ້າຫາກການກະທຳຂອງພວກເຂົາສົກກະປົກ ພວກເຂົາຍ່ອມ ເປັນ ຄົນສົກກະປົກ; ແລະ ຖ້າຫາກພວກເຂົາ ເປັນ ຄົນສົກກະປົກກໍຕ້ອງຈຳເປັນວ່າຈະຢູ່ໃນອານາຈັກຂອງພຣະເຈົ້າບໍ່ໄດ້’ [1 ນີໄຟ 15:33; ເນັ້ນຄຳເນີ້ງ]. ໂມໂຣໄນປະກາດວ່າ, ‘ຄົນ ທີ່ ສົກກະປົກຈະຄົງສົກກະປົກຢູ່ຄືເກົ່າ; ແລະ ຄົນ ທີ່ ຊອບທຳຈະຄົງຊອບທຳຢູ່ຄືເກົ່າ’ [ມໍມອນ 9:14; ເນັ້ນຄຳເນີ້ງ].”
ປະທານໂອກສ໌ໄດ້ກ່າວຕໍ່ໄປວ່າ: “ຈາກຄຳສອນເຫລົ່ານັ້ນ ເຮົາສະຫລຸບໄດ້ວ່າ ການພິພາກສາຄັ້ງສຸດທ້າຍ ບໍ່ແມ່ນພຽງແຕ່ການປະເມີນການກະທຳທີ່ດີ ແລະ ຊົ່ວທັງໝົດ—ຄືສິ່ງທີ່ເຮົາໄດ້ ເຮັດ. ມັນເປັນການຮັບຮູ້ເຖິງຜົນສະທ້ອນສຸດທ້າຍຂອງການກະທຳ ແລະ ຄວາມຄິດ—ສິ່ງທີ່ເຮົາໄດ້ ກາຍເປັນ.”
ການຊົດໃຊ້ຂອງພຣະຜູ້ຊ່ວຍໃຫ້ລອດ
ວຽກງານ ແລະ ຄວາມປາດຖະໜາຂອງເຮົາຢ່າງດຽວບໍ່ໄດ້ ແລະ ບໍ່ສາມາດຊ່ວຍເຮົາໃຫ້ລອດໄດ້. “ຫລັງຈາກພວກເຮົາເຮັດທຸກຢ່າງໄດ້ແລ້ວ,” ພວກເຮົາຈະຄືນດີກັບພຣະເຈົ້າ ພຽງແຕ່ຜ່ານທາງຄວາມເມດຕາ ແລະ ພຣະຄຸນທີ່ມີໃຫ້ຜ່ານທາງການເສຍສະລະຊົດໃຊ້ອັນເປັນນິດ ແລະ ນິລັນດອນຂອງພຣະຜູ້ຊ່ວຍໃຫ້ລອດເທົ່ານັ້ນ.
ແອວມາໄດ້ປະກາດວ່າ, “ເລີ່ມເຊື່ອຖືໃນພຣະບຸດຂອງພຣະເຈົ້າ, ວ່າພຣະອົງຈະສະເດັດມາໄຖ່ຜູ້ຄົນຂອງພຣະອົງ, ແລະ ວ່າພຣະອົງຈະຮັບເອົາຄວາມເຈັບປວດ ແລະ ສິ້ນພຣະຊົນເພື່ອຊົດໃຊ້ແທນບາບຂອງພວກເຂົາ, ແລະ ວ່າພຣະອົງຈະລຸກຂຶ້ນຈາກຄວາມຕາຍອີກ, ຊຶ່ງຈະເຮັດໃຫ້ເກີດການຟື້ນຄືນຊີວິດ, ເພື່ອຄົນທັງປວງຈະໄດ້ຢືນຢູ່ຕໍ່ພຣະພັກຂອງພຣະອົງ, ເພື່ອຮັບການພິພາກສາໃນມື້ສຸດທ້າຍ ແລະ ເປັນມື້ພິພາກສາ, ຕາມວຽກງານຂອງພວກເຂົາ.”
“ພວກເຮົາເຊື່ອວ່າ ຜ່ານທາງການຊົດໃຊ້ຂອງພຣະຄຣິດ, ມະນຸດຊາດທັງປວງຈະລອດໄດ້ ໂດຍການປະຕິບັດຕາມກົດ ແລະ ພິທີການແຫ່ງພຣະກິດຕິຄຸນ.” ເຮົາມີຄວາມກະຕັນຍູຫລາຍພຽງໃດທີ່ບາບ ແລະ ການກະທຳຊົ່ວຂອງເຮົາຈະບໍ່ຢືນເປັນປະຈັກພະຍານຕ້ານເຮົາ ຖ້າຫາກເຮົາ “ເກີດໃໝ່,” ແທ້ໆ ໃຊ້ສັດທາໃນພຣະຜູ້ໄຖ່, ກັບໃຈດ້ວຍ “ໃຈຈິງ” ແລະ “ເຈດຕະນາອັນແທ້ຈິງ,” ແລະ “ອົດທົນຈົນເຖິງທີ່ສຸດ.”
ຄວາມຢຳເກງພຣະເຈົ້າ
ພວກເຮົາຫລາຍຄົນອາດຈະຄາດຫວັງວ່າ ການປະກົດຕົວຢູ່ບ່ອນພິພາກສາຂອງຜູ້ພິພາກສາຜູ້ສະຖິດນິລັນດອນ ຈະຄ້າຍຄືກັນກັບການດຳເນີນຄະດີຢູ່ໃນສານໂລກ. ຜູ້ພິພາກສາຈະເປັນປະທານ. ຫລັກຖານຈະຖືກນຳສະເໜີ. ຄຳຕັດສິນຈະຖືກສະແດງ. ແລະ ເຮົາອາດຈະບໍ່ແນ່ນອນໃຈ ແລະ ຢ້ານກົວຈົນກວ່າເຮົາໄດ້ຍິນຜົນຮັບໃນທີ່ສຸດ. ແຕ່ຂ້າພະເຈົ້າເຊື່ອວ່າ ລັກສະນະເຊັ່ນນີ້ບໍ່ຖືກຕ້ອງ.
ແຕກຕ່າງຈາກນັ້ນ ແຕ່ກ່ຽວຂ້ອງກັບຄວາມຢ້ານກົວຂອງມະນຸດ ເຮົາມັກຈະປະສົບກັບສິ່ງທີ່ພຣະຄຳພີບັນຍາຍວ່າເປັນ “ຄວາມຢຳເກງພຣະເຈົ້າ” ຫລື “ຄວາມຢຳເກງພຣະຜູ້ເປັນເຈົ້າ.” ຕ່າງຈາກຄວາມຢ້ານກົວທາງໂລກທີ່ເຮັດໃຫ້ເຮົາຕົກໃຈ ແລະ ກະວົນກະວາຍໃຈ, ຄວາມຢຳເກງພຣະເຈົ້າແມ່ນແຫລ່ງທີ່ເຮັດໃຫ້ເຮົາມີຄວາມສະຫງົບ, ອຸ່ນໃຈ, ແລະ ໝັ້ນໃຈ.
ຄວາມຢຳເກງທີ່ຊອບທຳແມ່ນລວມທັງຄວາມຮູ້ສຶກຊາບຊຶ້ງໃນຄວາມຄາລະວະ ແລະ ຄວາມຢຳເກງອົງພຣະເຢຊູຄຣິດເຈົ້າ, ການເຊື່ອຟັງພຣະບັນຍັດຂອງພຣະອົງ, ແລະ ຕັ້ງໃຈລໍຄອຍການພິພາກສາຄັ້ງສຸດທ້າຍ ແລະ ຄວາມເປັນທຳຈາກພຣະຫັດຂອງພຣະອົງ. ຄວາມຢຳເກງພຣະເຈົ້າເກີດຂຶ້ນຈາກຄວາມເຂົ້າໃຈທີ່ຖືກຕ້ອງກ່ຽວກັບລັກສະນະອັນສູງສົ່ງ ແລະ ພາລະກິດຂອງພຣະຜູ້ໄຖ່, ຄວາມເຕັມໃຈທີ່ຈະຍອມຮັບພຣະປະສົງຂອງພຣະອົງ, ແລະ ຄວາມຮູ້ທີ່ຊາຍ ແລະ ຍິງທຸກຄົນຈະຮັບຜິດຊອບຕໍ່ຄວາມປາດຖະໜາ, ຄວາມຄິດ, ແລະ ການກະທຳຂອງຕົນເອງ ໃນວັນແຫ່ງການພິພາກສາ.
ຄວາມຢຳເກງພຣະຜູ້ເປັນເຈົ້າບໍ່ແມ່ນຄວາມຢ້ານກົວທີ່ລັງເລໃຈກ່ຽວກັບການເຂົ້າເຝົ້າພຣະອົງ ເພື່ອຮັບການພິພາກສາ. ແທນທີ່, ມັນເປັນການຄາດຫວັງໃນທ້າຍທີ່ສຸດ ທີ່ຈະຍອມຮັບກ່ຽວກັບຕົວເອງໃນສິ່ງຕ່າງໆ “ຕາມທີ່ເປັນຈິງ” ແລະ “ຕາມທີ່ມັນຈະເປັນ.”
ທຸກຄົນທີ່ເຄີຍມີຊີວິດ, ກຳລັງມີຊີວິດຢູ່ຕອນນີ້, ແລະ ຍັງບໍ່ໄດ້ມາສູ່ໂລກເທື່ອ “ຈະຖືກນຳໄປຢືນຢູ່ຕໍ່ໜ້າບ່ອນພິພາກສາຂອງພຣະເຈົ້າ, ເພື່ອຮັບການພິພາກສາຈາກພຣະອົງຕາມວຽກງານ [ຂອງເຂົາ] ບໍ່ວ່າເຂົາຈະດີ ຫລື ຈະຊົ່ວ.”
ຖ້າຄວາມປາດຖະໜາຂອງເຮົາເປັນເພື່ອຄວາມຊອບທຳ ແລະ ວຽກງານຂອງເຮົາດີ—ໝາຍຄວາມວ່າເຮົາໄດ້ໃຊ້ສັດທາໃນພຣະເຢຊູຄຣິດ, ໄດ້ເຮັດ ແລະ ຮັກສາພັນທະສັນຍາກັບພຣະເຈົ້າ, ແລະ ໄດ້ກັບໃຈຈາກບາບຂອງເຮົາ—ແລ້ວບ່ອນພິພາກສາກໍຈະເປັນທີ່ພໍໃຈ. ດັ່ງທີ່ເອໂນດໄດ້ປະກາດ, ເຮົາຈະ “ຢືນຢູ່ຕໍ່ພຣະພັກຂອງ [ພຣະຜູ້ໄຖ່]; ເພາະໃນເວລານັ້ນ [ເຮົາ] ຈະເຫັນພຣະພັກຂອງພຣະອົງດ້ວຍຄວາມສຸກໃຈ.” ແລະ ໃນມື້ສຸດທ້າຍ ເຮົາຈະ “ໄດ້ຮັບລາງວັນອັນໄປສູ່ຄວາມຊອບທຳ.”
ໃນທາງກົງກັນຂ້າມ, ຖ້າຄວາມປາດຖະໜາຂອງເຮົາເປັນຄວາມຊົ່ວ ແລະ ວຽກງານຂອງເຮົາຊົ່ວຮ້າຍ, ແລ້ວບ່ອນພິພາກສາກໍຈະເປັນເຫດແຫ່ງຄວາມຫວາດກົວ. ເຮົາຈະມີ “ຄວາມຮູ້ອັນສົມບູນ,” ມີ “ການຈື່ຈຳ … ຢ່າງແຈ່ມແຈ້ງ,” ແລະ “ຮູ້ສຶກໃນຄວາມຜິດ [ຂອງເຮົາ] ເອງ.” “ພວກເຮົາຄົງຈະຊື່ນຊົມຖ້າຫາກພວກເຮົາສາມາດສັ່ງຫີນ ແລະ ພູເຂົາໃຫ້ຕົກລົງມາໃສ່ພວກເຮົາ ເພື່ອເຊື່ອງພວກເຮົາຈາກທີ່ປະທັບຂອງພຣະອົງ.” ແລະ ໃນມື້ສຸດທ້າຍ ເຮົາຈະ “ໄດ້ຮັບລາງວັນ [ຂອງເຮົາ] ທີ່ເປັນຄວາມຊົ່ວ.”
ໃນທີ່ສຸດ, ແລ້ວ, ເຮົາຄືຜູ້ຕັດສິນຕົວເຮົາເອງ. ບໍ່ມີໃຜຈະຕ້ອງບອກເຮົາວ່າຈະໄປໃສ. ໃນທີ່ປະທັບຂອງພຣະຜູ້ເປັນເຈົ້າ, ເຮົາຈະຮັບຮູ້ສິ່ງທີ່ເຮົາໄດ້ເລືອກເພື່ອກາຍເປັນໃນຊ່ວງມະຕະ ແລະ ຮູ້ດ້ວຍຕົວເອງ ບ່ອນທີ່ເຮົາຄວນຢູ່ໃນນິລັນດອນ.
ຄຳສັນຍາ ແລະ ປະຈັກພະຍານ
ການເຂົ້າໃຈວ່າການພິພາກສາຄັ້ງສຸດທ້າຍສາມາດ ເປັນທີ່ພໍໃຈ ບໍ່ແມ່ນເປັນພອນທີ່ສະຫງວນໄວ້ສຳລັບໂມໂຣໄນເທົ່ານັ້ນ.
ແອວມາໄດ້ບັນຍາຍພອນທີ່ໄດ້ສັນຍາໄວ້ໃຫ້ແກ່ສານຸສິດທີ່ອຸທິດຕົນຂອງພຣະຜູ້ຊ່ວຍໃຫ້ລອດ. ເພິ່ນໄດ້ກ່າວວ່າ:
“ຄວາມໝາຍຂອງຄຳວ່າການນຳກັບຄືນມານັ້ນຄືການນຳເອົາຄວາມຊົ່ວກັບມາຫາຄວາມຊົ່ວ, ຫລື ກາມມະລົມມາຫາກາມມະລົມ, ຫລື ຄວາມຕ່ຳຊ້າມາຫາຄວາມຕ່ຳຊ້າ—ຄວາມດີມາຫາສິ່ງທີ່ດີ; ຄວາມຊອບທຳມາຫາສິ່ງທີ່ຊອບທຳ; ຄວາມທ່ຽງທຳມາຫາສິ່ງທີ່ທ່ຽງທຳ; ຄວາມເມດຕາມາຫາສິ່ງທີ່ມີຄວາມເມດຕາ.
“… ປະຕິບັດໂດຍທ່ຽງທຳ, ຕັດສິນໂດຍຊອບທຳ, ແລະ ກະທຳຄວາມດີຕະຫລອດເວລາ; ແລະ ຖ້າຫາກລູກເຮັດສິ່ງທັງໝົດນີ້ ແລ້ວລູກຈະໄດ້ຮັບລາງວັນຂອງລູກ; ແທ້ຈິງແລ້ວ, ຄວາມເມດຕາຈະກັບຄືນມາຫາລູກອີກ; ຄວາມຍຸດຕິທຳຈະກັບຄືນມາຫາລູກອີກ; ການພິພາກສາອັນຊອບທຳຈະກັບຄືນມາຫາລູກອີກ; ແລະ ລູກຈະມີຄວາມດີເປັນລາງວັນແກ່ລູກອີກ.”
ຂ້າພະເຈົ້າເປັນພະຍານດ້ວຍຄວາມສຸກວ່າ ພຣະເຢຊູຄຣິດເປັນພຣະຜູ້ຊ່ວຍໃຫ້ລອດທີ່ຊົງພຣະຊົນຂອງເຮົາ. ຄຳສັນຍາຂອງແອວມາເປັນຄວາມຈິງ ແລະ ກ່ຽວຂ້ອງກັບທ່ານ ແລະ ຂ້າພະເຈົ້າ—ໃນມື້ນີ້, ມື້ອື່ນ, ແລະ ຊົ່ວນິລັນດອນ. ໃນພຣະນາມອັນສັກສິດຂອງອົງພຣະເຢຊູຄຣິດເຈົ້າ, ອາແມນ.