ຈົ່ງເຮັດພາກສ່ວນຂອງທ່ານດ້ວຍສຸດໃຈຂອງທ່ານ
ຈົ່ງໄວ້ວາງໃຈໃນພຣະຜູ້ຊ່ວຍໃຫ້ລອດ ແລະ ມີສ່ວນຮ່ວມ, ຢ່າງອົດທົນ ແລະ ພາກພຽນ, ໃນການເຮັດພາກສ່ວນຂອງທ່ານດ້ວຍສຸດໃຈຂອງທ່ານ.
ປີກາຍນີ້ ໃນລະຫວ່າງການເດີນທາງໄປເອີຣົບ, ຂ້າພະເຈົ້າໄດ້ໄປຢ້ຽມຢາມບ່ອນເຮັດວຽກເກົ່າຂອງຂ້າພະເຈົ້າ, ບໍລິສັດການບິນ ລຸບແທນຊາ ເຢຍລະມັນ ທີ່ສະໜາມບິນ ແຟຣງເຝີດ.
ເພື່ອຝຶກອົບຮົມນັກບິນຂອງເຂົາ, ເຂົາເຈົ້າມີເຄື່ອງຈຳລອງການບິນແບບເຕັມຮູບແບບທີ່ທັນສະໄໝຫລາຍເຄື່ອງ ຊຶ່ງສາມາດສ້າງສະຖານະການການບິນທີ່ເປັນແບບປົກກະຕິ ແລະ ສຸກເສີນທຸກປະເພດ. ຕະຫລອດໄລຍະຫລາຍປີໃນຖານະກັບຕັນ, ຂ້າພະເຈົ້າຕ້ອງຜ່ານການກວດສອບການບິນໃນເຄື່ອງຈຳລອງການບິນທຸກໆຫົກເດືອນ ເພື່ອຮັກສາໃບອະນຸຍາດນັກບິນໃຫ້ຢູ່ໃນປະຈຸບັນ. ຂ້າພະເຈົ້າຍັງຈື່ຊ່ວງເວລາທີ່ເຂັ້ມງວດ ແລະ ຄວາມວິຕົກກັງວົນອັນໜັກໜ່ວງນັ້ນໄດ້ດີ ແຕ່ກໍຈື່ຄວາມຮູ້ສຶກສຳເລັດຫລັງຈາກຜ່ານການກວດສອບໄດ້ເປັນຢ່າງດີເຊັ່ນກັນ. ຕອນນັ້ນຂ້າພະເຈົ້າຍັງໜຸ່ມ ແລະ ມັກຄວາມທ້າທາຍນີ້.
ລະຫວ່າງການຢ້ຽມຢາມ, ຜູ້ບໍລິຫານລຸບແທນຊາທ່ານໜຶ່ງໄດ້ຖາມຂ້າພະເຈົ້າວ່າ ຢາກຈະລອງບິນເຄື່ອງຈຳລອງ 747 ອີກຄັ້ງຫລືບໍ່.
ກ່ອນທີ່ຂ້າພະເຈົ້າຈະມີເວລາຄິດກ່ຽວກັບຄຳຖາມນີ້, ຂ້າພະເຈົ້າກໍໄດ້ຍິນສຽງໜຶ່ງ—ຊຶ່ງຟັງຄ້າຍຄືກັບສຽງຂອງຂ້າພະເຈົ້າເອງ—ເວົ້າວ່າ, “ແມ່ນແລ້ວ, ຂ້ອຍຢາກລອງແທ້ໆ.”
ທັນທີທີ່ຂ້າພະເຈົ້າໄດ້ເວົ້າຄຳນີ້ອອກໄປ, ຄວາມຄິດຢ່າງຫລວງຫລາຍກໍຫລັ່ງໄຫລເຂົ້າມາໃນຈິດໃຈຂອງຂ້າພະເຈົ້າ. ມັນນານມາແລ້ວຕັ້ງແຕ່ຂ້າພະເຈົ້າໄດ້ບິນ 747. ຕອນນັ້ນຂ້າພະເຈົ້າຍັງເປັນກັບຕັນໜຸ່ມຄົນໜຶ່ງທີ່ໝັ້ນໃຈ. ຕອນນີ້ ຂ້າພະເຈົ້າມີຊື່ສຽງທີ່ຕ້ອງຮັກສາໄວ້ໃນຖານະ ອະດີດຫົວໜ້ານັກບິນ. ຂ້າພະເຈົ້າຈະເຮັດໃຫ້ຕົວເອງຂາຍໜ້າຢູ່ຕໍ່ໜ້າມືອາຊີບເຫລົ່ານີ້ບໍ?
ແຕ່ມັນກໍສາຍເກີນໄປທີ່ຈະຖອຍ, ສະນັ້ນ ຂ້າພະເຈົ້າຈຶ່ງນັ່ງລົງທີ່ບ່ອນນັ່ງກັບຕັນ, ວາງມືໃສ່ເທິງແຜງຄວບຄຸມທີ່ຄຸ້ນເຄີຍ ແລະ ຮັກ, ແລະ ສຳຜັດ, ອີກເທື່ອໜຶ່ງ, ຄວາມຕື່ນເຕັ້ນຂອງການບິນເຄື່ອງບິນຂະໜາດໃຫຍ່ ຂະນະທີ່ແລ່ນໄປຕາມເສັ້ນທາງຂຶ້ນສູ່ທ້ອງຟ້າຈຳລອງ.
ຂ້າພະເຈົ້າດີໃຈທີ່ຈະບອກວ່າ ຖ້ຽວບິນນັ້ນໄດ້ປະສົບຄວາມສຳເລັດ, ເຄື່ອງບິນຍັງຄົງຢູ່ໃນສະພາບເດີມ, ແລະ ພາບລັກສະນະຂອງຂ້າພະເຈົ້າກໍເຊັ່ນກັນ.
ເຖິງປານນັ້ນ, ປະສົບການຄັ້ງນີ້ກໍຍັງເຮັດໃຫ້ຂ້າພະເຈົ້າຖ່ອມຕົວລົງ. ຕອນທີ່ຂ້າພະເຈົ້າຍັງໜຸ່ມ, ການບິນໄດ້ກາຍເປັນເລື່ອງທຳມະຊາດ. ຕອນນີ້ ຂ້າພະເຈົ້າຕ້ອງໃຊ້ສະມາທິຢ່າງເຕັມທີ່ ເພື່ອເຮັດສິ່ງທີ່ເປັນພື້ນຖານ.
ການເປັນສານຸສິດຕ້ອງອາໄສລະບຽບວິໄນ
ປະສົບການຂອງຂ້າພະເຈົ້າໃນເຄື່ອງຈຳລອງການບິນ ແມ່ນເປັນສິ່ງເຕືອນໃຈທີ່ສຳຄັນວ່າ ການທີ່ຈະເກັ່ງໃນທຸກດ້ານ—ບໍ່ວ່າຈະເປັນການບິນ, ການພາຍເຮືອ, ການຫຍິບແສ່ວ, ຫລື ການຮູ້ແຈ້ງ—ລ້ວນແຕ່ຕ້ອງອາໄສການມີວິໄນກັບຕົວເອງ ແລະ ການຝຶກຝົນຢ່າງສະໝ່ຳສະເໝີ.
ທ່ານອາດໃຊ້ເວລາຫລາຍປີໃນການຝຶກຝົນທັກສະ ຫລື ພັດທະນາພອນສະຫວັນ. ທ່ານອາດເຮັດວຽກໜັກຈົນກາຍເປັນເລື່ອງທຳມະຊາດ. ແຕ່ຖ້າທ່ານຄິດວ່ານັ້ນໝາຍເຖິງການຢຸດຝຶກຝົນ ແລະ ຮຽນຮູ້, ທ່ານຈະຄ່ອຍໆສູນເສຍຄວາມຮູ້ ແລະ ຄວາມສາມາດທີ່ທ່ານເຄີຍມີຈົນໝົດສິ້ນ.
ສິ່ງນີ້ໃຊ້ໄດ້ກັບທັກສະຕ່າງໆເຊັ່ນ ການຮຽນພາສາ, ການຫລິ້ນເຄື່ອງດົນຕີ, ແລະ ການບິນໃນສາຍການບິນ. ມັນຍັງໃຊ້ກັບການເປັນສານຸສິດຂອງພຣະຄຣິດນຳອີກ.
ເວົ້າງ່າຍໆກໍຄື, ການເປັນສານຸສິດຕ້ອງອາໄສການມີລະບຽບວິໄນກັບຕົນເອງ.
ມັນບໍ່ແມ່ນຄວາມພະຍາຍາມແບບທຳມະດາ, ແລະ ມັນບໍ່ໄດ້ເກີດຂຶ້ນໂດຍບັງເອີນ.
ສັດທາໃນພຣະເຢຊູຄຣິດເປັນຂອງປະທານ, ແຕ່ການໄດ້ຮັບມັນເປັນການເລືອກທີ່ມີສະຕິ ທີ່ຮຽກຮ້ອງໃຫ້ມີຄວາມຕັ້ງໃຈດ້ວຍສຸດ “ພະລັງ, ຄວາມນຶກຄິດ, ແລະ ກຳລັງ” ຂອງເຮົາ. ມັນເປັນການປະຕິບັດທີ່ຕ້ອງເຮັດທຸກມື້. ທຸກຊົ່ວໂມງ. ຕ້ອງອາໄສການຮຽນຮູ້ຢ່າງຕໍ່ເນື່ອງ ແລະ ຄວາມມຸ່ງໝັ້ນຢ່າງແນ່ວແນ່. ສັດທາຂອງເຮົາ, ຊຶ່ງແມ່ນຄວາມຈົງຮັກພັກດີຂອງເຮົາຕໍ່ພຣະຜູ້ຊ່ວຍໃຫ້ລອດ, ຈະເຂັ້ມແຂງຂຶ້ນ ເມື່ອມັນຖືກທົດສອບກັບອຸປະສັກທີ່ເຮົາປະເຊີນຢູ່ທີ່ນີ້ໃນຊ່ວງມະຕະ. ມັນຈະຍືນຍົງເພາະເຮົາບຳລຸງລ້ຽງມັນ, ເຮົາໝັ່ນນຳໃຊ້ມັນ, ແລະ ເຮົາບໍ່ເຄີຍຍອມແພ້.
ໃນທາງກົງກັນຂ້າມ, ຖ້າເຮົາລົ້ມເຫລວໃນການໃຊ້ສັດທາ ແລະ ອຳນາດແຫ່ງການຍອມຮັບ ໂດຍການເຮັດຕາມນັ້ນ, ເຮົາເລີ່ມໝັ້ນໃຈໜ້ອຍລົງກັບສິ່ງທີ່ເຮົາເຄີຍຖືວ່າສັກສິດ—ໝັ້ນໃຈໜ້ອຍລົງກັບສິ່ງທີ່ເຮົາເຄີຍຮູ້ວ່າເປັນຄວາມຈິງ.
ສິ່ງລໍ້ລວງທີ່ບໍ່ເຄີຍຈະເອີ້ນຫາເຮົາ ເລີ່ມເບິ່ງບໍ່ເປັນຕາຢ້ານ ແລະ ດຶງດູດໃຈຫລາຍຂຶ້ນ.
ໄຟແຫ່ງປະຈັກພະຍານໃນມື້ວານນີ້ ສາມາດໃຫ້ຄວາມອົບອຸ່ນແກ່ເຮົາໄດ້ພຽງຊົ່ວໄລຍະໜຶ່ງເທົ່ານັ້ນ. ຈຳເປັນຕ້ອງໄດ້ຮັບການບຳລຸງລ້ຽງຢ່າງຕໍ່ເນື່ອງ ເພື່ອໃຫ້ລຸກຢູ່ຢ່າງສົດໃສ.
ໃນພຣະຄຳພີໃໝ່, ພຣະຜູ້ຊ່ວຍໃຫ້ລອດໄດ້ສິດສອນຄຳອຸປະມາເລື່ອງເຈົ້ານາຍຜູ້ມອບຄວາມໄວ້ວາງໃຈອັນສັກສິດໃຫ້ແກ່ຄົນຮັບໃຊ້ແຕ່ລະຄົນຂອງເພິ່ນ—ຈຳນວນເງິນທີ່ເອີ້ນວ່າ ຕະລັນຕົນ. ຄົນຮັບໃຊ້ທີ່ໃຊ້ຕະລັນຕົນຢ່າງພາກພຽນ ໄດ້ເພີ່ມພູນຕະລັນຕົນນັ້ນ. ຄົນຮັບໃຊ້ທີ່ຝັງຕະລັນຕົນໄວ້ ໃນທີ່ສຸດກໍສູນເສຍມັນໄປ.
ບົດຮຽນຄືຫຍັງ? ພຣະເຈົ້າໄດ້ປະທານຂອງປະທານໃຫ້ເຮົາ—ເຊັ່ນ ຄວາມຮູ້, ຄວາມສາມາດ, ໂອກາດ—ແລະ ພຣະອົງປະສົງໃຫ້ເຮົາໃຊ້ ແລະ ເສີມຂະຫຍາຍມັນ ເພື່ອວ່າມັນຈະສາມາດເປັນພອນໃຫ້ແກ່ເຮົາ ແລະ ເປັນພອນໃຫ້ແກ່ລູກໆຄົນອື່ນໆຂອງພຣະອົງ. ສິ່ງນີ້ຈະບໍ່ເກີດຂຶ້ນຖ້າຫາກເຮົາວາງຂອງປະທານເຫລົ່ານີ້ໄວ້ເທິງຊັ້ນວາງສິ່ງຂອງ ຄືກັບລາງວັນທີ່ເຮົາຊົມເຊີຍເປັນບາງຄັ້ງບາງຄາວ. ຂອງປະທານຂອງເຮົາຈະເສີມຂະຫຍາຍພຽງແຕ່ເມື່ອເຮົານຳມັນໄປໃຊ້.
ທ່ານມີພອນສະຫວັນ
“ແຕ່ແອວເດີ ອຸກດອບ,” ທ່ານອາດເວົ້າ, “ຂ້ານ້ອຍບໍ່ມີຂອງປະທານ ຫລື ພອນສະຫວັນ—ຢ່າງໜ້ອຍ, ກໍບໍ່ແມ່ນສິ່ງໃດທີ່ມີຄ່າຂະໜາດນັ້ນ.” ບາງທີທ່ານອາດເບິ່ງຄົນອື່ນທີ່ມີພອນສະຫວັນທີ່ຊັດເຈນ ແລະ ໜ້າປະທັບໃຈ ແລະ ທ່ານຮູ້ສຶກວ່າຕົວເອງຂ້ອນຂ້າງທຳມະດາເມື່ອປຽບທຽບກັນ. ທ່ານອາດຄິດວ່າໃນຊີວິດກ່ອນເກີດ, ໃນວັນທີ່ຂອງຂວັນ ແລະ ພອນສະຫວັນອັນຍິ່ງໃຫຍ່ຖືກມອບໃຫ້, ຖາດຂອງທ່ານເບິ່ງຄືມີໜ້ອຍດຽວ—ໂດຍສະເພາະເມື່ອປຽບທຽບກັບຖາດຂອງຄົນອື່ນທີ່ມີກ່າຍກອງ ແລະ ລົ້ນເຫລືອ.
ໂອ, ຂ້າພະເຈົ້າປາດຖະໜາຢ່າງຍິ່ງທີ່ຈະໂອບກອດທ່ານ ແລະ ຊ່ວຍໃຫ້ທ່ານເຂົ້າໃຈຄວາມຈິງອັນຍິ່ງໃຫຍ່ທີ່ວ່າ: ທ່ານໄດ້ຮັບພອນທີ່ເປັນແສງສະຫວ່າງ, ເປັນລູກທາງວິນຍານຂອງພຣະເຈົ້າທີ່ບໍ່ມີຂອບເຂດ! ແລະ ທ່ານມີສັກກະຍະພາບໃນຕົວທ່ານເອງ ເກີນກວ່າທີ່ຈະຈິນຕະນາການໄດ້.
ດັ່ງທີ່ນັກກະວີໄດ້ກ່າວໄວ້, ທ່ານມາສູ່ໂລກ “ຕາມເມກແຫ່ງລັດສະໝີພາບທີ່ທອດຍາວ”!
ຕົ້ນກຳເນີດຂອງທ່ານແມ່ນສັກສິດ, ແລະ ຈຸດໝາຍປາຍທາງຂອງທ່ານກໍເຊັ່ນກັນ. ທ່ານໄດ້ຈາກສະຫວັນມາທີ່ນີ້, ແຕ່ສະຫວັນບໍ່ເຄີຍປະຖິ້ມທ່ານເລີຍ!
ທ່ານບໍ່ແມ່ນຄົນທຳມະດາ.
ທ່ານມີພອນສະຫວັນ!
ໃນຄຳສອນ ແລະ ພັນທະສັນຍາ, ພຣະເຈົ້າໄດ້ປະກາດວ່າ:
“ມີຂອງປະທານຫລາຍຢ່າງ, ແລະ ແກ່ທຸກ [ຄົນ] ຂອງປະທານຖືກມອບໃຫ້ໂດຍພຣະວິນຍານຂອງພຣະເຈົ້າ.
“ແກ່ບາງຄົນມັນຖືກມອບໃຫ້ຢ່າງໜຶ່ງ, ແລະ ອີກບາງຄົນມັນຖືກມອບໃຫ້ອີກຢ່າງໜຶ່ງ, [ແລະ] ວ່າທຸກຄົນຈະໄດ້ຮັບຜົນປະໂຫຍດດ້ວຍການນັ້ນ.”
ຂອງປະທານບາງຢ່າງຂອງເຮົາຖືກລະບຸໄວ້ຢູ່ໃນພຣະຄຳພີ. ຫລາຍຢ່າງກໍບໍ່ໄດ້ຖືກລະບຸໄວ້.
ດັ່ງທີ່ສາດສະດາໂມໂຣໄນໄດ້ກ່າວໄວ້ວ່າ, “ບໍ່ໃຫ້ປະຕິເສດຂອງປະທານຂອງພຣະເຈົ້າ, ເພາະມັນມີຢູ່ຢ່າງຫລວງຫລາຍ; ແລະ ມັນມາຈາກພຣະເຈົ້າອົງດຽວກັນ.” ມັນອາດສະແດງໃຫ້ປະຈັກຕາມ “ວິທີຕ່າງໆ … ; ແຕ່ເປັນພຣະເຈົ້າອົງດຽວກັນທີ່ທຳງານທັງໝົດທຸກຢ່າງ.”
ມັນອາດຈະເປັນຄວາມຈິງທີ່ຂອງປະທານທາງວິນຍານຂອງເຮົາບໍ່ໄດ້ເບິ່ງໂດດເດັ່ນສະເໝີໄປ, ແຕ່ນັ້ນບໍ່ໄດ້ໝາຍຄວາມວ່າ ຂອງປະທານເຫລົ່ານັ້ນມີຄວາມສຳຄັນໜ້ອຍກວ່າ. ຂ້າພະເຈົ້າຂໍແບ່ງປັນຂອງປະທານທາງວິນຍານບາງຢ່າງ ທີ່ຂ້າພະເຈົ້າໄດ້ສັງເກດເຫັນໃນສະມາຊິກຫລາຍຄົນໃນທົ່ວໂລກ ຊິໄດ້ບໍ? ລອງພິຈາລະນາເບິ່ງວ່າ ທ່ານໄດ້ຮັບພອນດ້ວຍຂອງປະທານຢ່າງໜຶ່ງ ຫລື ຫລາຍຢ່າງເຊັ່ນ:
-
ການສະແດງຄວາມເຫັນອົກເຫັນໃຈ.
-
ການສັງເກດເຫັນຄົນທີ່ຖືກມອງຂ້າມ.
-
ການຊອກຫາເຫດຜົນທີ່ຈະມີຄວາມສຸກ.
-
ການເປັນຜູ້ສ້າງຄວາມສະຫງົບສຸກ.
-
ການສັງເກດເຫັນສິ່ງມະຫັດສະຈັນເລັກໆນ້ອຍໆ.
-
ການຍ້ອງຍໍຢ່າງຈິງໃຈ.
-
ການໃຫ້ອະໄພ.
-
ການກັບໃຈ.
-
ການອົດທົນ.
-
ການອະທິບາຍສິ່ງຕ່າງໆຢ່າງລຽບງ່າຍ.
-
ການເຊື່ອມຕໍ່ກັບເດັກນ້ອຍ.
-
ການສະໜັບສະໜູນຜູ້ນຳຂອງສາດສະໜາຈັກ.
-
ການຊ່ວຍເຫລືອຄົນອື່ນໃຫ້ຮູ້ວ່າເຂົາເຈົ້າເປັນພາກສ່ວນ.
ທ່ານອາດຈະບໍ່ເຫັນຂອງປະທານເຫລົ່ານີ້ສະແດງອອກຢູ່ໃນງານສະແດງພອນສະຫວັນຂອງຫວອດ. ແຕ່ຂ້າພະເຈົ້າຫວັງວ່າ ທ່ານຈະເຫັນວ່າມັນມີຄ່າຫລາຍຊ່ຳໃດຕໍ່ວຽກງານຂອງພຣະຜູ້ເປັນເຈົ້າ ແລະ ທ່ານອາດໄດ້ສຳຜັດ, ອວຍພອນ, ຫລື ແມ່ນແຕ່ໄດ້ຊ່ວຍລູກໆຂອງພຣະເຈົ້າໃຫ້ລອດ ໂດຍຂອງປະທານຂອງທ່ານ. ຈົ່ງຈື່ຈຳວ່າ: “ໂດຍເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ.”
ສະນັ້ນ ຂໍໃຫ້ເຮົາແຕ່ລະຄົນເຮັດພາກສ່ວນນ້ອຍໆຂອງເຮົາ.
ຈົ່ງເຮັດສ່ວນເລັກນ້ອຍຂອງທ່ານ
ອ້າຍເອື້ອຍນ້ອງ, ໝູ່ເພື່ອນ, ທີ່ຮັກແພງຂອງຂ້າພະເຈົ້າ, ຂ້າພະເຈົ້າອະທິຖານຂໍໃຫ້ພຣະວິນຍານຊ່ວຍເຫລືອທ່ານໃຫ້ຮັບຮູ້ຂອງປະທານ ແລະ ພອນສະຫວັນທີ່ພຣະເຈົ້າໄດ້ປະທານໃຫ້ທ່ານ. ຈາກນັ້ນ, ໃຫ້ເຮົາ, ເຊັ່ນດຽວກັບຄົນຮັບໃຊ້ທີ່ຊື່ສັດຂອງເຈົ້ານາຍໃນຄຳອຸປະມາ, ເພີ່ມພູນ ແລະ ຂະຫຍາຍຕະລັນຕົນຂອງພວກເຂົາ.
ວັນໜຶ່ງຈະມາເຖິງ ເມື່ອເຮົາຈະຢືນຢູ່ຕໍ່ພຣະພັກຂອງພຣະບິດາຜູ້ສະຖິດຢູ່ໃນສະຫວັນທີ່ຊົງເມດຕາ ເພື່ອລາຍງານກ່ຽວກັບການພິທັກຮັກສາຂອງເຮົາ. ພຣະອົງຈະຢາກຮູ້ວ່າ ເຮົາໄດ້ເຮັດຫຍັງແດ່ກັບຂອງປະທານທີ່ພຣະອົງໄດ້ປະທານໃຫ້ເຮົາ—ໂດຍສະເພາະ, ເຮົາໄດ້ໃຊ້ຂອງປະທານເຫລົ່ານັ້ນເພື່ອອວຍພອນລູກໆຂອງພຣະອົງແນວໃດ. ພຣະເຈົ້າຮູ້ວ່າເຮົາແມ່ນໃຜແທ້ໆ, ຖືກອອກແບບໃຫ້ກາຍເປັນແບບໃດ, ແລະ ສະນັ້ນ ພຣະອົງຈຶ່ງຄາດຫວັງໄວ້ສູງ.
ແຕ່ພຣະອົງບໍ່ຄາດຫວັງໃຫ້ເຮົາກ້າວກະໂດດທີ່ຍິ່ງໃຫຍ່ ແລະ ກ້າຫານ, ຫລື ເໜືອມະນຸດ ເພື່ອໄປໃຫ້ເຖິງຈຸດໝາຍ. ໃນໂລກທີ່ພຣະອົງໄດ້ສ້າງຂຶ້ນມາ, ຄວາມເຕີບໂຕຈະຄ່ອຍເປັນຄ່ອຍໄປ—ແຕ່ກໍເກີດຂຶ້ນຢ່າງສະໝ່ຳສະເໝີ ແລະ ບໍ່ຢຸດຢັ້ງ.
ຈົ່ງຈື່ຈຳໄວ້ວ່າ, ແມ່ນພຣະເຢຊູຄຣິດທີ່ໄດ້ເຮັດພາກສ່ວນເໜືອມະນຸດໄປແລ້ວ ເມື່ອພຣະອົງໄດ້ເອົາຊະນະຄວາມຕາຍ ແລະ ບາບ.
ພາກສ່ວນຂອງເຮົາແມ່ນທີ່ຈະຕິດຕາມພຣະຄຣິດ. ມັນເປັນພາກສ່ວນຂອງເຮົາທີ່ຈະຫັນໜີຈາກບາບ, ຫັນມາຫາພຣະຜູ້ຊ່ວຍໃຫ້ລອດ, ແລະ ເດີນໄປໃນທາງຂອງພຣະອົງ, ເທື່ອລະບາດກ້າວ. ເມື່ອເຮົາເຮັດເຊັ່ນນີ້, ດ້ວຍຄວາມພາກພຽນ ແລະ ຊື່ສັດ, ໃນທີ່ສຸດເຮົາກໍຈະສາມາດປົດເປື້ອງຄວາມບໍ່ສົມບູນແບບ ແລະ ຄວາມຜິດ ແລະ ຄ່ອຍໆຂັດເກົາຕົນເອງ, ຈົນກະທັ້ງເຖິງວັນອັນສົມບູນແບບ ເມື່ອເຮົາຈະສົມບູນແບບໃນພຣະຄຣິດ.
ພອນຢູ່ໃກ້ພຽງແຄ່ເອື້ອມ. ຄຳສັນຍາມີຢູ່ແລ້ວ. ປະຕູເປີດກວ້າງ. ມັນເປັນການເລືອກຂອງເຮົາທີ່ຈະເຂົ້າໄປ ແລະ ເລີ່ມຕົ້ນ.
ການເລີ່ມຕົ້ນອາດຈະເລັກນ້ອຍ. ນັ້ນກໍບໍ່ເປັນຫຍັງ.
ເມື່ອສັດທາອ່ອນແອ, ຈົ່ງເລີ່ມຕົ້ນດ້ວຍຄວາມຫວັງໃນພຣະເຢຊູຄຣິດ ແລະ ໃນອຳນາດຂອງພຣະອົງໃນການຊຳລະ ແລະ ເຮັດໃຫ້ບໍລິສຸດ.
ພຣະບິດາຂອງເຮົາຂໍໃຫ້ເຮົາຮັບມືກັບຄວາມທ້າທາຍແຫ່ງສັດທາ ແລະ ການເປັນສານຸສິດນີ້ ບໍ່ແມ່ນໃນຖານະນັກທ່ອງທ່ຽວທົ່ວໄປ ແຕ່ໃນຖານະຜູ້ເຊື່ອທີ່ເຕັມປ່ຽມ ຜູ້ປະຖິ້ມບາບີໂລນໄວ້ຂ້າງຫລັງ ແລະ ຕັ້ງໃຈ, ຄວາມນຶກຄິດ, ແລະ ບາດກ້າວມຸ້ງໄປທີ່ຊີໂອນ.
ເຮົາຮູ້ວ່າຄວາມພະຍາຍາມຂອງເຮົາພຽງຢ່າງດຽວບໍ່ສາມາດເຮັດໃຫ້ເຮົາເປັນຄົນຊັ້ນສູງໄດ້. ແຕ່ມັນສາມາດເຮັດໃຫ້ເຮົາຈົງຮັກພັກດີ ແລະ ມຸ່ງໝັ້ນຕໍ່ພຣະເຢຊູ ຜູ້ຊົງເປັນພຣະຄຣິດ, ແລະ ພຣະອົງ ສາມາດເຮັດໃຫ້ເຮົາເປັນຄົນຊັ້ນສູງໄດ້.
ເພາະພຣະຜູ້ຊ່ວຍໃຫ້ລອດທີ່ຊົງຮັກຂອງເຮົາ, ບໍ່ມີເລື່ອງໃດທີ່ຈະເອົາຊະນະບໍ່ໄດ້. ຖ້າຫາກເຮົາຝາກຄວາມຫວັງ ແລະ ສັດທາໄວ້ນຳພຣະອົງ, ໄຊຊະນະຂອງເຮົາກໍຈະແນ່ນອນ. ພຣະອົງສັນຍາກັບເຮົາວ່າ ເຮົາສາມາດເຂົ້າເຖິງພະລັງຂອງພຣະອົງ, ອຳນາດຂອງພຣະອົງ, ແລະ ພຣະຄຸນຢ່າງລົ້ນເຫລືອຂອງພຣະອົງໄດ້. ເທື່ອລະກ້າວ, ເທື່ອລະເລັກລະໜ້ອຍ, ເຮົາຈະຍິ່ງໃກ້ຊິດກັບວັນອັນຍິ່ງໃຫຍ່ ແລະ ສົມບູນແບບນັ້ນຫລາຍຂຶ້ນເລື້ອຍໆ ເມື່ອເຮົາຈະໄດ້ຢູ່ກັບພຣະອົງ ແລະ ຄົນທີ່ເຮົາຮັກໃນລັດສະໝີພາບນິລັນດອນ.
ເພື່ອໄປໃຫ້ເຖິງຈຸດນັ້ນ, ເຮົາຕ້ອງເຮັດພາກສ່ວນຂອງເຮົາໃນມື້ນີ້ ແລະ ທຸກໆມື້. ເຮົາຂອບຄຸນສຳລັບບາດກ້າວທີ່ເຮົາໄດ້ເລີ່ມຕົ້ນໃນມື້ວານນີ້, ແຕ່ເຮົາຈະບໍ່ຢຸດຢູ່ທີ່ນັ້ນ. ເຮົາຮູ້ວ່າ ເຮົາຍັງມີເສັ້ນທາງໄກທີ່ຈະເດີນໄປ, ແຕ່ ເຮົາຈະບໍ່ໃຫ້ສິ່ງນັ້ນມາທໍ້ແທ້ໃຈເຮົາ.
ນັ້ນຄືແກ່ນແທ້ຂອງເຮົາ—ໃນຖານະຜູ້ຕິດຕາມຂອງພຣະຄຣິດ.
ຂ້າພະເຈົ້າຂໍຊຸກຍູ້ ແລະ ອວຍພອນສະມາຊິກທຸກຄົນຂອງສາດສະໜາຈັກ, ແລະ ທຸກຄົນຜູ້ທີ່ປາດຖະໜາທີ່ຈະເປັນສ່ວນໜຶ່ງຂອງການເດີນທາງນີ້, ໃຫ້ໄວ້ວາງໃຈພຣະຜູ້ຊ່ວຍໃຫ້ລອດ ແລະ ເຂົ້າຮ່ວມ, ດ້ວຍຄວາມອົດທົນ ແລະ ພາກພຽນ, ໃນການເຮັດພາກສ່ວນຂອງທ່ານດ້ວຍສຸດໃຈຂອງທ່ານ—ເພື່ອວ່າຄວາມຊື່ນຊົມຂອງທ່ານຈະເຕັມປ່ຽມ ແລະ ວ່າ, ໃນມື້ໜຶ່ງ, ທ່ານຈະໄດ້ຮັບທັງໝົດທີ່ພຣະບິດາມີ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມຂອງພຣະເຢຊູຄຣິດ, ອາແມນ.