ປັບຫົວໃຈຂອງທ່ານຫາພຣະເຢຊູຄຣິດ: ຂອງປະທານອັນສັກສິດຂອງດົນຕີປະຖົມໄວ
ເພງປະຖົມໄວເປັນບົດເທດສະໜາສຳລັບສານຸສິດຂອງພຣະເຢຊູຄຣິດ, ປະຈັກພະຍານຕໍ່ຄວາມເປັນຄວາມຈິງຂອງພຣະກິດຕິຄຸນທີ່ຖືກຟື້ນຟູ, ແລະ ເປັນຄຳອະທິຖານທີ່ແຕ່ງເປັນເພງ.
ໜຶ່ງໃນຫລາຍໆພອນຂອງການຮັບໃຊ້ຂອງຂ້າພະເຈົ້າໃນຊັ້ນປະຖົມໄວກໍຄື ຫົວໃຈຂອງຂ້າພະເຈົ້າໄດ້ຮຽນຮູ້ທີ່ຈະຮັກໃນພາສາຕ່າງໆທີ່ລີ້ນຂອງຂ້າພະເຈົ້າບໍ່ສາມາດເວົ້າໄດ້. ຂ້າພະເຈົ້າໄດ້ພົບຄວາມຊື່ນຊົມໃນການເຊື່ອມໂຍງກັບເພື່ອນໄພ່ພົນຜ່ານທາງພາສາຂອງດົນຕີສັກສິດທີ່ໃຊ້ຮ່ວມກັນ. ແລະ ໂດຍສະເພາະຢ່າງຍິ່ງແມ່ນຜ່ານທາງເພງທີ່ລຽບງ່າຍຂອງຊັ້ນປະຖົມໄວ, ພຣະວິນຍານບໍລິສຸດໄດ້ຂ້າມຜ່ານທາງອຸປະສັກທາງດ້ານພາສາ ແລະ ໄດ້ເຕີມເຕັມຫົວໃຈຂອງຂ້າພະເຈົ້າດ້ວຍສຽງກະຊິບຂອງພຣະອົງ. ໃນສຽງຂອງເດັກນ້ອຍ, ຄວາມຮັກຂອງພຣະເຈົ້າ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ຖືກປະກາດດ້ວຍຄວາມຈິງທີ່ຊັດເຈນ ແລະ ສຽບແທງ.
ເຖິງແມ່ນວ່າ ຂ້າພະເຈົ້າບໍ່ໄດ້ເຕີບໂຕໃນຊັ້ນປະຖົມໄວ, ພຣະວິນຍານໄດ້ສິດສອນຂ້າພະເຈົ້າຢ່າງໄວວາເຖິງຄວາມສັກສິດຂອງບົດເພງຂອງມັນ, ແລະ ມັນໄດ້ກາຍເປັນສ່ວນໜຶ່ງຂອງການນະມັດສະການສ່ວນຕົວຂອງຂ້າພະເຈົ້າ. ເພງປະຖົມໄວໄດ້ມີອິດທິພົນອັນສັກສິດໃນຊີວິດຂ້າພະເຈົ້າ ແລະ ໄດ້ເຊີດຊູຈິດວິນຍານຂອງຂ້າພະເຈົ້າ, ໄດ້ສິດສອນຄວາມຈິງນິລັນດອນແກ່ຂ້າພະເຈົ້າ, ແລະ ໄດ້ດຶງຂ້າພະເຈົ້າໃຫ້ເຂົ້າໃກ້ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງຫລາຍຍິ່ງຂຶ້ນ.
ຄັ້ງໜຶ່ງ ປະທານດາລິນ ເອັຈ ໂອກສ໌ ໄດ້ສິດສອນວ່າ “ການຮ້ອງເພງສວດຄືໜຶ່ງໃນວິທີທີ່ດີທີ່ສຸດທີ່ຈະຮຽນຮູ້ຄຳສອນຂອງພຣະກິດຕິຄຸນທີ່ຖືກຟື້ນຟູ.” ຖ້ອຍຄຳເຫລົ່ານັ້ນເປັນຄວາມຈິງສຳລັບເຮົາທຸກຄົນ ແຕ່ສຳລັບເດັກນ້ອຍເປັນພິເສດ. ດົນຕີປະຖົມໄວເປັນໜຶ່ງໃນເຄື່ອງມືທີ່ອ່ອນໂຍນທີ່ສຸດຂອງພຣະເຈົ້າສຳລັບການປູກເມັດພືດແຫ່ງປະຈັກພະຍານໃນຫົວໃຈຂອງສານຸສິດທີ່ອາຍຸນ້ອຍທີ່ສຸດຂອງພຣະຜູ້ຊ່ວຍໃຫ້ລອດ. ພໍ່ແມ່, ຜູ້ນຳ, ແລະ ຄູສອນໃຫ້ການບຳລຸງລ້ຽງເມັດພືດນັ້ນ ຂະນະທີ່ ເຂົາເຈົ້າເປັນພະຍານເຖິງ ແລະ ເຊື້ອເຊີນປະຈັກພະຍານຂອງເດັກນ້ອຍ ທຸກຄົນໃຫ້ເຂົ້າມາຮູ້ຈັກກັບພຣະບິດາເທິງສະຫວັນ; ພຣະບຸດຂອງພຣະອົງ, ພຣະເຢຊູຄຣິດ; ແລະ ພຣະວິນຍານບໍລິສຸດ.
ໃນຊ່ວງຫລາຍປີຜ່ານມາຂອງການຮັບໃຊ້ຂອງຂ້າພະເຈົ້ານີ້, ຂ້າພະເຈົ້າໄດ້ໃຊ້ເວລາຮ້ອງເພງ ແລະ ຮຽນຮູ້ຈາກດົນຕີປະຖົມໄວ ຂະນະທີ່ຕຶກຕອງຄຳຖາມບາງຂໍ້:
-
ເພງປະຖົມໄວທີ່ໄດ້ຮຽນໃນຕອນຍັງເປັນເດັກນ້ອຍຈະສາມາດກາຍເປັນພາສາທາງວິນຍານທີ່ເດັກນ້ອຍໃຊ້ເພື່ອ ເປັນພະຍານ ຕະຫລອດຊີວິດຂອງພວກເຂົາໄດ້ແນວໃດ?
-
ການຮ້ອງເພງຄວາມຈິງຂອງພຣະກິດຕິຄຸນຈະສາມາດຊ່ວຍໃຫ້ເດັກນ້ອຍ ຈື່ຈຳ ພຣະຜູ້ເປັນເຈົ້າວ່າເປັນສ່ວນໜຶ່ງຂອງພັນທະສັນຍາຂອງພວກເຂົາ ແລະ ກຽມພວກເຂົາສຳລັບພິທີການຕ່າງໆຂອງພຣະອົງໄດ້ແນວໃດ?
-
ແລະ ເພງປະຖົມໄວຈະສາມາດຊ່ວຍ ຂຽນ ກົດຂອງພຣະເຈົ້າເທິງຫົວໃຈຂອງສານຸສິດທີ່ອາຍຸນ້ອຍທີ່ສຸດເຫລົ່ານີ້ໄດ້ແນວໃດ?
ເມື່ອຊັ້ນປະຖົມໄວໄດ້ເລີ່ມຕົ້ນໃນປີ 1878, ປະທານຜູ້ທຳອິດ, ອາວເຣເລຍ ສະເປັນເຊີ ຣໍເຈີສ໌, ໄດ້ສັງເກດວ່າ “ການຮ້ອງເພງເປັນສິ່ງຈຳເປັນ.” ດົນຕີໄດ້ເປັນຫົວໃຈສຳຄັນຂອງການສິດສອນພຣະກິດຕິຄຸນແກ່ເດັກນ້ອຍສະເໝີມາ. ເພງປະຖົມໄວສາມາດກາຍເປັນພາສາທາງວິນຍານທຳອິດຂອງເດັກນ້ອຍ ຍ້ອນທຳນອງທີ່ລຽບງ່າຍ ແລະ ໜ້າຈົດຈຳຂອງມັນເປັນສຽງໃຫ້ກັບຄວາມຈິງຂອງພຣະກິດຕິຄຸນ. ເພງເຫລົ່ານີ້ຖືອຳນາດທີ່ຈະຢູ່ກັບເດັກນ້ອຍຕະຫລອດຊີວິດ, ໂດຍກາຍເປັນສ່ວນໜຶ່ງຂອງການເປັນສານຸສິດຂອງພວກເຂົາ ແລະ ເປັນວິທີທຳມະຊາດ ແລະ ທຳມະດາທົ່ວໄປ ສຳລັບພວກເຂົາທີ່ຈະເປັນພະຍານເຖິງພຣະຜູ້ຊ່ວຍໃຫ້ລອດ.
ສິດສອນຄຳສອນຂອງພຣະເຢຊູຄຣິດຜ່ານທາງເພງ
ເພງປະຖົມໄວສາມາດເປັນເຄື່ອງມືສິດສອນຄຳສອນທີ່ມີພະລັງ. ເພງບາງເພງເລົ່າເລື່ອງລາວຊີວິດ ແລະ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ. ເພງອື່ນໆສິດສອນຄຸນລັກສະນະຂອງພຣະອົງ, ເຊັ່ນ ສັດທາຂອງພຣະອົງ, ຄວາມຫວັງຂອງພຣະອົງ, ແລະ ຄວາມໃຈບຸນຂອງພຣະອົງ. ແລະ ເພງທີ່ສັກສິດທີ່ສຸດ ເປັນພະຍານເຖິງການຊົດໃຊ້ອັນບໍ່ມີຂອບເຂດຂອງພຣະອົງ ແລະ ຄວາມຮັກທີ່ຫລັ່ງໄຫລຈາກການກະທຳແຫ່ງຄວາມລອດນັ້ນ.
ສາດສະດາຂອງພຣະຜູ້ເປັນເຈົ້າ, ປະທານຣະໂຊ ເອັມ ແນວສັນ, ໄດ້ສິດສອນວ່າ: “[ດົນຕີ] ສາມາດສົ່ງອິດທິພົນດີຢ່າງຕໍ່ເນື່ອງເໜືອການເວລາ ຕອນທີ່ເດັກນ້ອຍຍັງນ້ອຍໆ. … [ມັນ] ມີອຳນາດທີ່ຈະໃຫ້ການບຳລຸງລ້ຽງທາງວິນຍານ. ມັນມີອຳນາດແຫ່ງການປິ່ນປົວ. ມັນມີອຳນາດ [ນັ້ນ] ທີ່ຈະອຳນວຍຄວາມສະດວກໃນການນະມັດສະການ; ມັນຊ່ວຍໃຫ້ເຮົາຕຶກຕອງການຊົດໃຊ້ [ຂອງພຣະຜູ້ຊ່ວຍໃຫ້ລອດ] ແລະ ການຟື້ນຟູພຣະກິດຕິຄຸນ ພ້ອມດ້ວຍຫລັກທຳແຫ່ງຄວາມລອດ ແລະ ພິທີການແຫ່ງຄວາມສູງສົ່ງ. ດົນຕີໃຫ້ພະລັງແກ່ເຮົາເພື່ອທີ່ຈະສະແດງອອກເຖິງຄວາມຄິດແຫ່ງການອະທິຖານ ແລະ ເປັນພະຍານເຖິງຄວາມຈິງອັນສັກສິດ.”
ໃນຖານະພໍ່ແມ່, ຜູ້ນຳ, ແລະ ຄູສອນ, ຄວາມພະຍາຍາມຂອງເຮົາແມ່ນລວມທັງການຊ່ວຍໃຫ້ເດັກນ້ອຍເຂົ້າເຖິງພອນທີ່ໄດ້ສັນຍາໄວ້ ໂດຍການສິດສອນດ້ວຍຄວາມຕັ້ງໃຈເຖິງຄວາມຈິງຂອງພຣະກິດຕິຄຸນທີ່ພົບໃນດົນຕີ. ປະທານແນວສັນຍັງໄດ້ສິດສອນນຳອີກວ່າ “ເດັກນ້ອຍສາມາດຮຽນຮູ້ຄຳສອນເມື່ອພວກເຂົາກຳລັງຮຽນຮ້ອງເພງ ສໍ່າໆກັນກັບທີ່ພວກເຂົາສາມາດຮຽນຮູ້ຄຳສອນໃນຫ້ອງຮຽນ.” ເພງເຫລົ່ານີ້ສາມາດໃຫ້ບ່ອນເກັບບົດເທດສະໜາທີ່ເຕັມໄປດ້ວຍສັດທາທີ່ຊີ້ໃຫ້ເດັກນ້ອຍມາຫາພຣະຜູ້ຊ່ວຍໃຫ້ລອດ ແລະ ຊ່ວຍໃຫ້ພວກເຂົາພັດທະນາຄວາມອຸທິດຕົນຕໍ່ພຣະກິດຕິຄຸນຂອງພຣະອົງ.
ພຣະຄຳພີສິດສອນວ່າ ເພງຂອງຄົນຊອບທຳທີ່ມາຈາກຫົວໃຈ ກໍເປັນຄວາມເບີກບານສຳລັບພຣະຜູ້ຊ່ວຍໃຫ້ລອດ. ຂ້າພະເຈົ້າເຮັດໄດ້ພຽງແຕ່ຕົກຕະລຶງກັບຄວາມເບີກບານທີ່ສຽງຂອງສານຸສິດທີ່ອາຍຸນ້ອຍທີ່ສຸດຂອງພຣະຜູ້ຊ່ວຍໃຫ້ລອດນຳມາໃຫ້. ຂ້າພະເຈົ້າຮູ້ວ່າ ເພງແຫ່ງການອະທິຖານຂອງພວກເຂົາໄປຮອດສະຫວັນໃນຖານະການສະແດງອອກເຖິງສັດທາທີ່ເຊື້ອເຊີນພຣະວິນຍານສັກສິດໃຫ້ຢືນຢັນຄວາມຈິງນິລັນດອນ ແລະ ເຊື້ອເຊີນຄົນອື່ນຢ່າງອ່ອນໂຍນ ແລະ ອ່ອນຫວານໃຫ້ຮັບເອົາການເອີ້ນຂອງພຣະຜູ້ຊ່ວຍໃຫ້ລອດໃຫ້ຕິດຕາມພຣະອົງ ແລະ ກັບຄືນບ້ານ. ດັ່ງທີ່ແອວເດີ ເຮັນຣີ ບີ ໄອຣິງ ໄດ້ຢໍ້າເຕືອນເຮົາ, ແມ່ນໃນຊ່ວງເວລາແຫ່ງການຮູ້ສຶກເຖິງພຣະວິນຍານ ທີ່ເຮົາມີຫລັກຖານເຖິງການຊົດໃຊ້ຂອງພຣະຜູ້ຊ່ວຍໃຫ້ລອດທີ່ກຳລັງເກີດຜົນໃນຊີວິດຂອງເຮົາ.
ປະທັບຄວາມຈິງໃສ່ຫົວໃຈ
ດົນຕີປະຖົມໄວສາມາດເປັນສິ່ງອັດສະຈັນທີ່ເອົາໄປນຳຕາມເສັ້ນໂຄ້ງແຫ່ງການເປັນສານຸສິດທີ່ລູກໆຂອງເຮົາຈະເດີນທາງໄປຕະຫລອດຊີວິດ. ເພງທີ່ໄດ້ຮຽນຕອນອາຍຸຫົກປີມີອຳນາດທີ່ຈະຢູ່ກັບເຮົາ—ແລະ ສາມາດກັບຄືນມາອີກຄັ້ງໃນຫລາຍທົດສະວັດຕໍ່ມາ ໃນຊ່ວງເວລາແຫ່ງການຕັດສິນໃຈ, ການລໍ້ລວງ, ຄວາມທຸກໂສກ, ຫລື ຄວາມຊື່ນຊົມ. ບາງທີໃນຊ່ວງບັ້ນປາຍຊີວິດຂອງເຮົາ, ເນື້ອເພງຂອງເພງ “I Will Follow God’s Plan [ເຮົາຈະເຮັດຕາມແຜນຂອງພຣະເຈົ້າ]” ອາດໃຊ້ເປັນສະໝໍທາງວິນຍານທີ່ເຮັດໃຫ້ພະຍານຂອງອັກຄະສາວົກໂປໂລເຖິງຄວາມແນ່ນອນຂອງຄຳສັນຍາຂອງພຣະເຈົ້າທີ່ມີຕໍ່ເຮົາດັງກ້ອງ. ຫລື ເນື້ອເພງອາດຢໍ້າເຕືອນເຮົາວ່າ ເພາະພຣະເຈົ້າຮັກສາຄຳສັນຍາຂອງພຣະອົງ, ພັນທະສັນຍາຂອງພຣະອົງຈະມອບການປອບໃຈທີ່ເຂັ້ມແຂງ ແລະ ບ່ອນຫລົບໄພ ແລະ ເຊື້ອເຊີນເຮົາໃຫ້ຝາກຄວາມຫວັງ ແລະ ຄວາມໝັ້ນໃຈຂອງເຮົາຢ່າງແນ່ວແນ່ໄວ້ກັບພຣະເຢຊູຄຣິດ ແລະ ອຳນາດແຫ່ງການຊົດໃຊ້ຂອງພຣະອົງ.
ສະມາຊິກຜູ້ໃຫຍ່ທົ່ວທັງໂລກ, ໃນຊ່ວງເວລາແຫ່ງຄວາມຍາກລຳບາກ, ມັກຈະຈື່ ແລະ ຫັນໄປຫາເພງປະຖົມໄວທີ່ເຂົາເຈົ້າໄດ້ຮຽນຕອນເປັນເດັກນ້ອຍ. ສຳລັບຫລາຍຄົນແລ້ວ, ເພງເຫລົ່ານີ້ໄດ້ຄໍ້າຊູສະຖາປັດຍະກຳຕອນຕົ້ນຂອງສັດທາຂອງເຂົາເຈົ້າໃນພຣະເຢຊູຄຣິດ ແລະ ມັກຈະເປັນບ່ອນທຳອິດທີ່ການປ່ຽນໃຈເຫລື້ອມໃສຕໍ່ພຣະກິດຕິຄຸນຂອງພຣະອົງໄດ້ເລີ່ມຕົ້ນຂຶ້ນ. ພໍ່ແມ່, ຜູ້ນຳ, ແລະ ຄູສອນໄດ້ບຳລຸງລ້ຽງສັດທານັ້ນເປັນເວລາຫລາຍປີ ໂດຍການສິດສອນ, ຮ້ອງເພງ, ແລະ ເປັນພະຍານແກ່ເດັກນ້ອຍທັງຫລາຍດ້ວຍຄວາມຫ່ວງໃຍ.
ຊິດສະເຕີຄົນໜຶ່ງໄດ້ແບ່ງປັນກັບຂ້າພະເຈົ້າວ່າ ລາວທະນຸຖະໜອມດົນຕີປະຖົມໄວຫລາຍ, ແລະ ຫລັງຈາກ 20 ປີຕໍ່ມາ ລາວໄດ້ຍົກຍ້ອງມັນທີ່ເລັ່ງການປ່ຽນໃຈເຫລື້ອມໃສອັນຕໍ່ເນື່ອງຂອງລາວຫາພຣະກິດຕິຄຸນຂອງພຣະເຢຊູຄຣິດ. ສະມາຊິກອີກຄົນໜຶ່ງໄດ້ເປັນພະຍານວ່າ ຊັ້ນປະຖົມໄວໄດ້ປູກຝັງເມັດພືດແຫ່ງສັດທາ ເມື່ອຕອນທີ່ລາວຍັງນ້ອຍ ແລະ ເປັນເຫດຜົນທີ່ລາວສາມາດກັບຄືນມາສູ່ສາດສະໜາຈັກຂອງພຣະຜູ້ເປັນເຈົ້າຕອນທີ່ລາວອາຍຸ 30 ປາຍປີ. ພຣະຜູ້ຊ່ວຍໃຫ້ລອດໄດ້ສັນຍາວ່າ, “[ພຣະຜູ້ປອບໂຍນ] … ຈະ [ສິດສອນ] ພວກເຈົ້າທຸກສິ່ງ, ແລະ ຈະເຕືອນໃຫ້ພວກເຈົ້າລະນຶກເຖິງທຸກສິ່ງ.” ດົນຕີປະຖົມໄວສາມາດເປັນວິທີໜຶ່ງທີ່ບັນລຸຄຳສັນຍານັ້ນ.
ເພງປະຖົມໄວອັນເປັນທີ່ຮັກອີກເພງໜຶ່ງຖ່າຍທອດພະລັງແຫ່ງສັດທາທີ່ລຽບງ່າຍ ແລະ ປະຈັກພະຍານທີ່ຢັ້ງຢືນ:
ຂະນະທີ່ເຮົາຍ່າງໄປກັບພຣະເຢຊູສູ່ບ້ານຂອງເຮົາຢູ່ເບື້ອງບົນ,
ພຣະອົງຈະອວຍພອນເຮົາດ້ວຍພຣະວິນຍານຂອງພຣະອົງ ແລະ ເຕີມເຕັມເຮົາດ້ວຍຄວາມຮັກຂອງພຣະອົງ,
ປ່ຽນແປງຫົວໃຈຂອງເຮົາຕະຫລອດໄປ ແລະ ຊ່ວຍໃຫ້ເຮົາເຫັນຢ່າງຊັດເຈນ.
ເຮົາຈະຍ່າງໄປກັບພຣະເຢຊູ, ແລະ ພຣະອົງຈະຍ່າງໄປກັບເຮົາ.
ຂະນະທີ່ເດັກນ້ອຍຮ້ອງເພງ, ພວກເຂົາກຳລັງສະແດງອອກເຖິງຄວາມປາດຖະໜາຂອງສານຸສິດຄົນໜຶ່ງ ແລະ ກຳລັງຮຽນຮູ້ແບບແຜນຂອງການໃຊ້ຊີວິດຕາມພັນທະສັນຍາ. ພຣະວິນຍານສາມາດໃຊ້ດົນຕີເພື່ອຈາລຶກຄວາມຈິງນິລັນດອນໃສ່ຫົວໃຈອັນອ່ອນໂຍນຂອງພວກເຂົາ. ແລະ ເມື່ອເວລາມາເຖິງ, ເດັກນ້ອຍຈະສາມາດເລືອກທີ່ຈະປັບ ແລະ ຫັນ ຫົວໃຈ ແລະ ຊີວິດຂອງພວກເຂົາ ຫາພຣະເຢຊູຄຣິດ ໂດຍການເຮັດ ແລະ ຮັກສາພັນທະສັນຍາອັນສັກສິດກັບພຣະອົງ.
ການຈື່ຈຳພັນທະສັນຍາຂອງເຮົາ ແລະ ກຽມພ້ອມສຳລັບພິທີການຕ່າງໆ
ດົນຕີສັກສິດສາມາດຊ່ວຍຂຽນຄຳສອນຂອງພຣະຄຣິດໃສ່ຈິດວິນຍານ ແລະ ກຽມເຮົາໃຫ້ພ້ອມທີ່ຈະຮັບພິທີການຕ່າງໆຂອງພຣະອົງ. ມັນເຊື່ອມຕໍ່ຄຳສອນຂອງພຣະຜູ້ຊ່ວຍໃຫ້ລອດໃສ່ກັບຄວາມຊົງຈຳຂອງເຮົາ ແລະ ຄວາມຊົງຈຳນັ້ນໃສ່ກັບການເປັນສານຸສິດຂອງເຮົາໃນພຣະອົງ.
ໃນຖານະຜູ້ນຳຊັ້ນປະຖົມໄວ, ພວກເຮົາມີໂອກາດ ແລະ ໜ້າທີ່ຮັບຜິດຊອບອັນສັກສິດເພື່ອໃຫ້ແນ່ໃຈວ່າ ດົນຕີໃນຊັ້ນປະຖົມໄວຈະຖືກສິດສອນດ້ວຍຄວາມຊື່ນຊົມ, ດ້ວຍຄວາມເຂົ້າໃຈໃນຄຳສອນ, ແລະ ດ້ວຍພຣະວິນຍານ. ນີ້ລວມໄປເຖິງການເຊື້ອເຊີນເດັກນ້ອຍໃຫ້ສັງເກດເຫັນສິ່ງທີ່ພວກເຂົາຮູ້ສຶກຂະນະທີ່ພວກເຂົາຮ້ອງເພງ ແລະ ຊ່ວຍໃຫ້ພວກເຂົາຮູ້ຈັກວ່າ ຄວາມຮູ້ສຶກເຫລົ່ານັ້ນມາຈາກພຣະວິນຍານບໍລິສຸດ. ຄວາມພະຍາຍາມເຫລົ່ານີ້ຊ່ວຍກຽມລູກໆຂອງເຮົາໃຫ້ພ້ອມສຳລັບພິທີການອັນສັກສິດ, ເຊັ່ນ ການບັບຕິສະມາ ແລະ ການຢືນຢັນ, ພ້ອມທັງດົນໃຈຄວາມຊົງຈຳທາງພັນທະສັນຍາຂອງພວກເຂົາ ຂະນະທີ່ພວກເຂົາຕໍ່ຄຳສັນຍາຂອງພວກເຂົາກັບພຣະເຈົ້າຢ່າງເປັນປະຈຳ.
ໃນເຂົ້າແລງຄາບສຸດທ້າຍ, ຫລັງຈາກພຣະຜູ້ຊ່ວຍໃຫ້ລອດໄດ້ສ້າງຕັ້ງສິນລະລຶກນັ້ນ, ມັດທາຍໄດ້ບັນທຶກວ່າ “ເມື່ອພວກເພິ່ນຮ້ອງເພງສັນລະເສີນພຣະເຈົ້າບົດໜຶ່ງແລ້ວ ກໍພາກັນອອກໄປທີ່ພູເຂົາໝາກກອກເທດ.” ແຕ່ລະອາທິດ, ສະມາຊິກຂອງສາດສະໜາຈັກທີ່ຖືກຟື້ນຟູຂອງພຣະຜູ້ເປັນເຈົ້າທີ່ໄດ້ຮັບບັບຕິສະມາ ແລະ ການຢືນຢັນ, ລວມທັງເດັກນ້ອຍທີ່ໄດ້ຮັບບັບຕິສະມາຊຶ່ງມີອາຍຸພຽງແປດປີ, ກຽມຕົວເພື່ອທີ່ຈະຮັບສິນລະລຶກຂອງພຣະຜູ້ເປັນເຈົ້າ. ຜ່ານທາງການຮ້ອງເພງສັກສິດ, ບ່ອນຊຸມນຸມຂອງລູກໆຂອງພຣະເຈົ້າແມ່ນໄດ້ຮັບໂອກາດທີ່ຈະກຽມໃຈຂອງພວກເຂົາສຳລັບພິທີການສັກສິດ ເພື່ອຮັບເອົາພຣະນາມຂອງພຣະອົງໄວ້ກັບເຂົາເຈົ້າ, ເພື່ອລະນຶກເຖິງພຣະອົງຕະຫລອດເວລາ, ແລະ ເພື່ອຮັກສາພຣະບັນຍັດຂອງພຣະອົງ.
ປະຈັກພະຍານປິດທ້າຍ
ໝູ່ເພື່ອນທີ່ຮັກແພງເອີຍ, ຂ້າພະເຈົ້າເປັນພະຍານວ່າ ເພງປະຖົມໄວສິດສອນຄວາມຈິງນິລັນດອນ ແລະ ຄຳສອນທີ່ນຳພາເຮົາມາຫາພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ຂ້າພະເຈົ້າຂໍເຊື້ອເຊີນທ່ານໃຫ້ພິຈາລະນາວ່າ ຄວາມຈິງທີ່ເປັນພື້ນຖານອັນໃດທີ່ຖືກຂຽນໄວ້ຢູ່ໃນໃຈຂອງທ່ານຜ່ານທາງຄຳສອນທີ່ລຽບງ່າຍຂອງເພງເຫລົ່ານີ້ ແລະ ເປັນພະຍານເຖິງຄວາມຈິງເຫລົ່ານັ້ນແກ່ສານຸສິດທີ່ອາຍຸນ້ອຍທີ່ສຸດຂອງພຣະຜູ້ຊ່ວຍໃຫ້ລອດ ຂະນະທີ່ທ່ານສິດສອນພວກເຂົາເຖິງຂ່າວປະເສີດຂອງພຣະກິດຕິຄຸນຜ່ານທາງເພງ.
ຂ້າພະເຈົ້າຮູ້ວ່າ ພຣະເຈົ້າພຣະບິດາຂອງເຮົາ, ໃນຄວາມຮັກອັນບໍ່ມີຂອບເຂດຂອງພຣະອົງ, ໄດ້ສົ່ງພຣະບຸດທີ່ຮັກຂອງພຣະອົງມາຍັງແຜ່ນດິນໂລກເພື່ອສິດສອນເຮົາ, ເພື່ອຊີ້ທາງໃຫ້ເຮົາ, ແລະ ເພື່ອໄຖ່ເຮົາຜ່ານທາງການຊົດໃຊ້ຂອງພຣະອົງ.
ຂ້າພະເຈົ້າຮູ້ວ່າ ຊີວິດ ແລະ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດນັ້ນເປັນເລື່ອງແທ້ ແລະ ເປັນສ່ວນຕົວ. ພຣະຄຳພີເຕັມໄປດ້ວຍເລື່ອງລາວຂອງການປິ່ນປົວຂອງພຣະອົງ, ຄວາມເມດຕາຂອງພຣະອົງ, ແລະ ການອັດສະຈັນຂອງພຣະອົງ.
ຂ້າພະເຈົ້າຮູ້ວ່າ ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານທີ່ຈິງໃຈຂອງລູກໆຂອງພຣະອົງ, ບໍ່ວ່າຈະອາຍຸເທົ່າໃດ, ສະພາບການເປັນແນວໃດ, ຫລື ພາສາໃດກໍຕາມ. ພຣະອົງຟັງຄຳວິງວອນອັນງຽບໆໃນໃຈຂອງເຮົາ.
ຂ້າພະເຈົ້າເປັນພະຍານວ່າ ໃນເຄັດເຊມາເນ, ພຣະເຢຊູຄຣິດໄດ້ແບກເອົານໍ້າໜັກຂອງບາບ, ຄວາມໂສກເສົ້າ, ແລະ ຄວາມເຈັບປວດຂອງເຮົາ. ພຣະອົງໄດ້ທົນທຸກທໍລະມານຢ່າງເຕັມພຣະໄທ ຍ້ອນຄວາມຮັກທີ່ພຣະອົງມີຕໍ່ເຮົາ ແລະ ໄດ້ເຮັດໃຫ້ເປັນໄປໄດ້ສຳລັບເຮົາທີ່ຈະໄດ້ຮັບອະໄພ ແລະ ກັບຄືນບ້ານ.
ຂ້າພະເຈົ້າຮູ້ວ່າ ເຮົາເປັນລູກແທ້ໆຂອງພຣະເຈົ້າ, ທີ່ໄດ້ຖືກສ້າງຕາມຮູບລັກສະນະຂອງພຣະອົງ, ໄດ້ຮັບຂອງປະທານແຫ່ງສັກກະຍະພາບແຫ່ງສະຫວັນ, ແລະ ໄດ້ຮັບເຊີນໃຫ້ກັບຄືນໄປຢູ່ກັບພຣະອົງ ຖ້າເຮົາເລືອກທີ່ຈະຕິດຕາມພຣະເຢຊູຄຣິດ.
ຂ້າພະເຈົ້າຮູ້ວ່າ ພຣະເຢຊູຄຣິດເປັນຕົວຢ່າງທີ່ດີພ້ອມຂອງເຮົາ, ແລະ ເມື່ອເຮົາຕິດຕາມພຣະອົງໂດຍການຮັບໃຊ້, ໃຫ້ອະໄພ, ແລະ ຮັກຄົນອື່ນ, ເຮົາກໍຈະກາຍເປັນເໝືອນດັ່ງພຣະອົງຫລາຍຍິ່ງຂຶ້ນທຸກໆມື້.
ແລະ ຂ້າພະເຈົ້າຮູ້ວ່າ ພຣະວິຫານອັນສັກສິດຂອງພຣະຜູ້ເປັນເຈົ້າ ເປັນບ້ານຂອງພຣະອົງຢູ່ເທິງໂລກນີ້. ໃນພຣະວິຫານ, ເຮົາເຮັດພັນທະສັນຍາອັນສັກສິດ, ຮັບພອນນິລັນດອນ, ແລະ ຮຽນຮູ້ກ່ຽວກັບພຣະອົງຫລາຍຍິ່ງຂຶ້ນ ແລະ ຮູ້ສຶກເຖິງທີ່ປະທັບຂອງພຣະອົງຫລາຍຍິ່ງຂຶ້ນ. ພຣະວິຫານເປັນສະຖານທີ່ແຫ່ງການຮຽນຮູ້, ສັນຕິສຸກ, ແລະ ການກຽມພ້ອມສຳລັບຊີວິດຂອງເຮົາ.
ຂ້າພະເຈົ້າເປັນພະຍານວ່າ ຄວາມພະຍາຍາມຂອງເຮົາໃນການສິດສອນ ແລະ ຮ້ອງເພງປະຖົມໄວເຫລົ່ານີ້ແກ່ລູກໆຂອງເຮົາ ບໍ່ແມ່ນພຽງແຕ່ສ່ວນທີ່ດີຂອງປະເພນີທາງສາດສະໜາຂອງເຮົາ. ມັນເປັນບົດເທດສະໜາສຳລັບສານຸສິດຂອງພຣະເຢຊູຄຣິດ, ປະຈັກພະຍານຕໍ່ຄວາມເປັນຄວາມຈິງຂອງພຣະກິດຕິຄຸນທີ່ຖືກຟື້ນຟູ, ແລະ ເປັນຄຳອະທິຖານທີ່ແຕ່ງເປັນເພງ. ດົນຕີສັກສິດສາມາດສ່ອງແສງຄວາມສະຫວ່າງຂອງພຣະຄຣິດແກ່ຜູ້ທີ່ຟັງ ແລະ ສາມາດຖອກເທມັນໃສ່ຫົວໃຈຂອງຜູ້ທີ່ຮ້ອງ. ໝູ່ເພື່ອນທີ່ຮັກແພງທັງຫລາຍເອີຍ, ພຣະເຢຊູຍັງຢາກໃຫ້ເຮົາເປັນລຳແສງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.