ການຈົດຈຳແກະ
ຫລັກທຳຂອງການນັບ ແລະ ການຮັບຜິດຊອບ ໃຊ້ງານໄດ້ແທ້. ມັນເປັນວິທີຂອງພຣະຜູ້ເປັນເຈົ້າ.
ພຣະຄຣິດຄືຜູ້ລ້ຽງແກະທີ່ດີ. ແກະແຕ່ລະໂຕໃນຝູງແມ່ນມີຄ່າສຳລັບພຣະອົງ. ພຣະອົງເປັນແບບແຜນໃນການລ້ຽງແກະ ແລະ ໄດ້ສິດສອນເຮົາໂດຍພຣະຄຳ ແລະ ການກະທຳ ເຖິງຄຸນສົມບັດຂອງຜູ້ລ້ຽງແກະທີ່ດີ, ລວມທັງຮູ້ຈັກແກະຂອງທ່ານຕາມຊື່, ຮັກພວກມັນ, ຊອກຫາໂຕທີ່ເສຍໄປ, ໃຫ້ອາຫານ, ແລະ ທ້າຍທີ່ສຸຸດ, ນຳພາພວກມັນກັບຄືນບ້ານອີກຄັ້ງ. ພຣະອົງຄາດຫວັງໃຫ້ເຮົາເຮັດຢ່າງດຽວກັນ ໃນຖານະຜູ້ລ້ຽງແກະພາຍໃຕ້ພຣະອົງ.
ເຮົາສາມາດຮຽນຮູ້ຫລາຍຢ່າງກ່ຽວກັບການປະຕິບັດສາດສະໜາກິດຕາມວິທີຂອງພຣະຜູ້ເປັນເຈົ້າຈາກສາດສະດາສະໄໝບູຮານ—ແລະ ຜູ້ລ້ຽງແກະທີ່ດີເລີດ—ໂມໂຣໄນ. ພຣະອົງໄດ້ໃຊ້ຊີວິດລະຫວ່າງຊ່ວງເວລາທີ່ຍາກລຳບາກ, ໂດຍບໍ່ມີຜົນປະໂຫຍດຈາກໂທລະສັບມືຖື, ຄອມພິວເຕີ, ແລະ ອິນເຕີເນັດ. ແຕ່ພຣະອົງຍັງສາມາດເຝົ້າຕາມແກະໄດ້. ແນວໃດຈຶ່ງສາມາດເຮັດໄດ້? ເຮົາເຫັນພາບແວັບໜຶ່ງໃນລະບຽບວິທີຂອງພຣະອົງໃນ ໂມໂຣໄນ 6. ໃນນັ້ນ ເຮົາອ່ານວ່າ ສະມາຊິກ “ໄດ້ຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະຄຣິດ; ແລະ ຊື່ຂອງເຂົາໄດ້ຖືກຮັບໄວ້, ເພື່ອເຂົາຈະໄດ້ຖືກຈົດຈຳ ແລະ ບຳລຸງລ້ຽງດ້ວຍພຣະຄຳອັນປະເສີດຂອງພຣະເຈົ້າ, ເພື່ອຮັກສາເຂົາຢູ່ໃນທາງທີ່ຖືກຕ້ອງ. … ສາດສະໜາຈັກໄດ້ຊຸມນຸມກັນຢູ່ເລື້ອຍໆ, ເພື່ອຖືສິນອົດເຂົ້າ ແລະ ເພື່ອອະທິຖານ ແລະ ເພື່ອສົນທະນາກັນກ່ຽວກັບຄວາມຜາສຸກຂອງຈິດວິນຍານຂອງພວກເຂົາ” (ໂມໂຣໄນ 6:4–5; ເນັ້ນຄຳເນີ້ງ).
ສຳລັບໂມໂຣໄນແລ້ວ, ທັງໝົດແມ່ນກ່ຽວກັບຜູ້ຄົນ—ຊື່! ເພິ່ນໄດ້ປະຕິບັດຕາມຫລັກທຳຂອງການນັບ ແລະ ການຮັບຜິດຊອບເພື່ອວ່າ ທຸກຄົນ ຈະຖືກຈົດຈຳ. ຜູ້ໃດກໍຕາມທີ່ດີ້ນລົນ ຫລື ຊັດເຊພະເນຈອນ ໄດ້ຮັບການສັງເກດເຫັນ, ໂດຍອະນຸຍາດໃຫ້ບັນດາໄພ່ພົນສົນທະນາກ່ຽວກັບຄວາມຜາສຸກຂອງພວກເຂົາໃນສະພາ. ເຊັ່ນດຽວກັບຜູ້ລ້ຽງແກະທີ່ໄດ້ປະແກະເກົ້າສິບເກົ້າໂຕ (ທີ່ປອດໄພ ແລະ ໝັ້ນຄົງ, ຂ້າພະເຈົ້າແນ່ໃຈ) ແລະ ອອກຕາມຫາໂຕທີ່ເສຍໄປ (ເບິ່ງ ລູກາ 15:4–7), ເຮົາຖືກຂໍໃຫ້ຮູ້ເຖິງຝູງຂອງເຮົາ—ເພື່ອສັງເກດເຫັນ ແລະ ຈົດຈຳ ແລະ ໄປ ແລະ ເຮັດຢ່າງດຽວກັນ.
ໃນຖານະຜູ້ນຳເຂດເຜີຍແຜ່ໃນປະເທດອິນເດຍ, ຂ້າພະເຈົ້າຈື່ໄດ້ວ່າເຄີຍຖາມປະທານສາຂາໜຸ່ມຄົນໜຶ່ງກ່ຽວກັບເປົ້າໝາຍບາງຢ່າງຂອງເພິ່ນໃນປີທີ່ຈະມາເຖິງວ່າ: “ທ່ານຈະກຽມຜູ້ຊາຍຈັກຄົນເພື່ອຮັບຖານະປະໂລຫິດແຫ່ງເມນຄີເສເດັກ?” ຄຳຕອບທັນທີຂອງເພິ່ນແມ່ນ “ເຈັດ!”
ຂ້າພະເຈົ້າໄດ້ສົງໄສວ່າ ເພິ່ນໄດ້ເສກເລກທີ່ສະເພາະເຈາະຈົງນັ້ນມາແຕ່ໃສ! ກ່ອນທີ່ຂ້າພະເຈົ້າຈະຕອບ, ເພິ່ນໄດ້ຈັບເຈ້ຍແຜ່ນໜຶ່ງອອກມາ ຊຶ່ງມີຕົວເລກຕັ້ງແຕ່ໜຶ່ງຮອດເຈັດຂຽນໃສ່ທາງຂ້າງ. ຫ້າແຖວທຳອິດມີຊື່ຂຽນໃສ່—ຄົນແທ້ທີ່ເພິ່ນ ແລະ ກຸ່ມແອວເດີຂອງເພິ່ນກຳລັງຈະເຊື້ອເຊີນ ແລະ ຊຸກຍູ້ໃຫ້ຮັບພອນຂອງຖານະປະໂລຫິດໃນຊີວິດຂອງພວກເຂົາ. ແນ່ນອນ, ຂ້າພະເຈົ້າຕ້ອງຖາມກ່ຽວກັບແຖວວ່າງທີຫົກ ແລະ ເຈັດ. “ໂອ, ປະທານ,” ເພິ່ນກ່າວ, ຂະນະທີ່ແກວ່ງຫົວຢ່າງໜ້າເຫັນໃຈ, “ແນ່ນອນວ່າ ເຮົາຈະບັບຕິສະມາຢ່າງໜ້ອຍຜູ້ຊາຍສອງຄົນໃນວັນທີໜຶ່ງຂອງປີ ຜູ້ທີ່ຈະສາມາດຮັບຖານະປະໂລຫິດພາຍໃນທ້າຍປີ.” ຜູ້ນຳທີ່ດີເລີດຄົນນີ້ເຂົ້າໃຈຫລັກທຳຂອງການນັບ ແລະ ການຮັບຜິດຊອບ.
ພຣະຄຣິດໄດ້ຈັດຕັ້ງສາດສະໜາຈັກຂອງພຣະອົງໃນວິທີທີ່ຍາກທີ່ຈະລືມຈິດວິນຍານໜຶ່ງ, ເພາະແຕ່ລະຈິດວິນຍານລ້ວນແຕ່ເປັນທີ່ຮັກຕໍ່ພຣະອົງ. ທຸກຄົນໃນຫວອດ, ບໍ່ວ່າຈະອາຍຸເທົ່າໃດ ຫລື ເພດໃດ, ຕ່າງກໍມີຜູ້ພິທັກຮັກສາເປັນຈຳນວນຫລວງຫລາຍ—ຜູ້ລ້ຽງແກະ—ທີ່ໄດ້ຮັບໜ້າທີ່ໃຫ້ເບິ່ງແຍງພວກເຂົາ, ດ້ວຍການຈົດຈຳ. ຊາຍໜຸ່ມຄົນໜຶ່ງ, ຍົກຕົວຢ່າງ, ໄດ້ຖືກມອບໝາຍໃຫ້ຝ່າຍອະທິການ, ອ້າຍນ້ອງຜູ້ປະຕິບັດສາດສະໜາກິດ, ທີ່ປຶກສາຜູ້ໃຫຍ່ໜຸ່ມ, ຄູສອນຫ້ອງຮຽນສາດສະໜາ, ຝ່າຍປະທານກຸ່ມ ເບິ່ງແຍງຄວາມຜາສຸກຂອງລາວ, ແລະ ຄົນອື່ນໆອີກ—ທຸກຄົນແມ່ນຮັບໃຊ້ເປັນຫລາຍໆຕາໜ່າງນິລະໄພ, ທີ່ຖືກຄຶງຂຶ້ນຢ່າງເຄັ່ງແໜ້ນຢູ່ກ້ອງຊາຍໜຸ່ມຄົນນັ້ນ ເພື່ອຮັບເອົາລາວເມື່ອລາວຕົກລົງ. ເຖິງແມ່ນວ່າ ຈະມີພຽງແຕ່ຕາໜ່າງດຽວທີ່ຖືກວາງໄວ້ຢ່າງເໝາະສົມກໍຕາມ, ຊາຍໜຸ່ມຄົນນັ້ນຈະປອດໄພ, ຖືກສັງເກດເຫັນ, ແລະ ຖືກຈົດຈຳ. ແຕ່ເຖິງຢ່າງນັ້ນກໍດີ, ເຮົາມັກຈະພົບວ່າ ບໍ່ມີຕາໜ່າງໃດເລີຍທີ່ຢູ່ໃນຕຳແໜ່ງ. ຜູ້ຄົນຊັດເຊເຂົ້າໄປໃນໝອກຢ່າງເປັນປະຈຳ—ແລະ ບໍ່ມີໃຜສັງເກດເຫັນເລີຍ. ເຮົາຈະສາມາດເປັນຜູ້ລ້ຽງແກະທີ່ດີກວ່າເກົ່າໄດ້ແນວໃດ? ເຮົາສາມາດຮຽນຮູ້ທີ່ຈະນັບ ແລະ ຮັບຜິດຊອບ.
ສາດສະໜາຈັກຈັດຫາລາຍງານ ແລະ ເຄື່ອງມືໄວ້ໃຫ້ເຮົາເພື່ອເຮັດເຊັ່ນນັ້ນ—ໃຫ້ຈົດຈຳ. ລາຍງານປະຈຳໄຕມາດຖືເປັນຕົວຢ່າງທີ່ດີ. ມັນໃຫ້ເຮົານັບ ແລະ ຮັບຜິດຊອບສະມາຊິກແຕ່ລະຄົນຫລາຍເທື່ອ ແລະ ໃຫ້ສັງເກດເຫັນຜູ້ທີ່ຫາຍໄປ ຫລື ຕ້ອງການຄວາມຊ່ວຍເຫລືອ ແລະ ຄວາມຮັກຈາກເຮົາ. ລາຍຊື່ການດຳເນີນການ ແລະ ການສຳພາດ ລະບຸຜູ້ທີ່ຕ້ອງການຄວາມສົນໃຈຈາກເຮົາໃນຕອນນີ້, ເຊັ່ນດຽວກັບລາຍງານສະຖານະໃບຮັບຮອງເຂົ້າພຣະວິຫານ ແລະ ອື່ນໆ. ເຄື່ອງມືການນັບ ແລະ ການຮັບຜິດຊອບເຫລົ່ານີ້ ຊ່ວຍໃຫ້ເຮົາສຸມໃຈໃສ່ຜູ້ຄົນ. ແມ່ນໃຜຕ້ອງການການເອີ້ນ, ຄວາມກ້າວໜ້າດ້ານຖານະປະໂລຫິດ, ຫລື ຄວາມຊ່ວຍເຫລືອໃນການເອົາຊື່ຄອບຄົວໄປພຣະວິຫານ? ແມ່ນໃຜທີ່ເຮົາສາມາດຊ່ວຍເຫລືອໄດ້ໃນການກະກຽມສຳລັບການເຜີຍແຜ່ເຕັມເວລາ? ແມ່ນໃຜຫາຍໄປເດືອນນີ້? ເຄື່ອງມືເຫລົ່ານີ້ຊ່ວຍໃຫ້ເຮົາຈົດຈຳຜູ້ຄົນໄດ້.
ຂ້າພະເຈົ້າຮູ້ຈັກຄອບຄົວໜຶ່ງຈາກສະຫະລັດທີ່ໄດ້ຮັບວຽກງານມອບໝາຍໃນອາຟຣິກາ. ໃນວັນອາທິດທຳອິດຂອງພວກເຂົາ, ພວກເຂົາໄດ້ຍ່າງເຂົ້າໄປໃນໜ່ວຍສາດສະໜາຈັກພຽງແຕ່ແຫ່ງດຽວໃນປະເທດ, ບ່ອນທີ່ພວກເຂົາໄດ້ຮັບການຕ້ອນຮັບຢ່າງກະຕືລືລົ້ນ. ເມື່ອເຖິງທ້າຍຕອນເຊົ້າ, ພັນລະຍາຂອງຊາຍຄົນນັ້ນໄດ້ຖືກເອີ້ນໃຫ້ເປັນປະທານສະມາຄົມສະຕີສົງເຄາະ ແລະ ໃຫ້ລາວເປັນຜູ້ນຳຊາຍໜຸ່ມ! ລາວໄດ້ຖາມປະທານສາຂາທີ່ເບິ່ງຄືເມື່ອຍວ່າ ມີຊາຍໜຸ່ມຈັກຄົນ. ຜູ້ນຳລຸ້ນທຳອິດທີ່ຊື່ສັດນີ້ ໄດ້ຊີ້ໄປທາງຫລັງຂອງຫໍສິນລະລຶກ ແລະ ກ່າວວ່າ, “ສອງຄົນນັ້ນຢູ່ຫັ້ນ.” ຊາຍຄົນນັ້ນໄດ້ລະແວງສົງໄສພໍສົມຄວນ, ລາວຈຶ່ງເອົາບັນຊີລາຍຊື່ຫວອດເມືອ, ໂດຍສັງເກດເຫັນຢ່າງໄວວາວ່າ ທີ່ຈິງແລ້ວ ມີຊາຍໜຸ່ມ 20 ຄົນຢູ່ໃນລາຍຊື່. ລາວໄດ້ກັບໄປຫາປະທານສາຂາ ແລະ ຂໍໃຫ້ຜູ້ໃຫຍ່ໜຸ່ມທີ່ຫ້າວຫັນ ແລະ ເວົ້າໄດ້ສອງພາສາສອງຄົນໃຫ້ຮັບໃຊ້ເປັນທີ່ປຶກສາຂອງລາວ ແລະ ນັ່ງລົງກັບພວກເຂົາ ແລະ ຊາຍໜຸ່ມສອງຄົນເພື່ອກວດເບິ່ງລາຍຊື່.
ແລ້ວຄົນໜຸ່ມທີ່ພາກພຽນເຫລົ່ານີ້ໄດ້ລົງມືເຮັດວຽກ. ໃນຊ່ວງສອງສາມເດືອນຕໍ່ມາ, ພວກເຂົາໄດ້ພົບຊາຍໜຸ່ມທຸກຄົນທີ່ຢູ່ໃນລາຍຊື່. ແຕ່ລະຊື່ ແຕ່ລະຊື່, ແກະທີ່ເສຍໄປເຫລົ່ານັ້ນໄດ້ຮັບການຕ້ອນຮັບກັບຄືນໂດຍໝູ່ເພື່ອນ ແລະ ໄດ້ຮັບການລ້ຽງດູທາງວິນຍານ ແລະ ທາງຮ່າງກາຍ! ພາຍໃນໜຶ່ງປີ, ໃນແຕ່ລະວັນອາທິດ, ມີຊາຍໜຸ່ມ 21 ຄົນເຂົ້າຮ່ວມໂດຍສະເລ່ຍ. ຕ້ອງຂອບໃຈບັນດາຊາຍໜຸ່ມທີ່ໄດ້ນັບ ແລະ ຮັບຜິດຊອບ.
ໝູ່ທີ່ຮັກແພງຄົນໜຶ່ງຂອງຂ້າພະເຈົ້າ, ຕອນທີ່ເປັນນັກຮຽນປະລິນຍາໂທໜຸ່ມ, ໄດ້ຍ້າຍໄປເມືອງອາເມຣິກາໃຫຍ່ແຫ່ງໜຶ່ງກັບຄອບຄົວຂອງລາວ ເພື່ອສຶກສາຕໍ່. ລາວໄດ້ຖືກເອີ້ນໂດຍທັນທີໃຫ້ເປັນປະທານກຸ່ມແອວເດີ. ໂດຍທີ່ຕື່ນເຕັ້ນກ່ຽວກັບການສຳພາດທຳອິດກັບປະທານສະເຕກ, ລາວໄດ້ຕັ້ງໃຈທີ່ຈະໄປຢ່າງກຽມພ້ອມ. ລາວໄດ້ບອກປະທານສະເຕກວ່າ ລາວມີເປົ້າໝາຍສາມຢ່າງສຳລັບປີທີ່ຈະມາເຖິງນີ້: (1) 90 ເປີເຊັນ ການປະຕິບັດສາດສະໜາກິດ, (2) ບົດຮຽນພຣະກິດຕິຄຸນທີ່ມີແກ່ນສານແຕ່ລະອາທິດ, ແລະ (3) ກິດຈະກຳກຸ່ມທີ່ວາງແຜນເປັນຢ່າງດີທຸກໆເດືອນ.
ໂດຍທີ່ຍິ້ມໃສ່ໝູ່ຂອງຂ້າພະເຈົ້າ, ປະທານສະເຕກທີ່ມີສະຕິປັນຍາຜູ້ນີ້ໄດ້ຖາມວ່າ, “ເຈົ້າສາມາດບອກຊື່ຂອງສະມາຊິກກຸ່ມທີ່ບໍ່ຄ່ອຍມາໂບດຄົນໜຶ່ງ ທີ່ເຈົ້າຈະສາມາດຊ່ວຍພາໄປພຣະວິຫານກັບຄອບຄົວຂອງລາວປີນີ້ໄດ້ບໍ່?” ນັ້ນໄດ້ເຮັດໃຫ້ໝູ່ຂອງຂ້າພະເຈົ້າປະຫລາດໃຈ. ລາວໄດ້ຄິດຢ່າງລະມັດລະວັງ ແລະ ໄດ້ຄິດຊື່ໜຶ່ງອອກມາ. “ຈົດໄວ້,” ປະທານສະເຕກໄດ້ຊີ້ນຳ. ແລ້ວຜູ້ນຳທີ່ມີປະສົບການຜູູູ້ນີ້ໄດ້ຖາມຄຳຖາມດຽວກັນອີກສາມເທື່ອ—ແລະ ການສຳພາດກໍໄດ້ຈົບລົງ. ຊາຍໜຸ່ມຄົນນີ້ໄດ້ຍ່າງອອກມາຈາກການສຳພາດນັ້ນ ໂດຍທີ່ໄດ້ຮຽນຮູ້ບົດຮຽນທີ່ຍິ່ງໃຫຍ່ທີ່ສຸດສຳລັບລາວກ່ຽວກັບຄວາມເປັນຜູ້ນຳ ແລະ ການປະຕິບັດສາດສະໜາກິດ. ລາວໄດ້ເຂົ້າໄປໃນການສຳພາດພ້ອມກັບໂປຣແກຣມ, ບົດຮຽນ, ແລະ ກິດຈະກຳ. ລາວໄດ້ຍ່າງອອກມາພ້ອມກັບຊື່! ຕໍ່ມາ ຊື່ທັງສີ່ນັ້ນໄດ້ກາຍເປັນຈຸດສຸມຫລັກຂອງການປະຕິບັດສາດສະໜາກິດຂອງລາວ ແລະ ຂອງກຸ່ມຂອງລາວ.
ໃນຖານະຜູ້ນຳເຂດເຜີຍແຜ່, ຂ້າພະເຈົ້າໄດ້ໄປຢ້ຽມຢາມໜຶ່ງໃນສາຂາຂອງຂ້າພະເຈົ້າໃນເຊົ້າວັນອາທິດໜຶ່ງ. ຂ້າພະເຈົ້າສັງເກດເຫັນວ່າ ປະທານສາຂາມີແຕ່ຈັບເອົາບັດອອກມາຈາກຖົງຂອງເພິ່ນ ແລະ ຂຽນໃສ່. ຂ້າພະເຈົ້າໄດ້ຕັດສິນໃຈທີ່ຈະຖາມເພິ່ນກ່ຽວກັບເລື່ອງນັ້ນຫລັງຈາກການອະທິຖານປິດ. ເມື່ອກອງປະຊຸມໄດ້ຈົບລົງ ແລະ ກ່ອນທີ່ຂ້າພະເຈົ້າຈະຖາມກ່ຽວກັບບັດນັ້ນ, ຜູ້ນຳເຜີຍແຜ່ຂອງສາຂາໄດ້ຟ້າວໄປຍັງແທ່ນປາໄສ, ບ່ອນທີ່ລາວໄດ້ຮັບເຈ້ຍນັ້ນ. ຂ້າພະເຈົ້າໄດ້ຕິດຕາມຜູ້ນຳທີ່ກະຕືລືລົ້ນຜູ້ນີ້ໄປບ່ອນປະຊຸມປະສານງານຜູ້ສອນສາດສະໜາຂອງສາຂາປະຈຳອາທິດທັນທີ. ກ່ອນທີ່ເຂົາເຈົ້າຈະເລີ່ມ, ລາວໄດ້ຈັບເອົາເຈ້ຍອອກມາຈາກຖົງຂອງລາວ. ມັນໄດ້ເຕັມໄປດ້ວຍຊື່ຂອງສະມາຊິກຜູ້ທີ່ບໍ່ໄດ້ມາກອງປະຊຸມສິນລະລຶກ. ພາຍໃນບໍ່ເທົ່າໃດນາທີ, ສະມາຊິກແຕ່ລະຄົນໃນສະພາ ໄດ້ເລືອກຊື່ໜຶ່ງ ຫລືື ສອງຊື່, ໂດຍທີ່ມຸ່ງໝັ້ນທີ່ຈະໄປຢ້ຽມຢາມພວກເຂົາໃນມື້ດຽວກັນນັ້ນ ເພື່ອແນ່ໃຈວ່າ ພວກເຂົາບໍ່ເປັນຫຍັງ ແລະ ໃຫ້ພວກເຂົາຮູ້ວ່າ ພວກເຂົາຖືກຄິດຮອດ. ບັດນີ້ ນັ້ນແຫລະ ຄືການນັບ ແລະ ການຮັບຜິດຊອບ.
ຂ້າພະເຈົ້າຈື່ທ້ອງຖິ່ນໜຶ່ງ, ຫລາຍຊົ່ວໂມງທາງຍົນຫ່າງຈາກພຣະວິຫານທີ່ໃກ້ທີ່ສຸດ, ບ່ອນທີ່ການຮັກສາໃບຮັບຮອງປະຈຸບັນ ເປັນເລື່ອງສຳຄັນສູງສຸດ, ເຖິງແມ່ນວ່າຈະມີແນວໂນ້ມທີ່ມັນຈະບໍ່ເຄີຍຖືກໃຊ້ເລີຍກໍຕາມ. ວັນອາທິດທຳອິດຂອງແຕ່ລະເດືອນ, ຜູ້ນຳໄດ້ໃຊ້ເຄື່ອງມືນັບຂອງເຂົາເຈົ້າເພື່ອຮັບຜິດຊອບຕໍ່ສະມາຊິກທີ່ໄດ້ຮັບຂອງປະທານສັກສິດ. ຖ້າເຂົາເຈົ້າພົບວ່າ ໃບຮັບຮອງໃກ້ຈະໝົດອາຍຸ, ເລຂາທິການສູງສຸດຈະນັດໝາຍການສຳພາດເພື່ອຕໍ່ໃໝ່. ຜູ້ທີ່ມີໃບຮັບຮອງໝົດອາຍຸຈະໄດ້ຮັບການແນະນຳ, ຈາກນັ້ນຊອກຫາວິທີທີ່ຈະຊ່ວຍພວກເຂົາກັບຄືນສູ່ເສັ້ນທາງແຫ່ງພັນທະສັນຍາ. ຂ້າພະເຈົ້າຖາມວ່າ ສະມາຊິກທີ່ໄດ້ຮັບຂອງປະທານສັກສິດຈັກຄົນມີໃບຮັບຮອງປະຈຸບັນ. ຄຳຕອບແມ່ນ 98.6 ເປີເຊັນ ຊຶ່ງໜ້າຕະລຶງຫລາຍ. ເມື່ອຖືກຖາມກ່ຽວກັບຫົກຄົນທີ່ໃບຮັບຮອງໄດ້ໝົດອາຍຸ, ຜູ້ນຳກໍສາມາດລະບຸພວກເຂົາຕາມຊື່ ແລະ ໄດ້ອະທິບາຍແກ່ຂ້າພະເຈົ້າເຖິງຄວາມພະຍາຍາມທີ່ຈະນຳພວກເຂົາກັບຄືນມາ!
ເມື່ອບໍ່ເທົ່າໃດປີກ່ອນ, ຄອບຄົວຂອງຂ້າພະເຈົ້າໄດ້ຍ້າຍກັບຄືນມາສະຫະລັດ. ພວກເຮົາຕື່ນເຕັ້ນທີ່ຈະໄປໂບດຢູ່ພີ້ ຫລັງຈາກ 26 ປີທີ່ໜ້າອັດສະຈັນໃນໜ່ວຍທີ່ນ້ອຍກວ່າ ແລະ ຫ່າງໄກກວ່າ. ຂ້າພະເຈົ້າໄດ້ຖືກເອີ້ນໃຫ້ເປັນຜູ້ສອນສາດສະໜາຫວອດ. ພວກເຮົາໄດ້ມີຜູ້ນຳເຜີຍແຜ່ຫວອດທີ່ດີ ແລະ ໄດ້ເຮັດສິ່ງທີ່ໜ້າຕື່ນເຕັ້ນ ແລະ ສິດສອນຜູ້ຄົນທີ່ແສນວິເສດ. ຂ້າພະເຈົ້າໄດ້ຖືກຂໍໃຫ້ເຂົ້າຮ່ວມການປະຊຸມສະພາຫວອດ ເພື່ອສັງເກດການ ແລະ ຂໍຄວາມຊ່ວຍເຫລືອຈາກໝູ່ເພື່ອນທີ່ພວກເຮົາກຳລັງເຮັດວຽກນຳ. ຂ້າພະເຈົ້າຮູ້ສຶກປະຫລາດໃຈເມື່ອທັງໝົດທີ່ໄດ້ສົນທະນາກັນແມ່ນກ່ຽວກັບກິດຈະກຳຫວອດທີ່ກຳລັງຈະມາເຖິງ. ຫລັງຈາກນັ້ນ ຂ້າພະເຈົ້າໄດ້ເຂົ້າໄປຫາຜູ້ນຳເຜີຍແຜ່ຫວອດ ແລະ ໄດ້ໃຫ້ຄຳເຫັນວ່າ ລາວບໍ່ໄດ້ມີໂອກາດທີ່ຈະກັບມາລາຍງານກ່ຽວກັບຜູ້ຄົນຂອງພວກເຮົາ. ຄຳຕອບຂອງລາວກໍຄື? “ໂອ, ຂ້ອຍບໍ່ເຄີຍລາຍງານ.”
ຂ້າພະເຈົ້າໄດ້ປຽບທຽບກັບການປະຊຸມສະພາຫວອດໃນເມືອງລາຮໍ, ປະເທດປາກິດສະຖານ, ທີ່ຂ້າພະເຈົ້າໄດ້ເຂົ້າຮ່ວມເມື່ອຫລາຍອາທິດກ່ອນ. ກຸ່ມນ້ອຍໆນີ້ໄດ້ນັ່ງອ້ອມໂຕະນ້ອຍນຳກັນ, ແລະ ເລື່ອງດຽວທີ່ເຂົາເຈົ້າເວົ້າເຖິງແມ່ນກ່ຽວກັບຜູ້ຄົນ. ຊື່. ຜູ້ນຳແຕ່ລະຄົນໄດ້ລາຍງານການເປັນຜູ້ພິທັກຮັກສາຂອງຕົນ ແລະ ບຸກຄົນ ແລະ ຄອບຄົວທີ່ເຂົາເຈົ້າກັງວົນ. ທຸກຄົນມີໂອກາດທີ່ຈະເສີມຄວາມຄິດຂອງຕົນກ່ຽວກັບວິທີທີ່ດີທີ່ສຸດທີ່ເຂົາເຈົ້າຈະສາມາດເປັນພອນໃຫ້ແກ່ຜູ້ທີ່ກຳລັງເວົ້າເຖິງນັ້ນ. ໄດ້ມີການວາງແຜນ ແລະ ໄດ້ມີການມອບໝາຍວຽກງານ. ຊ່າງເປັນບົດຮຽນອັນດີເລີດໃນການນັບ ແລະ ການຮັບຜິດຊອບຕາມຊື່ຈາກອ້າຍເອື້ອຍນ້ອງລຸ້ນທຳອິດຂອງພວກເຮົາ.
ໃນສາດສະໜາຈັກຂອງພຣະເຢຊູຄຣິດ, ພວກເຮົາໄດ້ຮັບການຊີ້ນຳຈາກສາດສະດາໃນອະດີດ ແລະ ສາດສະດາໃນປະຈຸບັນ—ແລະ ຕາມແບບແຜນທີ່ຕັ້ງຂຶ້ນໂດຍພຣະຜູ້ຊ່ວຍໃຫ້ລອດ—ວິທີປະຕິບັດສາດສະໜາກິດ. ເຮົາຈົດຊື່, ເຮົາຈົດຈຳ, ແລະ ເຮົາປຶກສາຫາລືກ່ຽວກັບຄວາມຜາສຸກຂອງຈິດວິນຍານ. ຜູ້ນຳທີ່ເຮັດສິ່ງນີ້ ຈະບໍ່ມີວັນໝົດວາລະໃນການປະຊຸມສະພາຂອງຕົນ! ຫລັກທຳຂອງການນັບ ແລະ ການຮັບຜິດຊອບ ໃຊ້ງານໄດ້ແທ້. ມັນເປັນວິທີຂອງພຣະຜູ້ເປັນເຈົ້າ. ເຮົາສາມາດເຮັດໄດ້ດີກວ່າເກົ່າ. ສຳລັບພຣະເຈົ້າ, ຜູ້ທີ່ໄດ້ສ້າງຈັກກະວານ ແລະ ກົດທີ່ປົກຄອງທຸກສິ່ງ, ວຽກງານນີ້—ວຽກງານ ແລະ ລັດສະໝີພາບ ຂອງພຣະອົງ—ແມ່ນເປັນເລື່ອງສ່ວນຕົວຫລາຍ. ແລະ ເຫດສະນັ້ນ ມັນຄວນເປັນເຊັ່ນນັ້ນສຳລັບເຮົາແຕ່ລະຄົນ, ໃນຖານະເຄື່ອງມືໃນພຣະຫັດຂອງພຣະອົງໃນວຽກງານແຫ່ງຄວາມລອດ ແລະ ຄວາມສູງສົ່ງອັນໜ້າອັດສະຈັນຂອງພຣະອົງ. ອັດສະຈັນໃນຊີວິດຂອງຜູ້ຄົນແທ້ໆຈະເກີດຂຶ້ນ. ໃນພຣະນາມຂອງພຣະເຢຊູຄຣິດ, ອາແມນ.