ຮູ້ວ່າທ່ານເປັນໃຜແທ້ໆ
ບໍ່ວ່າເຮົາຈະຢູ່ຈຸດໃດໃນເສັ້ນທາງການເປັນສານຸສິດ, ໂດຍທົ່ວໄປແລ້ວ ຊີວິດຂອງເຮົາຈະປ່ຽນໄປ ຖ້າຫາກເຮົາເຂົ້າໃຈວ່າເຮົາເປັນໃຜແທ້ໆ.
ເມື່ອຫລາຍປີກ່ອນ ລູກສາວຂອງພວກເຮົາໄດ້ມີປະສົບການອັນເລິກເຊິ່ງ ໃນການເຜີຍແຜ່ຂອງນາງ. ດ້ວຍຄວາມເຫັນດີຈາກນາງ, ຂ້າພະເຈົ້າຂໍແບ່ງປັນຂໍ້ຄວາມບາງສ່ວນຈາກສິ່ງທີ່ນາງໄດ້ຂຽນເຖິງພວກເຮົາໃນອາທິດນັ້ນ:
“ມື້ວານນີ້ ສະມາຊິກຄົນໜຶ່ງທີ່ໄດ້ກັບຄືນມາໂບດ ໄດ້ຂໍໃຫ້ພວກເຮົາໄປຫາໄວໆທີ່ສຸດເທົ່າທີ່ຈະເປັນໄປໄດ້. ເມື່ອພວກເຮົາໄປເຖິງ, ພວກເຮົາພົບລາວຢູ່ເທິງພື້ນ, ຮ້ອງໄຫ້ຢ່າງບໍ່ສາມາດຄວບຄຸມໄດ້. ຜ່ານທາງນ້ຳຕາ, ພວກເຮົາພົບວ່າ ລາວໄດ້ສູນເສຍວຽກຂອງລາວ, ຈະຖືກຂັບໄລ່ອອກຈາກຫ້ອງແຖວຂອງລາວ, ແລະ ອີກເທື່ອໜຶ່ງ, ກາຍເປັນຄົນທີ່ບໍ່ມີທີ່ຢູ່ອາໄສ.”
ລູກສາວຂອງພວກເຮົາໄດ້ເວົ້າຕໍ່ວ່າ: “ລູກເລີ່ມຕົ້ນຄົ້ນຫາຂໍ້ພຣະຄຳພີຂອງລູກ, ພະຍາຍາມຊອກຫາບາງສິ່ງ—ແມ່ນຫຍັງກໍໄດ້—ທີ່ຈະຊ່ວຍລາວ. ຂະນະທີ່ລູກກຳລັງຊອກຫາຂໍ້ທີ່ເໝາະສົມຢູ່ນັ້ນ, ລູກຄິດວ່າ, ‘ເຮົາກຳລັງເຮັດຫຍັງ? ນີ້ບໍ່ແມ່ນສິ່ງທີ່ພຣະຄຣິດຈະເຮັດ. ນີ້ບໍ່ແມ່ນບັນຫາທີ່ເຮົາສາມາດແກ້ໄຂໄດ້, ແຕ່ນີ້ແມ່ນທິດາຂອງພຣະເຈົ້າແທ້ໆ ຜູ້ທີ່ຕ້ອງການຄວາມຊ່ວຍເຫລືອຈາກເຮົາ.’ ສະນັ້ນ ລູກຈຶ່ງໄດ້ປິດພຣະຄຳພີ, ຄຸເຂົ່າລົງຂ້າງໆລາວ, ແລະ ໂອບກອດລາວຂະນະທີ່ພວກເຮົາຮ້ອງໄຫ້ນຳກັນ, ຈົນກະທັ້ງລາວພ້ອມທີ່ຈະລຸກຂຶ້ນ ແລະ ປະເຊີນໜ້າກັບການທົດລອງນີ້.”
ຫລັງຈາກທີ່ຜູ້ຍິງຄົນນີ້ໄດ້ຮັບການປອບໂຍນແລ້ວ, ລູກສາວຂອງພວກເຮົາໄດ້ໃຊ້ພຣະຄຳພີເພື່ອພະຍາຍາມຊ່ວຍໃຫ້ລາວເຂົ້າໃຈເຖິງຄວາມເປັນຈິງໃນຄຸນຄ່າອັນສູງສົ່ງຂອງລາວ ແລະ ເພື່ອສິດສອນລາວເຖິງຄວາມຈິງອັນພື້ນຖານທີ່ສຸດຢ່າງໜຶ່ງຂອງການດຳລົງຢູ່ຂອງເຮົາ—ວ່າເຮົາເປັນບຸດ ແລະ ທິດາຂອງພຣະເຈົ້າ, ພຣະເຈົ້າຜູ້ຮູ້ສຶກເມດຕາຢ່າງສົມບູນແບບ ເມື່ອເຮົາທຸກທໍລະມານ ແລະ ພ້ອມທີ່ຈະຊ່ວຍເຫລືອເຮົາ ເມື່ອເຮົາລຸກຂຶ້ນຢືນອີກຄັ້ງ.
ມັນເປັນຄວາມຮູ້ແຈ້ງທີ່ວ່າ ຈຸດທຳອິດຂອງຄຳສອນທີ່ຜູ້ສອນສາດສະໜາສິດສອນແມ່ນວ່າ ພຣະເຈົ້າເປັນພຣະບິດາເທິງສະຫວັນທີ່ຊົງຮັກຂອງເຮົາ. ທຸກໆຄວາມຈິງທີ່ຕາມມາ ລ້ວນແຕ່ສ້າງຂຶ້ນຈາກພື້ນຖານຄວາມເຂົ້າໃຈທີ່ວ່າ ເຮົາເປັນໃຜແທ້ໆ.
ຊູແຊນ ເອັຈ ຜອດເທີ, ປະທານອົງການປະຖົມໄວສາມັນ, ໄດ້ສິດສອນວ່າ: “ເມື່ອທ່ານຮູ້ຈັກ ແລະ ເຂົ້າໃຈວ່າ ທ່ານເປັນທີ່ຮັກຢ່າງໝົດໃຈໃນຖານະລູກຂອງພຣະເຈົ້າຫລາຍສ່ຳໃດແລ້ວ, ທຸກຢ່າງຈະປ່ຽນໄປ. ມັນປ່ຽນວິທີທີ່ທ່ານຮູ້ສຶກກ່ຽວກັບຕົວທ່ານເອງ ເມື່ອທ່ານເຮັດຜິດພາດ. ມັນປ່ຽນວິທີທີ່ທ່ານຮູ້ສຶກ ເມື່ອສິ່ງທີ່ຍາກລຳບາກເກີດຂຶ້ນ. ມັນປ່ຽນມຸມມອງຂອງທ່ານກ່ຽວກັບພຣະບັນຍັດຂອງພຣະເຈົ້າ. ມັນປ່ຽນມຸມມອງຂອງທ່ານກ່ຽວກັບຄົນອື່ນ ແລະ ກ່ຽວກັບຄວາມສາມາດຂອງທ່ານທີ່ມີຜົນກະທົບ.”
ການປ່ຽນແປງນີ້ສະແດງໃຫ້ເຫັນໄດ້ ເມື່ອເຮົາອ່ານກ່ຽວກັບປະສົບການທີ່ໂມໄຊໄດ້ເວົ້າລົມກັບພຣະເຈົ້າໜ້າຕໍ່ໜ້າ. ລະຫວ່າງການສົນທະນານັ້ນ, ພຣະເຈົ້າໄດ້ສິດສອນໂມເຊຊ້ຳແລ້ວຊ້ຳອີກ ເຖິງມໍລະດົກອັນສູງສົ່ງຂອງເພິ່ນ, ໂດຍກ່າວວ່າ, “ໂມເຊ, … ເຈົ້າແມ່ນບຸດຂອງເຮົາ.” ພຣະເຈົ້າໄດ້ອະທິບາຍວ່າ ໂມເຊມີລັກສະນະດຽວກັນກັບພຣະອົງດຽວທີ່ຖືກຳເນີດຂອງພຣະອົງ. ໂມເຊໄດ້ເຂົ້າໃຈຢ່າງແຈ່ມແຈ້ງວ່າ ເພິ່ນເປັນໃຜ, ວ່າເພິ່ນມີວຽກງານທີ່ຈະເຮັດ, ແລະ ວ່າເພິ່ນມີພຣະບິດາເທິງສະຫວັນທີ່ຊົງຮັກ.
ຫລັງຈາກປະສົບການນີ້, ຜູ້ປໍລະປັກໄດ້ມາລໍ້ລວງເພິ່ນ ແລະ ກ່າວກັບເພິ່ນໃນທັນທີວ່າ, “ໂມເຊ, ບຸດມະນຸດ.” ນີ້ເປັນເຄື່ອງມືທີ່ພົບເຫັນໄດ້ທົ່ວໄປ ແລະ ອັນຕະລາຍໃນຍຸດທະວິທີຂອງຜູ້ປໍລະປັກ. ເຖິງແມ່ນພຣະບິດາເທິງສະຫວັນຂອງເຮົາໄດ້ເຕືອນເຮົາຢູ່ສະເໝີ ແລະ ດ້ວຍຄວາມຮັກ ວ່າເຮົາເປັນລູກຂອງພຣະອົງ, ແຕ່ຜູ້ປໍລະປັກຈະພະຍາຍາມໃສ່ຮ້າຍປ້າຍສີເຮົາຢູ່ສະເໝີ ດ້ວຍຈຸດອ່ອນຂອງເຮົາ. ແຕ່ໂມເຊໄດ້ຮຽນຮູ້ແລ້ວວ່າ ເພິ່ນເປັນຫລາຍກວ່າ “ບຸດມະນຸດ.” ເພິ່ນໄດ້ປະກາດກັບຊາຕານວ່າ: “ທ່ານເປັນໃຜ? ເພາະຈົ່ງເບິ່ງ, ຂ້າພະເຈົ້າເປັນບຸດຂອງພຣະເຈົ້າ.” ໃນທຳນອງດຽວກັນ, ເມື່ອເຮົາປະເຊີນກັບຄວາມທ້າທາຍຂອງຊີວິດມະຕະ ຫລື ເມື່ອເຮົາຮູ້ສຶກວ່າ ມີຄົນພະຍາຍາມໃສ່ຮ້າຍປ້າຍສີເຮົາ ດ້ວຍຈຸດອ່ອນຂອງເຮົາ, ເຮົາຕ້ອງຢືນຢັດຢ່າງໝັ້ນຄົງ ໃນຄວາມຮູ້ທີ່ວ່າເຮົາເປັນໃຜແທ້ໆ. ເຮົາຕ້ອງສະແຫວງຫາການຢືນຢັນຈາກພຣະເຈົ້າ, ບໍ່ແມ່ນຈາກມະນຸດ. ແລະ ເມື່ອເຮົາເຮັດເຊັ່ນນັ້ນ, ເຮົາກໍສາມາດປະກາດຢ່າງກ້າຫານວ່າ, “ເຮົາເປັນລູກຂອງພຣະເຈົ້າ.”
ໃນກອງປະຊຸມໃຫ້ຄຳດົນໃຈສຳລັບຜູ້ໃຫຍ່ໜຸ່ມ, ປະທານຣະໂຊ ເອັມ ແນວສັນ ທີ່ຮັກຂອງເຮົາ ໄດ້ສິດສອນວ່າ: “ສະນັ້ນ ທ່ານເປັນໃຜ? ກ່ອນອື່ນໝົດ, ທ່ານເປັນລູກຂອງພຣະເຈົ້າ, ລູກແຫ່ງພັນທະສັນຍາ, ແລະ ເປັນສານຸສິດຂອງພຣະເຢຊູຄຣິດ. ເມື່ອທ່ານນ້ອມຮັບຄວາມຈິງເຫລົ່ານີ້, ພຣະບິດາເທິງສະຫວັນຂອງເຮົາກໍຈະຊ່ວຍທ່ານໃຫ້ໄປຮອດເປົ້າໝາຍສູງສຸດຂອງທ່ານທີ່ຈະດຳເນີນຊີວິດຢ່າງນິລັນດອນໃນພຣະພັກອັນບໍລິສຸດຂອງພຣະອົງ.”
ມັນບໍ່ແມ່ນເລື່ອງບັງເອີນທີ່ພຣະຄຳພີກ່າວຊ້ຳແລ້ວຊ້ຳອີກວ່າ, ພຣະເຈົ້າເຕືອນເຮົາເຖິງຄວາມສຳພັນຂອງເຮົາກັບພຣະອົງ. ໃນບັນດາພຣະນາມທັງໝົດທີ່ພຣະອົງສາມາດລະບຸໄດ້ໃນຄຳອະທິຖານສິນລະລຶກ, ພຣະອົງໄດ້ຂໍໃຫ້ເອີ້ນວ່າ “ພຣະອົງເຈົ້າ, ພຣະບິດານິລັນດອນ.”
ເມື່ອເຮົາຮູ້ຈັກວ່າເຮົາເປັນໃຜແທ້ໆ, ເຮົາຈະເຊື່ອໝັ້ນຫລາຍຂຶ້ນວ່າ ພຣະບິດາເທິງສະຫວັນໄດ້ຈັດຕຽມແຜນໄວ້ສຳລັບເຮົາ ທີ່ຈະກັບໄປຢູ່ກັບພຣະອົງອີກຄັ້ງ. ແອວເດີ ແພທຣິກ ເຄຍຣັນ ໄດ້ສິດສອນວ່າ: “ແຜນທີ່ສວຍງາມຂອງພຣະບິດາຂອງເຮົາ, ແມ່ນແຕ່ແຜນທີ່ ‘ຍອດຍ້ຽມ’, ຖືກອອກແບບມາເພື່ອນຳທ່ານກັບບ້ານ, ບໍ່ແມ່ນ ປິດກັ້ນທ່ານໃຫ້ອອກໄປ. … ພຣະເຈົ້າສະແຫວງຫາທ່ານຢ່າງບໍ່ຢຸດຢັ້ງ.” ໃຫ້ຄິດເບິ່ງຈັກບຶດໜຶ່ງ—ພຣະບິດາຜູ້ຊົງລິດທານຸພາບ ແລະ ເຕັມປ່ຽມດ້ວຍຄວາມຮັກຂອງເຮົາໄດ້ “ຕິດຕາມທ່ານຢ່າງບໍ່ລົດລະ.”
ບໍ່ວ່າເຮົາຈະຢູ່ຈຸດໃດໃນເສັ້ນທາງການເປັນສານຸສິດ, ໂດຍທົ່ວໄປແລ້ວ ຊີວິດຂອງເຮົາຈະປ່ຽນໄປ ຖ້າຫາກເຮົາເຂົ້າໃຈວ່າເຮົາເປັນໃຜແທ້ໆ. ຂ້າພະເຈົ້າຂໍແນະນຳສອງວິທີທີ່ເຮົາສາມາດເຮັດໃຫ້ຄວາມເຂົ້າໃຈນີ້ເລິກເຊິ່ງຫລາຍຂຶ້ນ.
ທຳອິດ, ການອະທິຖານ
ຂະນະທີ່ພຣະຜູ້ຊ່ວຍໃຫ້ລອດເລີ່ມປະຕິບັດສາດສະໜາກິດໃນຊ່ວງມະຕະຂອງພຣະອົງ, ພຣະອົງໄດ້ຖືກນຳເຂົ້າໄປໃນຖິ່ນແຫ້ງແລ້ງກັນດານ ເພື່ອໄປ “ຢູ່ກັບພຣະເຈົ້າ.” ບາງທີເຮົາຄວນປ່ຽນຄວາມຄິດຂອງເຮົາຈາກການເວົ້າຄຳອະທິຖານເທົ່ານັ້ນ ແຕ່ໃຫ້ໃຊ້ເວລາພຽງພໍ ເພື່ອສົນທະນາ ແລະ “ຢູ່ກັບພຣະເຈົ້າ” ແຕ່ລະມື້.
ຂ້າພະເຈົ້າພົບເຫັນວ່າ ຄຸນນະພາບຂອງການອະທິຖານຂອງຂ້າພະເຈົ້າດີຂຶ້ນ ເມື່ອຂ້າພະເຈົ້າໃຊ້ເວລາເພີ່ມອີກສອງສາມນາທີ ເພື່ອຕຽມພ້ອມທີ່ຈະເວົ້າລົມກັບພຣະບິດາເທິງສະຫວັນຂອງຂ້າພະເຈົ້າ. ພຣະຄຳພີສະແດງໃຫ້ເຮົາເຫັນວ່າ ນີ້ຄືແບບແຜນທີ່ໃຊ້ໄດ້. ບໍ່ວ່າຈະເປັນໂຈເຊັບ ສະມິດ; ນີໄຟ, ລູກຊາຍຂອງຮີລາມັນ; ຫລື ເອໂນດ, ທຸກຄົນຕ່າງກໍມີຮູບແບບຂອງການໄຕ່ຕອງ ແລະ ສະທ້ອນຄິດ ກ່ອນການສື່ສານກັບພຣະເຈົ້າທີ່ບັນທຶກໄວ້. ເອໂນດໄດ້ກ່າວວ່າ ຈິດວິນຍານຂອງເພິ່ນຫິວໂຫຍ ເມື່ອຖ້ອຍຄຳຂອງບິດາຂອງເພິ່ນຝັງເລິກຢູ່ໃນໃຈຂອງເພິ່ນ. ແຕ່ລະຕົວຢ່າງເຫລົ່ານີ້ສິດສອນເຮົາເຖິງຄວາມຈຳເປັນໃນການຕຽມພ້ອມທາງວິນຍານ ສຳລັບເວລາຂອງເຮົາໃນແຕ່ລະວັນ ທີ່ຈະ “ຢູ່ກັບພຣະເຈົ້າ.”
ຕໍ່ຊາວນີໄຟ, ພຣະຜູ້ຊ່ວຍໃຫ້ລອດໄດ້ແນະນຳວ່າ, “ເວລາເຈົ້າອະທິຖານ, ຈົ່ງເຂົ້າໄປໃນຫ້ອງ ແລະ ເມື່ອເຈົ້າປິດປະຕູແລ້ວ, ຈົ່ງອະທິຖານຫາພຣະບິດາຂອງເຈົ້າ.”
ບໍ່ວ່າຈະຢູ່ໃນຫ້ອງໃດ ຫລື ໃນຫ້ອງນອນ, ຫລັກທຳແມ່ນການຊອກຫາສະຖານທີ່ທີ່ທ່ານສາມາດຢູ່ຄົນດຽວເພື່ອອະທິຖານ, ປ່ອຍໃຫ້ຈິດວິນຍານຂອງທ່ານສະຫງົບນິ້ງ, ແລະ ຮູ້ສຶກເຖິງການກະຕຸ້ນຂອງ “ສຽງແຜ່ວເບົາ.” ເຮົາສາມາດຕຽມຕົວໄດ້ໂດຍການໄຕ່ຕອງເຖິງສິ່ງທີ່ເຮົາກະຕັນຍູຕໍ່ ແລະ ຄຳຖາມ ຫລື ຂໍ້ກັງວົນທີ່ເຮົາຈະນຳມັນມາຫາພຣະບິດາຂອງເຮົາ. ເຮົາຄວນພະຍາຍາມບໍ່ໃຫ້ມີການອະທິຖານແບບຊ້ຳຄຳເກົ່າ ແຕ່ໃຫ້ ເວົ້າລົມ ກັບພຣະບິດາຂອງເຮົາ, ອອກສຽງຖ້າເປັນໄປໄດ້.
ຂ້າພະເຈົ້າຮູ້ວ່າ ທ່າມກາງຄວາມວຸ້ນວາຍຂອງຊີວິດເຮົາ, ເມື່ອເຮົາຕ້ອງຮັບມືກັບລູກນ້ອຍ ຫລື ແລ່ນໄປຫັ້ນມານີ້ລະຫວ່າງການປະຊຸມ, ເຮົາອາດບໍ່ມີເວລາທີ່ຈະເຂົ້າໄປໃນຫ້ອງທີ່ງຽບໆ ແລະ ຕຽມຕົວຢ່າງຮອບຄອບ—ແຕ່ການອະທິຖານໃນໃຈ, ຢ່າງໄວ, ແລະ ເລັ່ງດ່ວນນັ້ນ ສາມາດມີຄວາມໝາຍຫລາຍກວ່າເມື່ອເຮົາພະຍາຍາມ “ຢູ່ກັບພຣະເຈົ້າ” ກ່ອນໜ້ານັ້ນໃນມື້ເຊົ້າ.
ອາດມີບາງຄົນທີ່ບໍ່ໄດ້ອະທິຖານເປັນເວລາດົນນານແລ້ວ ຫລື ບາງຄົນອາດຍັງບໍ່ຮູ້ສຶກວ່າຄຳອະທິຖານຂອງເຂົາຖືກຮັບຟັງ. ຂ້າພະເຈົ້າສັນຍາວ່າ ພຣະບິດາເທິງສະຫວັນຂອງທ່ານຮູ້ຈັກທ່ານ, ຮັກທ່ານ, ແລະ ຢາກໄດ້ຍິນຈາກທ່ານ. ພຣະອົງຢາກສື່ສານກັບທ່ານ. ພຣະອົງຢາກໃຫ້ທ່ານຈື່ຈຳວ່າທ່ານເປັນໃຜ.
ແອວເດີ ແຈັບຟະຣີ ອາ ຮໍແລນ ໄດ້ສິດສອນເມື່ອບໍ່ດົນມານີ້ວ່າ: “ບໍ່ວ່າທ່ານຈະອະທິຖານຫລາຍພຽງໃດ, ຈົ່ງອະທິຖານໃຫ້ຫລາຍຂຶ້ນ. ບໍ່ວ່າທ່ານຈະອະທິຖານໜັກປານໃດ, ຈົ່ງອະທິຖານໜັກກວ່າເກົ່າ.”
ນອກເໜືອໄປຈາກການອະທິຖານເລື້ອຍກວ່າເກົ່າ ແລະ ຢ່າງແຮງກ້າແລ້ວ, ການສຶກສາພຣະຄຳພີມໍມອນທຸກວັນ ແລະ ການນະມັດສະການໃນພຣະວິຫານ ຈະຊ່ວຍຕຽມຈິດໃຈຂອງເຮົາສຳລັບການເປີດເຜີຍນຳອີກ. ຂະນະທີ່ເຮົາພະຍາຍາມປັບປຸງການສື່ສານຂອງເຮົາກັບພຣະບິດາເທິງສະຫວັນ, ພຣະອົງຈະອວຍພອນເຮົາໃຫ້ຮູ້ສຶກຢ່າງເລິກເຊິ່ງຫລາຍຂຶ້ນ ວ່າເຮົາເປັນລູກໆຂອງພຣະອົງ.
ທີສອງ, ຮູ້ວ່າພຣະເຢຊູຄືພຣະຄຣິດ
ການສະແດງໃຫ້ປະຈັກທີ່ຍິ່ງໃຫຍ່ທີ່ສຸດເຖິງຄວາມຮັກຂອງພຣະບິດາເທິງສະຫວັນທີ່ມີຕໍ່ເຮົາ ໃນຖານະລູກໆຂອງພຣະອົງ ແມ່ນຄວາມເປັນຈິງທີ່ພຣະອົງໄດ້ສົ່ງພຣະບຸດຂອງພຣະອົງ, ພຣະຜູ້ຊ່ວຍໃຫ້ລອດສ່ວນຕົວຂອງເຮົາມາ, ເພື່ອຊ່ວຍເຮົາກັບບ້ານ. ດັ່ງນັ້ນ, ເຮົາຕ້ອງຮູ້ຈັກພຣະອົງ.
ເມື່ອຫລາຍປີກ່ອນ, ຂະນະທີ່ຮັບໃຊ້ເປັນປະທານສະເຕກ, ຂ້າພະເຈົ້າໄດ້ສົ່ງໃບແນະນຳອ້າຍນ້ອງຄົນໜຶ່ງ ເພື່ອຮັບໃຊ້ເປັນພະນັກງານພິທີການໃນພຣະວິຫານ. ຫລັງຈາກໄດ້ອະທິບາຍວ່າ ລາວຈະເປັນພະນັກງານພິທີການທີ່ຍອດຍ້ຽມພຽງໃດ, ຂ້າພະເຈົ້າໄດ້ຫລົງໄປກົດຄຳວ່າ “ບໍ່ຮັບຮອງ” ຊຶ່ງເປັນຄຳແນະນຳທີ່ສົ່ງໄປ. ຫລັງຈາກທີ່ໄດ້ພະຍາຍາມກູ້ເອກະສານນັ້ນຄືນແຕ່ກໍບໍ່ສຳເລັດ, ຂ້າພະເຈົ້າໄດ້ໂທໄປຫາປະທານພຣະວິຫານ ແລະ ເວົ້າວ່າ, “ຂ້ອຍໄດ້ເຮັດຜິດພາດຢ່າງຮ້າຍແຮງ.” ໂດຍທີ່ບໍ່ລັງເລ, ປະທານພຣະວິຫານທີ່ດີຄົນນີ້ໄດ້ກ່າວວ່າ, “ປະທານໄອຣີ, ບໍ່ມີສິ່ງໃດທີ່ທ່ານເຮັດລົງໄປ ທີ່ບໍ່ສາມາດອະໄພໃຫ້ ແລະ ຈະແກ້ໄຂໄດ້ໃນທີ່ສຸດ.” ຊ່າງເປັນຄວາມຈິງທີ່ຍິ່ງໃຫຍ່ແທ້ໆ. ແນ່ນອນ, ພຣະເຢຊູຄຣິດຊົງ “ອະນຸພາບເພື່ອຊ່ວຍໃຫ້ລອດ.”
ໃນປີ 2019 ໄດ້ມີການປ່ຽນແປງຢ່າງເລິກເຊິ່ງໃນຄຳຖາມສຳລັບໃບຮັບຮອງເຂົ້າພຣະວິຫານ. ກ່ອນໜ້ານັ້ນ, ຄຳຖາມໜຶ່ງໄດ້ຖາມວ່າ ເຈົ້າມີປະຈັກພະຍານເຖິງບົດບາດຂອງພຣະເຢຊູຄຣິດໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ບໍ່. ຕອນນີ້ ມັນຖາມວ່າ ເຈົ້າມີປະຈັກພະຍານເຖິງບົດບາດຂອງພຣະອົງໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ ຂອງເຈົ້າ ບໍ່. ການຊົດໃຊ້ຂອງພຣະເຢຊູຄຣິດບໍ່ພຽງແຕ່ໃຊ້ໄດ້ກັບຄົນອື່ນເທົ່ານັ້ນ; ມັນໃຊ້ໄດ້ກັບທ່ານ ແລະ ຂ້າພະເຈົ້າເຊັ່ນກັນ. ພຣະອົງເປັນພຣະຜູ້ຊ່ວຍໃຫ້ລອດຂອງຂ້າພະເຈົ້າ. ພຣະອົງເປັນພຣະຜູ້ຊ່ວຍໃຫ້ລອດຂອງທ່ານ. ເປັນສ່ວນບຸກຄົນ. ພຽງແຕ່ຜ່ານທາງພຣະອົງເທົ່ານັ້ນທີ່ທ່ານ ແລະ ຂ້າພະເຈົ້າຈະສາມາດກັບໄປຢູ່ກັບພຣະບິດາຂອງເຮົາໄດ້.
ສະນັ້ນ, ອ້າຍເອື້ອຍນ້ອງທັງຫລາຍ, ຂໍໃຫ້ເຮົາຈົ່ງສະແຫວງຫາພຣະອົງ. ຂໍໃຫ້ເຮົາຈົ່ງສຶກສາຄວາມສຳພັນອັນສູງສົ່ງຂອງພຣະອົງກັບພຣະບິດາ ແລະ ກັບກັນແລະກັນ. ຂໍໃຫ້ເຮົາຈົ່ງປະສົບກັບເພງແຫ່ງຄວາມຮັກທີ່ໄຖ່ ທີ່ມາສູ່ເຮົາແຕ່ລະຄົນເປັນສ່ວນຕົວ ຜ່ານທາງພຣະຜູ້ໄຖ່ຂອງເຮົາ ເມື່ອເຮົາກັບໃຈ. ເມື່ອເຮົາຮູ້ວ່າ “ພຣະອົງຜູ້ຊົງອະນຸພາບເພື່ອຊ່ວຍໃຫ້ລອດ,” ເຮົາຈະເຂົ້າໃຈວ່າ ເຮົາ, ໃນຖານະລູກໆຂອງພຣະເຈົ້າ, ເປັນຄວາມຊື່ນຊົມຂອງພຣະອົງ—ເປັນຈຸດສຸມທີ່ສຳຄັນທີ່ສຸດຂອງພຣະອົງ—ແລະ ເຮົາກຸ້ມຄ່າທີ່ຈະຊ່ວຍໃຫ້ລອດຢ່າງແນ່ນອນ.
ຂ້າພະເຈົ້າເປັນພະຍານວ່າ ເຮົາມີພຣະບິດາເທິງສະຫວັນທີ່ຊົງຮັກ. ເມື່ອເຮົາຮູ້ຄວາມຈິງນິລັນດອນນີ້ຜ່ານທາງການອະທິຖານຢ່າງມີພະລັງ, ການເປີດເຜີຍສ່ວນຕົວ, ແລະ ການມາຫາພຣະເຢຊູຄຣິດ, ເຮົາຈະສາມາດປະກາດຢ່າງກ້າຫານໃນຕອນນີ້ ແລະ ຕະຫລອດໄປວ່າ, “ເຮົາເປັນລູກຂອງພຣະເຈົ້າ.” ໃນພຣະນາມຂອງພຣະເຢຊູຄຣິດ, ອາແມນ.