ຫວັງເພິ່ງພຣະເຈົ້າ ແລະ ມີຊີວິດ
ມີພຽງການຫັນມາຫາພຣະເຈົ້າເທົ່ານັ້ນທີ່ບຸກຄົນ, ຄອບຄົວ, ແລະ ແມ່ນແຕ່ປະຊາຊາດຈະຈະເລີນໄດ້.
ໃນເດືອນມິຖຸນາທີ່ຜ່ານມາ, ໄດ້ເກີດອຸບັດຕິເຫດທີ່ຮ້າຍແຮງຂຶ້ນໃນປະເທດເລໂຊໂຕ ທາງຕອນໃຕ້ຂອງອາຟຣິກາ. ລົດເມນ້ອຍຄັນໜຶ່ງໄດ້ບັນທຸກຍິງໜຸ່ມ 20 ຄົນຂອງສາຂາ ມາປຸດໂຊ ແລະ ຜູ້ນຳເຈັດຄົນຂອງເຂົາເຈົ້າ ກຳລັງມຸ້ງໜ້າໄປເມືອງຫລວງ, ມາເຊຣູ, ເພື່ອເຂົ້າຮ່ວມການຊຸມນຸມຂອງຍິງໜຸ່ມຈາກທ້ອງຖິ່ນຂອງເຂົາເຈົ້າ. ຂະນະທີ່ເຂົາເຈົ້າກຳລັງເດີນທາງຢູ່ໃນທາງຫລວງໃນຕອນເຊົ້າ, ມີລົດຍົນຄັນໜຶ່ງກຳລັງແລ່ນສວນທາງມາ, ພະຍາຍາມແຊງລົດຄັນອື່ນ, ເຂົ້າມາໃນເລນທີ່ມີລົດເມ. ບໍ່ມີພື້ນທີ່ ຫລື ເວລາທີ່ຈະຫລີກລ້ຽງການຊົນດວນກັນ, ແລະ ພາຍໃນສອງສາມວິນາທີ ລົດກໍພຸ່ງຊົນ, ກິ້ງອອກນອກຖະໜົນ, ແລະ ລຸກເປັນໄຟ.
ໃນຈຳນວນທັງໝົດ, 15 ຄົນໄດ້ເສຍຊີວິດໃນອຸບັດຕິເຫດ, ລວມທັງຍິງໜຸ່ມຫົກຄົນ, ຜູ້ນຳຍິງໜຸ່ມສອງຄົນ, ແລະ ປະທານສາຂາ ແລະ ພັນລະຍາຂອງເພິ່ນ. ຜູ້ລອດຊີວິດ, ສະມາຊິກຄອບຄົວ, ແລະ ໝູ່ເພື່ອນໄດ້ສະແດງຄວາມຮູ້ສຶກທີ່ຫລາກຫລາຍ, ລວມທັງໃຈຮ້າຍ, ຄວາມຫົດຫູ່, ແລະ ແມ່ນແຕ່ຮູ້ສຶກຜິດ. ເຖິງແມ່ນຈະມີຄວາມຮູ້ສຶກ ແລະ ຄຳຖາມທີ່ບໍ່ໄດ້ຮັບຄຳຕອບ, ແຕ່ເຂົາເຈົ້າກໍຍັງປອບໂຍນກັນແລະກັນ ແລະ ຫັນໄປຫາພຣະເຈົ້າຜ່ານທາງເພງສັກສິດ, ພຣະຄຳພີ, ແລະ ການອະທິຖານ, ຊຶ່ງເຮັດໃຫ້ເຂົາເຈົ້າພົບການປອບໂຍນ. ຜູ້ລອດຊີວິດ ໄວສິບເຈັດປີ ຊື່ນາງ ເຊັດໂຊອານາ ເຊເລເບລີ ໄດ້ເປັນພະຍານວ່າ, “ພຣະເຢຊູຄຣິດຮັກພວກເຮົາ ແລະ ສະຖິດຢູ່ກັບພວກເຮົາ, ເຖິງແມ່ນຫົວໃຈຂອງພວກເຮົາຈະເຈັບປວດ.”
ຍິງໜຸ່ມຄົນໜຶ່ງ ແລະ ຜູ້ນຳທີ່ເຂົ້າຮັກສາແຜໄຟໄໝ້ໃນໂຮງໝໍໄດ້ສຶກສາພຣະຄຳພີມໍມອນນຳກັນ. ຄົນໜຶ່ງເວົ້າວ່າ, “ເມື່ອບໍ່ດົນມານີ້ ພວກເຮົາໄດ້ອ່ານໃນໂມໂຣໄນ, ແລະ ໂມໂຣໄນເວົ້າກົງກັບສິ່ງທີ່ຂ້ານ້ອຍຮູ້ສຶກ. … ເມື່ອເພິ່ນກ່າວ, ມັນເໝືອນກັບເພິ່ນກ່າວວ່າ, ‘ເຈົ້າຕ້ອງຮຽນຮູ້ຖ້ອຍຄຳເຫລົ່ານີ້ ເພາະມັນຖືກຂຽນໄວ້ເພື່ອຊ່ວຍໃຫ້ເຈົ້າຜ່ານສິ່ງນີ້ໄປ.’”
ໃນພິທີສົບຮ່ວມກັນສຳລັບຜູ້ເສຍຊີວິດ, ສາວົກເຈັດສິບປະຈຳເຂດ ແອວເດີ ຊິຢາບອງກາ ມະໄຄເຊ ໄດ້ແນະນຳວ່າ, “ເຮົາທຸກຄົນຄວນຫັນມາຫາພຣະຜູ້ເປັນເຈົ້າໃນເວລານີ້ ແລະ ທູນຂໍໃຫ້ພຣະອົງປອບໂຍນໃຈຂອງພວກເຮົາ ແລະ … ບັນເທົາຄວາມເຈັບປວດທີ່ພວກເຮົາຮູ້ສຶກ.” ແມມໂຟ ມາຄູຣາ ປະທານອົງການຍິງໜຸ່ມຈາກສາຂາ ເລຣິເບ ທີ່ຢູ່ໃກ້ຄຽງ, ໄດ້ຊຸກຍູ້ວ່າ: “ຈົ່ງຫັນມາຫາພຣະຜູ້ເປັນເຈົ້າ, ແລະ ພົບຄວາມເຂັ້ມແຂງ ເພື່ອຍອມຮັບພຣະປະສົງຂອງພຣະອົງ. ພຣະເຢຊູຄຣິດເປັນ ‘ຜູ້ບຸກເບີກ [ສັດທາ] ແລະ ຜູ້ຊົງເຮັດໃຫ້ [ສັດທາ] ຂອງພວກເຮົາເຖິງທີ່ສຳເລັດ’ [ເຮັບເຣີ 12:2]. ຢ່າຫັນໜີ, ແຕ່ໃຫ້ຫວັງເພິ່ງພຣະອົງ.”
ຫວັງເພິ່ງພຣະອົງ. ຖ້ອຍຄຳຂອງນາງສະທ້ອນຄຳແນະນຳຂອງແອວມາຕໍ່ຮີລາມັນ ລູກຊາຍຂອງເພິ່ນ: “ຈົ່ງເບິ່ງວ່າລູກຫວັງເພິ່ງພຣະເຈົ້າ ແລະ ມີຊີວິດ.” ແອວມາໄດ້ບອກເຖິງປະສົບການຂອງລີໄຮ ແລະ ຜູ້ຄົນຂອງເພິ່ນກັບເລຍໂຮນາ ວ່າເປັນແບບ: “ເພາະຈົ່ງເບິ່ງ, ມັນງ່າຍທີ່ຈະເອົາໃຈໃສ່ຕໍ່ພຣະຄຳຂອງພຣະຄຣິດ, ຊຶ່ງຈະຊີ້ທາງຊື່ໃຫ້ລູກໄປຫາຄວາມສຸກ, ດັ່ງທີ່ເປັນມາກັບບັນພະບຸລຸດຂອງພວກເຮົາທີ່ໄດ້ເອົາໃຈໃສ່ກັບເຂັມຊີ້ທິດນີ້, ຊຶ່ງຈະຊີ້ທາງຊື່ໄປຫາແຜ່ນດິນແຫ່ງຄຳສັນຍາ.” ແອວມາໄດ້ກ່າວວ່າ: “ຖ້າວ່າ ເຂົາເຈົ້າ ຫລຽວເຫັນ ເຂົາເຈົ້າ ກໍຈະມີຊີວິດ. … ແລະ ຖ້າຫາກ ພວກເຮົາ … ຫລຽວເບິ່ງ ພວກເຮົາ ຈະມີຊີວິດຕະຫລອດການ.”
ໃນອີກໂອກາດໜຶ່ງ, ແອວມາໄດ້ອ້າງເຖິງຕົວຢ່າງຂອງງູທອງສຳຣິດທີ່ໂມເຊໄດ້ຍົກຂຶ້ນ ເມື່ອຊາວອິດສະຣາເອນໃນສະໄໝບູຮານຖືກງູພິດຕອດ. ພຣະຜູ້ເປັນເຈົ້າໄດ້ບອກໂມເຊໃຫ້ສ້າງຮູບງູ ແລະ ຍົກມັນຂຶ້ນກັບເສົາ ພ້ອມກັບຄຳສັນຍາວ່າ “ຜູ້ໃດຜູ້ໜຶ່ງທີ່ຖືກງູຕອດ, ເມື່ອແນມເບິ່ງງູທອງສຳຣິດນັ້ນແລ້ວກໍຈະໄດ້ຮັບການປິ່ນປົວໃຫ້ຫາຍດີ.” ແອວມາໄດ້ອະທິບາຍວ່າ ງູທອງສຳຣິດນັ້ນເປັນແບບ ຫລື ສັນຍາລັກຂອງພຣະຄຣິດ ຜູ້ຈະຖືກຍົກຂຶ້ນເທິງໄມ້ກາງແຂນ. ຫລາຍຄົນໄດ້ຫລຽວເບິ່ງ ແລະ ມີຊີວິດ, ແຕ່ບາງຄົນ, ຕາມຖ້ອຍຄຳຂອງແອວມາ, “ໃຈແຂງກະດ້າງ” ຈົນວ່າພວກເຂົາບໍ່ຍອມເບິ່ງ ແລະ ໄດ້ຕາຍໄປ.
ແອວມາໄດ້ຖາມວ່າ:
“ຖ້າຫາກພວກທ່ານຈະຖືກປິ່ນປົວໄດ້ ໂດຍພຽງແຕ່ຫລຽວເບິ່ງ ພວກທ່ານກໍຖືກປິ່ນປົວແລ້ວ, ພວກທ່ານຈະບໍ່ຫລຽວເບິ່ງໂລດບໍ, ຫລື ວ່າພວກທ່ານຈະເຮັດໃຈແຂງກະດ້າງຢູ່ໃນຄວາມບໍ່ເຊື່ອຖື, ແລະ ເມີນເສີຍບໍ່ຍອມຫລຽວໄປເບິ່ງເລີຍ, ຈົນວ່າພວກທ່ານຕາຍໄປ?
“… ເລີ່ມເຊື່ອຖືໃນພຣະບຸດຂອງພຣະເຈົ້າ, ວ່າພຣະອົງຈະສະເດັດມາໄຖ່ຜູ້ຄົນຂອງພຣະອົງ, ແລະ ວ່າພຣະອົງຈະຮັບເອົາຄວາມເຈັບປວດ ແລະ ສິ້ນພຣະຊົນເພື່ອຊົດໃຊ້ແທນບາບຂອງພວກເຂົາ, ແລະ ວ່າພຣະອົງຈະລຸກຂຶ້ນຈາກຄວາມຕາຍອີກ, ຊຶ່ງຈະເຮັດໃຫ້ເກີດການຟື້ນຄືນຊີວິດ, ເພື່ອຄົນທັງປວງຈະໄດ້ຢືນຢູ່ຕໍ່ພຣະພັກຂອງພຣະອົງ, ເພື່ອຮັບການພິພາກສາໃນມື້ສຸດທ້າຍ ແລະ ເປັນມື້ພິພາກສາ, ຕາມວຽກງານຂອງພວກເຂົາ.”
ແນ່ນອນ, ຄຳແນະນຳທີ່ວ່າ “ຫວັງເພິ່ງພຣະເຈົ້າ ແລະ ມີຊີວິດ” ມີຄວາມໝາຍສຳລັບເຮົາບໍ່ພຽງແຕ່ໃນນິລັນດອນເທົ່ານັ້ນ, ແຕ່ຍັງສ້າງຄວາມແຕກຕ່າງທັງໝົດໃນລັກສະນະ ແລະ ຄຸນນະພາບຊີວິດໃນຊ່ວງມະຕະຂອງເຮົານຳອີກ. ຈົ່ງຈື່ຈຳຄຳເວົ້າຂອງຍິງໜຸ່ມ ເຊເລເບລີ ໃນປະເທດເລໂຊໂຕ ທີ່ກ່າວເຖິງຜ່ານມານັ້ນ—“ພຣະເຢຊູຄຣິດຮັກພວກເຮົາ ແລະ ສະຖິດຢູ່ກັບພວກເຮົາ, ເຖິງແມ່ນຫົວໃຈຂອງພວກເຮົາຈະເຈັບປວດ.”
ໂດຍທຳມະຊາດຂອງໂລກທີ່ຕົກຕ່ຳ—ຊຶ່ງມານຮ້າຍເດືອດດານ ແລະ ທຸກຄົນບໍ່ສົມບູນແບບ—ຈະມີຄວາມຜິດຫວັງ ແລະ ຄວາມຂຸ່ນເຄືອງ, ຄວາມທຸກທໍລະມານ ແລະ ຄວາມໂສກເສົ້າ, ຄວາມລົ້ມເຫລວ ແລະ ຄວາມສູນເສຍ, ການຂົ່ມເຫັງ ແລະ ຄວາມບໍ່ຍຸດຕິທຳ. ມີພຽງການຫັນມາຫາພຣະເຈົ້າເທົ່ານັ້ນທີ່ບຸກຄົນ, ຄອບຄົວ, ແລະ ແມ່ນແຕ່ປະຊາຊາດຈະຈະເລີນໄດ້. ປະທານຣະໂຊ ເອັມ ແນວສັນ ໄດ້ສິດສອນວ່າ, “ເພາະພຣະຜູ້ຊ່ວຍໃຫ້ລອດ, ຜ່ານທາງການຊົດໃຊ້ອັນບໍ່ມີຂອບເຂດຂອງພຣະອົງ, ໄດ້ໄຖ່ເຮົາແຕ່ລະຄົນຈາກຄວາມອ່ອນແອ, ຄວາມຜິດພາດ, ແລະ ບາບ, ແລະ ເພາະພຣະອົງໄດ້ປະສົບກັບຄວາມເຈັບປວດ, ຄວາມກັງວົນ, ແລະ ຄວາມໜັກໜ່ວງທຸກຢ່າງ ທີ່ທ່ານເຄີຍມີ [ເບິ່ງ ແອວມາ 7:11–13], ແລ້ວເມື່ອທ່ານກັບໃຈຢ່າງແທ້ຈິງ ແລະ ສະແຫວງຫາຄວາມຊ່ວຍເຫລືອຈາກພຣະອົງ, ທ່ານຈະສາມາດຢູ່ເໜືອໂລກທີ່ບໍ່ແນ່ນອນໃນປະຈຸບັນນີ້ໄດ້.”
ບໍ່ມີຄຳສັນຍາໃດທີ່ກ່າວຊ້ຳເລື້ອຍໆໃນພຣະຄຳພີສັກສິດຫລາຍກວ່າຄຳນີ້: “ຕາບໃດທີ່ເຈົ້າຈະຮັກສາບັນຍັດຂອງເຮົາ ເຈົ້າຈະຮຸ່ງເຮືອງຢູ່ໃນແຜ່ນດິນນັ້ນ; ແຕ່ຕາບໃດທີ່ເຈົ້າຈະບໍ່ຮັກສາບັນຍັດຂອງເຮົາ ເຈົ້າຈະຖືກຕັດອອກຈາກທີ່ປະທັບຂອງເຮົາ.” ປະສົບການຊີວິດຂອງຜູ້ຄົນໃນພຣະຄຳພີມໍມອນຕະຫລອດຫລາຍສັດຕະວັດ ສະແດງໃຫ້ເຫັນເຖິງຄວາມຈິງຂອງຖ້ອຍຄຳເຫລົ່ານີ້. “ຮຸ່ງເຮືອງ” ໝາຍເຖິງການໄດ້ຮັບການຊົງນຳ ແລະ ພອນຈາກສະຫວັນໃນຊີວິດຂອງພວກເຂົາ. “ຮຸ່ງເຮືອງ” ໝາຍເຖິງການບັນລຸເຖິງລະດັບຄວາມຜາສຸກທາງເສດຖະກິດ–ທີ່ໃຫ້ພວກເຂົາສາມາດແຕ່ງງານ, ລ້ຽງດູຄອບຄົວ ແລະ ສະໜອງຄວາມຕ້ອງການຂອງຄົນອື່ນ. “ການຮຸ່ງເຮືອງ” ແມ່ນລວມທັງຄວາມສາມາດທີ່ກ້າວຂ້າມຄວາມຍາກລຳບາກ ແລະ ການທົດລອງ. ຜ່ານທາງພຣະຄຸນຂອງພຣະຄຣິດ, “ທຸກສິ່ງທັງປວງ [ໄດ້] ທຳງານນຳກັນເພື່ອຄວາມດີຂອງ [ພວກເຂົາ],” ຂັດເກົາພວກເຂົາ, ແລະ ເຮັດໃຫ້ຄວາມສຳພັນຂອງພວກເຂົາກັບພຣະອົງເລິກເຊິ່ງຫລາຍຂຶ້ນ.
ແອວມາໄດ້ອະທິບາຍວ່າ ການຫວັງເພິ່ງພຣະເຈົ້າ ຄືການຮັກສາພຣະບັນຍັດຂອງພຣະອົງ, ການຮ້ອງຂໍການສະໜັບສະໜູນຈາກພຣະອົງຢູ່ສະເໝີ, ການປຶກສາກັບພຣະອົງໃນການກະທຳທຸກສິ່ງທັງປວງຂອງທ່ານ, ແລະ ການໃຫ້ຫົວໃຈຂອງທ່ານເຕັມປ່ຽມໄປດ້ວຍຄວາມຂອບພຣະຄຸນພຣະອົງ ທັງກາງເວັນ ແລະ ກາງຄືນ. ພຣະບັນຍັດ ແລະ ຄຳແນະນຳຂອງພຣະອົງມີຢູ່ໃນພຣະຄຳພີ ແລະ ໃນຖ້ອຍຄຳຂອງຜູ້ຮັບໃຊ້ຂອງພຣະອົງ. ຫລັກທຳ ແລະ ອຸດົມຄະຕິທີ່ກ່າວໄວ້ໃນ “ຄອບຄົວ: ການປະກາດຕໍ່ໂລກ” ມີຕົວຢ່າງທີ່ສຳຄັນ. ອີກຢ່າງໜຶ່ງແມ່ນການຊົງນຳທີ່ພົບເຫັນຢູ່ໃນປຶ້ມນ້ອຍ ສຳລັບຄວາມເຂັ້ມແຂງຂອງຊາວໜຸ່ມ. ຄຳຂວັນຂອງຊາຍໜຸ່ມ ແລະ ຍິງໜຸ່ມສຳລັບປີນີ້ແມ່ນ “ເບິ່ງທີ່ພຣະຄຣິດ,” ຊຶ່ງມາຈາກການຊີ້ນຳທີ່ປອບໂຍນຂອງພຣະເຈົ້າທີ່ມອບໃຫ້ແກ່ໂຈເຊັບ ສະມິດ ແລະ ອໍລີເວີ ຄາວເດີຣີ ທີ່ວ່າ: “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ, ຢ່າສົງໄສ, ຢ່າສູ່ຢ້ານ.” ສຳລັບຄວາມເຂັ້ມແຂງຂອງຊາວໜຸ່ມ ກ່າວເຖິງພຣະບັນຍັດ ແລະ ມາດຕະຖານທີ່ເລັ່ງດ່ວນຫລາຍທີ່ສຸດຫລາຍຢ່າງຂອງພຣະເຈົ້າ ແລະ ສິດສອນວິທີເບິ່ງພຣະຜູ້ເປັນເຈົ້າໃນການຕັດສິນໃຈທີ່ດີ. ມັນເປັນແນວທາງບໍ່ພຽງແຕ່ສຳລັບຊາວໜຸ່ມເທົ່ານັ້ນ ແຕ່ສຳລັບເຮົາທຸກຄົນນຳອີກ.
ໃນຖານະເປັນຕົວຢ່າງໜຶ່ງທີ່ສຳຄັນ ສຳລັບຄວາມເຂັ້ມແຂງຂອງຊາວໜຸ່ມ ມີຄຳແນະນຳສຳຄັນໃນບົດທີ່ຊື່ວ່າ “ຮ່າງກາຍຂອງເຈົ້າສັກສິດ.” ມັນແນະນຳໃຫ້: “ປະຕິບັດຕໍ່ຮ່າງກາຍຂອງເຈົ້າ—ແລະ ຮ່າງກາຍຂອງຄົນອື່ນ—ດ້ວຍຄວາມເຄົາລົບ. ຂະນະທີ່ທ່ານຕັດສິນໃຈກ່ຽວກັບເສື້ອຜ້າ, ຊົງຜົມ, ແລະ ຮູບລັກສະນະພາຍນອກຂອງທ່ານ, ໃຫ້ຖາມຕົວເອງວ່າ, ‘ເຮົາໃຫ້ກຽດແກ່ຮ່າງກາຍຂອງເຮົາ ໃນຖານະຂອງຂວັນອັນສັກສິດຈາກພຣະເຈົ້າຫລືບໍ່?’”
ສຳລັບຄວາມເຂັ້ມແຂງຂອງຊາວໜຸ່ມ ກ່າວຕໍ່ອີກວ່າ: “ຈົ່ງຮັກສາເພດ ແລະ ຄວາມຮູ້ສຶກທາງເພດໃຫ້ສັກສິດ. ມັນບໍ່ຄວນເປັນເລື່ອງຕະຫລົກ ຫລື ຄວາມບັນເທີງ. ນອກເໜືອການແຕ່ງງານລະຫວ່າງຊາຍ ແລະ ຍິງແລ້ວ, ເປັນສິ່ງທີ່ຜິດ ທີ່ຈະສຳຜັດສ່ວນລັບ, ສ່ວນສັກສິດຂອງຮ່າງກາຍຂອງຄົນອື່ນ ເຖິງແມ່ນຈະໃສ່ເສື້ອຜ້າກໍຕາມ. ໃນການເລືອກຂອງເຈົ້າກ່ຽວກັບສິ່ງທີ່ເຈົ້າຈະເຮັດ, ຫລຽວເບິ່ງ, ອ່ານ, ຟັງ, ຄິດກ່ຽວກັບ, ໂພສ໌, ຫລື ສົ່ງຂໍ້ຄວາມ, ຈົ່ງຫລີກລ້ຽງສິ່ງໃດກໍຕາມທີ່ຈົງໃຈປຸກອາລົມຕັນຫາໃນຕົວຄົນອື່ນ ຫລື ຕົວເຈົ້າເອງ.”
ສິ່ງນີ້ເຮັດໃຫ້ນຶກເຖິງຄຳຕັກເຕືອນຂອງປະທານແນວສັນ ເມື່ອບໍ່ດົນມານີ້:
“ມີສອງສາມຢ່າງທີ່ຈະເຮັດໃຫ້ຊີວິດຂອງທ່ານຫຍຸ້ງຍາກໄວຂຶ້ນໃນການລະເມີດກົດອັນສັກສິດນີ້ [ກົດພົມມະຈັນ]. ສຳລັບຜູ້ທີ່ເຮັດພັນທະສັນຍາກັບພຣະເຈົ້າ, ການເຮັດຜິດສິນທຳເປັນວິທີໜຶ່ງທີ່ຈະສູນເສຍປະຈັກພະຍານໄດ້ໄວທີ່ສຸດ.
“… ພະລັງໃນການສ້າງຊີວິດເປັນ ສິດທິພິເສດຢ່າງດຽວ ຂອງຄວາມເປັນພຣະເຈົ້າ ທີ່ພຣະບິດາເທິງສະຫວັນອະນຸຍາດໃຫ້ລູກໆມະຕະຂອງພຣະອົງນຳໃຊ້. ດັ່ງນັ້ນ, ພຣະເຈົ້າຈຶ່ງໄດ້ກຳນົດແນວທາງຊີ້ນຳທີ່ແຈ້ງຊັດສຳລັບການໃຊ້ອຳນາດທີ່ດຳລົງຢູ່ ແລະ ສັກສິດນີ້. ຄວາມໃກ້ຊິດທາງກາຍມີໄວ້ ພຽງແຕ່ ສຳລັບຊາຍ ແລະ ຍິງທີ່ແຕ່ງງານກັນເທົ່ານັ້ນ.
“ໂລກສ່ວນໃຫຍ່ບໍ່ເຊື່ອເລື່ອງນີ້, ແຕ່ຄວາມຄິດເຫັນຂອງສາທາລະນະບໍ່ແມ່ນຕົວຊີ້ຂາດກ່ຽວກັບຄວາມຈິງ. ພຣະຜູ້ເປັນເຈົ້າໄດ້ປະກາດວ່າ ບຸກຄົນທີ່ບໍ່ບໍລິສຸດ ຈະບໍ່ສາມາດຮັບອານາຈັກຊັ້ນສູງໄດ້. … ຖ້າຫາກທ່ານບໍ່ບໍລິສຸດ, ຂ້າພະເຈົ້າຂໍອ້ອນວອນໃຫ້ທ່ານກັບໃຈ. ມາຫາພຣະຄຣິດ ແລະ ຮັບຄຳສັນຍາຂອງພຣະອົງເລື່ອງການໃຫ້ອະໄພໂດຍ ສົມບູນ ເມື່ອທ່ານກັບໃຈຈາກບາບຢ່າງເຕັມທີ່ [ເບິ່ງ ເອຊາຢາ 1:18–18; ຄຳສອນ ແລະ ພັນທະສັນຍາ 58:42–43].”
ຈົ່ງຈື່ຈຳວ່າ ໃນຄຳສັນຍາຂອງພຣະຄຳພີສັກສິດ, ສິ່ງກົງກັນຂ້າມກັບຄວາມຈະເລີນຮຸ່ງເຮືອງບໍ່ແມ່ນຄວາມຍາກຈົນ—ແຕ່ມັນຄືການຖືກຕັດອອກຈາກທີ່ປະທັບຂອງພຣະຜູ້ເປັນເຈົ້າ. ທີ່ປະທັບຂອງພຣະອົງໝາຍເຖິງອິດທິພົນຂອງພຣະວິນຍານຂອງພຣະອົງໃນຊີວິດຂອງບຸກຄົນ. ທຸກຄົນລ້ວນແຕ່ເຕັມປ່ຽມໄປດ້ວຍຄວາມສະຫວ່າງຂອງພຣະຄຣິດ ເມື່ອເຂົາມາສູ່ໂລກ. ນອກຈາກນີ້, ບາງຄົນຕັດສິນໃຈຮັບບັບຕິສະມາ ແລະ ຮັບຂອງປະທານ ແລະ ແສງສະຫວ່າງທີ່ເພີ່ມເຂົ້າມາຂອງພຣະວິນຍານບໍລິສຸດ. ພຣະອົງນຳແຮງບັນດານໃຈ ແລະ ການຊົງນຳມາໃຫ້, ເສີມສ້າງ ແລະ ຂັດເກົາຂອງປະທານ ແລະ ຄວາມສາມາດໂດຍກຳເນີດຂອງຕົນ, ແລະ ຊ່ວຍຫລີກລ້ຽງອິດທິພົນທີ່ຊົ່ວຮ້າຍ, ການຕັດສິນໃຈທີ່ບໍ່ດີ, ແລະ ທາງຕັນ.
ເຊັ່ນດຽວກັບທ່ານ, ຂ້າພະເຈົ້າຮູ້ຈັກບາງຄົນທີ່ເຄີຍໄດ້ຮັບຂອງປະທານແຫ່ງພຣະວິນຍານບໍລິສຸດ ແຕ່ເນື່ອງຈາກຄວາມລົ້ມເຫລວໃນການຮັກສາພຣະບັນຍັດຂອງພຣະເຈົ້າ ເຂົາຈຶ່ງສູນເສຍພອນນັ້ນໄປ. ນຶກເຖິງຄົນໜຶ່ງໂດຍສະເພາະ ທີ່ສະມາຊິກກະພາບຂອງລາວໃນສາດສະໜາຈັກຖືກຖອນ ເພາະການລ່ວງລະເມີດ. ລາວເວົ້າວ່າປະຕິກິລິຍາທຳອິດຂອງລາວແມ່ນ ຮູ້ສຶກຂຸ່ນເຄືອງ. ລາວຮູ້ສຶກຖືກຕັດສິນໂດຍຜູ້ນຳທີ່ບໍ່ສົມບູນແບບ. ລາວຮູ້ວ່າການປະພຶດຂອງລາວນັ້ນຜິດ, ແຕ່ລາວກໍຫາເຫດຜົນເຂົ້າຂ້າງຕົນເອງ ໂດຍການຊີ້ໃຫ້ເຫັນເຖິງຄວາມບົກພ່ອງ ແລະ ຄວາມລົ້ມເຫລວຂອງຄົນອື່ນ. ຫລັງຈາກນັ້ນບໍ່ດົນ, ລາວໄດ້ເລີ່ມຕົ້ນຮູ້ສຶກສະບາຍໃຈກັບວິຖີຊີວິດຂອງລາວຢູ່ນອກສາດສະໜາຈັກ ປາດສະຈາກພາລະໜ້າທີ່ຂອງການເອີ້ນ ແລະ ຄວາມຄາດຫວັງໃຫ້ໄປຮ່ວມນະມັດສະການ ແລະ ການປະຕິບັດສາດສະໜາກິດຕໍ່ຄົນອື່ນ.
ສິ່ງນີ້ດຳເນີນໄປຊົ່ວໄລຍະໜຶ່ງ, ແຕ່ລາວໄດ້ເລີ່ມຮູ້ສຶກເຖິງການຂາດຫາຍຂອງພຣະວິນຍານສັກສິດ—ການປະທັບຢູ່ຂອງພຣະເຈົ້າ—ໃນຊີວິດຂອງລາວ. ຈາກປະສົບການ, ລາວຮູ້ວ່າ ການໄດ້ຮັບການປອບໂຍນ, ການຊົງນຳ, ແລະ ຄວາມໝັ້ນໃຈທີ່ເກີດຈາກພຣະວິນຍານໃນແຕ່ລະວັນນັ້ນເປັນແນວໃດ, ແລະ ລາວຄິດຮອດມັນ. ໃນທີ່ສຸດ, ລາວໄດ້ເຮັດສິ່ງທີ່ຈຳເປັນເພື່ອຈະກັບໃຈ ແລະ ມີຄຸນສົມບັດອີກຄັ້ງສຳລັບການຮັບບັບຕິສະມາໂດຍນ້ຳ ແລະ ໂດຍພຣະວິນຍານ.
ເບິ່ງຄືກັບວ່າ ແຫລ່ງຕ່າງໆທີ່ຜູ້ຄົນສະແຫວງຫາຄວາມໝາຍ, ຄວາມສຸກ, ແລະ ຄວາມຊ່ວຍເຫລືອນັ້ນ ບໍ່ມີທີ່ສິ້ນສຸດ. ສ່ວນຫລາຍແມ່ນ “ເບິ່ງຂ້າມເຄື່ອງໝາຍ.” ແຕ່ເຮົາບໍ່ຕ້ອງເປັນ “ເດັກນ້ອຍອີກຕໍ່ໄປ, ຖືກພັດໄປພັດມາ, ແລະ ຫັນເຫໄປມາດ້ວຍລົມປາກແຫ່ງຄຳສັ່ງສອນທຸກຢ່າງຂອງຄົນທີ່ຫລອກລວງ [ຫລື ແຟຊັ່ນ].” ໃນການຫວັງເພິ່ງພຣະເຈົ້າ, ເຮົາສາມາດພົບສັນຕິສຸກ ແລະ ສັດທາຂອງເຮົາສາມາດເຕີບໂຕຕໍ່ໄປ ແມ່ນແຕ່ໃນຍາມທີ່ມີຄວາມສົງໄສ ແລະ ຄວາມທ້າທາຍທາງວິນຍານກໍຕາມ. ເຮົາສາມາດຮັບຄວາມເຂັ້ມແຂງເມື່ອປະເຊີນໜ້າກັບການຕໍ່ຕ້ານ ແລະ ຄວາມໂດດດ່ຽວ. ເຮົາສາມາດປະສານອຸດົມຄະຕິກັບຄວາມເປັນຈິງໃນປະຈຸບັນໄດ້. ແທ້ຈິງແລ້ວ, ມັນບໍ່ມີຫົນທາງອື່ນໃດນອກຈາກສິ່ງທີ່ພຣະເຈົ້າເອງໄດ້ບັນຊາໄວ້ວ່າ: “ຊາວໂລກທັງໂລກ ຈົ່ງກັບມາຫາເຮົາ: ເຮົາເທົ່ານັ້ນຄືພຣະເຈົ້າ, ແລະ ຊ່ວຍໃຫ້ພົ້ນໄດ້.”
ການຫວັງເພິ່ງພຣະເຈົ້າໝາຍຄວາມວ່າ ພຣະອົງບໍ່ພຽງແຕ່ເປັນໜຶ່ງໃນສິ່ງທີ່ເຮົາໃຫ້ຄວາມສຳຄັນເປັນອັນດັບໜຶ່ງເທົ່ານັ້ນ, ແຕ່ໝາຍຄວາມວ່າ ພຣະອົງຄືສິ່ງທີ່ເຮົາໃຫ້ຄວາມສຳຄັນສູງສຸດ. ຂ້າພະເຈົ້ານຶກເຖິງອຸບັດຕິເຫດຮ້າຍແຮງທີ່ປະເທດເລໂຊໂຕ ໃນເດືອນມິຖຸນາຜ່ານມານີ້. ຈາກຕຽງນອນໃນໂຮງໝໍ, ຜູ້ນຳຍິງໜຸ່ມຄົນໜຶ່ງທີ່ລອດຊີວິດ, ຜູ້ທີ່ບໍ່ເຊື່ອໃນພຣະເຈົ້າກ່ອນເຂົ້າຮ່ວມສາດສະໜາຈັກ, ໄດ້ເວົ້າວ່າ ຈຸດປະສົງຂອງນາງໃນຕອນນີ້ ຄືການຄົ້ນຫາວ່າ ເປັນຫຍັງຊີວິດນາງຈຶ່ງຖືກຮັກສາໄວ້. “ການຮັບໃຊ້ພຣະເຈົ້າຢ່າງຕໍ່ເນື່ອງຄືຫົນທາງດຽວທີ່ຂ້ານ້ອຍຈະພົບຄຳຕອບ, ຖ້າຫາກຂ້ານ້ອຍພົບຄຳຕອບ,” ນາງເວົ້າ. “ຂ້ານ້ອຍເຄີຍຄິດວ່າ ຂ້ານ້ອຍຮັກພຣະເຈົ້າ, ແຕ່ຕອນນີ້ ຂ້ານ້ອຍຮັກພຣະອົງແທ້ໆ, ແທ້ໆ, ແທ້ໆ, ແທ້ໆ, ຫລາຍແທ້ໆ. ຕອນນີ້ພຣະອົງເປັນ [ອັນດັບໜຶ່ງ] ໃນຊີວິດຂອງຂ້ານ້ອຍ.”
ຂ້າພະເຈົ້າເປັນພະຍານເຖິງພຣະບິດາ, ພຣະບຸດ, ແລະ ພຣະວິນຍານບໍລິສຸດ ຊຶ່ງເປັນໜຶ່ງໃນພຣະຄຳ, ຄວາມຄິດ, ຈຸດປະສົງ, ແລະ ການກະທຳ ເປັນພຣະເຈົ້າອົງດຽວ, ທີ່ເຮົາຈະສະແຫວງຫາສິ່ງດີໆທັງໝົດໄດ້. ຂ້າພະເຈົ້າເປັນພະຍານເຖິງການຊົດໃຊ້ຂອງພຣະເຢຊູຄຣິດ, ຊຶ່ງອຳນາດມີມາເພື່ອສຳເລັດຄຳສັນຍາທີ່ດີເລີດທີ່ວ່າ: “ຈົ່ງເບິ່ງທີ່ເຮົາ ແລະ ອົດທົນຈົນເຖິງທີ່ສຸດ, ແລະ ເຈົ້າຈະມີຊີວິດ; ຍ້ອນເຮົາຈະໃຫ້ຊີວິດນິລັນດອນແກ່ຄົນທີ່ອົດທົນຈົນເຖິງທີ່ສຸດ.” ໃນພຣະນາມຂອງພຣະເຢຊູຄຣິດ, ອາແມນ.