ສູດຂ່າວດີ
ການຕື່ມພຣະເຢຊູຄຣິດເຂົ້າໃນຊີວິດຂອງທ່ານຈະເປັນແນວໃດ?
ຫາກທ່ານເຄີຍໄປຢ້ຽມຢາມບ້ານຂອງຂ້າພະເຈົ້າຢູ່ລັດລຸຍຊີອານາ, ທ່ານໜ້າຈະຄຸ້ນເຄີຍກັບອາຫານຈານແຊບໆຫລາຍຢ່າງ—ກຳໂບ, ຈຳບາລາຢາ, ເອທູເຟ, ແລະ ລາຍການກໍມີຕໍ່ໆໄປອີກ.
ບາງຄັ້ງຄາວ, ຂ້າພະເຈົ້າພົບວ່າ ຕົນເອງຮູ້ສຶກກ້າຫານພໍທີ່ຈະເຮັດອາຫານສູດແຊບໆເຫລົ່ານັ້ນ. ຂັ້ນຕອນສຸດທ້າຍທີ່ບໍ່ໄດ້ມີຂຽນໄວ້ຫລັງຈາກທີ່ປະສົມສ່ວນປະກອບທັງໝົດ ແລະ ເຮັດຕາມຄຳແນະນຳທີ່ລະອຽດ ກໍຄືລອງຊີມລົດຊາດເປັນຄັ້ງສຸດທ້າຍ ແລະ ເບິ່ງວ່າ ຂາດຫຍັງບໍ່. ໃນຈຸດນັ້ນ, ຂ້າພະເຈົ້າໄດ້ຍິນສຽງຕຳນານການເຮັດອາຫານຄຣີໂອລ໌ກຳລັງສື່ມໃສ່ຫູຂອງຂ້າພະເຈົ້າວ່າ, “ໃສ່ Tony’s ຕື່ມ.” Tony’s ແມ່ນເຄື່ອງປຸງຄຣີໂອລ໌ທີ່ຜະລິດໃນເມືອງໂອເປລູຊາສ໌, ລຸຍຊີອານາ, ບ້ານເກີດຂອງຂ້າພະເຈົ້າ. ມັນມັກຈະຖືກໃຊ້ເປັນ “ສ່ວນປະສົມລັບ” ເພື່ອຊົດເຊີຍຄວາມບໍ່ສົມບູນແບບທີ່ເກີດຂຶ້ນຂະນະທີ່ເຮັດຕາມສູດ.
ມິເຊວ ພັນລະຍາຂອງຂ້າພະເຈົ້າ ແລະ ຂ້າພະເຈົ້າ ເປັນກຽດທີ່ໄດ້ຮັບໃຊ້ເປັນຜູ້ນຳເຂດເຜີຍແຜ່ໃນລຸຍຊີອານາ. ພວກເຮົາມີປະເພນີໃນການສິດສອນຜູ້ສອນສາດສະໜາວິທີເຮັດຈຳບາລາຢາ ສູດພິເສດຂອງນາງ ໃນຄືນສຸດທ້າຍຂອງພວກເຂົາໃນບ້ານເຜີຍແຜ່ ກ່ອນທີ່ພວກເຂົາຈະກັບຄືນໄປຫາຄອບຄົວຂອງພວກເຂົາ. ນອກເໜືອຈາກປະຈັກພະຍານຂອງພວກເຂົາເຖິງພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດແລ້ວ, ຜູ້ສອນສາດສະໜາຂອງພວກເຮົາໄດ້ອອກຈາກເຂດເຜີຍແຜ່ໄປພ້ອມກັບຄວາມຊາບຊຶ້ງໃຈສຳລັບສູດອາຫານ.
ສອງສາມເດືອນກ່ອນ, ຂ້າພະເຈົ້າໄດ້ເລື່ອນຜ່ານຫ້ອງສະໝຸດສື່ຂອງສາດສະໜາຈັກ ແລະ ໄດ້ເຫັນລິ້ງສູ່ຄໍເລັກຊັນວິດີໂອສັ້ນທີ່ມີຊື່ວ່າ ການສົນທະນາກ່ຽວກັບການຟື້ນຟູກັບປະທານຣະໂຊ ເອັມ ແນວສັນ. ຊື່ຂອງໜຶ່ງໃນວິດີໂອສັ້ນໃນລາຍການນັ້ນ ໄດ້ສະດຸດຕາຂອງຂ້າພະເຈົ້າ ແລະ ໄດ້ເຮັດໃຫ້ຂ້າພະເຈົ້າຍິ້ມ. ມັນເອີ້ນວ່າ “ພຣະຄຳພີເປັນສູດຂອງພຣະເຈົ້າສຳລັບການໃຊ້ຊີວິດທີ່ມີຄວາມສຸກ.” ຂ້າພະເຈົ້າໄດ້ກົດວິດີໂອສອງນາທີນັ້ນ ແລະ ໄດ້ເບິ່ງປະທານແນວສັນສິດສອນກຸ່ມເດັກນ້ອຍປະຖົມໄວເຖິງຂ່າວສານທີ່ລຽບງ່າຍ ແລະ ມີພະລັງກ່ຽວກັບວິທີມີຄວາມສຸກ. ເພິ່ນໄດ້ສິດສອນວ່າ: “ຖ້າທ່ານກຳລັງເຮັດເຄັກ, ທ່ານເຮັດຕາມຄຳແນະນຳ, ບໍ່ແມ່ນບໍ? ແລະ ທ່ານຈະໄດ້ຮັບຜົນທີ່ດີທຸກຄັ້ງ, ບໍ່ແມ່ນບໍ?”
ເພິ່ນໄດ້ກ່າວຕໍ່, ໂດຍເວົ້າເຖິງການທີ່ອາຍຸຈະຄົບ 95 ປີ ໃນອີກບໍ່ດົນ: “ຄົນທັງຫລາຍເວົ້າວ່າ, ‘ທ່ານກິນຫຍັງ? ເຄັດລັບຂອງທ່ານແມ່ນຫຍັງ?’” ເພິ່ນໄດ້ຕອບວ່າ, “ເຄັດລັບນັ້ນເອີ້ນວ່າ ພຣະຄຳພີ. ທ່ານອາດອ່ານມັນ ແລະ ລອງສຶກສາມັນ.”
ເອົາລະ, ນັ້ນແຫລະຄືຄຳຕອບ. ເຄັດລັບທີ່ລຽບງ່າຍສຳລັບການໃຊ້ຊີວິດຢ່າງມີຄວາມສຸກ ກໍຄືພຽງແຕ່ເຮັດຕາມສູດຂອງພຣະເຈົ້າຕາມລາຍລະອຽດໃນພຣະຄຳພີ. ຂ້າພະເຈົ້າເອີ້ນມັນວ່າ “ສູດຂ່າວດີ.”
ທ່ານຈະເຮັດແນວໃດ ຖ້າເກີດຂໍ້ຜິດພາດຂຶ້ນເມື່ອກຳລັງເຮັດຕາມສູດ? ເອົາລະ, ທີ່ຝັງຢູ່ໃນສູດຂ່າວດີນັ້ນກໍຄື “ສ່ວນປະສົມລັບ” ທີ່ເຮັດໃຫ້ທ່ານແນ່ໃຈວ່າ ທ່ານຈະເຮັດໃຫ້ມັນອອກມາຖືກຕ້ອງໃນຕອນທ້າຍ. ຄຳຕອບກໍຄືພຣະເຢຊູຄຣິດສະເໝີ.
ຂ້າພະເຈົ້າຄິດວ່າ ເຮົາທຸກຄົນລ້ວນແຕ່ມີຊ່ວງເວລາທີ່ເຮົາຮູ້ສຶກວ່າ ສ່ວນປະສົມຂອງເຮົາບໍ່ດີພໍ, ຫລື ເຮົາດີ້ນລົນທີ່ຈະເຮັດຕາມຄຳແນະນຳ, ຫລື ບາງທີ ເຮົາເຮັດບາງຢ່າງຜິດລຳດັບ, ຫລື ມີບາງຢ່າງເກີດຂຶ້ນທີ່ຢູ່ເໜືອການຄວບຄຸມຂອງເຮົາ, ແລະ ອື່ນໆ.
ຈະແກ້ໄຂດ້ວຍວິທີໃດ? ກໍພຽງແຕ່ຕື່ມສິ່ງທີ່ເຊື້ອເຊີນພຣະເຢຊູຄຣິດໃຫ້ເຂົ້າມາໃນຊີວິດທ່ານ.
ສະນັ້ນ, ການຕື່ມພຣະເຢຊູຄຣິດໃນຊີວິດຂອງທ່ານໜ້າຕາເປັນແນວໃດ?
ຂະນະທີ່ກຳລັງຮັບໃຊ້ເປັນປະທານເຜີຍແຜ່, ຂ້າພະເຈົ້າມີຄວາມຍິນດີທີ່ໄດ້ພົບກັບຜູ້ສອນສາດສະໜາໜຸ່ມຂອງພວກເຮົາແຕ່ລະຄົນເປັນການສ່ວນຕົວທຸກໆຫົກອາທິດ. ລະຫວ່າງການພົບກັນແບບຕົວຕໍ່ຕົວ, ເປັນເລື່ອງທຳມະດາສຳລັບບັນດາຜູ້ສອນສາດສະໜາທີ່ຈະສະແຫວງຫາການຊີ້ນຳເຖິງວິທີປັບປຸງຄວາມມີປະສິດທິພາບຂອງຄວາມເປັນຄູ່ຂອງພວກເຂົາ.
ໃນໂອກາດໜຶ່ງ, ຜູ້ສອນສາດສະໜາຄົນໜຶ່ງໄດ້ເຂົ້າມາໃນການສຳພາດສ່ວນຕົວຂອງລາວ ແລະ ໄດ້ນັ່ງລົງ. ຂ້າພະເຈົ້າສາມາດບອກໄດ້ຈາກພາສາກາຍຂອງລາວວ່າ ມີບາງຢ່າງທີ່ເຮັດໃຫ້ລາວໜັກໃຈ. ຂ້າພະເຈົ້າໄດ້ຖາມວ່າ, “ແອວເດີ, ເຈົ້າຢາກເວົ້າກ່ຽວກັບຫຍັງມື້ນີ້?” ລາວໄດ້ອະທິບາຍເຖິງຄວາມທ້າທາຍບາງຢ່າງທີ່ລາວມີກັບຄູ່ຂອງລາວ ແລະ ວິທີທີ່ມັນກະທົບຄວາມສາມາດຂອງພວກເຂົາໃນການເຮັດວຽກງານເຜີຍແຜ່. ດ້ວຍນໍ້າຕາໃນຕາຂອງລາວ, ລາວໄດ້ເບິ່ງມາທີ່ຂ້າພະເຈົ້າ ແລະ ຖາມວ່າ, “ປະທານ, ຂ້ານ້ອຍຄວນເຮັດແນວໃດ?”
ໃນຕອນນັ້ນ, ຂ້າພະເຈົ້າບໍ່ຮູ້ແທ້ໆວ່າຈະຕອບແນວໃດ. ຫລັງຈາກຊ່ວງເວລາສັ້ນໆ, ຂ້າພະເຈົ້າໄດ້ຖາມລາວວ່າ ຈະເປັນຫຍັງບໍ ຖ້າພວກເຮົາຄຸເຂົ່າລົງອະທິຖານນຳກັນ ເພື່ອຂໍການຊີ້ນຳຈາກພຣະວິນຍານ. ລາວຕົກລົງ, ແລະ ພວກເຮົາໄດ້ຄຸເຂົ່າລົງນຳກັນ ແລະ ອະທິຖານຂໍການດົນໃຈ.
ຫລັງຈາກທີ່ອະທິຖານແລ້ວ, ພວກເຮົາໄດ້ສືບຕໍ່ຄຸເຂົ່າເປັນເວລາສັ້ນໆ ແລະ ແລ້ວກໍນັ່ງຕັ່ງຂອງພວກເຮົາຫັນໜ້າເຂົ້າຫາກັນ. ຂ້າພະເຈົ້າໄດ້ຖາມວ່າ ພວກເຮົາອ່ານພຣະຄຳພີນຳກັນໄດ້ບໍ່. ຂະນະທີ່ພວກເຮົາເປີດພຣະຄຳພີຂອງພວກເຮົານັ້ນ, ຂ້າພະເຈົ້າໄດ້ຢຸດ ແລະ ບອກລາວວ່າ, “ແອວເດີ, ຂະນະທີ່ພວກເຮົາອ່ານພຣະຄຳພີນີ້, ຂໍໃຫ້ເຈົ້າຖາມຕົວເອງຄຳຖາມຕໍ່ໄປນີ້: ຖ້າເຮົາໃຊ້ຊີວິດຕາມຄຸນລັກສະນະເຫລົ່ານີ້, ມັນຈະປັບປຸງຄວາມເປັນຄູ່ຂອງເຮົາ ແລະ ວຽກງານເຜີຍແຜ່ຂອງພວກເຮົາບໍ່?”
ແລ້ວພວກເຮົາກໍໄດ້ເປີດ ໂມໂຣໄນ 7:45 ແລະ ອ່ານອອກສຽງວ່າ: “ແລະ ຄວາມໃຈບຸນອົດທົນໄດ້ດົນນານ, ແລະ ມີຄວາມເມດຕາ, ແລະ ບໍ່ອິດສາບັງບຽດ, ແລະ ບໍ່ອວດອົ່ງ, ແລະ ບໍ່ສະແຫວງຫາເພື່ອຕົນເອງ, ບໍ່ຄຽດງ່າຍ, ບໍ່ຄິດຊົ່ວ, ແລະ ບໍ່ປິຕິຍິນດີໃນຄວາມຊົ່ວຮ້າຍ ແຕ່ປິຕິຍິນດີໃນຄວາມຈິງ, ທົນແບກຫາບທຸກສິ່ງ, ເຊື່ອທຸກສິ່ງ, ຫວັງທຸກສິ່ງ, ອົດທົນທຸກສິ່ງ.”
ແລ້ວແອວເດີຜູ້ນີ້ກໍໄດ້ເບິ່ງຂ້າພະເຈົ້າດ້ວຍນໍ້າຕາໃນຕາຂອງລາວ ແລະ ເວົ້າວ່າ, “ແມ່ນແລ້ວ, ປະທານ, ແຕ່ມັນຍາກທີ່ຈະເຮັດ.” ຂ້າພະເຈົ້າເຫັນດີ ແລະ ໄດ້ຢໍ້າເຕືອນລາວວ່າ ລາວເປັນບຸດຂອງພຣະເຈົ້າ ທີ່ມີສັກກະຍະພາບແຫ່ງສະຫວັນທີ່ຈະເຮັດສິ່ງນີ້ນຳກັນກັບພຣະຜູ້ເປັນເຈົ້າ.
ແລ້ວພວກເຮົາກໍໄດ້ສົນທະນາກັນສັ້ນໆກ່ຽວກັບຄຳອຸປະມາເລື່ອງຄວາມລາດຊັນທີ່ສິດສອນໂດຍແອວເດີ ຄະລາກ ຈີ ກຽວເບີດ ແຫ່ງສາວົກເຈັດສິບ, ຊຶ່ງໄດ້ຢໍ້າເຕືອນເຮົາວ່າ ເຮົາຕ້ອງເລີ່ມຈາກບ່ອນທີ່ເຮົາຢູ່ ແລະ, ນຳກັນກັບພຣະຜູ້ເປັນເຈົ້າ, ຈະກ້າວໄປທາງໜ້າ ແລະ ກ້າວຂຶ້ນໄປທາງເທິງໃນທິດທາງທີ່ດີ. ຂ້າພະເຈົ້າສາມາດບອກໄດ້ວ່າ ລາວຍັງຮູ້ສຶກຖ້ວມທົ້ນຢູ່ໜ້ອຍໜຶ່ງກັບຂັ້ນຕອນຕໍ່ໄປ, ສະນັ້ນ ຂ້າພະເຈົ້າຈຶ່ງຂໍໃຫ້ລາວອະທິບາຍຄວາມເຂົ້າໃຈຂອງລາວກ່ຽວກັບຂໍ້ພຣະຄຳພີທີ່ວ່າ “ໂດຍເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ.” ລາວໄດ້ສືບຕໍ່ອະທິບາຍແນວຄິດນັ້ນວ່າ ໂດຍການເຮັດສິ່ງເລັກນ້ອຍ ແລະ ລຽບງ່າຍ, ສິ່ງໃຫຍ່ໆສາມາດເກີດຂຶ້ນໄດ້. ຂ້າພະເຈົ້າກໍໄດ້ຂໍໃຫ້ລາວໃຊ້ເວລາຈັກນາທີໜຶ່ງ ເພື່ອລະບຸສິ່ງເລັກນ້ອຍ ແລະ ລຽບງ່າຍສອງຢ່າງທີ່ລາວສາມາດເຮັດໄດ້ ເພື່ອສະແດງຄວາມມີນໍ້າໃຈຕໍ່ຄູ່ຂອງລາວ.
ບໍ່ດົນຫລັງຈາກນັ້ນ, ລາວໄດ້ແບ່ງປັນຄວາມຄິດຂອງລາວ. ແລ້ວຂ້າພະເຈົ້າກໍໄດ້ຂໍໃຫ້ລາວໃຊ້ເວລາຈັກນາທີໜຶ່ງ ເພື່ອລະບຸສິ່ງເລັກນ້ອຍ ແລະ ລຽບງ່າຍສອງຢ່າງທີ່ລາວສາມາດເຮັດໄດ້ ເພື່ອອົດທົນກັບຄູ່ຂອງລາວ. ລາວໄດ້ແບ່ງປັນຄວາມຄິດສອງຢ່າງຂອງລາວເກືອບທັນທີ. ມັນຊັດເຈນວ່າ ລາວໄດ້ໄຕ່ຕອງເລື່ອງນີ້ກ່ອນການພົບກັນຂອງພວກເຮົາ. ຂ້າພະເຈົ້າໄດ້ເຊື້ອເຊີນລາວໃຫ້ນຳເອົາສອງສາມຂໍ້ນີ້ໄປຫາພຣະເຈົ້າໃນການອະທິຖານ ແລະ ໃຫ້ຂໍການຢືນຢັນ, ການຊີ້ນຳ, ແລະ ການດົນໃຈເຖິງວິທີດຳເນີນແຜນການຂອງລາວດ້ວຍເຈດຕະນາອັນແທ້ຈິງ. ລາວກໍຕົກລົງ. ເມື່ອພວກເຮົາຈົບແລ້ວ, ຂ້າພະເຈົ້າໄດ້ຂໍໃຫ້ລາວໃຫ້ການອັບເດດແບບຫຍໍ້ໆໃນຈົດໝາຍປະຈຳອາທິດຂອງລາວ.
ເມື່ອຫລາຍອາທິດຜ່ານໄປ, ຂ້າພະເຈົ້າສາມາດເຫັນໄດ້ໃນຈົດໝາຍປະຈຳອາທິດຂອງລາວວ່າ ສິ່ງຕ່າງໆກຳລັງດີຂຶ້ນ. ຂ້າພະເຈົ້າບໍ່ໄດ້ເຫັນພຽງແຕ່ການປັບປຸງໃນຈົດໝາຍປະຈຳອາທິດ ຂອງລາວ ເທົ່ານັ້ນ, ແຕ່ຂ້າພະເຈົ້າຍັງສາມາດເຫັນມັນໃນຈົດໝາຍປະຈຳອາທິດຂອງຄູ່ຂອງລາວເຊັ່ນກັນ. ລະຫວ່າງການສຳພາດແບບຕົວຕໍ່ຕົວຄັ້ງຕໍ່ໄປຂອງພວກເຮົາ, ຂ້າພະເຈົ້າໄດ້ເຫັນຄວາມແຕກຕ່າງປານແຈ້ງກັບມືດໃນສີໜ້າ ແລະ ວິນຍານຂອງລາວ. ຂ້າພະເຈົ້າໄດ້ຖາມລາວວ່າ, “ສະນັ້ນ, ແອວເດີ, ແມ່ນແທ້ບໍທີ່ວ່າ ‘ຄວາມໃຈບຸນດຳລົງຢູ່ຕະຫລອດໄປ?’” ລາວໄດ້ຕອບພ້ອມດ້ວຍຮອຍຍິ້ມກວ້າງວ່າ, “ແມ່ນແລ້ວ, ແລະ ໂດຍເລື່ອງເລັກນ້ອຍ ແລະ ງ່າຍໆຈະນຳເລື່ອງໃຫຍ່ມາ.”
ເມື່ອທ່ານເຮັດຕາມສູດຂ່າວດີສຳລັບການໃຊ້ຊີວິດຢ່າງມີຄວາມສຸກ, ໃຫ້ຈື່ຄຳສອນຂອງປະທານແນວສັນ ທີ່ວ່າ: “ບໍ່ວ່າທ່ານຈະມີຄຳຖາມ ຫລື ບັນຫາໃດກໍຕາມ, ທ່ານຈະພົບຄຳຕອບຢູ່ໃນພຣະຊົນຊີບ ແລະ ຄຳສອນຂອງພຣະເຢຊູຄຣິດສະເໝີ. ຈົ່ງຮຽນຮູ້ກ່ຽວກັບການຊົດໃຊ້ຂອງພຣະອົງ, ຄວາມຮັກຂອງພຣະອົງ, ຄວາມເມດຕາຂອງພຣະອົງ, ຄຳສອນຂອງພຣະອົງ, ແລະ ພຣະກິດຕິຄຸນແຫ່ງການປິ່ນປົວ ແລະ ຄວາມກ້າວໜ້າ ທີ່ຖືກຟື້ນຟູຂອງພຣະອົງ. ຈົ່ງຫັນມາຫາພຣະອົງ! ຈົ່ງຕິດຕາມພຣະອົງ!”
ເມື່ອທ່ານຕ້ອງການທີ່ຈະ “ຟັງພຣະອົງ” ແລະ ຮູ້ຈັກວິທີເຊື້ອເຊີນພຣະເຢຊູຄຣິດໃຫ້ເຂົ້າມາໃນຊີວິດຂອງທ່ານ, ໃຫ້ພິຈາລະນາຂັ້ນຕອນທີ່ປະທານແນວສັນໄດ້ສິດສອນເຮົາກ່ຽວກັບການເປີດເຜີຍສ່ວນຕົວ:
“ໃຫ້ຊອກຫາບ່ອນທີ່ງຽບໆ ທີ່ທ່ານສາມາດໄປຫາໄດ້ເປັນປະຈຳ. ໃຫ້ຖ່ອມຕົວລົງຢູ່ຕໍ່ພຣະພັກຂອງພຣະເຈົ້າ. ໃຫ້ເປີດໃຈຕໍ່ພຣະບິດາເທິງສະຫວັນຂອງທ່ານ. ໃຫ້ຫັນໄປຫາພຣະອົງ ເພື່ອຄຳຕອບ ແລະ ການປອບໂຍນ.
“ຈົ່ງອະທິຖານໃນພຣະນາມຂອງພຣະເຢຊູຄຣິດ ກ່ຽວກັບບັນຫາ, ຄວາມຢ້ານກົວ, ແລະ ຄວາມອ່ອນແອຂອງທ່ານ—ແມ່ນແລ້ວ, ກ່ຽວກັບຄວາມປາດຖະໜາຂອງໃຈທ່ານ. ແລ້ວໃຫ້ຮັບຟັງ! ໃຫ້ຂຽນແນວຄິດທີ່ມາສູ່ຈິດໃຈຂອງທ່ານໄວ້. ບັນທຶກຄວາມຮູ້ສຶກຂອງທ່ານ ແລະ ເຮັດຕາມການກະຕຸ້ນທີ່ທ່ານໄດ້ຮັບ. ເມື່ອທ່ານເຮັດຕາມຂັ້ນຕອນນີ້ທຸກມື້, ທຸກເດືອນ, ທຸກປີ, ແລ້ວທ່ານຈະ ‘ເຕີບໂຕຢູ່ໃນຫລັກທຳແຫ່ງການເປີດເຜີຍ.’”
ຂ້າພະເຈົ້າເປັນພະຍານວ່າ ພຣະເຢຊູຄຣິດ ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ພຣະອົງ “ໄດ້ບັນລຸທຸກສິ່ງທີ່ເຮົາຕ້ອງການເພື່ອທີ່ຈະສາມາດກັບຄືນໄປຫາພຣະບິດາເທິງສະຫວັນ.” ໃນພຣະນາມຂອງພຣະເຢຊູຄຣິດ, ອາແມນ.