ໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ
ຄວາມຍິ່ງໃຫຍ່ຂອງໄພ່ພົນຂອງພວກເຮົາໃນອາຟຣິກາ ປະກົດຊັດເຈນຫລາຍຂຶ້ນເມື່ອເຂົາເຈົ້າປະເຊີນກັບຄວາມທ້າທາຍໃນຊີວິດ ແລະ ຄວາມຕ້ອງການຂອງສາດສະໜາຈັກທີ່ກຳລັງເຕີບໂຕ.
ເມື່ອໜຶ່ງປີກ່ອນ, ຂ້າພະເຈົ້າໄດ້ຖືກປົດຈາກວຽກງານມອບໝາຍໃນຝ່າຍປະທານສາວົກເຈັດສິບ, ຊຶ່ງເປັນການປ່ຽນແປງທີ່ປະກາດຢູ່ທີ່ກອງປະຊຸມໃຫຍ່ສາມັນ. ເນື່ອງຈາກວ່າຊື່ຂອງຂ້າພະເຈົ້າຖືກອ່ານໃກ້ລາຍຊື່ຂອງຜູ້ທີ່ຈະກາຍເປັນອະດີດເຈົ້າໜ້າທີ່ຊັ້ນຜູ້ໃຫຍ່, ຫລາຍຄົນໄດ້ຄິດວ່າ ຂ້າພະເຈົ້າໄດ້ສິ້ນສຸດເວລາການຮັບໃຊ້ຂອງຂ້າພະເຈົ້າແລ້ວເຊັ່ນກັນ. ຫລັງຈາກກອງປະຊຸມໃຫຍ່, ຂ້າພະເຈົ້າໄດ້ຮັບຂໍ້ຄວາມສະແດງຄວາມຂອບໃຈ ແລະ ປາດຖະໜາດີຢ່າງຫລວງຫລາຍສຳລັບຊ່ວງຕໍ່ໄປໃນຊີວິດຂອງຂ້າພະເຈົ້າ. ບາງຄົນເຖິງກັບສະເໜີຊື້ເຮືອນຂອງຂ້າພະເຈົ້າໃນເມືອງນອດເຊົາເລັກ. ຂ້າພະເຈົ້າດີໃຈທີ່ເຫັນວ່າທຸກຄົນຈະຄິດຮອດຂ້າພະເຈົ້າ ແລະ ຮູ້ວ່າພວກເຮົາຈະບໍ່ມີບັນຫາໃນການຂາຍບ້ານຂອງພວກເຮົາ ເມື່ອຂ້າພະເຈົ້າສິ້ນສຸດການຮັບໃຊ້. ແຕ່ຂ້າພະເຈົ້າຍັງບໍ່ເຖິງຈຸດນັ້ນເທື່ອ.
ໜ້າທີ່ມອບໝາຍໃໝ່ຂອງຂ້າພະເຈົ້າໄດ້ນຳ ໂມນິກາ ແລະ ຂ້າພະເຈົ້າໄປຍັງອາຟຣິກາທີ່ສວຍງາມ, ບ່ອນທີ່ສາດສະໜາຈັກກຳລັງຈະເລີນຮຸ່ງເຮືອງ. ມັນເປັນພອນທີ່ໄດ້ຮັບໃຊ້ໃນທ່າມກາງໄພ່ພົນທີ່ຊື່ສັດໃນເຂດອາຟຣິກາໃຕ້ ແລະ ເປັນພະຍານເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ເຂົາເຈົ້າ. ມັນເປັນເລື່ອງສ້າງແຮງບັນດານໃຈທີ່ໄດ້ເຫັນຄອບຄົວຈາກລຸ້ນສູ່ລຸ້ນໃນທຸກພື້ນຖານ, ລວມທັງສະມາຊິກຂອງສາດສະໜາຈັກທີ່ປະສົບຜົນສຳເລັດ ແລະ ມີການສຶກສາດີຫລາຍຄົນ, ທີ່ໄດ້ອຸທິດເວລາ ແລະ ພອນສະຫວັນຂອງເຂົາເຈົ້າ ເພື່ອຮັບໃຊ້ຄົນອື່ນ.
ໃນເວລາດຽວກັນ, ດ້ວຍລັກສະນະປະຊາກອນຂອງພູມີພາກນີ້, ຜູ້ມີຖານະຍາກຈົນຈຳນວນຫລາຍກຳລັງເຂົ້າຮ່ວມສາດສະໜາຈັກ ແລະ ປ່ຽນແປງຊີວິດຂອງເຂົາເຈົ້າ ຜ່ານທາງພອນແຫ່ງການຈ່າຍສ່ວນສິບຢ່າງຊື່ສັດ ແລະ ໂອກາດທາງການສຶກສາ ທີ່ສາດສະໜາຈັກໄດ້ສະເໜີມອບໃຫ້. ໂຄງການຕ່າງໆເຊັ່ນ Succeed in School [ຄວາມສຳເລັດໃນໂຮງຮຽນ], EnglishConnect [ເຊື່ອມຕໍ່ທາງພາສາອັງກິດ], BYU–Pathway Worldwide [ການສຶກສາຜ່ານທາງ BYU ທົ່ວໂລກ], ແລະ Perpetual Education Fund [ທຶນການສຶກສາຕໍ່ເນື່ອງ] ໄດ້ເປັນພອນໃຫ້ແກ່ຫລາຍຄົນ, ໂດຍສະເພາະຄົນລຸ້ນໃໝ່.
ປະທານເຈມສ໌ ອີ ຟາວ ເຄີຍກ່າວໄວ້ວ່າ, “ມີຄົນເວົ້າວ່າ ສາດສະໜາຈັກນີ້ບໍ່ຈຳເປັນຕ້ອງດຶງດູດຄົນທີ່ຍິ່ງໃຫຍ່ ແຕ່ມັກເຮັດໃຫ້ຄົນທຳມະດາກາຍເປັນຄົນເກັ່ງ.”
ຄວາມຍິ່ງໃຫຍ່ຂອງໄພ່ພົນຂອງພວກເຮົາໃນອາຟຣິກາ ປະກົດຊັດເຈນຫລາຍຂຶ້ນເມື່ອເຂົາເຈົ້າປະເຊີນກັບຄວາມທ້າທາຍໃນຊີວິດ ແລະ ຄວາມຕ້ອງການຂອງສາດສະໜາຈັກທີ່ກຳລັງເຕີບໂຕ. ເຂົາເຈົ້າມັກຈະເບິ່ງເລື່ອງນີ້ດ້ວຍທັດສະນະຄະຕິໃນທາງບວກ. ເຂົາເຈົ້າຮວບຮວມຄຳສອນທີ່ເປັນທີ່ຮູ້ຈັກກັນດີໄວ້ເປັນຢ່າງດີ ຈາກປະທານຣະໂຊ ເອັມ ແນວສັນ ທີ່ວ່າ:
“ຄວາມສຸກທີ່ເຮົາຮູ້ສຶກບໍ່ຂຶ້ນກັບສະຖານະການໃນຊີວິດຂອງເຮົາ ແຕ່ມັນຂຶ້ນກັບວ່າ ເຮົາເອົາໃຈໃສ່ຕໍ່ສິ່ງໃດໃນຊີວິດຂອງເຮົາ.
“ເມື່ອເຮົາເຮັດໃຫ້ຊີວິດຂອງເຮົາສຸມໃສ່ແຜນແຫ່ງຄວາມລອດຂອງພຣະເຈົ້າ … ແລະ ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ເຮົາສາມາດຮູ້ສຶກເຖິງຄວາມສຸກໄດ້ ບໍ່ວ່າແມ່ນຫຍັງຈະເກີດຂຶ້ນ—ຫລື ບໍ່ເກີດຂຶ້ນກໍຕາມ—ໃນຊີວິດຂອງເຮົາ.”
ເຂົາເຈົ້າພົບຄວາມຊື່ນຊົມເຖິງແມ່ນຈະປະເຊີນກັບຄວາມທ້າທາຍຕ່າງໆກໍຕາມ. ເຂົາເຈົ້າໄດ້ຮຽນຮູ້ວ່າຄວາມສຳພັນຂອງເຮົາກັບພຣະຜູ້ຊ່ວຍໃຫ້ລອດ ຊ່ວຍໃຫ້ເຮົາສາມາດຮັບມືກັບຄວາມຍາກລຳບາກ ດ້ວຍໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູໄດ້.
ຂ້າພະເຈົ້າຂໍແບ່ງປັນປະສົບການບາງຢ່າງກັບໄພ່ພົນທີ່ຊື່ສັດເຫລົ່ານີ້ ຜູ້ໄດ້ສະແດງຫລັກທຳນີ້, ໂດຍເລີ່ມຕົ້ນຈາກປະເທດໂມຊຳບິກ.
ໂມຊຳບິກ
ສອງສາມເດືອນຜ່ານມານີ້, ຂ້າພະເຈົ້າໄດ້ເປັນປະທານກອງປະຊຸມສະເຕກ ຂອງສະເຕກທີ່ກໍ່ຕັ້ງໄດ້ໜຶ່ງປີ ແຕ່ມີ 10 ໜ່ວຍແລ້ວ. ຜູ້ຄົນຫລາຍກວ່າ 2,000 ຄົນເຕັມຢູ່ໃນຕຶກໂບດນ້ອຍ ແລະ ຜ້າເຕັນສາມຫລັງ ທີ່ໄດ້ຕັ້ງໄວ້ຢູ່ຂ້າງນອກ. ປະທານສະເຕກ ມີອາຍຸ 31 ປີ, ພັນລະຍາຂອງເພິ່ນ 26 ປີ, ແລະ ພວກເພິ່ນມີລູກນ້ອຍສອງຄົນ. ເພິ່ນນຳພາສະເຕກທີ່ກຳລັງເຕີບໂຕ ແລະ ທ້າທາຍນີ້ ໂດຍບໍ່ເວົ້າຈົ່ມ—ພຽງແຕ່ດ້ວຍໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ.
ໃນການສຳພາດກັບປິຕຸ, ຂ້າພະເຈົ້າໄດ້ຮຽນຮູ້ວ່າ ພັນລະຍາຂອງເພິ່ນກຳລັງປ່ວຍໂຊ, ແລະ ເພິ່ນຕ້ອງດີ້ນລົນເພື່ອດູແລນາງ. ຫລັງຈາກໄດ້ເວົ້າລົມເລື່ອງນີ້ກັບປະທານສະເຕກແລ້ວ, ພວກເຮົາໄດ້ມອບພອນຂອງຖານະປະໂລຫິດໃຫ້ແກ່ນາງ. ຂ້າພະເຈົ້າໄດ້ຖາມປິຕຸວ່າ ເພິ່ນໄດ້ມອບປິຕຸພອນຫລາຍປານໃດໂດຍສະເລ່ຍ.
“ແປດ ເຖິງ ສິບ,” ເພິ່ນເວົ້າ.
ຂ້າພະເຈົ້າໄດ້ຖາມວ່າ, “ຕໍ່ເດືອນບໍ?”
ເພິ່ນຕອບ, “ຕໍ່ອາທິດ!” ຂ້າພະເຈົ້າໄດ້ແນະນຳເພິ່ນວ່າ ການເຮັດຫລາຍແບບນັ້ນຕໍ່ອາທິດບໍ່ໄດ້ເປັນການສະຫລາດ.
“ແອວເດີ ກາໂດຍ,” ເພິ່ນເວົ້າ, “ພວກເຂົາມາທຸກອາທິດ, ລວມທັງສະມາຊິກໃໝ່ ແລະ ຊາວໜຸ່ມຈຳນວນຫລາຍ.” ອີກຄັ້ງ, ບໍ່ມີການເວົ້າຈົ່ມ—ມີພຽງແຕ່ໃບໜ້າຍິ້ມແຍ້ມ ແລະ ຫົວໃຈທີ່ກະຕັນຍູ.
ຫລັງຈາກພາກວັນເສົາຕອນແລງຂອງກອງປະຊຸມສະເຕກ, ຂະນະທີ່ເດີນທາງໄປໂຮງແຮມຂອງຂ້າພະເຈົ້າ, ຂ້າພະເຈົ້າໄດ້ສັງເກດເຫັນຜູ້ຄົນກຳລັງຊື້ອາຫານຢູ່ແຄມຖະໜົນໃນຍາມເດິກ. ຂ້າພະເຈົ້າໄດ້ຖາມຄົນຂັບລົດຂອງຂ້າພະເຈົ້າວ່າ ເປັນຫຍັງພວກເຂົາຈຶ່ງຊື້ຕອນກາງຄືນ ແທນທີ່ຈະຊື້ໃນຕອນກາງເວັນ. ລາວໄດ້ຕອບວ່າ ພວກເຂົາເຮັດວຽກໃນຕອນກາງເວັນ ເພື່ອຈະໄດ້ເງິນມາຊື້ໃນຕອນແລງ.
“ໂອ, ພວກເຂົາເຮັດວຽກມື້ນີ້ ເພື່ອກິນມື້ອື່ນນໍ,” ຂ້າພະເຈົ້າເວົ້າ.
ແຕ່ລາວໄດ້ເວົ້າແກ້ຂ້າພະເຈົ້າວ່າ: “ບໍ່ແມ່ນ, ພວກເຂົາເຮັດວຽກໃນຕອນກາງເວັນ ເພື່ອຈະໄດ້ກິນໃນຄືນນີ້.” ຂ້າພະເຈົ້າຫວັງວ່າສະມາຊິກຂອງພວກເຮົາຈະຢູ່ໃນສະຖານະການທີ່ດີກວ່ານີ້, ແຕ່ລາວໄດ້ຢືນຢັນວ່າ ຫລາຍຄົນກໍປະເຊີນຄວາມທ້າທາຍທີ່ຄ້າຍຄືກັນນີ້ ໃນພາກສ່ວນນັ້ນຂອງປະເທດ. ເຊົ້າຕໍ່ມາ, ລະຫວ່າງພາກວັນອາທິດຂອງພວກເຮົາ ແລະ ໂດຍທີ່ຮູ້ເຖິງສະພາບຂອງເຂົາເຈົ້າ, ຂ້າພະເຈົ້າຍິ່ງປະທັບໃຈຫລາຍດ້ວຍໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູຂອງເຂົາເຈົ້າ.
ຊຳບີ
ຂະນະທີ່ເດີນທາງໄປຮ່ວມກອງປະຊຸມໃນວັນອາທິດ, ປະທານສະເຕກ ແລະ ຂ້າພະເຈົ້າໄດ້ເຫັນຜົວເມຍຄູ່ໜຶ່ງກຳລັງຍ່າງຢູ່ຂ້າງທາງ ພ້ອມດ້ວຍແອນ້ອຍ ແລະ ລູກນ້ອຍສອງຄົນ. ພວກເຮົາໄດ້ຢຸດລົດ ແລະ ເຊີນເຂົາເຈົ້າຂຶ້ນລົດໄປນຳ. ເຂົາເຈົ້າປະຫລາດໃຈ ແລະ ດີໃຈຫລາຍ. ເມື່ອຂ້າພະເຈົ້າຖາມວ່າ ຕ້ອງໃຊ້ເວລາດົນປານໃດເພື່ອຍ່າງໄປໂບດ, ຜູ້ເປັນພໍ່ໄດ້ຕອບວ່າ ປະມານ 45 ນາທີ ເຖິງ ໜຶ່ງຊົ່ວໂມງ, ຂຶ້ນຢູ່ກັບການຍ່າງຂອງລູກໆ. ເຂົາເຈົ້າໄດ້ເດີນໄປກັບແບບນີ້, ທຸກວັນອາທິດ, ບໍ່ມີການເວົ້າຈົ່ມ—ມີພຽງໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ.
ມາລາວີ
ໃນວັນອາທິດໜຶ່ງ ກ່ອນກອງປະຊຸມສະເຕກ, ຂ້າພະເຈົ້າໄດ້ໄປຢ້ຽມຢາມສອງສາຂາ ທີ່ໃຊ້ໂຮງຮຽນຫລວງເປັນສະຖານທີ່ປະຊຸມ. ຂ້າພະເຈົ້າຕົກໃຈກັບສະພາບອາຄານທີ່ຕ່ຳຕ້ອຍ ແລະ ລຽບງ່າຍ, ຊຶ່ງຂາດແມ່ນແຕ່ສິ່ງອຳນວຍຄວາມສະດວກຂັ້ນພື້ນຖານບາງຢ່າງ. ຂະນະທີ່ຂ້າພະເຈົ້າພົບກັບສະມາຊິກບໍ່ເທົ່າໃດຄົນຢູ່ທີ່ນັ້ນ, ຂ້າພະເຈົ້າພ້ອມທີ່ຈະຂໍໂທດສຳລັບສະພາບຂອງອາຄານປະຊຸມຂອງເຂົາເຈົ້າ ທີ່ບໍ່ພຽບພ້ອມ, ແຕ່ເຂົາເຈົ້າດີໃຈທີ່ມີສະຖານທີ່ເຕົ້າໂຮມຢູ່ໃກ້ໆ, ຫລີກເວັ້ນຈາກການຍ່າງໄກຕາມປົກກະຕິ. ອີກເທື່ອໜຶ່ງ, ບໍ່ມີການເວົ້າຈົ່ມ—ມີພຽງໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ.
ຊິມບຳເວ
ຫລັງຈາກການຝຶກອົບຮົມຜູ້ນຳໃນວັນເສົາ, ປະທານສະເຕກໄດ້ພາຂ້າພະເຈົ້າໄປຮ່ວມກອງປະຊຸມໃນວັນອາທິດ ທີ່ຖືກຈັດຂຶ້ນໃນເຮືອນເຊົ່າຫລັງໜຶ່ງ. ມີຜູ້ຄົນ 240 ຄົນເຂົ້າຮ່ວມ. ຈາກນັ້ນອະທິການໄດ້ແນະນຳສະມາຊິກໃໝ່ 10 ຄົນ ທີ່ຫາກໍໄດ້ຮັບບັບຕິສະມາໃນອາທິດນັ້ນ. ຜູ້ເຂົ້າຮ່ວມປະຊຸມກະຈັດກະຈາຍກັນຢູ່ໃນຫ້ອງນ້ອຍສອງຫ້ອງ, ບາງຄົນກໍນັ່ງຢູ່ນອກອາຄານ, ເບິ່ງກອງປະຊຸມຜ່ານປ່ອງຢ້ຽມ ແລະ ປະຕູ. ອີກເທື່ອໜຶ່ງ, ບໍ່ມີການເວົ້າຈົ່ມ—ມີພຽງໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ.
ເລໂຊໂຕ
ຂ້າພະເຈົ້າໄດ້ໄປຢ້ຽມຢາມປະເທດນ້ອຍທີ່ສວຍງາມແຫ່ງໜຶ່ງ, ຊຶ່ງຮູ້ຈັກກັນອີກວ່າ “ອານາຈັກພູເຂົາ,” ເພື່ອຊົມທ້ອງຖິ່ນຂອງສາດສະໜາຈັກທີ່ກາຍເປັນສະເຕກ. ຫລັງຈາກການປະຊຸມໃນວັນເສົາ, ຂ້າພະເຈົ້າໄດ້ໄປຮ່ວມກອງປະຊຸມໃນວັນອາທິດ ໃນສາຂາໜຶ່ງຂອງເຂົາເຈົ້າ ຢູ່ໃນເຮືອນທີ່ເຊົ່າ. ຫ້ອງສິນລະລຶກແມ່ນເຕັມໄປດ້ວຍຜູ້ຄົນ, ບາງຄົນຢືນຢູ່ນອກປະຕູເພື່ອເຂົ້າຮ່ວມ. ຂ້າພະເຈົ້າໄດ້ບອກປະທານສາຂາວ່າ ເພິ່ນຕ້ອງມີເຮືອນຫລັງໃຫຍ່ກວ່ານັ້ນ. ຂ້າພະເຈົ້າຮູ້ສຶກປະຫລາດໃຈ, ເມື່ອເພິ່ນໄດ້ບອກຂ້າພະເຈົ້າວ່າ ນັ້ນແມ່ນພຽງແຕ່ສະມາຊິກຈຳນວນເຄິ່ງໜຶ່ງຂອງເພິ່ນເທົ່ານັ້ນ. ສ່ວນອີກເຄິ່ງໜຶ່ງຈະເຂົ້າຮ່ວມກອງປະຊຸມສິນລະລຶກໃນຊົ່ວໂມງທີສອງ. ອີກເທື່ອໜຶ່ງ, ບໍ່ມີການເວົ້າຈົ່ມ—ມີພຽງໃບໜ້າທີ່ຍິ້ມແຍ້ມ ແລະ ຫົວໃຈທີ່ກະຕັນຍູ.
ຂ້າພະເຈົ້າໄດ້ກັບໄປປະເທດເລໂຊໂຕ ໃນພາຍຫລັງ ເນື່ອງຈາກອຸບັດຕິເຫດຮ້າຍແຮງທາງລົດ ທີ່ກ່ຽວຂ້ອງກັບຊາວໜຸ່ມຂອງພວກເຮົາຫລາຍຄົນ, ຊຶ່ງຖືກກ່າວເຖິງໂດຍແອວເດີ ດີ ທອດ ຄຣິສໂຕເຟີສັນ ກ່ອນໜ້ານີ້. ເມື່ອຂ້າພະເຈົ້າໄດ້ໄປຢ້ຽມຢາມຄອບຄົວ ແລະ ຜູ້ນຳ, ຂ້າພະເຈົ້າຄາດວ່າບັນຍາກາດຈະເສົ້າໝອງ. ແທນທີ່, ຂ້າພະເຈົ້າໄດ້ເຫັນໄພ່ພົນທີ່ເຂັ້ມແຂງ ແລະ ຢືດຢຸ່ນ ຜູ້ທີ່ຮັບມືກັບສະຖານະການດ້ວຍວິທີທີ່ເຊີດຊູໃຈ ແລະ ສ້າງແຮງບັນດານໃຈ.
ມະໂຟ ອານິເຊຍ ນະກູ, 14 ປີ, ຜູ້ລອດຊີວິດຈາກອຸບັດຕິເຫດໃນຮູບນີ້, ໄດ້ສະແດງໃຫ້ເຫັນຢ່າງດີໃນຄຳຂອງນາງເອງ ທີ່ວ່າ: “ຈົ່ງໄວ້ວາງໃຈໃນພຣະເຢຊູ ແລະ ຫວັງເພິ່ງພຣະອົງສະເໝີ, ເພາະຜ່ານທາງພຣະອົງ ທ່ານຈະພົບສັນຕິສຸກ, ແລະ ພຣະອົງຈະຊ່ວຍເຫລືອທ່ານໃນຂະບວນການປິ່ນປົວ.”
ນີ້ເປັນພຽງບາງຕົວຢ່າງທີ່ພວກເຮົາເຫັນທັດສະນະຄະຕິຂອງເຂົາເຈົ້າ ເພາະເຂົາເຈົ້າເຮັດໃຫ້ພຣະກິດຕິຄຸນຂອງພຣະເຢຊູຄຣິດເປັນສູນກາງໃນຊີວິດຂອງເຂົາເຈົ້າ. ເຂົາເຈົ້າຮູ້ວ່າຈະຊອກຫາຄວາມຊ່ວຍເຫລືອ ແລະ ຄວາມຫວັງໄດ້ຢູ່ໃສ.
ອຳນາດແຫ່ງການປິ່ນປົວຂອງພຣະຜູ້ຊ່ວຍໃຫ້ລອດ
ເປັນຫຍັງພຣະຜູ້ຊ່ວຍໃຫ້ລອດຈຶ່ງສາມາດຊ່ວຍເຫລືອເຂົາເຈົ້າ ແລະ ເຮົາໃນສະຖານະການຂອງຊີວິດເຮົາ? ຄຳຕອບມີຢູ່ໃນພຣະຄຳພີ ທີ່ວ່າ:
“ແລະ ພຣະອົງຈະສະເດັດອອກໄປ, ທົນຕໍ່ຄວາມເຈັບປວດ ແລະ ຄວາມທຸກ ແລະ ການລໍ້ລວງທຸກຢ່າງ. …
“… ພຣະອົງຈະຮັບເອົາຄວາມອ່ອນແອຂອງພວກເຂົາໄວ້, ເພື່ອວ່າ [ພຣະອົງ] ຈະເຕັມໄປດ້ວຍຄວາມເມດຕາ, … ເພື່ອວ່າພຣະອົງ … ຈະຊ່ວຍຜູ້ຄົນຂອງພຣະອົງ ຕາມຄວາມບົກພ່ອງຂອງພວກເຂົາ.”
ດັ່ງທີ່ແອວເດີ ເດວິດ ເອ ແບ໊ດນາ ໄດ້ສິດສອນ, ບໍ່ມີຄວາມເຈັບປວດ, ຄວາມທຸກທໍລະມານ, ຫລື ຄວາມອ່ອນແອທາງຮ່າງກາຍໃດທີ່ເຮົາສາມາດປະສົບ ທີ່ພຣະຜູ້ຊ່ວຍໃຫ້ລອດບໍ່ຮູ້ຈັກ. “ທ່ານ ແລະ ຂ້າພະເຈົ້າໃນຍາມອ່ອນແອອາດຮ້ອງວ່າ, ‘ບໍ່ມີໃຜເຂົ້າໃຈ [ສິ່ງທີ່ເຮົາກຳລັງປະເຊີນ]. …’ ບາງທີ, ບໍ່ມີມະນຸດຄົນໃດຮູ້. ແຕ່ພຣະບຸດຂອງພຣະເຈົ້າຮູ້ຈັກ ແລະ ເຂົ້າໃຈເປັນຢ່າງດີ.” ແລະ ເປັນຫຍັງ? ເພາະ “ພຣະອົງຮູ້ສຶກ ແລະ ໄດ້ແບກຫາບພາລະຂອງເຮົາ ກ່ອນເຮົາເສຍອີກ.”
ຂ້າພະເຈົ້າຂໍຈົບດ້ວຍປະຈັກພະຍານຂອງຂ້າພະເຈົ້າ ດ້ວຍພຣະຄຳຂອງພຣະຄຣິດ ທີ່ພົບເຫັນໃນ ມັດທາຍ 11:
“ບັນດາຜູ້ທີ່ເຮັດການໜັກໜ່ວງ ແລະ ແບກພາລະໜັກ ຈົ່ງມາຫາເຮົາ ແລະ ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.
“ຈົ່ງເອົາແອກຂອງເຮົາແບກໄວ້ແລ້ວຮຽນຮູ້ຈາກເຮົາ ເພາະວ່າເຮົາເປັນຜູ້ໃຈອ່ອນສຸພາບ ແລະ ຖ່ອມລົງ ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.
“ດ້ວຍວ່າ ແອກຂອງເຮົາກໍພໍເໝາະ ແລະ ພາລະຂອງເຮົາກໍເບົາ.”
ເຊັ່ນດຽວກັບໄພ່ພົນເຫລົ່ານັ້ນໃນອາຟຣິກາ, ຂ້າພະເຈົ້າຮູ້ວ່າຄຳສັນຍານີ້ເປັນຄວາມຈິງ. ມັນເປັນຄວາມຈິງຢູ່ທີ່ນັ້ນ, ແລະ ມັນເປັນຄວາມຈິງໃນທຸກບ່ອນ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມຂອງພຣະເຢຊູຄຣິດ, ອາແມນ.