ຈົ່ງຄືນດີກັບພຣະເຈົ້າ
ການຄືນດີກັບພຣະເຈົ້າ, ຜ່ານທາງການຊົດໃຊ້ຂອງພຣະເຢຊູຄຣິດ, ຈະນຳພາໄປສູ່ສັດທາທີ່ບໍ່ສະທ້ານຫວັ່ນໄຫວ.
ຂະນະທີ່ຂ້າພະເຈົ້າສຶກສາພຣະຄຳພີ, ຂ້າພະເຈົ້າໄດ້ພົບກັບຄຳທີ່ດຶງດູດຄວາມສົນໃຈຂອງຂ້າພະເຈົ້າແທ້ໆ, ຫລັກໆແລ້ວຍ້ອນວ່າຄຳເຫລົ່ານັ້ນມີຄວາມໝາຍພິເສດອັນເປັນຜົນມາຈາກປະສົບການທີ່ຂ້າພະເຈົ້າມີໃນຊີວິດຂອງຂ້າພະເຈົ້າ. ຂ້າພະເຈົ້າໃຊ້ຊີວິດການເຮັດວຽກຂອງຂ້າພະເຈົ້າເປັນນັກບັນຊີນິຕິສາດ. ດ້ວຍພື້ນຖານເຊັ່ນນັ້ນ, ຄຳວ່າ ຄືນດີ ຈຶ່ງດຶງດູດຄວາມສົນໃຈຂອງຂ້າພະເຈົ້າໃນຂະນະທີ່ຂ້າພະເຈົ້າອ່ານພຣະຄຳພີ. ວຽກຂອງຂ້າພະເຈົ້າແມ່ນກວດສອບຈຳນວນເງິນທີ່ຖືກລາຍງານມາແລ້ວກັບບັນທຶກດ້ານການເງິນ ໂດຍການນຳໃຊ້ທັກສະທາງດ້ານການບັນຊີ, ການກວດສອບບັນຊີ, ແລະ ການສືບສວນ. ໃນອີກຄຳໜຶ່ງ, ເປົ້າໝາຍຂອງຂ້າພະເຈົ້າຄື ຈັດຮຽງບັນທຶກດ້ານການເງິນໃຫ້ສອດຄ່ອງກັບເອກະສານດ້ານການເງິນທີ່ກ່ຽວຂ້ອງເພື່ອຮັບປະກັນຄວາມຖືກຕ້ອງ ແລະ ທ່ຽງຕົງ. ຂ້າພະເຈົ້າໄດ້ພະຍາຍາມຢ່າງພາກພຽນໃນການແກ້ໄຂຂໍ້ຄາດເຄື່ອນ, ແລະ ມັນເປັນເລື່ອງປົກກະຕິທີ່ຕ້ອງໃຊ້ເວລາຢ່າງຫລວງຫລາຍໃນການແກ້ໄຂຂໍ້ຄາດເຄື່ອນແມ່ນແຕ່ພຽງເລັກນ້ອຍ.
ອັກຄະສາວົກໂປໂລ ໄດ້ຮ້ອງຂໍຊາວໂກຣິນໂທໃຫ້ “ຄືນດີກັບ [ພຣະເຈົ້າ].” ການຄືນດີກັບພຣະເຈົ້າໝາຍເຖິງການຖືກນຳກັບຄືນມາສູ່ພຣະເຈົ້າດ້ວຍຄວາມປອງດອງອີກຄັ້ງ ຫລື ການຟື້ນຟູຄວາມສຳພັນກັບພຣະເຈົ້າທີ່ເຄີຍເຄັ່ງຕຶງ ຫລື ແຕກຫັກຍ້ອນຄວາມຜິດບາບ ຫລື ການກະທຳຂອງເຮົາ. ເວົ້າງ່າຍໆກໍຄື, ການຄືນດີກັບພຣະເຈົ້າໝາຍເຖິງການເຮັດໃຫ້ຄວາມປະສົງ ແລະ ການກະທຳຂອງເຮົາສອດຄ່ອງກັບພຣະປະສົງຂອງພຣະເຈົ້າ, ຫລື ດັ່ງທີ່ໄດ້ສິດສອນໂດຍ ປະທານຣະໂຊ ເອັມ ແນວສັນ, ໃຫ້ພຣະເຈົ້າໄຊຊະນະໃນຊີວິດຂອງເຮົາ.
ດັ່ງທີ່ມີສອນໄວ້ໃນພຣະຄຳພີ, ເຮົາມີສິດທີ່ຈະເຮັດເພື່ອຕົນເອງ, “ທີ່ຈະເລືອກທາງແຫ່ງຄວາມຕາຍອັນເປັນນິດ ຫລື ທາງແຫ່ງຊີວິດນິລັນດອນ.” ແຕ່ຖ້າວ່າເຮົາບໍ່ພາກພຽນ, ເສລີພາບໃນການເຮັດເພື່ອຕົວເຮົາເອງນີ້ ອາດຈະນຳໄປສູ່ການສູນເສຍຄວາມສອດຄ່ອງກັບພຣະປະສົງຂອງພຣະເຈົ້າ.
ສາດສະດາຢາໂຄບໄດ້ສິດສອນວ່າ ເມື່ອເຮົາພົບຕົນເອງຢູ່ໃນຄວາມບໍ່ປອງດອງ ຫລື ຄວາມບໍ່ລົງຮອຍກັບພຣະເຈົ້າ, ວິທີດຽວທີ່ເຮົາຈະສາມາດບັນລຸການຄືນດີໄດ້ນັ້ນກໍຄື “ຄືນດີກັບ [ພຣະເຈົ້າ] ທາງການຊົດໃຊ້ຂອງພຣະຄຣິດ.” ເຮົາຕ້ອງຮັບຮູ້ວ່າ ການຄືນດີນັ້ນແມ່ນຂຶ້ນຢູ່ກັບຄວາມເມດຕາ, ຊຶ່ງໝາຍຄວາມວ່າ ການກະທຳທີ່ມີພຣະຄຸນແຫ່ງການຊົດໃຊ້ຂອງພຣະເຢຊູຄຣິດນັ້ນ ເຮັດໃຫ້ການຄືນດີເປັນໄປໄດ້.
ຂະນະທີ່ທ່ານໄຕ່ຕອງຊີວິດຂອງຕົນເອງ, ໃຫ້ຄິດກ່ຽວກັບຕອນທີ່ທ່ານຮູ້ສຶກຢູ່ຫ່າງໄກຈາກພຣະບິດາເທິງສະຫວັນເພາະວ່າທ່ານໄດ້ຫຍັບອອກໄປຈາກພຣະອົງ. ຍົກຕົວຢ່າງ, ບາງທີທ່ານອາດຈະມີຄວາມພາກພຽນໜ້ອຍລົງໃນການອະທິຖານຫາພຣະອົງ ຫລື ໃນການຮັກສາພຣະບັນຍັດຂອງພຣະອົງ. ດັ່ງທີ່ເຮົາເລືອກທີ່ຈະຕີຕົວອອກຫ່າງຈາກພຣະເຈົ້າ, ເຮົາຕ້ອງເລືອກທີ່ຈະເລີ່ມຄວາມພະຍາຍາມທີ່ຈະຄືນດີ. ພຣະຜູ້ເປັນເຈົ້າໄດ້ເນັ້ນໜັກໜ້າທີ່ຮັບຜິດຊອບຂອງເຮົາເມື່ອພຣະອົງກ່າວວ່າ: “ຈົ່ງເຂົ້າມາໃກ້ເຮົາ ແລະ ເຮົາຈະເຂົ້າໃກ້ພວກເຈົ້າ; ຈົ່ງສະແຫວງຫາເຮົາດ້ວຍຄວາມພາກພຽນ ແລະ ພວກເຈົ້າຈະພົບເຮົາ; ຈົ່ງໝັ່ນຂໍ ແລ້ວພວກເຈົ້າຈະໄດ້ຮັບ; ຈົ່ງໝັ່ນເຄາະ ແລ້ວຈະມີຜູ້ໄຂປະຕູໃຫ້ພວກເຈົ້າ.”
ພຣະຜູ້ຊ່ວຍໃຫ້ລອດຊ່ວຍເຮົາໃຫ້ຟື້ນຟູ ແລະ ຄືນດີກັບຄວາມສຳພັນທີ່ສຳຄັນນີ້ໄດ້ແນວໃດ? ສຳລັບຂ້າພະເຈົ້າແລ້ວ, ຂ້າພະເຈົ້າໄດ້ມີຄວາມກ້າວໜ້າຢ່າງຫລວງຫລາຍໃນການເດີນທາງຂອງຂ້າພະເຈົ້າເພື່ອຄືນດີກັບພຣະເຈົ້າ ເມື່ອຂ້າພະເຈົ້າເຮັດຕາມຄຳແນະນຳຂອງປະທານແນວສັນ ແລະ ກັບໃຈທຸກໆມື້. ເຫດຜົນນັ້ນກໍຄື ການຄືນດີເປັນສັນຍາລັກຂອງການຟື້ນຟູຄວາມສຳພັນທີ່ແຕກຫັກ, ໂດຍສະເພາະລະຫວ່າງພຣະເຈົ້າ ແລະ ມະນຸດຊາດ, ໂດຍການນຳເອົາອຸປະສັກແຫ່ງບາບນັ້ນອອກໄປ.
ການຄືນດີຄັ້ງຍິ່ງໃຫຍ່ປະການໜຶ່ງທີ່ເຮົາໄດ້ອ່ານໃນພຣະຄຳພີນັ້ນກໍຄືເລື່ອງຂອງເອໂນດ. ມີບາງຢ່າງໃນຊີວິດຂອງເພິ່ນທີ່ບໍ່ສອດຄ່ອງກັບພຣະເຈົ້າ. ເພິ່ນໄດ້ເປັນຕົວຢ່າງໃນການເພິ່ງພາການຊົດໃຊ້ຂອງພຣະເຢຊູຄຣິດໃນການຄືນດີກັບພຣະເຈົ້າ. ເພິ່ນໄດ້ອະທິບາຍເຖິງຄວາມປາດຖະໜາຂອງເພິ່ນທີ່ຈະກັບໃຈ, ຄວາມຖ່ອມຕົວຂອງເພິ່ນ, ຈຸດສຸມຂອງເພິ່ນ, ແລະ ຄວາມຕັ້ງໃຈຂອງເພິ່ນ. ການຄືນດີຂອງເພິ່ນກັບພຣະເຈົ້າໄດ້ຮັບການຢືນຢັນເມື່ອສຸລະສຽງໜຶ່ງໄດ້ມາເຖິງເພິ່ນ, ໂດຍກ່າວວ່າ, “ເອໂນດ, ບາບຂອງເຈົ້າໄດ້ຮັບການອະໄພໃຫ້ແລ້ວ, ແລະ ເຈົ້າຈະໄດ້ຮັບພອນ.” ເອໂນດໄດ້ຮັບຮູ້ເຖິງຜົນກະທົບທີ່ການກັບໃຈ ແລະ ການຄືນດີນັ້ນໄດ້ມີຕໍ່ເພິ່ນ ເມື່ອເພິ່ນໄດ້ກ່າວວ່າ, “ແລະ ຂ້າພະເຈົ້າເອໂນດຮູ້ວ່າພຣະເຈົ້າຈະບໍ່ເວົ້າຕົວະ; ດັ່ງນັ້ນ, ຄວາມຜິດຂອງຂ້າພະເຈົ້າຈຶ່ງຖືກກວາດລ້າງໄປ.”
ການຄືນດີບໍ່ພຽງແຕ່ນຳຄວາມຮູ້ສຶກໂລ່ງໃຈຈາກຄວາມຮູ້ສຶກຜິດມາໃຫ້ ແຕ່ຍັງນຳມາສັນຕິສຸກພາຍໃນຕົວເຮົາ ແລະ ກັບຄົນອື່ນມາໃຫ້ອີກດ້ວຍ. ມັນປິ່ນປົວຄວາມສຳພັນ, ເຮັດໃຫ້ໃຈອ່ອນໂຍນລົງ, ແລະ ເສີມສ້າງຄວາມເປັນສານຸສິດຂອງເຮົາ, ນຳຄວາມໝັ້ນໃຈຫລາຍຂຶ້ນຢູ່ຕໍ່ພຣະພັກຂອງພຣະເຈົ້າມາໃຫ້ນຳອີກ. ສິ່ງທີ່ນຳເອົາຄວາມຫວັງ ແລະ ຄວາມໝັ້ນໃຈອັນຍິ່ງໃຫຍ່ມາສູ່ຂ້າພະເຈົ້າກໍຄືໝາກຜົນຂອງການຄືນດີທີ່ໄດ້ຖືກອະທິບາຍໄວ້ໂດຍ ເອໂນດ ເມື່ອເພິ່ນໄດ້ກ່າວວ່າ, “ແລະ ຫລັງຈາກຂ້າພະເຈົ້າເອໂນດໄດ້ຍິນຄຳເຫລົ່ານີ້ແລ້ວ, ສັດທາຂອງຂ້າພະເຈົ້າບໍ່ຫວັ່ນໄຫວໃນພຣະຜູ້ເປັນເຈົ້າ.”
ຕອນທີ່ຂ້າພະເຈົ້າຍັງເປັນເດັກນ້ອຍ, ພໍ່ຕູ້ຂອງຂ້າພະເຈົ້າມີສວນໝາກເຊີຣີທີ່ກວ້າງໃຫຍ່. ຂ້າພະເຈົ້າໄດ້ມີໂອກາດເຮັດວຽກຢູ່ທີ່ສວນໝາກໄມ້ນັ້ນ, ສ່ວນຫລາຍແມ່ນໃນຊ່ວງລະດູຮ້ອນຊຶ່ງເປັນລະດູຂອງການເກັບກ່ຽວໝາກເຊີຣີ. ໂດຍທີ່ຍັງເປັນເດັກນ້ອຍ, ຂອບເຂດການມີສ່ວນຮ່ວມໃນໜ້າວຽກນັ້ນກໍຄືການຮັບເອົາຄຸໃສ່ໝາກໄມ້ ແລະ ຈາກນັ້ນກໍສົ່ງຕໍ່ຂຶ້ນໄປເທິງຕົ້ນໄມ້ເພື່ອເກັບໝາກເຊີຣີ.
ການເກັບກ່ຽວໝາກເຊີຣີໄດ້ປ່ຽນໄປຫລາຍ ເມື່ອພໍ່ຕູ້ຂອງຂ້າພະເຈົ້າໄດ້ຊື້ເຄື່ອງຈັກທີ່ເອີ້ນວ່າ ເຄື່ອງສັ່ນໝາກເຊີຣີ. ເຄື່ອງຈັກນີ້ຈັບເອົາລຳຕົ້ນຂອງຕົ້ນໄມ້ ແລະ ສັ່ນມັນ, ໂດຍເຮັດໃຫ້ໝາກເຊີຣີຫລົ່ນລົງມາຈາກຕົ້ນ ຕົກໃສ່ຕາໜ່າງທີ່ຖືກກາງໄວ້ເພື່ອເກັບໝາກເຊີຣີ. ຂ້າພະເຈົ້າໄດ້ສັງເກດເຫັນວ່າ ເມື່ອເຄື່ອງສັ່ນເລີ່ມສັ່ນຕົ້ນໄມ້ນັ້ນ, ໝາກເຊີຣີເກືອບທັງໝົດໄດ້ຕົກລົງມາພາຍໃນບໍ່ຮອດເທົ່າໃດນາທີ. ຂ້າພະເຈົ້າຍັງສັງເກດເຫັນອີກວ່າ ມັນບໍ່ສຳຄັນວ່າຕົ້ນໄມ້ນັ້ນຈະຖືກສັ່ນເປັນເວລາ 10 ວິນາທີ ຫລື ສັ່ນເປັນເວລາໜຶ່ງນາທີເຕັມ, ໝາກເຊີຣີບາງຈຳນວນນັ້ນກໍຍັງບໍ່ຕົກລົງມາ. ພວກມັນບໍ່ສະທ້ານຫວັ່ນໄຫວແທ້ໆ.
ການສັ່ນໝາກເຊີຣີອອກຈາກຕົ້ນນັ້ນເປັນໄປໄດ້ຍ້ອນການປົດປ່ອຍຂອງສານ ເອທີລິນ. ຮໍໂມນຊະນິດນີ້ໄດ້ເຮັດໃຫ້ຊັ້ນຂອງຈຸລັງລະຫວ່າງກ້ານຂອງໝາກເຊີຣີທີ່ຕິດກັບຕົ້ນນັ້ນອ່ອນແອລົງ. ດັ່ງນັ້ນ, ກ້ານຂອງໝາກເຊີຣີທີ່ສຸກແລ້ວຈຶ່ງຫລຸດອອກຈາກຕົ້ນໄດ້ຢ່າງງ່າຍດາຍ ເນື່ອງຈາກການເຊື່ອມຕໍ່ທີ່ອ່ອນແອລົງ.
ໃນພຣະຄຳພີ, ເຮົາຮຽນຮູ້ວ່າ ເຊື້ອວົງຂອງເຢຊີເປັນຄຳອຸປະມາເຖິງພຣະເມຊີອາ, ພຣະເຢຊູຄຣິດ, ຜູ້ທີ່ຖືກທຳນາຍໄວ້ວ່າຈະມາຈາກເຊື້ອສາຍຂອງເຢຊີ, ບິດາຂອງກະສັດດາວິດ. ໃນທຳນອງດຽວກັນກັບທີ່ສານເອທີລິນທີ່ເຮັດໃຫ້ການເຊື່ອມຕໍ່ລະຫວ່າງກ້ານຂອງໝາກເຊີຣີທີ່ສຸກແລ້ວນັ້ນອ່ອນແອລົງ, ການບໍ່ເຊື່ອຟັງ, ຄວາມສົງໄສ, ແລະ ຄວາມຢ້ານກົວ ສາມາດເຮັດໃຫ້ການເຊື່ອມຕໍ່ຂອງເຮົາກັບກ້ານຂອງເຢຊີ, ຫລື ພຣະເຢຊູຄຣິດນັ້ນອ່ອນແອລົງ, ເຮັດໃຫ້ເຮົາຫວັ່ນໄຫວໄດ້ງ່າຍ ແລະ ຖືກແຍກຕົວອອກຈາກພຣະອົງ. ເຖິງແມ່ນວ່າເຮົາຈະຊື່ສັດຫລາຍພຽງໃດກໍຕາມ, ເຮົາຕ້ອງລະວັງບໍ່ໃຫ້ຄວາມສຳພັນລະຫວ່າງເຮົາກັບພຣະເຢຊູຄຣິດນັ້ນອ່ອນແອລົງ.
ໃນຄຳສອນ ແລະ ພັນທະສັນຍາ, ແມ່ນແຕ່ຜູ້ທີ່ຊື່ສັດກໍຍັງໄດ້ຮັບການເຕືອນວ່າ: “ແຕ່ກໍເປັນໄປໄດ້ທີ່ມະນຸດຈະຕົກໄປຈາກພຣະຄຸນ ແລະ ໜີໄປຈາກພຣະເຈົ້າທີ່ຊົງພຣະຊົນຢູ່.” ພຣະຜູ້ເປັນເຈົ້າຍັງກ່າວຕໍ່ໄປວ່າ, “ແທ້ຈິງແລ້ວ, … ແມ່ນແຕ່ຄົນທີ່ໄດ້ຮັບການຊຳລະໃຫ້ບໍລິສຸດແລ້ວກໍໃຫ້ລະວັງຄືກັນ.” ເພື່ອຫລີກເວັ້ນຈາກການຕົກ, ພຣະຜູ້ເປັນເຈົ້າແນະນຳວ່າ, “ສະນັ້ນ ຂໍໃຫ້ສາດສະໜາຈັກຈົ່ງລະວັງ ແລະ ອະທິຖານສະເໝີ, ຖ້າບໍ່ດັ່ງນັ້ນເຂົາຈະຕົກໄປສູ່ການລໍ້ລວງ.”
ເຮົາອາດປຽບທຽບກັບສະພາບຂອງການຖືກສັ່ນຄອນໄດ້ງ່າຍເໝືອນດັ່ງທີ່ພຣະຄຳພີໄດ້ອະທິບາຍວ່າກຳລັງສຸກເພື່ອຄວາມພິນາດໄປພ້ອມກັບຜົນທີ່ກຳລັງຕາມມາຂອງການກະທຳ. ວະລີນີ້ຍັງສາມາດໃຊ້ໄດ້ໃນຄວາມໝາຍທີ່ກວ້າງກວ່ານັ້ນ ເພື່ອບົ່ງບອກເຖິງສະພາບທີ່ເສື່ອມໂຊມ, ເນົ່າເປື່ອຍ, ຫລື ລົດຖອຍລົງທີ່ເຮັດໃຫ້ບາງສິ່ງບາງຢ່າງມີແນວໂນ້ມທີ່ຈະພັງທະລາຍ ຫລື ເປ່ເພໄດ້.
ການສຸກງອມນີ້ໝາຍເຖິງຫຍັງ? ມັນໝາຍຄວາມວ່າ ເຮົາແຕ່ຄົນສາມາດໄປເຖິງຈຸດທີ່ເຮົາບໍ່ສາມາດປ່ຽນແປງໄດ້ເລີຍບໍ? ບໍ່ແມ່ນ, ຂ້າພະເຈົ້າຄິດວ່າມັນໝາຍຄວາມວ່າ ເຮົາແຕ່ລະຄົນສາມາດໄປເຖິງຈຸດໜຶ່ງຂອງເວລາທີ່ເຮົາບໍ່ຕ້ອງການທີ່ຈະປ່ຽນແປງ. ວິທີແກ້ການສຸກເພື່ອຄວາມພິນາດນັ້ນກໍຄືການເຮັດສິ່ງຕ່າງໆເຫລົ່ານັ້ນທີ່ຈະເສີມສ້າງຄວາມເຂັ້ມແຂງໃຫ້ກັບຄວາມສຳພັນຂອງເຮົາກັບພຣະເຢຊູຄຣິດ. ດັ່ງທີ່ໄດ້ກ່າວໄປແລ້ວ, ການກັບໃຈນຳພາເອໂນດໄປເຖິງຈຸດທີ່ສັດທາບໍ່ສາມາດຖືກສັ່ນຄອນໄດ້. ມີຄວາມເຂັ້ມແຂງໃນການກັບໃຈ—ການກັບໃຈຢ່າງເປັນປະຈຳ, ວ່ອງໄວ, ແລະ ເລື້ອຍໆ. ດັ່ງທີ່ປະທານແນວສັນໄດ້ສິດສອນເຮົາວ່າ, “ບໍ່ມີສິ່ງໃດທີ່ເປັນອິດສະລະ, ຍົກລະດັບຈິດໃຈ, ຫລື ສຳຄັນສຳລັບຄວາມກ້າວໜ້າຂອງເຮົາຫລາຍໄປກວ່າການເອົາໃຈໃສ່ທຸກວັນ ຕໍ່ການກັບໃຈເປັນປະຈຳຂອງເຮົາ.”
ນອກເໜືອຈາກການກັບໃຈແລ້ວ, ສາດສະດາຢາໂຄບໄດ້ສິດສອນວ່າ ການຮູ້ເຖິງພຣະຫັດຂອງພຣະເຈົ້າໃນຊີວິດຂອງເຮົາ, ການສະແຫວງຫາ ແລະ ການຮັບການເປີດເຜີຍ, ແລະ ການຟັງພຣະເຈົ້າເມື່ອພຣະອົງກ່າວ ທັງໝົດນີ້ຈະຊ່ວຍເຮົາບໍ່ໃຫ້ຫວັ່ນໄຫວ. ຢາໂຄບຍັງໄດ້ສິດສອນອີກວ່າ, “ດັ່ງນັ້ນ, ພວກເຮົາຄົ້ນຫາການຂຽນຂອງສາດສະດາ, ແລະ ພວກເຮົາໄດ້ຮັບການເປີດເຜີຍຫລາຍເລື່ອງ ແລະ ວິນຍານແຫ່ງການທຳນາຍ; ແລະ ມີພະຍານທັງໝົດນີ້ ພວກເຮົາຈຶ່ງໄດ້ຮັບຄວາມຫວັງ, ແລະ ມີສັດທາຢ່າງບໍ່ສະທ້ານຫວັ່ນໄຫວ.” ການຟັງ ແລະ ການເຮັດຕາມຖ້ອຍຄຳ ແລະ ການເຊື້ອເຊີນຂອງສາດສະດາ ແລະ ອັກຄະສາວົກ ສາມາດເຕີມເຕັມເຮົາດ້ວຍຄວາມຫວັງ, ຄວາມໝັ້ນໃຈ, ແລະ ຄວາມເຂັ້ມແຂງໄດ້, ເປັນຜົນເຮັດໃຫ້ສັດທາຂອງເຮົາບໍ່ສະທ້ານຫວັ່ນໄຫວ.
ຂ້າພະເຈົ້າໄດ້ຮຽນຮູ້ວ່າຄວາມປາດຖະໜາທີ່ຈະຄືນດີກັບພຣະເຈົ້ານັ້ນ ຈະຕ້ອງມາພ້ອມກັບຄວາມປາດຖະໜາທີ່ຈະກັບໃຈ. ການກັບໃຈ ແລະ ການປະສົບກັບພອນແຫ່ງການຊົດໃຊ້ຂອງພຣະເຢຊູຄຣິດ ນຳໄປສູ່ສັດທາທີ່ບໍ່ສະທ້ານຫວັ່ນໄຫວ. ສັດທາທີ່ບໍ່ສະທ້ານຫວັ່ນໄຫວຈະນຳໄປສູ່ຄວາມປາດຖະໜາທີ່ຈະຄືນດີກັບພຣະເຈົ້າຢູ່ສະເໝີ. ນີ້ຄືແບບແຜນເປັນວົງມົນ, ຫລື ແບບວົນຊ້ຳໆ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍເຊື້ອເຊີນທ່ານໃຫ້ຄືນດີກັບພຣະເຈົ້າຜ່ານທາງການຊົດໃຊ້ຂອງພຣະເຢຊູຄຣິດ. ຂ້າພະເຈົ້າເປັນພະຍານວ່າ ການເຮັດ ແລະ ການຮັກສາພັນທະສັນຍາຈະເຮັດໃຫ້ຄວາມສຳພັນຂອງເຮົາກັບພຣະຜູ້ຊ່ວຍໃຫ້ລອດນັ້ນເຂັ້ມແຂງຂຶ້ນ, ເພື່ອເປັນການຫລີກເວັ້ນຈາກການສຸກເພື່ອຄວາມພິນາດ. ຂ້າພະເຈົ້າເປັນພະຍານວ່າການຄືນດີກັບພຣະເຈົ້າ, ຜ່ານທາງການຊົດໃຊ້ຂອງພຣະເຢຊູຄຣິດນີ້, ຈະນຳພາໄປສູ່ສັດທາທີ່ບໍ່ສະທ້ານຫວັ່ນໄຫວ.
ຂ້າພະເຈົ້າຮູ້ວ່າ ພຣະບິດາເທິງສະຫວັນຮັກທ່ານ ແລະ ຂ້າພະເຈົ້າ, ແລະ ພຣະອົງໄດ້ສົ່ງພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ມາເພື່ອເປັນພຣະຜູ້ຊ່ວຍໃຫ້ລອດ, ພຣະຜູ້ໄຖ່ ແລະ ພຣະຜູ້ຊ່ວຍໃຫ້ຄືນດີທີ່ຍິ່ງໃຫຍ່ຂອງເຮົາ. ຂ້າພະເຈົ້າເປັນພະຍານເຖິງພຣະເຢຊູຄຣິດ ແລະ ເຮັດເຊັ່ນນັ້ນ ໃນພຣະນາມຂອງພຣະເຢຊູຄຣິດ, ອາແມນ.