ການປະກາດກ່ຽວກັບຄອບຄົວ—ພຣະຄຳຈາກພຣະເຈົ້າ
ການປະກາດນີ້ມີຕົ້ນກຳເນີດຈາກສະຫວັນ, ສະນັ້ນ ເຮົາຕ້ອງປະຕິບັດຕໍ່ການປະກາດນີ້ດ້ວຍຄວາມຄາລະວະຢ່າງທີ່ຄວນໃຫ້ແກ່ຄຳທີ່ມາຈາກພຣະເຈົ້າ.
ກອງປະຊຸມໃຫຍ່ສາມັນຂອງເດືອນຕຸລາ ປີ 2025 ນີ້ ເປັນວາລະຄົບຮອບ 30 ປີ ຂອງການປະກາດ “ຄອບຄົວ: ການປະກາດຕໍ່ໂລກ.” ໂດຍການອອກແບບອັນສູງສົ່ງ, ການປະກາດນີ້, ພ້ອມດ້ວຍຄຳເປີດເຜີຍ, ໄດ້ຖືກສ້າງຂຶ້ນເພື່ອ “ຈະໄດ້ເຮັດໃຫ້ຄອບຄົວຂອງເຮົາເຂັ້ມແຂງຂຶ້ນ ເປັນໜ່ວຍສຳຄັນຍິ່ງຂອງສັງຄົມ.”
ທຸກຄົນລ້ວນແຕ່ເປັນສ່ວນໜຶ່ງຂອງຄອບຄົວ, ບໍ່ວ່າຈະເປັນແມ່, ພໍ່, ລູກສາວ, ລູກຊາຍ, ຫລານ, ປູ່ຍ່າຕາຍາຍ, ປ້ານ້າອາ, ລຸງນ້າອາວ, ອ້າຍນ້ອງ, ເອື້ອຍນ້ອງ, ຫລື ພີ່ນ້ອງ. ທີ່ສຳຄັນທີ່ສຸດ, ເຮົາແຕ່ລະຄົນ, ດັ່ງທີ່ການປະກາດກ່າວ, “ເປັນບຸດ ຫລື ທິດາທີ່ຮັກຫອມຂອງພຣະບິດາມານດາເທິງສະຫວັນ … [ດ້ວຍ] ທຳມະຊາດແຫ່ງສະຫວັນ ແລະ ມີຈຸດໝາຍປາຍທາງນິລັນດອນ.”
ເມື່ອຂ້າພະເຈົ້າໄດ້ຖືກເອີ້ນສູ່ການເປັນອັກຄະສາວົກສັກສິດໃນປີ 2015, ຂ້າພະເຈົ້າໄດ້ຖືກແນະນຳວ່າ, “ບັດນີ້ການປະກາດນີ້ເປັນຂອງທ່ານແລ້ວ. ຊື່ຂອງທ່ານ [ຊີ້ໄປທີ່ຄຳວ່າ ‘ສະພາອັກຄະສາວົກສິບສອງ’ ໃນຫົວຂໍ້] ແມ່ນຢູ່ທີ່ນີ້. ຈົ່ງສຳຜັດ ແລະ ສິດສອນມັນຄືກັບວ່າທ່ານເປັນເຈົ້າຂອງ.”
ຂ້າພະເຈົ້າຮັກການປະກາດກ່ຽວກັບຄອບຄົວ. ຂ້າພະເຈົ້າໄດ້ເປັນພະຍານທົ່ວໂລກ ຈາກອາຟຣິກາ ເຖິງ ອົດສະຕາລີ ແລະ ທຸກແຫ່ງລະຫວ່າງນັ້ນ ເຖິງບົດບາດຂອງຄອບຄົວໃນແຜນນິລັນດອນຂອງພຣະເຈົ້າ. ການປະກາດນີ້ມີຕົ້ນກຳເນີດຈາກສະຫວັນ, ສະນັ້ນ ເຮົາຕ້ອງປະຕິບັດຕໍ່ການປະກາດນີ້ດ້ວຍຄວາມຄາລະວະຢ່າງທີ່ຄວນໃຫ້ແກ່ຄຳທີ່ມາຈາກພຣະເຈົ້າ.
ອ້າຍເອື້ອຍນ້ອງທັງຫລາຍ, ຈື່ໄດ້ບໍ, ດັ່ງທີ່ຂ້າພະເຈົ້າໄດ້ກ່າວໃນກອງປະຊຸມໃຫຍ່ສາມັນທີ່ຜ່ານມາຈາກແທ່ນປາໄສນີ້ວ່າ, “ຖ້ອຍຄຳແມ່ນສຳຄັນ.”
ຂ້າພະເຈົ້າຂໍເລົ່າຄວາມເປັນມາບາງຢ່າງກ່ຽວກັບການປະກາດນີ້ ໃນຖານະຂ່າວສານຫລັກຂອງສິ່ງທີ່ເຮົາເຊື່ອ.
ໃນປີ 1994, ໜຶ່ງປີກ່ອນການປະກາດໄດ້ຖືກສະເໜີ, ກຸ່ມອັກຄະສາວົກສິບສອງໄດ້ປຶກສາຫາລືກັນວ່າ ສັງຄົມ ແລະ ລັດຖະບານກຳລັງຖອຍຫ່າງຈາກກົດຂອງພຣະເຈົ້າສຳລັບຄອບຄົວ, ການແຕ່ງງານ, ແລະ ເພດ. “ແຕ່ສິ່ງນັ້ນບໍ່ໄດ້ເປັນສິ່ງສຸດທ້າຍທີ່ພວກເຮົາເຫັນ,” ປະທານຣະໂຊ ເອັມ ແນວສັນ ໄດ້ອະທິບາຍ. “ພວກເຮົາສາມາດເຫັນຄວາມພະຍາຍາມຂອງຊຸມຊົນຕ່າງໆ ທີ່ຈະກຳຈັດມາດຕະຖານ ແລະ ຂໍ້ກຳນົດເລື່ອງກິດຈະກຳທາງເພດ. ພວກເຮົາເຫັນຄວາມສັບສົນຂອງເພດ. ພວກເຮົາເຫັນວ່າມັນກຳລັງຈະເກີດຂຶ້ນ.”
ອັກຄະສາວົກສິບສອງໄດ້ຕັດສິນໃຈຕຽມເອກະສານ, ຊຶ່ງເປັນການປະກາດຢ່າງເປັນທາງການ, ສະຫລຸບຈຸດຢືນຂອງສາດສະໜາຈັກກ່ຽວກັບຄອບຄົວ. ລະຫວ່າງປີນັ້ນ, ອັກຄະສາວົກ ແລະ ຜູ້ພະຍາກອນເຫລົ່ານີ້ທີ່ຖືກເອີ້ນຈາກພຣະເຈົ້າ, ໄດ້ຕຽມການປະກາດກ່ຽວກັບຄອບຄົວ. ປະທານດາລິນ ເອັຈ ໂອກສ໌ ຈື່ໄດ້ວ່າ ພວກເພິ່ນໄດ້ຫັນໄປຫາພຣະຜູ້ເປັນເຈົ້າດ້ວຍການອະທິຖານສຳລັບ “ສິ່ງທີ່ [ພວກເພິ່ນ] ຄວນກ່າວ ແລະ ວິທີທີ່ [ພວກເພິ່ນ] ຄວນກ່າວ.” ພວກເພິ່ນໄດ້ນຳສະເໜີມັນຕໍ່ຝ່າຍປະທານສູງສຸດ: ປະທານຮາວເວີດ ດັບເບິນຢູ ຮັນເທີ, ກໍດອນ ບີ ຮິງລີ, ແລະ ທອມມັສ ແອັສ ມອນສັນ ເພື່ອການພິຈາລະນາຂອງພວກເພິ່ນ.
ບໍ່ເທົ່າໃດເດືອນຈາກນັ້ນ, ໃນເດືອນມີນາ ປີ 1995, ປະທານຮັນເທີໄດ້ເສຍຊີວິດ, ແລະ ປະທານຮິງລີກາຍເປັນປະທານຂອງສາດສະໜາຈັກຄົນທີ 15. ແລ້ວ ການປະກາດໄດ້ຢູ່ໃນມືຂອງເພິ່ນ. ເມື່ອໃດຈຶ່ງຈະເປັນເວລາທີ່ເໝາະສົມທີ່ຈະປະກາດຕໍ່ສາດສະໜາຈັກ? ເວລານັ້ນໄດ້ມາເຖິງຫົກເດືອນຕໍ່ມາ.
ບໍ່ເທົ່າໃດມື້ກ່ອນກອງປະຊຸມສະມາຄົມສະຕີສົງເຄາະສາມັນ ໃນວັນທີ 23 ເດືອນກັນຍາ ຊຶ່ງໄດ້ຈັດຂຶ້ນກ່ອນກອງປະຊຸມໃຫຍ່ສາມັນ, ປະທານຮິງລີ ແລະ ທີ່ປຶກສາຂອງເພິ່ນໄດ້ປຶກສາກັບຝ່າຍປະທານສະມາຄົມສະຕີສົງເຄາະສາມັນ. ເອື້ອຍນ້ອງດັ່ງກ່າວ, ເຊັ່ນດຽວກັບອັກຄະສາວົກ, ໄດ້ມີຄວາມກັງວົນກ່ຽວກັບແມ່ຍິງ ແລະ ຄອບຄົວ. ພວກເພິ່ນໄດ້ສຸມໃສ່ຄອບຄົວໃນກອງປະຊຸມທີ່ຈະມາເຖິງ.
ປະທານຮິງລີໄດ້ຖືກກຳນົດເວລາໃຫ້ກ່າວກັບສະຕີໃນທີ່ປະຊຸມ. ເພິ່ນໄດ້ໄຕ່ຕອງທິດທາງຂອງການກ່າວຄຳປາໄສຂອງເພິ່ນ. ຂະນະທີ່ການສົນທະນາດຳເນີນຕໍ່ໄປ, ເພິ່ນໄດ້ເອີ່ຍຊື່ “ຄອບຄົວ: ການປະກາດຕໍ່ໂລກ” ທີ່ຫາກໍສ້າງຂຶ້ນໃໝ່ ແຕ່ຍັງບໍ່ໄດ້ເປີດເຜີຍຕໍ່ສາທາລະນະເທື່ອ. ກອງປະຊຸມສະຕີຄັ້ງນີ້ເປັນໂອກາດທີ່ເໝາະສົມຫລືບໍ່ ທີ່ຈະປະກາດເລື່ອງຄອບຄົວຢ່າງເດັດຂາດ?
ຕໍ່ມາ ປະທານສະມາຄົມສະຕີສົງເຄາະສາມັນ ອີເລນ ແຈ໊ກ ໄດ້ອະທິບາຍວ່າ: “ພວກເຮົາບໍ່ຮູ້ວ່າການປະກາດກ່ຽວກັບຄອບຄົວແມ່ນຫຍັງໃນເວລານັ້ນ. … [ພວກເຮົາ] ສາມາດບອກໄດ້ຈາກຊື່, ແຕ່ພວກເຮົາຮູ້ສຶກວ່າ ແມ່ນຫຍັງກໍຕາມທີ່ຢູ່ໃນນັ້ນກ່ຽວກັບຄອບຄົວ … ຈະເປັນເລື່ອງທາງບວກ. … ຂ້າພະເຈົ້າຮູ້ສຶກໃນແງ່ດີທີ່ເຮົາມີສະມາຊິກໃນກຸ່ມອັກຄະສາວົກສິບສອງທີ່ໄດ້ຮັບການເປີດເຜີຍ.”
ກອງປະຊຸມສະມາຄົມສະຕີສົງເຄາະໃນວັນເສົານັ້ນແມ່ນເປັນປະຫວັດສາດ. ປະທານຮິງລີໄດ້ແນະນຳການປະກາດກ່ຽວກັບຄອບຄົວດ້ວຍຂໍ້ຄວາມທີ່ສຳຄັນເຫລົ່ານີ້: “ດ້ວຍເຫດຜົນຜິດໆທີ່ຖືວ່າເປັນຄວາມຈິງ, ດ້ວຍຄວາມຫລອກລວງຢ່າງຫລວງຫລາຍກ່ຽວກັບມາດຕະຖານ ແລະ ຄຸນຄ່າ, ດ້ວຍແຮງດຶງດູດ ແລະ ການລໍ້ລວງຢ່າງຫລວງຫລາຍທີ່ຈະຮັບເອົາຄວາມມົວໝອງຂອງໂລກທີ່ຄ່ອຍໆເສື່ອມ, ພວກເຮົາຮູ້ສຶກຢາກເຕືອນ ແລະ ເຕືອນລ່ວງໜ້າ … ກ່ຽວກັບມາດຕະຖານ, ຄຳສອນ, ແລະ ການປະຕິບັດ ທີ່ກ່ຽວຂ້ອງກັບຄອບຄົວ ຊຶ່ງສາດສະດາ, ຜູ້ພະຍາກອນ, ແລະ ຜູ້ເປີດເຜີຍຂອງສາດສະໜາຈັກນີ້ ໄດ້ກ່າວຊ້ຳແລ້ວຊ້ຳອີກຕະຫລອດປະຫວັດສາດຂອງສາດສະໜາຈັກ.”
ແລ້ວເພິ່ນໄດ້ອ່ານການປະກາດທັງໝົດ. ດັ່ງທີ່ພຣະຜູ້ເປັນເຈົ້າໄດ້ກ່າວວ່າ, “ບໍ່ວ່າຈະເປັນໂດຍສຽງຂອງເຮົາເອງ ຫລື ໂດຍສຽງຂອງຜູ້ຮັບໃຊ້ຂອງເຮົາ, ມັນກໍເໝືອນກັນ.”
ການປະກາດໄດ້ກ່າວວ່າ, “ຄອບຄົວແມ່ນຖືກແຕ່ງຕັ້ງໂດຍພຣະເຈົ້າ.” ຂ້າພະເຈົ້າມັກຄວາມຊັດເຊນຂອງຂໍ້ຄວາມນັ້ນ. ການປະກາດນີ້ເປັນການຮຽກຮ້ອງໃຫ້ເຮົາດຳລົງຊີວິດໃນຊ່ວງມະຕະ ໂດຍຄຳນຶງເຖິງຄວາມສູງສົ່ງໃນຕົວເຮົາ ແລະ ອະນາຄົດນິລັນດອນທີ່ຢູ່ເບື້ອງໜ້າເຮົາ. ປະທານແນວສັນໄດ້ສິດສອນວ່າ: “ທ່ານເປັນລູກທາງວິນຍານຂອງພຣະເຈົ້າແທ້ໆ. … ທ່ານສາມາດແນ່ໃຈໄດ້ວ່າ: ສັກກະຍະພາບຂອງທ່ານນັ້ນສູງສົ່ງ. ດ້ວຍການສະແຫວງຫາຢ່າງພາກພຽນຂອງທ່ານ, ພຣະເຈົ້າຈະສະແດງໃຫ້ທ່ານເຫັນວ່າທ່ານຈະກາຍເປັນໃຜ.”
ເມື່ອນຳສະເໜີ, ການປະກາດບໍ່ສອດຄ່ອງກັບທັດສະນະຂອງຫລາຍຄົນໃນໂລກ. ບໍ່ແມ່ນຕອນນັ້ນ. ບໍ່ແມ່ນຕອນນີ້. ມີບາງຄົນທີ່ບໍ່ເຫັນດ້ວຍກັບການປະກາດເລື່ອງຄອບຄົວ, ການແຕ່ງງານ, ແລະ ເພດ. ບາງຄົນແນະນຳໃຫ້ສາດສະໜາຈັກຖອນມັນຄືນ, ປັບປຸງ, ຫລື ແມ່ນແຕ່ຍົກເລີກການປະກາດນັ້ນ.
ການປະກາດກ່ຽວກັບຄອບຄົວນີ້, ດັ່ງທີ່ປະທານຮິງລີໄດ້ກ່າວ, ເປັນຄຳສອນ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ. ຫລັກທຳບໍ່ໄດ້ຢູ່ນອກຂັ້ນຕອນ ແຕ່ສອດຄ່ອງກັບວິທີທາງຂອງພຣະຜູ້ເປັນເຈົ້າ ແລະ ເສັ້ນທາງແຫ່ງພັນທະສັນຍາຂອງພຣະອົງ. ຄຳສອນຂອງການປະກາດໄດ້ຖືກເປີດເຜີຍໂດຍອົງພຣະເຢຊູຄຣິດເຈົ້າແກ່ອັກຄະສາວົກຂອງພຣະອົງໃນຕອນນັ້ນ ແລະ ໃນຕອນນີ້. ນີ້ແມ່ນສາດສະໜາຈັກຂອງພຣະອົງ; ພຣະອົງໄດ້ສະຖາປະນາຄວາມຈິງ ຊຶ່ງເຮົາດຳລົງຊີວິດຕາມ.
ບາງຄົນໃນພວກທ່ານອາດສະທ້ອນຄິດເຖິງການປະກາດນັ້ນ ແລະ ເວົ້າວ່າ, “ສິ່ງນີ້ບໍ່ໄດ້ຜົນສຳລັບຂ້ອຍ.” “ເບິ່ງຄືວ່າ ບໍ່ໃສ່ໃຈກັບຄວາມຮູ້ສຶກ.” “ຄອບຄົວຂອງຂ້ອຍບໍ່ເໝືອນແບບນັ້ນເລີຍ.” “ຂ້ອຍບໍ່ເຂົ້າພວກ.”
ສຳລັບຜູ້ທີ່ມີຄວາມກັງວົນ, ຂໍໃຫ້ຮູ້ວ່າ ທ່ານເປັນລູກຂອງພຣະບິດາມານດາແຫ່ງສະຫວັນ, ສ່ວນໜຶ່ງຂອງຄອບຄົວຂອງພຣະບິດາເທິງສະຫວັນຂອງທ່ານ. ບໍ່ມີໃຜຮູ້ຈັກທ່ານດີກວ່າ ຫລື ສົນໃຈທ່ານຫລາຍກວ່າພຣະອົງ. ຈົ່ງຫັນມາຫາພຣະອົງ; ທຸ້ມເທໃຈຂອງທ່ານໃຫ້ກັບພຣະອົງ; ໄວ້ວາງໃຈພຣະອົງ ແລະ ຄຳສັນຍາຂອງພຣະອົງ. ທ່ານມີຄອບຄົວໃນພຣະຜູ້ຊ່ວຍໃຫ້ລອດຂອງທ່ານ, ພຣະເຢຊູຄຣິດ, ຜູ້ຮັກທ່ານ. ພຣະອົງໄດ້ມາສູ່ໂລກນີ້ເພື່ອຊົດໃຊ້ບາບຂອງເຮົາ ແລະ ແບກຮັບພາລະຈາກຄວາມຜິດພາດຂອງເຮົາ ແລະ ມື້ທີ່ບໍ່ດີຂອງເຮົາ. ພຣະອົງເຂົ້າໃຈສິ່ງທີ່ທ່ານກຳລັງປະເຊີນ ແລະ ຮູ້ສຶກ. ຈົ່ງຫັນມາຫາພຣະອົງ; ໄວ້ວາງໃຈວ່າພຣະອົງຈະສົ່ງພຣະວິນຍານບໍລິສຸດມາສະຖິດຢູ່ກັບທ່ານ, ຍົກທ່ານຂຶ້ນ, ແລະ ນຳພາທ່ານ. ຮູ້ສຶກເຖິງຄວາມຮັກຂອງພວກພຣະອົງທີ່ “ແຜ່ຂະຫຍາຍໄປຢ່າງກວ້າງໄກ ໃນໃຈຂອງລູກຫລານມະນຸດ, … ເປັນສິ່ງທີ່ໜ້າເພິ່ງປາດຖະໜາເກີນກວ່າທຸກສິ່ງທັງປວງ … ແລະ ເປັນສິ່ງທີ່ໜ້າຊື່ນຊົມທີ່ສຸດຕໍ່ຈິດວິນຍານ.”
ອັກຄະສາວົກທັງໝົດຂອງພຣະຜູ້ເປັນເຈົ້າຮັກທ່ານຫລາຍ. ພວກເຮົາອະທິຖານເພື່ອທ່ານ ແລະ ສະແຫວງຫາການຊົງນຳຈາກພຣະຜູ້ເປັນເຈົ້າເພື່ອທ່ານ. ຢູ່ກັບພວກເຮົາ. ທ່ານມີຊີວິດຢູ່ໃນຊ່ວງເວລາທີ່ທ້າທາຍ ເມື່ອຜູ້ປໍລະປັກສະແຫວງຫາທີ່ຈະເຮັດໃຫ້ທ່ານເປັນຂອງມັນ. ຢ່າຖືກດຶງອອກໄປ. ແລະ ຖ້າຫາກທ່ານຖືກດຶງອອກໄປ, ຈົ່ງກັບຄືນມາ. ແຂນຂອງພວກເຮົາຍັງເອື້ອມອອກໄປຫາທ່ານ, ເຊັ່ນດຽວກັບຜູ້ອື່ນທີ່ຮັກທ່ານ.
ການປະກາດກ່າວວ່າ, “ພໍ່ແມ່ມີໜ້າທີ່ອັນສັກສິດທີ່ຈະລ້ຽງດູລູກໆຂອງຕົນດ້ວຍຄວາມຮັກ ແລະ ດ້ວຍຄວາມຊອບທຳ.” ພຣະຄຳພີມໍມອນເປັນພະຍານທີສອງເຖິງຄວາມຈິງນີ້. ໃນຂໍ້ທຳອິດຂອງບົດທຳອິດ, ເຮົາອ່ານວ່າ, “ຂ້າພະເຈົ້ານີໄຟທີ່ໄດ້ເກີດຈາກບິດາມານດາຜູ້ປະເສີດ.” ມີຈັກຄົນໃນພວກເຮົາໄດ້ເລີ່ມອ່ານພຣະຄຳພີມໍມອນ—ແລະ ໄດ້ເລີ່ມອ່ານຊ້ຳແລ້ວຊ້ຳອີກ—ແລະ ໃນລະຫວ່າງນັ້ນກໍໄດ້ຈົດຈຳຄຳເຫລົ່ານັ້ນ? ຈົ່ງຈົດຈຳໄວ້ໃນໃຈ.
ຂໍ້ຄວາມທີ່ຂ້າພະເຈົ້າໂປດປານໃນການປະກາດນີ້ແມ່ນ: “ຄອບຄົວຈະມີຄວາມສຸກກໍຕໍ່ເມື່ອເຂົາເຈົ້າດຳເນີນຊີວິດຕາມຄຳສອນຂອງ … ພຣະເຢຊູຄຣິດ.”
ແມ່ນໃຜບໍ່ຕ້ອງການທີ່ຈະມີຄວາມສຸກ?
ແລະ ຄຳສອນຂອງພຣະເຢຊູຄຣິດແມ່ນຫຍັງ? ອີກເທື່ອໜຶ່ງ, ໃນການປະກາດ: “ສັດທາ, ການອະທິຖານ, ການກັບໃຈ, ການໃຫ້ອະໄພ, ການນັບຖື, ຄວາມຮັກ, ຄວາມເມດຕາ, ວຽກງານ, ແລະ ກິດຈະກຳທີ່ໃຫ້ການພັກຜ່ອນຢ່ອນອາລົມທີ່ເປັນປະໂຫຍດຕ່າງໆ.”
ຊີວິດຂອງໃຜແດ່ທີ່ວ່າຈະບໍ່ດີຂຶ້ນ ຖ້າຫາກນຳຫລັກທຳສຳຄັນເຫລົ່ານີ້ໄປນຳໃຊ້? ບໍ່ມີໃຜໃນພວກເຮົາຈະເຮັດໄດ້ຢ່າງສົມບູນແບບ; ແຕ່ເຮົາສາມາດເຮັດຕາມຖ້ອຍຄຳຂອງປະທານຮິງລີ ທີ່ວ່າ: “ຈົ່ງເຮັດໃຫ້ດີທີ່ສຸດເທົ່າທີ່ທ່ານສາມາດເຮັດໄດ້.”
ເຮົາອ່ານໃນການປະກາດວ່າ, “ພໍ່ຈະເປັນຜູ້ນຳພາຄອບຄົວ … ດ້ວຍຄວາມຮັກ ແລະ ດ້ວຍຄວາມຊອບທຳ,” ແລະ “ແມ່ມີໜ້າທີ່ຮັບຜິດຊອບຕົ້ນຕໍທີ່ຈະລ້ຽງດູລູກເຕົ້າຂອງຕົນ.” ນຳພາ ບໍ່ໄດ້ໝາຍເຖິງການຄອບຄອງ, ແລະ ລ້ຽງດູ ບໍ່ໄດ້ໝາຍເຖິງບົດບາດສຳຮອງ. ພຣະເຈົ້າໄດ້ມອບບົດບາດທີ່ແຕກຕ່າງກັນ ແຕ່ເທົ່າທຽມກັນ ແລະ ສຳຄັນຫລາຍແກ່ຊາຍ ແລະ ຍິງ ຊຶ່ງສົ່ງເສີມຊຶ່ງກັນແລະກັນ.
ຂ້າພະເຈົ້າຂໍແບ່ງປັນເລື່ອງລາວສ່ວນຕົວ.
ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ຮຽນຮູ້ທີ່ຈະເປັນຫຸ້ນສ່ວນທີ່ເທົ່າທຽມກັນ ຫລັງຈາກມື້ໜຶ່ງທີ່ຂ້າພະເຈົ້າໄດ້ຕັດສິນໃຈເຮັດບາງສິ່ງທີ່ສຳຄັນໂດຍບໍ່ໄດ້ປຶກສາກັບນາງກ່ອນ. ການກະທຳຂອງຂ້າພະເຈົ້າໄດ້ເຮັດໃຫ້ນາງປະຫລາດໃຈ, ເຮັດໃຫ້ນາງຕັ້ງຕົວບໍ່ທັນ, ແລະ ເຮັດໃຫ້ນາງຕົກຢູ່ໃນສະຖານະການທີ່ຍາກລຳບາກ. ຫລັງຈາກນັ້ນ, ນາງໄດ້ວາງມືໃສ່ເທິງບ່າໄຫລ່ຂອງຂ້າພະເຈົ້າ ແລະ ເວົ້າຢ່າງໜັກແໜ້ນວ່າ, “ອ້າຍຣອນ, ກະລຸນາຢ່າເຮັດແບບນັ້ນກັບນ້ອງອີກ.” ນັບແຕ່ນັ້ນມາ, ພວກເຮົາຕ່າງກໍມີຄວາມຄິດເຫັນທີ່ຕົງກັນ.
ເຮົາພົບເຫັນຢູ່ໃນການປະກາດວ່າ: “ພໍ່ແມ່ຕ້ອງໄດ້ຊ່ວຍກັນແລະກັນ ແລະ ເປັນຫຸ້ນສ່ວນທີ່ເທົ່າທຽມກັນ.”
ເທົ່າທຽມກັນ ແມ່ນຄຳທີ່ສຳຄັນ. ຕະຫລອດຫລາຍປີທີ່ຜ່ານມາ ຂະນະທີ່ຊິດສະເຕີ ແຣັສ໌ແບນ ແລະ ຂ້າພະເຈົ້າໄດ້ເຮັດວຽກນຳກັນໃນສິ່ງທີ່ການປະກາດໄດ້ບັນຍາຍວ່າ “ໜ້າທີ່ຮັບຜິດຊອບທີ່ສັກສິດ” ຂອງເຮົາ, ພວກເຮົາໄດ້ຮ່ວມກັນສ້າງຊີວິດສົມຣົດຂອງພວກເຂົາທີ່ເທົ່າທຽມກັນ. ເມື່ອລູກໆແຕ່ລະຄົນຂອງພວກເຮົາໄດ້ແຕ່ງງານຕອນນີ້, ຊິດສະເຕີ ແຣັສ໌ແບນ ແລະ ຂ້າພະເຈົ້າໄດ້ສືບຕໍ່ແນະນຳເຂົາເຈົ້າ ແລະ ຄູ່ຄອງຂອງເຂົາເຈົ້າເຖິງການເປັນຫຸ້ນສ່ວນທີ່ເທົ່າທຽມກັນ.
ເມື່ອເຮົາດຳລົງຊີວິດທີ່ເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ, ເຮົາຈະເຄົາລົບກັນແລະກັນ ແລະ ສະໜັບສະໜູນກັນແລະກັນ. ແບບແຜນແຫ່ງຄວາມຊອບທຳອັນສູງສົ່ງເຫລົ່ານັ້ນຈະນຳໄປສູ່ຄວາມໝັ້ນຄົງໃນຊີວິດສ່ວນຕົວ, ຄອບຄົວຂອງເຮົາ, ແລະ ສັງຄົມຂອງເຮົາ.
ພຣະບິດາຜູ້ສະຖິດຢູ່ໃນສະຫວັນຂອງເຮົາໄດ້ຈັດໃຫ້ມີການປະກາດກ່ຽວກັບຄອບຄົວ ເພື່ອຊ່ວຍນຳພາເຮົາກັບບ້ານໄປຫາພຣະອົງ, ເພື່ອຊ່ວຍເຮົາໃຫ້ຮຽນຮູ້ ແລະ ເຕັມດ້ວຍຄວາມຮັກ, ຄວາມເຂັ້ມແຂງ, ຈຸດປະສົງ, ແລະ ຄວາມເຂົ້າໃຈນິລັນດອນ. ດ້ວຍຈິດວິນຍານທັງໝົດຂອງຂ້າພະເຈົ້າ, ຂ້າພະເຈົ້າອ້ອນວອນທ່ານໃຫ້ດຳລົງຊີວິດຢ່າງໃກ້ຊິດກັບພຣະອົງ ແລະ ພຣະບຸດທີ່ຮັກຂອງພຣະອົງ. ຂ້າພະເຈົ້າສັນຍາວ່າ ເມື່ອທ່ານເຮັດເຊັ່ນນັ້ນ, ພຣະວິນຍານຈະດົນໃຈ ແລະ ນຳພາທ່ານ ແລະ ຊ່ວຍທ່ານໃຫ້ຮູ້ສຶກໃນໃຈຂອງທ່ານ ເຖິງສັນຕິສຸກທີ່ພວກພຣະອົງສັນຍາໄວ້ ທີ່ວ່າ “ຊຶ່ງເກີນຄວາມເຂົ້າໃຈ.” ໃນພຣະນາມຂອງພຣະເຢຊູຄຣິດ, ອາແມນ.