ແລະ ດຽວນີ້ໄດ້ເຫັນຮຸ່ງແລ້ວ
ຜົນກະທົບຈາກພຣະຄຳພີມໍມອນໃນຊີວິດຂອງຂ້າພະເຈົ້ານັ້ນ ກໍບໍ່ຕ່າງຫຍັງກັບການມະຫັດສະຈັນຂອງການຖົ່ມນ້ຳລາຍລົງດິນໃຫ້ເປັນຂີ້ຕົມ ແລ້ວທາໃສ່ຕາຂອງຊາຍທີ່ຕາບອດນັ້ນ.
ດ້ວຍຄວາມຮັກທີ່ຈິງໃຈ, ພວກເຮົາທຸກຄົນຂໍຮ່ວມສະແດງຄວາມໄວ້ອາໄລກັບປະທານໂອກສ໌ ຕໍ່ການຈາກໄປຂອງປະທານຣະໂຊ ເອັມ ແນວສັນ. ແລະ ດ້ວຍຄວາມຮັກ ແລະ ການໄວ້ທຸກອັນເລິກເຊິ່ງທີ່ເທົ່າທຽມກັນ, ພວກເຮົາທຸກຄົນຮັບຮູ້ໂສກອະນາດຕະກຳໃນລັດມິຊິແກນເມື່ອບໍ່ດົນມານີ້ ແລະ ເກືອບທຸກມື້ທົ່ວໂລກ. ພວກເຮົາຮັບຮູ້ສິ່ງເຫລົ່ານີ້ດ້ວຍຄວາມຮັກ ແລະ ຄວາມໄວ້ວາງໃຈໃນອົງພຣະເຢຊູຄຣິດເຈົ້າ.
ບົດທີເກົ້າຂອງໂຢຮັນບັນທຶກປະສົບການຂອງພຣະເຢຊູ ແລະ ພວກສາວົກຂອງພຣະອົງກຳລັງຍ່າງຜ່ານໄປໃກ້ໆຊາຍຂໍທານຄົນໜຶ່ງ, ທີ່ຕາບອດຕັ້ງແຕ່ເກີດ. ສິ່ງນີ້ເຮັດໃຫ້ພວກສາວົກຖາມພຣະເຢຊູຫລາຍຂໍ້ກ່ຽວກັບສາດສະໜາທີ່ຊັບຊ້ອນ ເຖິງທີ່ມາ ແລະ ການຖ່າຍທອດຂໍຈຳກັດຂອງຊາຍຕາບອດຜູ້ນີ້. ພຣະອາຈານໄດ້ຕອບໂດຍການເຮັດບາງສິ່ງທີ່ລຽບງ່າຍ ແລະ ໜ້າປະຫລາດໃຈຫລາຍ. ພຣະອົງໄດ້ຖົ່ມນ້ຳລາຍລົງດິນ ແລະ ຄົນເຂົ້າກັນໜ້ອຍໜຶ່ງໃຫ້ເປັນຂີ້ຕົມ. ແລ້ວພຣະອົງໄດ້ເອົາຂີ້ຕົມນັ້ນທາໃສ່ຕາຂອງຊາຍຕາບອດ, ແນະນຳລາວໃຫ້ໄປລ້າງທີ່ສະນ້ຳສີໂລອາມ. ຊາຍຕາບອດໄດ້ເຮັດຕາມທັງໝົດ ແລະ “ກັບຄືນມາກໍເຫັນຮຸ່ງ,” ພຣະຄຳພີກ່າວ. ຊ່າງເປັນຫລັກຖານທີ່ສຳຄັນແທ້ໆ, ຊຶ່ງກົງກັນຂ້າມກັບຄວາມປາດຖະໜາ ຫລື ການຜິດຖຽງກັນ ຫລື ແມ່ນແຕ່ຄວາມອາຄາດທີ່ຂັດແຍ້ງກັບຄວາມຈິງ.
ເອົາລະ, ດ້ວຍຄວາມຢ້ານກົວວ່າການມະຫັດສະຈັນນີ້ຂອງພຣະເຢຊູຈະຍິ່ງຊ້ຳເຕີມໄພຄຸກຄາມຕໍ່ສິດອຳນາດຂອງພວກເຂົາ, ສັດຕູຂອງພຣະຜູ້ຊ່ວຍໃຫ້ລອດຈຶ່ງໄດ້ປະເຊີນໜ້າກັບຊາຍທີ່ຫາກໍເຫັນຮຸ່ງ ແລະ ເວົ້າຢ່າງໃຈຮ້າຍວ່າ, “ພວກເຮົາຮູ້ວ່າ [ພຣະເຢຊູ] ເປັນຄົນບາບ.” ຊາຍຄົນນັ້ນໄດ້ຟັງບຶດໜຶ່ງ, ແລ້ວເວົ້າວ່າ, “ເພິ່ນເປັນຄົນບາບຫລືບໍ່ … , ຂ້ານ້ອຍບໍ່ຮູ້: [ແຕ່] ຂ້ານ້ອຍຮູ້ພຽງແຕ່ວ່າ ເມື່ອກ່ອນນັ້ນຂ້ານ້ອຍຕາບອດ ແລະ ດຽວນີ້ [ກໍ] ໄດ້ເຫັນຮຸ່ງແລ້ວ.”
ພຣະເຢຊູໄດ້ໃຫ້ຄວາມໝາຍທຳອິດແກ່ການແລກປ່ຽນນີ້, ໂດຍກ່າວກັບພວກສາວົກຂອງພຣະອົງວ່າ ເຫດການທຸກຢ່າງນີ້ຕ້ອງເກີດຂຶ້ນ “ເພື່ອໃຫ້ພາລະກິດຂອງພຣະເຈົ້າສຳແດງໃນຕົວລາວ.” ຈົ່ງຈື່ຈຳໄວ້ວ່າໃນເລື່ອງເລົ່າເລື່ອງນີ້ ມີການກ່າວເຖິງການກະທຳຂອງພຣະຜູ້ຊ່ວຍໃຫ້ລອດສອງຄັ້ງ ວ່າໄດ້ “ເອົາຂີ້ຕົມ” ທາໃສ່ຕາຂອງຊາຍຄົນນີ້, ຊຶ່ງເປັນການກະທຳທີ່ຕ້ອງເຮັດໃຫ້ສຳເລັດ ໂດຍການຊຳລະລ້າງ. ຄຳອະທິບາຍນີ້ທີ່ວ່າ “ເພື່ອໃຫ້ພາລະກິດຂອງພຣະເຈົ້າ [ກຳລັງ] ສຳແດງໃນຕົວລາວ” ອາດຈະສາມາດຊີ້ໃຫ້ເຫັນເຖິງການເປີດເຜີຍພິທີການ.
ຄວາມຈິງອີກຢ່າງໜຶ່ງທີ່ເຫັນໄດ້ຢ່າງຊັດເຈນໃນເລື່ອງນີ້ກໍຄືເຄື່ອງມືທີ່ພຣະຜູ້ສ້າງແຫ່ງສະຫວັນ ແລະ ແຜ່ນດິນໂລກ ແລະ ທຸກຢ່າງໃນນັ້ນໄດ້ຖືກໃຊ້ເພື່ອປະທານການມະຫັດສະຈັນຄື: ການຖົ່ມນ້ຳລາຍໃສ່ດິນ! ສ່ວນປະສົມທີ່ບໍ່ໜ້າຈະເປັນໄປໄດ້ເຫລົ່ານີ້ປະກາດວ່າ ພຣະເຈົ້າສາມາດອວຍພອນເຮົາໄດ້ ບໍ່ວ່າພຣະອົງຈະເລືອກວິທີໃດກໍຕາມ. ເຊັ່ນດຽວກັບນາອາມານທີ່ຕໍ່ຕ້ານແມ່ນ້ຳຈໍແດນ ຫລື ລູກຫລານຂອງອິດສະຣາເອນທີ່ປະຕິເສດບໍ່ເບິ່ງງູທີ່ຕອກຕິດໄວ້ກັບເສົາ, ເປັນເລື່ອງງ່າຍພຽງໃດທີ່ເຮົາຈະເບິ່ງຂ້າມແຫລ່ງທີ່ມາຂອງການໄຖ່ຂອງເຮົາ ເພາະເຄື່ອງມືທີ່ບົ່ງຊີ້ໄປຫາແຫລ່ງທີ່ມານັ້ນເບິ່ງຄືວ່າລຽບງ່າຍຈົນໜ້າອາຍເກີນໄປ.
ແຕ່ເຮົາຈົ່ງຈື່ຈຳຈາກພຣະຄຳພີມໍມອນໄວ້ວ່າ ບາງສິ່ງບາງຢ່າງທັງແຈ່ມແຈ້ງ ແລະ ມີຄ່າ ກ່ອນການກຳເນີດຂອງພຣະເຢຊູ, ໄດ້ມີຄຳທຳນາຍໄວ້ວ່າ “ເພິ່ນ [ຈະ] ບໍ່ມີຮູບລັກສະນະ ແລະ ຄວາມງາມໃດໆ; ແລະ ເມື່ອພວກເຮົາ [ໄດ້] ເຫັນເພິ່ນວ່າ ບໍ່ມີຄວາມງາມເລີຍ ພວກເຮົາກໍບໍ່ປາດຖະໜາເພິ່ນ.” ເລື້ອຍຊ່ຳໃດທີ່ພຣະເຈົ້າໄດ້ສົ່ງຂ່າວສານອັນຊົງກຽດຂອງພຣະອົງມາຜ່ານທາງປະທານສະມາຄົມສະຕີສົງເຄາະທີ່ມີຄວາມກັງວົນກັບການທີ່ຫາກໍໄດ້ຮັບການເອີ້ນ ຫລື ເດັກທີ່ຂາດການສຶກສາທີ່ມາຈາກໄຮ່ສວນໃນລັດນິວຢອກ ຫລື ຜູ້ສອນສາດສະໜາໃໝ່ ຫລື ທາລົກໃນຮາງຫຍ້າ.
ດັ່ງນັ້ນຈະເຮັດແນວໃດຖ້າຄຳຕອບຕໍ່ຄຳອະທິຖານຂອງເຮົາມາເຖິງເປັນແບບລຽບງ່າຍ ຫລື ໃນທາງສັບສົນ? ເຮົາເຕັມໃຈທີ່ຈະມານະບາກບັ່ນ, ທີ່ຈະພະຍາຍາມດຳລົງຊີວິດໃນພຣະກິດຕິຄຸນຂອງພຣະຄຣິດບໍ ບໍ່ວ່າຈະຕ້ອງແລກດ້ວຍນ້ຳລາຍ ແລະ ຂີ້ຕົມຫລາຍເທົ່າໃດກໍຕາມ? ມັນອາດຈະບໍ່ຊັດເຈນຕໍ່ເຮົາຕະຫລອດໄປວ່າ ແມ່ນຫຍັງກຳລັງເກີດຂຶ້ນ ຫລື ດ້ວຍເຫດໃດ, ແລະ ບາງຄັ້ງ, ເຮົາທຸກຄົນຈະຮູ້ສຶກເໝືອນດັ່ງເອື້ອຍນ້ອງຜູ້ອາວຸໂສທີ່ເວົ້າວ່າ, “ພຣະຜູ້ເປັນເຈົ້າເອີຍ, ແລ້ວພອນທີ່ບໍ່ຖືກເຊື່ອງຊ້ອນເດ?”
ໃຫ້ພິຈາລະນາຫລັກຖານຂອງຄວາມຈິງອີກປະການໜຶ່ງ, ເລື່ອງນີ້ກ່ຽວຂ້ອງກັບຖານະປະໂລຫິດທີ່ສັກສິດ. ໃນບັນທຶກການຈັດຕັ້ງສາດສະໜາຈັກໃນເວລາອັນຮຸ່ງໂລດ, ແຖວທຳອິດຂອງລູກາອ່ານວ່າ, “ເມື່ອ [ພຣະອົງ] ເອີ້ນສາວົກສິບສອງຄົນມາແລ້ວ, ພຣະອົງກໍໃຫ້ລິດເດດ ແລະ ສິດອຳນາດແກ່ພວກເພິ່ນ,” ຂອງປະທານເຫລົ່ານີ້ບໍ່ໄດ້ມອບໃຫ້ໂດຍອາໄສຫລັກຖານອັນໜ້າປະທັບໃຈ ຫລື ຖືກກຳນົດໂດຍປະເພນີ ຫລື ສິດກຳເນີດ. ມັນບໍ່ໄດ້ຖືກມອບໃຫ້ໂດຍໂຮງຮຽນແຫ່ງສະຫວັນ ຫລື ຫ້ອງຮຽນສາດສະໜາ. ສິ່ງເຫລົ່ານີ້ໄດ້ຖືກມອບໃຫ້ພຽງແຕ່ໂດຍການວາງມືໂດຍຜູ້ທີ່ໄດ້ຮັບອະນຸຍາດໃຫ້ວາງມືໃສ່ເຂົາ ໃນສາຍລຳດັບອັນຕໍ່ເນື່ອງ ທີ່ກັບສູ່ແຫລ່ງກຳເນີດຂອງສິດອຳນາດຈາກສະຫວັນ, ນັ້ນຄື ອົງພຣະເຢຊູຄຣິດເຈົ້າ.
ແລະ ໃນສາດສະໜາຈັກທີ່ເຂົ້າໃຈຂອງປະທານແຫ່ງຄວາມເມດຕາ, ຈະເປັນຫລັກຖານທີ່ໜ້າອັດສະຈັນແຫ່ງຄວາມສັດຈິງຂອງສາດສະໜາຈັກອີກຢ່າງໜຶ່ງບໍ່ແມ່ນບໍ ທີ່ຈະເຫັນພອນ ແລະ ພັນທະສັນຍາເຫລົ່ານີ້ໄປຮອດໄປເຖິງຍາດພີ່ນ້ອງທີ່ລ່ວງລັບໄປແລ້ວຂອງເຮົາ, ຄົນໃນຄອບຄົວຂອງເຮົາທີ່ລ່ວງລັບໄປແລ້ວ? ເຂົາເຈົ້າຄວນຖືກລົງໂທດບໍ ເພາະເຂົາເຈົ້າບໍ່ໄດ້ເຂົ້າເຖິງພຣະກິດຕິຄຸນ ຫລື ເພາະວ່າເຂົາເຈົ້າເກີດໃນເວລາ ຫລື ຢູ່ໃນບ່ອນທີ່ພິທີການ ແລະ ພັນທະສັນຍາແຫ່ງສະຫວັນບໍ່ມີໃຫ້ເຂົາເຈົ້າ? ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍມີບ້ານສັກສິດຂອງພຣະຜູ້ເປັນເຈົ້າໄດ້ທີ່ຮັບຄວາມເມດຕາ, ຊຶ່ງໃນນັ້ນວຽກງານແຫ່ງການອຸທິດກຳລັງຖືກກະທຳແທນຕະຫລອດວັນ ແລະ ຄືນໃຫ້ກັບຜູ້ທີ່ລ່ວງລັບໄປແລ້ວ, ພ້ອມທັງໂອກາດນະມັດສະການ ແລະ ພິທີການສຳລັບຄົນເປັນ. ເທົ່າທີ່ຂ້າພະເຈົ້າຮູ້, ຫລັກຖານສະເພາະເຈາະຈົງແຫ່ງຄວາມຈິງຂອງພຣະເຈົ້າ, ຄວາມຮັກຂອງພຣະອົງທີ່ມີຕໍ່ຜູ້ທຸກຄົນທີ່ມີຊີວິດຢູ່ ແລະ ຜູ້ທີ່ລ່ວງລັບໄປແລ້ວນັ້ນ, ບໍ່ມີປະກົດເຫັນໃນບ່ອນອື່ນໃດໃນໂລກ—ຍົກເວັ້ນໃນສາດສະໜາຈັກທີ່ສະແດງໃຫ້ເຫັນເຖິງຄວາມຈິງໃນເລື່ອງນີ້ໂດຍສະເພາະ: ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ການປະເຊີນຄັ້ງທຳອິດຂອງຂ້າພະເຈົ້າກັບຫລັກຖານທີ່ແທ້ຈິງຂອງຄວາມຈິງ ທີ່ໄດ້ມອບການຫລຽວເຫັນ ແລະ ການໃຫ້ຊີວິດ ບໍ່ໄດ້ເກີດຂຶ້ນໂດຍການທາດ້ວຍຂີ້ຕົມ ຫລື ໃນການອັດສະຈັນທີ່ສະນ້ຳສີໂລອາມ. ບໍ່ມີ, ເຄື່ອງມືແຫ່ງຄວາມຈິງທີ່ນຳການປິ່ນປົວຂອງຂ້າພະເຈົ້າມາຈາກພຣະຜູ້ເປັນເຈົ້າໃນໜ້າໜັງສືໃດເລີຍບໍ, ແມ່ນແລ້ວມີ, ໃນພຣະຄຳພີມໍມອນ: ປະຈັກພະຍານອີກຢ່າງໜຶ່ງຂອງພຣະເຢຊູຄຣິດ! ການກ່າວອ້າງກ່ຽວກັບໜັງສືເຫລັ້ມນີ້ໄດ້ຖືກໂຈມຕີ ແລະ ປະຕິເສດໂດຍຜູ້ທີ່ບໍ່ເຊື່ອ, ຄວາມໂກດແຄ້ນມັກຈະມາພ້ອມກັບຄວາມຮຸນແຮງເທົ່າກັບຄຳຮຸນແຮງຂອງຜູ້ທີ່ບອກຊາຍຜູ້ຫາຍດີວ່າ ເຂົາ ບໍ່ໜ້າຈະ ປະສົບກັບສິ່ງທີ່ເຂົາຮູ້ວ່າ ເຂົາ ເຄີຍ ປະສົບ.
ມັນໄດ້ຖືກຖິ້ມໂທດມາທີ່ຂ້າພະເຈົ້າດ້ວຍວ່າ ວິທີການທີ່ໜັງສືເຫລັ້ມນີ້ອອກມາແມ່ນໃຊ້ບໍ່ໄດ້ຜົນ, ບໍ່ໜ້າເຊື່ອ, ໜ້າອັບອາຍ, ຫລື ແມ່ນແຕ່ບໍ່ສັກສິດ. ບັດນີ້, ນັ້ນແມ່ນຄຳເວົ້າໃນພາສາທີ່ປະນາມດູໝິ່ນມາຈາກຜູ້ທີ່ຖືເອົາວ່າຕົວເອງຮູ້ຈັກວິທີການຄວາມເປັນມາຂອງໜັງສືເຫລັ້ມນີ້, ກໍມີພຽງແຕ່ຄຳອະທິບາຍດຽວທີ່ມີໄວ້ໃຫ້ນັ້ນກໍຄືມັນໄດ້ຮັບການແປ “ໂດຍຂອງປະທານ ແລະ ອຳນາດຂອງພຣະເຈົ້າ.” ເທົ່ານັ້ນແຫລະ. ມີແຕ່ເທົ່ານັ້ນ ໃນກໍລະນີໃດກໍຕາມ, ຜົນກະທົບຈາກພຣະຄຳພີມໍມອນໃນຊີວິດຂອງຂ້າພະເຈົ້າ ກໍບໍ່ຕ່າງຫຍັງກັບການມະຫັດສະຈັນຂອງການຖົ່ມນ້ຳລາຍລົງດິນໃຫ້ເປັນຂີ້ຕົມ ແລ້ວທາໃສ່ຕາຂອງຊາຍທີ່ຕາບອດນັ້ນ. ສຳລັບຂ້າພະເຈົ້າແລ້ວ, ມັນໄດ້ເປັນເໝືອນດັ່ງຮາວເຫລັກແຫ່ງຄວາມປອດໄພສຳລັບຈິດວິນຍານຂອງຂ້າພະເຈົ້າ, ເປັນແສງສະຫວ່າງທີ່ສ່ອງທາງໃຫ້ກັບເສັ້ນທາງທີ່ຂ້າພະເຈົ້າຕ້ອງເດີນໄປ ເມື່ອເມກໝອກແຫ່ງຄວາມມືດມາເຖິງ. ແລະ ມັນໄດ້ເປັນເຊັ່ນນັ້ນຢ່າງແນ່ນອນ, ແລະ ຈະເປັນເຊັ່ນນັ້ນຢ່າງແນ່ນອນ.
ແລະ ດ້ວຍການເບິ່ງເຫັນທີ່ພຣະຄຳພີໄດ້ມອບໃຫ້ຂ້າພະເຈົ້າກ່ຽວກັບຄວາມຮັກ ແລະ ພຣະຄຸນແຫ່ງການໄຖ່ຂອງພຣະຜູ້ຊ່ວຍໃຫ້ລອດຂອງຂ້າພະເຈົ້າ, ຂ້າພະເຈົ້າຂໍແບ່ງປັນປະຈັກພະຍານຂອງຂ້າພະເຈົ້າ, ຊຶ່ງໄດ້ຮັບການຢືນຢັນຈາກພໍ່ແມ່ຂອງຊາຍທີ່ຫາກໍໄດ້ຮັບພອນ ໄດ້ກ່າວວ່າ ລູກຊາຍຂອງເຂົາເຈົ້າຄວນໄດ້ຮັບການຮັບຟັງ ເພາະລາວ “ພົ້ນກະສຽນອາຍຸແລ້ວ.” ຂ້າພະເຈົ້າກໍເຊັ່ນກັນ. ລາວອາຍຸຫລາຍພໍທີ່ຈະຮັບການພິຈາລະນາຢ່າງຈິງຈັງແລ້ວ, ພວກເຂົາໄດ້ບອກເປັນໄນ. ຂ້າພະເຈົ້າກໍເຊັ່ນກັນ. ສອງເດືອນໜ້ານີ້ ຂ້າພະເຈົ້າກໍຈະຄົບ 85 ປີແລ້ວ. ຂ້າພະເຈົ້າເຄີຍຢູ່ທີ່ຂອບເຫວແຫ່ງຄວາມຕາຍ ແລະ ໄດ້ກັບມາ. ຂ້າພະເຈົ້າເຄີຍຍ່າງຄຽງຂ້າງກັບກະສັດ ແລະ ສາດສະດາ, ກັບປະທານປະເທດ ແລະ ອັກຄະສາວົກ. ແຕ່ທັງໝົດທັງປວງທີ່ດີທີ່ສຸດນັ້ນ, ຄືໃນຫລາຍຄັ້ງທີ່ຂ້າພະເຈົ້າຮູ້ສຶກເຕັມປ່ຽມໄປດ້ວຍພຣະວິນຍານບໍລິສຸດຂອງພຣະເຈົ້າ. ຂ້າພະເຈົ້າເຊື່ອວ່າ ຄຳພະຍານຂອງຂ້າພະເຈົ້າວ່າຄວນຈະໄດ້ຮັບການພິຈາລະນາຢ່າງນ້ອຍສ່ວນໜຶ່ງໃນທີ່ນີ້.
ບັດນີ້, ອ້າຍເອື້ອຍນ້ອງທັງຫລາຍ, ຂ້າພະເຈົ້າເຊື່ອຢ່າງສຸດຈິດສຸດໃຈວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຄືການຟື້ນຟູຂອງສາດສະໜາຈັກຂອງພຣະຄຳພີໃໝ່—ແລະ ອື່ນໆອີກ ຢ່າງແທ້ຈິງ—ເພາະຂ້າພະເຈົ້າບໍ່ສາມາດປະຕິເສດຫລັກຖານທີ່ບົ່ງບອກເຖິງການຟື້ນຟູນັ້ນ. ນັບຕັ້ງແຕ່ປະສົບການຄັ້ງທຳອິດເຫລົ່ານັ້ນ, ຂ້າພະເຈົ້າຄິດວ່າ ຂ້າພະເຈົ້າມີຫລັກຖານອີກເປັນພັນໆ—ສິບພັນ?—ຫລັກຖານ ອື່ນໆ ທີ່ຂ້າພະເຈົ້າໄດ້ກ່າວໃນມື້ນີ້ເປັນຄວາມຈິງ. ສະນັ້ນ ຂ້າພະເຈົ້າຈຶ່ງຍິນດີທີ່ໄດ້ຮ່ວມເດີນທາງກັບເພື່ອນຂອງຂ້າພະເຈົ້າໄດ້ດ້ວຍກັນໃນຖະໜົນຂອງເຢຣູຊາເລັມ, ເມື່ອຂ້າພະເຈົ້າຮ້ອງເພງດ້ວຍສຽງທີ່ອ່ອນແຮງຂອງຂ້າພະເຈົ້າວ່າ:
ໃນພຣະນາມຂອງພຣະເຢຊູຄຣິດ, ອາແມນ.