ຈະບໍ່ມີໃຜນັ່ງຢູ່ຄົນດຽວ
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ ແມ່ນລວມທັງການເຮັດໃຫ້ມີພື້ນທີ່ສຳລັບທຸກຄົນໃນສາດສະໜາຈັກທີ່ຖືກຟື້ນຟູຂອງພຣະອົງ.
I.
ເປັນເວລາ 50 ປີແລ້ວທີ່, ຂ້າພະເຈົ້າໄດ້ສຶກສາກ່ຽວກັບວັດທະນະທຳ, ລວມທັງວັດທະນະທຳຂອງພຣະກິດຕິຄຸນ. ຂ້າພະເຈົ້າໄດ້ເລີ່ມຕົ້ນຈາກເຂົ້າໜົມຄຸກກີສ່ຽງໂຊກ.
ໃນເຂດຊາຍນາທາວຂອງເມືອງແຊນແຟນຊິສະໂກ, ອາຫານຄ່ຳຂອງຄອບຄົວກອງ ປິດທ້າຍດ້ວຍເຂົ້າໜົມຄຸກກີສ່ຽງໂຊກ ແລະ ຄຳເວົ້າສະຫລາດທີ່ວ່າ “ການເດີນທາງໄກເປັນພັນໄມ ເລີ່ມຕົ້ນດ້ວຍບາດກ້າວດຽວ.”
ຕອນຍັງນ້ອຍ, ຂ້າພະເຈົ້າໄດ້ເຮັດເຂົ້າໜົມຄຸກກີສ່ຽງໂຊກ. ຂ້າພະເຈົ້າໃສ່ຖົງມືຜ້າຝ້າຍສີຂາວ, ແລ້ວພັບ ແລະ ປັບຮູບຮ່າງເຂົ້າໜົມຄຸກກີກ້ອນກົມທີ່ຫາກໍເອົາອອກມາຈາກເຕົາອົບສົດໆຮ້ອນໆ.
ຂ້າພະເຈົ້າປະຫລາດໃຈ, ທີ່ຂ້າພະເຈົ້າໄດ້ຮຽນຮູ້ວ່າເຂົ້າໜົມຄຸກກີສ່ຽງໂຊກນັ້ນບໍ່ໄດ້ແມ່ນສ່ວນໜຶ່ງຂອງວັດທະນະທຳຊາວຈີນແຕ່ດັ້ງເດີມ. ເພື່ອຈຳແນກວັດທະນະທຳເຂົ້າໜົມຄຸກກີສ່ຽງໂຊກທີ່ເປັນຂອງຊາວຈີນ, ອາເມຣິກາ, ແລະ ເອີຣົບ, ຂ້າພະເຈົ້າໄດ້ຊອກຫາເຂົ້າໜົມຄຸກກີສ່ຽງໂຊກທີ່ມາຈາກຫລາຍທະວີບ—ເຊັ່ນດຽວກັນກັບການໃຊ້ສະຖານທີ່ຫລາຍແຫ່ງເພື່ອລະບຸຕຳແໜ່ງທີ່ເກີດໄຟປ່າ. ຮ້ານອາຫານຈີນໃນເມືອງແຊນແຟນຊິສະໂກ, ລອສ໌ ແອນໂຈເລັສ໌, ແລະ ນິວຢອກ ແມ່ນມີເສີບເຂົ້າໜົມຄຸກກີສ່ຽງໂຊກ, ແຕ່ວ່າບໍ່ມີໃນຮ້ານອາຫານທີ່ຢູ່ໃນເມືອງເບຈິງ, ລອນດອນ, ຫລື ຊິດນີ. ມີພຽງແຕ່ຊາວອາເມຣິກາເທົ່ານັ້ນທີ່ສະເຫລີມສະຫລອງວັນເຂົ້າໜົມຄຸກກີສ່ຽງໂຊກແຫ່ງຊາດ. ມີພຽງແຕ່ໂຄສະນາຂອງຈີນເທົ່ານັ້ນທີ່ນຳສະເໜີ “ເຂົ້າໜົມຄຸກກີສ່ຽງໂຊກໃນແບບອາເມຣິກາແທ້.”
ເຂົ້າໜົມຄຸກກີສ່ຽງໂຊກເປັນຕົວຢ່າງທີ່ມ່ວນ ແລະ ລຽບງ່າຍ. ແຕ່ຫລັກການອັນດຽວກັນໃນການປຽບທຽບການປະຕິບັດດ້ານວັດທະນະທຳ ໃນຮູບແບບທີ່ແຕກຕ່າງກັນສາມາດຊ່ວຍເຮົາໃຫ້ຈຳແນກວັດທະນະທຳແຫ່ງພຣະກິດຕິຄຸນໄດ້. ແລະ ບັດນີ້ພຣະຜູ້ເປັນເຈົ້າກຳລັງເປີດໂອກາດໃໝ່ໆໃນການຮຽນຮູ້ວັດທະນະທຳແຫ່ງພຣະກິດຕິຄຸນ ເມື່ອຄຳປຽບທຽບໃນພຣະຄຳພີມໍມອນ ແລະ ຄຳອຸປະມາໃນພຣະຄຳພີໃໝ່ທີ່ຖືກທຳນາຍໄວ້ເກີດເປັນຈິງ.
II.
ທຸກຫົນແຫ່ງຜູ້ຄົນກຳລັງຍົກຍ້າຍ. ອົງການສະຫະປະຊາຊາດລາຍງານວ່າມີຜູ້ອົບພະຍົບລະຫວ່າງປະເທດຈຳນວນ 281 ລ້ານຄົນ. ນີ້ແມ່ນເພີ່ມຂຶ້ນຈຳນວນ 128 ລ້ານຄົນຈາກປີ 1990 ແລະ ຫລາຍກວ່າສາມເທົ່າໂດຍປະມານຈາກປີ 1970. ໃນທົ່ວທຸກຫົນແຫ່ງ, ມີຜູ້ປ່ຽນໃຈເຫລື້ອມໃສໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນຈຳນວນຫລາຍ. ໃນທຸກໆວັນຊະບາໂຕ, ສະມາຊິກ ແລະ ໝູ່ເພື່ອນທີ່ມາຈາກ 195 ປະເທດ ແລະ ດິນແດນເກີດ ໄດ້ເຕົ້າໂຮມກັນຢູ່ໃນ 31,916 ອາຄານຊຸມນຸມຂອງສາດສະໜາຈັກ. ພວກເຮົາເວົ້າ 125 ພາສາ.
ເມື່ອບໍ່ດົນມານີ້, ໃນປະເທດອານບານີ, ມາເກໂດເນຍ ເໜືອ, ໂຄໂຊໂວ, ສະວິດເຊີແລນ, ແລະ ເຢຍລະມັນ, ຂ້າພະເຈົ້າໄດ້ເຫັນສະມາຊິກໃໝ່ທີ່ເຮັດໃຫ້ຄຳປຽບທຽບເລື່ອງຕົ້ນໝາກກອກໃນພຣະຄຳພີມໍມອນເກີດເປັນຈິງ. ໃນ ຢາໂຄບ 5, ເຈົ້າຂອງສວນອະງຸ່ນ ແລະ ຄົນໃຊ້ຂອງເພິ່ນ ເພີ່ມຄວາມເຂັ້ມແຂງໃຫ້ທັງຮາກ ແລະ ກິ່ງງ່າຂອງຕົ້ນໝາກກອກໂດຍການຮວບຮວມ ແລະ ຕໍ່ກິ່ງຈາກສະຖານທີ່ຕ່າງໆເຂົ້າກັນ. ປະຈຸບັນນີ້ ລູກໆຂອງພຣະເຈົ້າເຕົ້າໂຮມກັນເປັນໜຶ່ງດຽວໃນພຣະເຢຊູຄຣິດ; ພຣະຜູ້ເປັນເຈົ້າໄດ້ສະເໜີວິທີການທາງທຳມະຊາດທີ່ໜ້າອັດສະຈັນ ເພື່ອຂະຫຍາຍຄວາມສົມບູນໃນຊີວິດ ແລະ ຄວາມເຂົ້າໃຈກ່ຽວກັບພຣະກິດຕິຄຸນຂອງພຣະອົງທີ່ຖືກຟື້ນຟູ.
ໃນການຕຽມເຮົາໃຫ້ພ້ອມສຳລັບອານາຈັກສະຫວັນ, ພຣະເຢຊູໄດ້ເລົ່າຄຳອຸປະມາເລື່ອງງານກິນລ້ຽງໃຫຍ່ ແລະ ງານລ້ຽງສົມຣົດ. ໃນຄຳອຸປະມາເຫລົ່ານີ້, ແຂກທີ່ຖືກຮັບເຊີນແມ່ນຫາຂໍ້ອ້າງທີ່ຈະບໍ່ມາຮ່ວມ. ນາຍໄດ້ສັ່ງໃຫ້ຄົນຮັບໃຊ້ຂອງເພິ່ນວ່າ “ຈົ່ງຟ້າວອອກໄປຕາມຖະໜົນໃຫຍ່ ແລະ ຮ່ອມນ້ອຍໃນເມືອງ” ແລະ “ຕາມທາງໃຫຍ່ ແລະ ນ້ອຍທີ່ນອກເມືອງ” ເພື່ອພາຄົນຍາກຈົນ, ຄົນພິການ, ຄົນຂາເສັ້ງ ແລະ ຄົນຕາບອດ “ເຂົ້າມາທີ່ນີ້”. ເວົ້າໃນທາງວິນຍານ, ນັ້ນຄືເຮົາແຕ່ລະຄົນ.
ພຣະຄຳພີປະກາດວ່າ:
“ທຸກປະຊາຊາດຈະຖືກຮັບເຊີນ” ໃຫ້ມາຮ່ວມ “ອາຫານຄ່ຳຂອງບ້ານຂອງພຣະຜູ້ເປັນເຈົ້າ.”
“ຈົ່ງຕຽມທາງຂອງພຣະຜູ້ເປັນເຈົ້າ, … ເພື່ອວ່າອານາຈັກຂອງພຣະອົງຈະຂະຫຍາຍອອກໄປເທິງແຜ່ນດິນໂລກ, ເພື່ອວ່າຜູ້ອາໄສຢູ່ໃນນັ້ນຈະໄດ້ຮັບມັນ, ແລະ ຕຽມພ້ອມສຳລັບວັນເວລາທີ່ຈະມາເຖິງ.”
ໃນປະຈຸບັນນີ້ ຜູ້ທີ່ໄດ້ຮັບເຊີນໃຫ້ເຂົ້າຮ່ວມອາຫານຄ່ຳຂອງພຣະຜູ້ເປັນເຈົ້າແມ່ນມາຈາກທຸກວັດທະນະທຳທົ່ວທຸກຫົນແຫ່ງ. ບໍ່ວ່າຈະເປັນຜູ້ເຖົ້າ ຫລື ຜູ້ໜຸ່ມ, ລ້ຳລວຍ ຫລື ຍາກຈົນ, ເປັນຄົນໃນທ້ອງຖິ່ນ ຫລື ມາຈາກທີ່ອື່ນ, ເຮົາເຮັດໃຫ້ການຊຸມນຸມຂອງສາດສະໜາຈັກເປັນເໝືອນດັ່ງຊຸມຊົນຂອງເຮົາ.
ໃນຖານະຜູ້ນຳອັກຄະສາວົກ, ເປໂຕໄດ້ເຫັນທ້ອງຟ້າໄຂອອກເຫັນພາບນິມິດຂອງ “ຜ້າຜືນໃຫຍ່ມີເຊືອກຜູກທັງສີ່ແຈ, … ໃນຜ້າຜືນນັ້ນມີ … ສັດທຸກຊະນິດ.” ໄດ້ສິດສອນເປໂຕວ່າ: “ຂ້າພະເຈົ້າຮູ້ເຫັນຄັກແນ່ແລ້ວວ່າ ພຣະເຈົ້າເຮັດກັບທຸກຄົນໂດຍບໍ່ເລືອກໜ້າ. … ທຸກຄົນບໍ່ວ່າຊາດໃດກໍຕາມ ທີ່ຢຳເກງ [ພຣະຜູ້ເປັນເຈົ້າ], ແລະ ປະຕິບັດໃນສິ່ງທີ່ຖືກຕ້ອງຊອບທຳກໍເປັນທີ່ພໍໃຈພຣະອົງ.”
ໃນຄຳອຸປະມາເລື່ອງໄທຊາມາເຣຍຜູ້ໃຈດີ, ພຣະເຢຊູເຊື້ອເຊີນເຮົາໃຫ້ມາຫາກັນ ແລະ ມາຫາພຣະອົງໃນໂຮງແຮມຂອງພຣະອົງ—ກໍຄືສາດສະໜາຈັກຂອງພຣະອົງ. ພຣະອົງເຊື້ອເຊີນເຮົາໃຫ້ເປັນເພື່ອນບ້ານທີ່ດີ. ໄທຊາມາເຣຍຜູ້ໃຈດີສັນຍາວ່າຈະກັບຄືນມາ ແລະ ຕອບແທນການເບິ່ງແຍງດູແລຂອງຜູ້ທີ່ຢູ່ໃນໂຮງແຮມຂອງພຣະອົງ. ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ ແມ່ນລວມທັງການເຮັດໃຫ້ມີພື້ນທີ່ສຳລັບທຸກຄົນໃນສາດສະໜາຈັກທີ່ຖືກຟື້ນຟູຂອງພຣະອົງ.
ຈິດວິນຍານຂອງ “ການມີພື້ນທີ່ໃນໂຮງແຮມ” ລວມທັງ “ຈະບໍ່ມີໃຜທີ່ນັ່ງຢູ່ຄົນດຽວ.” ເມື່ອທ່ານມາໂບດ, ຖ້າຫາກທ່ານພົບເຫັນຄົນໃດຄົນໜຶ່ງນັ່ງຢູ່ຄົນດຽວ, ຂໍໃຫ້ທ່ານຖາມສະບາຍດີ ແລະ ນັ່ງກັບຄົນນັ້ນໄດ້ບໍ? ນີ້ອາດຈະບໍ່ແມ່ນຄວາມເຄີຍຊິນຂອງທ່ານ. ຄົນຜູ້ນັ້ນອາດຈະເບິ່ງ ຫລື ເວົ້າແຕກຕ່າງຈາກທ່ານ. ແລະ, ແນ່ນອນ, ດັ່ງທີ່ເຂົ້າໜົມຄຸກກີສ່ຽງໂຊກອາດຈະກ່າວໄວ້ວ່າ, “ການເດີນທາງຂອງມິດຕະພາບ ແລະ ຄວາມຮັກທາງພຣະກິດຕິຄຸນເລີ່ມຕົ້ນຈາກການຖາມສະບາຍດີ ແລະ ຈະບໍ່ມີໃຜນັ່ງຢູ່ຄົນດຽວ.”
ຄຳວ່າ “ຈະບໍ່ມີໃຜນັ່ງຢູ່ຄົນດຽວ” ຍັງມີຄວາມໝາຍອີກດ້ວຍວ່າຈະບໍ່ມີໃຜນັ່ງຢູ່ຄົນດຽວທາງອາລົມ ຫລື ທາງວິນຍານ. ຂ້າພະເຈົ້າໄດ້ໄປກັບພໍ່ທີ່ເສຍໃຈຄົນໜຶ່ງເພື່ອໄປຢ້ຽມລູກຊາຍຂອງລາວ. ຫລາຍປີກ່ອນໜ້ານີ້, ລູກຊາຍຄົນນັ້ນຮູ້ສຶກຕື່ນເຕັ້ນຫລາຍທີ່ຈະໄດ້ເປັນມັກຄະນາຍົກ. ເນື່ອງໃນໂອກາດດັ່ງກ່າວຄອບຄົວຂອງລາວຈຶ່ງໄດ້ຊື້ເກີບໃໝ່ຄູ່ທຳອິດໃຫ້ລາວ.
ແຕ່ເມື່ອໄປທີ່ໂບດ, ບັນດາມັກຄະນາຍົກໄດ້ຫົວຂວັນລາວ. ເກີບຂອງລາວນັ້ນໃໝ່, ແຕ່ຕົກຍຸກໄປແລ້ວ. ໂດຍທີ່ຮູ້ສຶກອາຍ ແລະ ເຈັບໃຈ, ມັກຄະນາຍົກໜຸ່ມຄົນນັ້ນໄດ້ເວົ້າວ່າລາວຈະບໍ່ກັບຄືນໄປໂບດອີກເລີຍ. ຂ້າພະເຈົ້າຍັງຮູ້ສຶກເສຍໃຈກັບລາວ ແລະ ຄອບຄົວຂອງລາວ.
ໃນເສັ້ນທາງທີ່ມີຂີ້ຝຸ່ນທີ່ຈະໄປຫາເມືອງເຢຣິໂກ, ເຮົາແຕ່ລະຄົນແມ່ນຖືກຫົວຂວັນ, ເຮັດໃຫ້ອັບອາຍ ແລະ ເຈັບໃຈ, ບາງທີອາດຈະຖືກດູຖູກ ຫລື ຂົ່ມເຫັງ. ແລະ ດ້ວຍຄວາມຈົງໃຈໃນຫລາຍລະດັບ, ເຮົາແຕ່ລະຄົນຕ່າງກໍຍັງເຄີຍລະເລີຍ, ບໍ່ເຫັນ ຫລື ບໍ່ໄດ້ຍິນ, ແລະ ບາງທີອາດຈະເຮັດໃຫ້ຄົນອື່ນເຈັບໃຈໂດຍເຈດຕະນາ. ເປັນທີ່ຊັດເຈນແລ້ວວ່າຍ້ອນເຮົາໄດ້ຖືກເຮັດໃຫ້ເຈັບປວດ ແລະ ເຮັດໃຫ້ຄົນອື່ນເຈັບປວດ ດັ່ງນັ້ນ ພຣະເຢຊູຄຣິດຈຶ່ງນຳເຮົາທຸກຄົນມາສູ່ໂຮງແຮມຂອງພຣະອົງ. ໃນສາດສະໜາຈັກຂອງພຣະອົງ ແລະ ຜ່ານທາງພິທີການ ແລະ ພັນທະສັນຍາຂອງພຣະອົງ, ເຮົາເຂົ້າມາຫາກັນ ແລະ ມາຫາພຣະເຢຊູຄຣິດ. ເຮົາຈະຮັກ ແລະ ໄດ້ຮັບຄວາມຮັກ, ຈະຮັບໃຊ້ ແລະ ໄດ້ຮັບການຮັບໃຊ້, ໃຫ້ອະໄພ ແລະ ໄດ້ຮັບການໃຫ້ອະໄພ. ຈົ່ງຈື່ຈຳໄວ້ວ່າ, “ບໍ່ມີຄວາມໂສກເສົ້າໃດ ທີ່ສະຫວັນບໍ່ສາມາດປິ່ນປົວໄດ້”; ພາລະທາງໂລກເບົາລົງ—ຄວາມຊື່ນຊົມໃນພຣະຜູ້ຊ່ວຍໃຫ້ລອດຂອງເຮົານັ້ນເປັນຈິງ.
ໃນ 1 ນີໄຟ 19, ເຮົາອ່ານວ່າ: “ເຖິງແມ່ນພຣະເຈົ້າຂອງອິດສະຣາເອນອົງນີ້ຍັງຖືກ [ພວກເຂົາ] ຢຽບຍ່ຳໄວ້ໃຕ້ຕີນຂອງເຂົາ; … ເຂົາຖືວ່າພຣະອົງບໍ່ມີຄຸນຄ່າ. … ດັ່ງນັ້ນ ເຂົາຈຶ່ງຂ້ຽນພຣະອົງ, ແລະ ພຣະອົງໄດ້ທົນ; ແລະ ເຂົາຕີພຣະອົງ, ແລະ ພຣະອົງໄດ້ທົນ. ແທ້ຈິງແລ້ວ, ເຂົາໄດ້ຖົ່ມນ້ຳລາຍໃສ່ພຣະອົງ, ແລະ ພຣະອົງໄດ້ທົນ.”
ເພື່ອນຂອງຂ້າພະເຈົ້າ ອາຈານແທຣີ ວານເນີ ເວົ້າວ່າ ການຕັດສິນ, ການຂ້ຽນ, ການຕີ, ແລະ ການຖົ່ມນ້ຳລາຍໃສ່ ບໍ່ແມ່ນເຫດການທີ່ເກີດຂຶ້ນພຽງແຕ່ໃນຊ່ວງຊີວິດມະຕະຂອງພຣະຄຣິດເທົ່ານັ້ນ. ວິທີທີ່ເຮົາປະຕິບັດຕໍ່ກັນ—ໂດຍສະເພາະຜູ້ທີ່ຫິວເຂົ້າ, ຜູ້ທີ່ກະຫາຍ, ຜູ້ທີ່ຖືກປະຖິ້ມໄວ້ໃຫ້ຢູ່ຄົນດຽວ—ນັ້ນຄືວິທີທີ່ເຮົາປະຕິບັດກັບພຣະອົງ.
ໃນສາດສະໜາຈັກທີ່ຖືກຟື້ນຟູຂອງພຣະອົງ, ເຮົາທຸກຄົນຈະເປັນຄົນດີຂຶ້ນໃນຕອນທີ່ບໍ່ມີໃຜທີ່ນັ່ງຢູ່ຄົນດຽວ. ຂໍໃຫ້ເຮົາບໍ່ພຽງແຕ່ປັບຕົວ ຫລື ອົດທົນເທົ່ານັ້ນ. ຂໍໃຫ້ເຮົາຕ້ອນຮັບ, ຍອມຮັບ, ປະຕິບັດສາດສະໜາກິດ, ຮັກ. ຂໍໃຫ້ໝູ່ເພື່ອນ, ເອື້ອຍນ້ອງ, ອ້າຍນ້ອງແຕ່ລະຄົນຈະບໍ່ແມ່ນຄົນຕ່າງຊາດ ຫລື ຄົນແປກໜ້າ ແຕ່ເປັນລູກຄົນໜຶ່ງທີ່ຢູ່ໃນບ້ານ.
ໃນປະຈຸບັນນີ້ ຫລາຍຄົນຮູ້ສຶກໂດດດ່ຽວ ແລະ ດຽວດາຍ. ສື່ສັງຄົມ ແລະ ປັນຍາປະດິດຕ່າງໆ ສາມາດເຮັດໃຫ້ເຮົາປາດຖະໜາຄວາມໃກ້ຊິດ ແລະ ການສຳຜັດຈາກມະນຸດ. ເຮົາຕ້ອງການທີ່ຈະໄດ້ຍິນສຽງຂອງກັນແລະກັນ. ເຮົາຕ້ອງການ ການເປັນພາກສ່ວນ ແລະ ຄວາມເມດຕາທີ່ແທ້ຈິງ.
ມີຫລາຍສາເຫດທີ່ອາດຈະເຮັດໃຫ້ເຮົາຮູ້ສຶກວ່າບໍ່ເໝາະກັບສາດສະໜາຈັກ—ເຊັ່ນ, ເວົ້າຢ່າງປຽບທຽບກໍຄື, ເຮົານັ່ງຢູ່ຄົນດຽວ. ເຮົາອາດຈະເປັນກັງວົນເລື່ອງສຳນຽງການເວົ້າ, ເສື້ອຜ້າ, ສະຖານະການຄອບຄົວ. ບາງທີເຮົາອາດຈະຮູ້ສຶກບໍ່ພຽບພ້ອມ, ມີກິ່ນຄວັນຢາສູບ, ໂຫຍຫາຄວາມສະອາດທາງສິນທຳ, ອົກຫັກຈາກຄົນໃດຄົນໜຶ່ງ ແລະ ຮູ້ສຶກເຈັບ ແລະ ອາຍ, ເປັນກັງວົນກ່ຽວກັບນະໂຍບາຍນີ້ ຫລື ນັ້ນຂອງສາດສະໜາຈັກ. ເຮົາອາດຈະເປັນຄົນໂສດ, ຢ່າຮ້າງ, ເປັນໝ້າຍ. ລູກໆຂອງເຮົາວົນແຊວ; ເຮົາບໍ່ມີລູກ. ເຮົາບໍ່ໄດ້ຮັບໃຊ້ເຜີຍແຜ່ ຫລື ກັບບ້ານກ່ອນກຳນົດ. ແລະ ຫລາຍຢ່າງຕື່ມອີກ.
ໂມໄຊຢາ 18:21 ເຊື້ອເຊີນເຮົາໃຫ້ຜູກໃຈຂອງເຮົາເຂົ້າກັນໃນຄວາມຮັກ. ຂ້າພະເຈົ້າເຊື້ອເຊີນໃຫ້ທ່ານກັງວົນໜ້ອຍລົງ, ຕັດສິນໜ້ອຍລົງ, ຮຽກຮ້ອງຈາກຄົນອື່ນໜ້ອຍລົງ—ແລະ, ເມື່ອຈຳເປັນ, ກໍຢ່າເຂັ້ມງວດກັບຕົວເອງຫລາຍເກີນໄປ. ເຮົາບໍ່ໄດ້ສ້າງຊີໂອນໃນວັນດຽວ. ແຕ່ການທັກທາຍ “ສະບາຍດີ,” ສະແດງທ່າທີອັນອົບອຸ່ນແຕ່ລະຄັ້ງ, ນຳເອົາຊີໂອນເຂົ້າໃກ້ຫລາຍຂຶ້ນ. ຂໍໃຫ້ເຮົາໄວ້ວາງໃຈໃນພຣະຜູ້ເປັນເຈົ້າຫລາຍຂຶ້ນ ແລະ ເລືອກທີ່ຈະເຊື່ອຟັງພຣະບັນຍັດທຸກປະການຂອງພຣະອົງຢ່າງມີຄວາມສຸກ.
III.
ຕາມຫລັກຄຳສອນ, ໃນຄອບຄົວແຫ່ງສັດທາ ແລະ ມິດຕະພາບຂອງໄພ່ພົນ, ຈະບໍ່ມີໃຜນັ່ງຢູ່ຄົນດຽວ ຍ້ອນການເປັນສ່ວນໜຶ່ງຂອງພັນທະສັນຍາໃນພຣະເຢຊູຄຣິດ.
ດັ່ງທີ່ສິດສອນໂດຍສາດສະດາໂຈເຊັບ ສະມິດ: “ເພື່ອໃຫ້ເຮົາໄດ້ເຫັນ, ໄດ້ມີສ່ວນຮ່ວມ ແລະ ຊ່ວຍໃຫ້ລັດສະໝີພາບໃນຍຸກສຸດທ້າຍແຜ່ໄປຂ້າງໜ້າ, ‘ໃນຍຸກສະໄໝຂອງຄວາມສົມບູນແຫ່ງເວລາ … ,’ ເມື່ອໄພ່ພົນຂອງພຣະເຈົ້າຈະຖືກລວມເຂົ້າກັນຈາກທຸກປະຊາຊາດ, ຕະກຸນ, ແລະ ທຸກຜູ້ຄົນ.”
ພຣະເຈົ້າ “ຍ່ອມຈະບໍ່ກະທຳສິ່ງໃດນອກຈາກມັນຈະເປັນຜົນປະໂຫຍດແກ່ໂລກ; … ເພື່ອຈະໄດ້ພາມະນຸດ ທັງປວງ ທັງຊາຍ [ແລະ ຍິງ] ມາຫາພຣະອົງ. …
“… ພຣະອົງຈະເຊື້ອເຊີນເຂົາ ທັງໝົດ ໃຫ້ເຂົ້າມາຫາພຣະອົງ ແລະ ຮັບສ່ວນພຣະກະລຸນາທິຄຸນຂອງພຣະອົງ; … ແລະ ທຸກຄົນ ເທົ່າທຽມກັນໝົດສຳລັບພຣະເຈົ້າ.”
ການປ່ຽນໃຈເຫລື້ອມໃສໃນພຣະຄຣິດຮຽກຮ້ອງໃຫ້ເຮົາປະຖິ້ມມະນຸດທີ່ມີຈິດໃຈທຳມະດາ ແລະ ວັດທະນະທຳທາງໂລກ. ດັ່ງທີ່ປະທານດາລິນ ເອັຈ ໂອກສ໌ ສິດສອນວ່າ, ເຮົາຕ້ອງປະຖິ້ມປະເພນີ ແລະ ວັດທະນະທຳອັນໃດທີ່ຂັດກັບພຣະບັນຍັດຂອງພຣະເຈົ້າ ແລະ ກາຍເປັນໄພ່ພົນຍຸກສຸດທ້າຍ. ເພິ່ນອະທິບາຍວ່າ, “ພຣະກິດຕິຄຸນກໍມີວັດທະນະທຳຄືກັນ, ເປັນຫລັກທຳ ແລະ ການຄາດໝາຍ ແລະ ການປະຕິບັດການທີ່ເປັນທີ່ຮັບຮູ້ກັນໄປທົ່ວຕໍ່ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.” ວັດທະນະທຳຂອງພຣະກິດຕິຄຸນປະກອບດ້ວຍ ພົມມະຈັນ, ການມາໂບດທຸກອາທິດ, ການງົດເວັ້ນຈາກເຫລົ້າ, ຢາສູບ, ຊາ, ແລະ ກາເຟ. ມັນລວມດ້ວຍຄວາມຊື່ສັດ ແລະ ມີຄຸນນະທຳ, ຄວາມເຂົ້າໃຈວ່າເຮົາຈະກ້າວໄປຂ້າງໜ້າ, ບໍ່ແມ່ນການຂຶ້ນ ຫລື ລົງ, ໃນຕຳແໜ່ງຂອງສາດສະໜາຈັກ.
ຂ້າພະເຈົ້າຮຽນຮູ້ຈາກສະມາຊິກ ແລະ ໝູ່ເພື່ອນຜູ້ຊື່ສັດໃນທຸກດິນແດນ ແລະ ວັດທະນະທຳ. ການສຶກສາພຣະຄຳພີໃນຫລາຍພາສາ ແລະ ມຸມມອງທາງວັດທະນະທຳ ເຮັດໃຫ້ຄວາມເຂົ້າໃຈພຣະກິດຕິຄຸນນັ້ນເລິກເຊິ່ງຫລາຍຂຶ້ນ. ການສະແດງຄຸນລັກສະນະທີ່ເປັນເໝືອນພຣະຄຣິດທີ່ແຕກຕ່າງກັນເຮັດໃຫ້ຄວາມຮັກ ແລະ ຄວາມເຂົ້າໃຈກ່ຽວກັບພຣະຜູ້ຊ່ວຍໃຫ້ລອດຂອງຂ້າພະເຈົ້ານັ້ນເລິກເຊິ່ງຫລາຍຂຶ້ນ. ທຸກຄົນຈະໄດ້ຮັບພອນເມື່ອເຮົາກຳນົດເອກະລັກທາງວັດທະນະທຳຂອງເຮົາ, ດັ່ງທີ່ປະທານຣະໂຊ ເອັມ ແນວສັນ ໄດ້ສິດສອນ, ໃນຖານະລູກຂອງພຣະເຈົ້າຄົນໜຶ່ງ, ລູກທີ່ຢູ່ໃນພັນທະສັນຍາ, ແລະ ສານຸສິດຂອງພຣະຄຣິດ.
ສັນຕິສຸກຈາກພຣະເຢຊູຄຣິດແມ່ນມີໄວ້ໃຫ້ເຮົາເປັນການສ່ວນຕົວ. ເມື່ອບໍ່ດົນມານີ້, ມີຊາຍໜຸ່ມຄົນໜຶ່ງໄດ້ຖາມດ້ວຍຄວາມຈິງໃຈວ່າ, “ແອວເດີ ກອງ, ຂ້ານ້ອຍຍັງຈະສາມາດໄປສະຫວັນໄດ້ຢູ່ບໍ?” ລາວສົງໄສວ່າລາວຈະໄດ້ຮັບການໃຫ້ອະໄພຫລືບໍ່. ຂ້າພະເຈົ້າໄດ້ຖາມຊື່ຂອງລາວ, ຕັ້ງໃຈຟັງ, ເຊື້ອເຊີນໃຫ້ລາວລົມກັບອະທິການຂອງລາວ, ໄດ້ກອດລາວໄວ້ແໜ້ນໆ. ລາວໄດ້ຈາກໄປດ້ວຍຄວາມຫວັງ ໃນພຣະເຢຊູຄຣິດ.
ຂ້າພະເຈົ້າຂໍກ່າວກ່ຽວກັບຊາຍໜຸ່ມໃນອີກສະພາບແວດລ້ອມ. ຕໍ່ມາ ຂ້າພະເຈົ້າໄດ້ຮັບຈົດໝາຍທີ່ບໍ່ລົງນາມທີ່ມີເນື້ອໃນວ່າ, “ແອວເດີ ກອງ, ຂ້ານ້ອຍ ແລະ ພັນລະຍາໄດ້ລ້ຽງລູກເກົ້າຄົນ … ແລະ ຮັບໃຊ້ວຽກງານເຜີຍແຜ່ສອງຄັ້ງ.” ແຕ່ວ່າ “ຂ້ານ້ອຍຮູ້ສຶກສະເໝີວ່າຈະບໍ່ໄດ້ຮັບອະນຸຍາດໃຫ້ເຂົ້າໄປໃນອານາຈັກຊັ້ນສູງ … ເພາະວ່າບາບທີ່ຂ້ານ້ອຍເຮັດໃນໄວໜຸ່ມນັ້ນຮ້າຍແຮງຫລາຍ!”
ຈົດໝາຍນັ້ນຍັງຂຽນຕໍ່ໄປອີກວ່າ, “ແອວເດີ ກອງ, ເມື່ອທ່ານໄດ້ກ່າວກ່ຽວກັບຊາຍໜຸ່ມຄົນນັ້ນທີ່ໄດ້ຮັບຄວາມຫວັງແຫ່ງການໃຫ້ອະໄພ, ຂ້ານ້ອຍກໍເຕັມໄປດ້ວຍຄວາມຊື່ນຊົມ, ເລີ່ມທີ່ຈະສັງເກດໄດ້ວ່າບາງທີຂ້ານ້ອຍ [ອາດຈະໄດ້ຮັບການໃຫ້ອະໄພ].” ຈົດໝາຍນັ້ນຈົບລົງດ້ວຍ, “ຕອນນີ້ຂ້ານ້ອຍຮັກຕົວເອງແລ້ວ!”
ການເປັນພາກສ່ວນໂດຍພັນທະສັນຍາຈະເລິກເຊິ່ງຫລາຍຂຶ້ນເມື່ອເຮົາມາຫາກັນແລະກັນ ແລະ ມາຫາພຣະຜູ້ເປັນເຈົ້າ ໃນໂຮງແຮມຂອງພຣະອົງ. ພຣະຜູ້ເປັນເຈົ້າຈະໃຫ້ພອນແກ່ເຮົາທຸກຄົນ ເມື່ອບໍ່ມີໃຜທີ່ນັ່ງຢູ່ຄົນດຽວ. ແລະ ໃຜຈະຮູ້ໄດ້? ບາງທີຄົນທີ່ນັ່ງຕໍ່ຈາກເຮົາອາດຈະກາຍມາເປັນເພື່ອນທີ່ດີທີ່ສຸດຂອງເຮົາ ທີ່ມາຈາກເຂົ້າໜົມຄຸກກີສ່ຽງໂຊກກໍເປັນໄດ້. ຂໍໃຫ້ເຮົາພົບເຫັນ ແລະ ກຽມສະຖານທີ່ໄວ້ສຳລັບພຣະອົງ ແລະ ຊຶ່ງກັນແລະກັນ ໃນງານລ້ຽງຂອງພຣະເມສານ້ອຍ, ຂ້າພະເຈົ້າອະທິຖານດ້ວຍຄວາມຈິງໃຈ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.