ຜູ້ໃດສ້າງຄວາມສະຫງົບສຸກກໍເປັນສຸກ
ການສ້າງຄວາມສະຫງົບສຸກຍັງຄົງເລີ່ມຕົ້ນຈາກຈຸດພື້ນຖານທີ່ສຸດ—ໃນໃຈຂອງເຮົາ. ຈາກນັ້ນໃນບ້ານ ແລະ ຄອບຄົວ.
ຍິນດີຕ້ອນຮັບສູ່ກອງປະຊຸມໃຫຍ່ສາມັນ. ພວກເຮົາຮູ້ບຸນຄຸນທີ່ໄດ້ມາເຕົ້າໂຮມກັນ.
ຂະນະທີ່ເຮົາລໍຄອຍກອງປະຊຸມໃຫຍ່ຄັ້ງນີ້, ເຮົາໄດ້ຮູ້ເຖິງສິ່ງຮ້າຍແຮງທີ່ເກີດຂຶ້ນຫລາຍອາທິດມານີ້. ເຮົາຮູ້ວ່າ ຫົວໃຈຂອງເຮົາກຳລັງເສົ້າໂສກຈາກການສູນເສຍ, ແລະ ບາງຄົນກໍຮູ້ສຶກເຖິງຄວາມບໍ່ແນ່ນອນ ອັນເກີດມາຈາກຄວາມຮຸນແຮງ ຫລື ຄວາມໂສກເສົ້າ ໃນທົ່ວໂລກ. ແມ່ນແຕ່ຜູ້ທີ່ອຸທິດຕົນທີ່ໄດ້ເຕົ້າໂຮມກັນໃນສະຖານທີ່ສັກສິດ—ລວມທັງອາຄານໂບດທີ່ສັກສິດໃນລັດມິຊິກັນ—ໄດ້ເສຍຊີວິດ ຫລື ສູນເສຍຄົນທີ່ເຂົາເຈົ້າຮັກໄປ. ຂ້າພະເຈົ້າກ່າວຈາກໃຈຈິງ, ໂດຍຮູ້ວ່າຫົວໃຈຂອງພວກທ່ານຫລາຍຄົນໜັກໜ່ວງຈາກສິ່ງທີ່ທ່ານ, ຄອບຄົວຂອງທ່ານ, ແລະ ໂລກຂອງເຮົາໄດ້ປະເຊີນມາຕັ້ງແຕ່ກອງປະຊຸມໃຫຍ່ສາມັນເທື່ອແລ້ວນີ້.
ກາເປນາອູມໃນຄາລີເລ
ລອງຈິນຕະນາການວ່າ ທ່ານເປັນໄວລຸ້ນໃນເມືອງກາເປນາອູມ, ໃກ້ທະເລສາບຄາລີເລ, ລະຫວ່າງການປະຕິບັດສາດສະໜາກິດຂອງພຣະເຢຊູຄຣິດ. ຂ່າວສານຂອງອາຈານຜູ້ໜຶ່ງ—ຄູສອນ—ໄດ້ດຶງດູດຜູ້ຄົນຈຳນວນຫລາຍ. ເພື່ອນບ້ານວາງແຜນທີ່ຈະເດີນທາງໄປຍັງພູເຂົາທີ່ຫລຽວເຫັນທະເລ ເພື່ອຟັງພຣະອົງ.
ທ່ານຮ່ວມເດີນທາງໄປກັບຄົນອື່ນໆ ໃນຖະໜົນທີ່ມີຝຸ່ນໃນແຂວງຄາລີເລ. ເມື່ອທ່ານໄປເຖິງ, ຝູງຊົນກໍເຕົ້າໂຮມກັນເພື່ອຟັງພຣະເຢຊູຜູ້ນີ້ ເຮັດໃຫ້ທ່ານແປກໃຈ. ບາງຄົນກະຊິບກັນວ່າ, “ພຣະເມຊີອາ.”
ທ່ານຟັງ. ພຣະຄຳຂອງພຣະອົງປະທັບໃຈທ່ານຫລາຍ. ລະຫວ່າງທາງກັບບ້ານອັນຍາວໄກ, ທ່ານເລືອກທີ່ຈະງຽບ ຫລາຍກວ່າການສົນທະນາ.
ທ່ານໄຕ່ຕອງສິ່ງມະຫັດສະຈັນ—ສິ່ງທີ່ເໜືອກວ່າແມ່ນແຕ່ກົດຂອງໂມເຊ. ພຣະອົງໄດ້ກ່າວເຖິງການຫັນແກ້ມອີກຂ້າງ ແລະ ຮັກສັດຕູຂອງທ່ານ. ພຣະອົງໄດ້ສັນຍາວ່າ, “ຜູ້ໃດສ້າງຄວາມສະຫງົບສຸກກໍເປັນສຸກ: ເພາະວ່າພຣະເຈົ້າຈະຊົງເອີ້ນຜູ້ນັ້ນວ່າເປັນບຸດ.”
ໃນຄວາມເປັນຈິງຂອງທ່ານ, ຂະນະທີ່ທ່ານຮູ້ສຶກເຖິງຄວາມໜັກໜ່ວງຂອງວັນທີ່ຍາກລຳບາກ—ຄວາມບໍ່ແນ່ນອນ ແລະ ຄວາມຢ້ານກົວ—ສັນຕິສຸກກັບຮູ້ສຶກຢູ່ຫ່າງໄກ.
ທ່ານຍ່າງໄວຂຶ້ນ; ທ່ານໄປເຖິງບ້ານຢ່າງເມື່ອຍລ້າ. ຄອບຄົວຂອງທ່ານມາເຕົ້າໂຮມກັນ; ພໍ່ຂອງທ່ານຖາມວ່າ, “ເລົ່າໃຫ້ພວກເຮົາຟັງແດ່ວ່າເຈົ້າໄດ້ຍິນ ແລະ ຮູ້ສຶກແນວໃດ.”
ທ່ານເລົ່າວ່າ ພຣະອົງໄດ້ເຊື້ອເຊີນໃຫ້ທ່ານສ່ອງແຈ້ງຕໍ່ໜ້າຄົນທັງປວງ, ເພື່ອສະແຫວງຫາຄວາມຊອບທຳ ແມ່ນແຕ່ໃນຍາມທີ່ຖືກຂົ່ມເຫັງ. ສຽງຂອງທ່ານສະດຸດ ເມື່ອທ່ານກ່າວຊ້ຳວ່າ, “ຜູ້ໃດສ້າງຄວາມສະຫງົບສຸກກໍເປັນສຸກ: ເພາະວ່າພຣະເຈົ້າຈະຊົງເອີ້ນຜູ້ນັ້ນວ່າເປັນບຸດ.”
ທ່ານຖາມວ່າ, “ຂ້ອຍຈະສາມາດກາຍເປັນຜູ້ສ້າງຄວາມສະຫງົບໄດ້ແທ້ບໍ ໃນເມື່ອໂລກກຳລັງວຸ້ນວາຍ, ຫົວໃຈຂອງຂ້ອຍເຕັມໄປດ້ວຍຄວາມຢ້ານກົວ, ແລະ ສັນຕິສຸກເບິ່ງຄືວ່າຢູ່ຫ່າງໄກ?”
ພໍ່ຂອງທ່ານຫລຽວເບິ່ງແມ່ຂອງທ່ານ ແລະ ຕອບຢ່າງອ່ອນໂຍນວ່າ, “ເປັນໄດ້. ພວກເຮົາເລີ່ມຕົ້ນຈາກຈຸດພື້ນຖານທີ່ສຸດ—ໃນໃຈຂອງພວກເຮົາ. ຈາກນັ້ນໃນບ້ານ ແລະ ຄອບຄົວຂອງພວກເຮົາ. ເມື່ອພວກເຮົາຝຶກຝົນຢູ່ທີ່ນັ້ນ, ການສ້າງຄວາມສະຫງົບສຸກສາມາດແຜ່ຂະຫຍາຍໄປສູ່ທ້ອງຖະໜົນ ແລະ ໝູ່ບ້ານຂອງພວກເຮົາໄດ້.”
ເລື່ອນໄປຂ້າງໜ້າ 2,000 ປີ
ເລື່ອນໄປຂ້າງໜ້າ 2,000 ປີ. ບໍ່ຕ້ອງຈິນຕະນາການ—ນີ້ແມ່ນຄວາມເປັນຈິງຂອງເຮົາ. ເຖິງແມ່ນຄວາມກົດດັນທີ່ຄົນລຸ້ນໃໝ່ຮູ້ສຶກຢູ່ໃນທຸກວັນນີ້ແຕກຕ່າງຈາກຄົນໜຸ່ມໃນຄາລີເລ—ການແບ່ງແຍກ, ການເຮັດໃຫ້ເປັນໄປໃນທາງໂລກ, ການແກ້ແຄ້ນ, ການໂກດແຄ້ນໃນທ້ອງຖະໜົນ, ການຂຸ່ນເຄືອງ, ແລະ ການຖືກໂຈມຕີທາງສື່ສັງຄົມ—ທັງສອງລຸ້ນກໍຕ້ອງປະເຊີນກັບວັດທະນະທຳແຫ່ງຄວາມຂັດແຍ້ງ ແລະ ຕຶງຄຽດ.
ດ້ວຍຄວາມກະຕັນຍູ, ຊາຍໜຸ່ມ ແລະ ຍິງໜຸ່ມຂອງພວກເຮົາກໍຮູ້ສຶກຖືກດຶງດູດໃນຊ່ວງເວລາແຫ່ງການເທດສະໜາທີ່ໂນນພູເຊັ່ນກັນ: ຫ້ອງຮຽນສາດສະໜາ, ສຳລັບຄວາມເຂັ້ມແຂງຂອງຊາວໜຸ່ມ, ແລະ ຈົ່ງຕາມເຮົາມາ. ຢູ່ທີ່ນີ້ພວກເຂົາໄດ້ຮັບຄຳເຊື້ອເຊີນອັນຢັ້ງຢືນດຽວກັນຈາກພຣະຜູ້ເປັນເຈົ້າວ່າ: ຈົ່ງໃຫ້ແສງສະຫວ່າງຂອງພວກເຂົາສ່ອງແຈ້ງຕໍ່ໜ້າຄົນທັງປວງ, ເພື່ອສະແຫວງຫາຄວາມຊອບທຳ ແມ່ນແຕ່ເມື່ອຖືກຂົ່ມເຫັງ, ແລະ ຮັກສັດຕູຂອງພວກເຂົາ.
ພວກເຂົາໄດ້ຮັບຖ້ອຍຄຳໃຫ້ກຳລັງໃຈຈາກສາດສະດາທີ່ມີຊີວິດຢູ່ແຫ່ງການຟື້ນຟູ ທີ່ວ່າ: “ຕ້ອງການຜູ້ສ້າງຄວາມສະຫງົບສຸກ.” ບໍ່ເຫັນດ້ວຍໂດຍບໍ່ຂັດແຍ້ງ. ແທນຄວາມຂັດແຍ້ງ ແລະ ຄວາມທະນົງຕົວດ້ວຍການໃຫ້ອະໄພ ແລະ ຄວາມຮັກ. ສ້າງສະພານແຫ່ງຄວາມຮ່ວມມື ແລະ ຄວາມເຂົ້າໃຈ, ບໍ່ແມ່ນກຳແພງແຫ່ງຄວາມອະຄະຕິ ຫລື ການແບ່ງແຍກ. ແລະ ຄຳສັນຍາອັນດຽວກັນນັ້ນ: “ຜູ້ໃດສ້າງຄວາມສະຫງົບສຸກກໍເປັນສຸກ: ເພາະວ່າພຣະເຈົ້າຈະຊົງເອີ້ນຜູ້ນັ້ນວ່າເປັນບຸດ.”
ຫົວໃຈຂອງຄົນລຸ້ນໃໝ່ໃນທຸກວັນນີ້ເຕັມໄປດ້ວຍປະຈັກພະຍານເຖິງພຣະເຢຊູຄຣິດ ແລະ ຄວາມຫວັງສຳລັບອະນາຄົດ. ແຕ່ພວກເຂົາກໍຖາມເຊັ່ນກັນວ່າ, “ຂ້ອຍຈະສາມາດກາຍເປັນຜູ້ສ້າງຄວາມສະຫງົບໄດ້ແທ້ບໍ ໃນເມື່ອໂລກກຳລັງວຸ້ນວາຍ, ຫົວໃຈຂອງຂ້ອຍເຕັມໄປດ້ວຍຄວາມຢ້ານກົວ, ແລະ ສັນຕິສຸກເບິ່ງຄືວ່າຢູ່ຫ່າງໄກ?”
ຄຳຕອບດັງກ້ອງອີກຄັ້ງວ່າ ເປັນໄດ້! ເຮົານ້ອມຮັບພຣະຄຳຂອງພຣະຜູ້ຊ່ວຍໃຫ້ລອດ ທີ່ວ່າ: “ສັນຕິສຸກທີ່ເຮົາມອບໃຫ້ພວກເຈົ້າ, ສັນຕິສຸກທີ່ເຮົາໃຫ້ນັ້ນ. … ຢ່າວຸ້ນວາຍເປັນທຸກໃຈ, ແລະ ຢ່າສູ່ຢ້ານ.”
ປະຈຸບັນນີ້, ການສ້າງຄວາມສະຫງົບສຸກຍັງຄົງເລີ່ມຕົ້ນຈາກຈຸດພື້ນຖານທີ່ສຸດ—ໃນໃຈຂອງເຮົາ. ຈາກນັ້ນໃນບ້ານ ແລະ ຄອບຄົວ. ເມື່ອເຮົາຝຶກຝົນຢູ່ທີ່ນັ້ນ, ການສ້າງຄວາມສະຫງົບສຸກສາມາດແຜ່ຂະຫຍາຍໄປສູ່ເພື່ອນບ້ານ ແລະ ຊຸມຊົນຂອງເຮົາ.
ລອງພິຈາລະນາເພີ່ມເຕີມສາມສະຖານທີ່ເຫລົ່ານີ້ ທີ່ໄພ່ພົນຍຸກສຸດທ້າຍໃນປະຈຸບັນ ສ້າງຄວາມສະຫງົບສຸກ.
ການສ້າງຄວາມສະຫງົບສຸກໃນໃຈຂອງເຮົາ
ທຳອິດແມ່ນໃນໃຈຂອງເຮົາ. ອົງປະກອບທີ່ຫລຽວເຫັນໄດ້ຂອງການປະຕິບັດສາດສະໜາກິດຂອງພຣະຄຣິດ ສະແດງໃຫ້ເຫັນວ່າ ເດັກນ້ອຍຖືກດຶງດູດເຂົ້າຫາພຣະອົງ. ນັ້ນຄືຂໍ້ຄິດ. ການຫລຽວເຂົ້າໄປໃນໃຈທີ່ບໍລິສຸດ ແລະ ໄຮ້ດຽງສາຂອງເດັກນ້ອຍ ສາມາດສ້າງການດົນໃຈໃຫ້ກັບໃຈຂອງເຮົາໄດ້. ນີ້ຄືຄຳຕອບຂອງເດັກນ້ອຍປະຖົມໄວຫລາຍຄົນ ທີ່ວ່າ “ການເປັນຜູ້ສ້າງຄວາມສະຫງົບສຸກເປັນແນວໃດ?”
ຂ້າພະເຈົ້າຂໍແບ່ງປັນຄຳຕອບຈາກໃຈຈິງຂອງພວກເຂົາ! ທ້າວລຸກເວົ້າວ່າ, “ຊ່ວຍເຫລືອຄົນອື່ນສະເໝີ.” ນາງເກຣດໄດ້ແບ່ງປັນວ່າ ການໃຫ້ອະໄພຄົນອື່ນນັ້ນສຳຄັນພຽງໃດ, ເຖິງແມ່ນຈະຮູ້ສຶກບໍ່ຍຸດຕິທຳກໍຕາມ. ນາງແອນນາເວົ້າວ່າ, “ຂ້ານ້ອຍເຫັນຄົນໜຶ່ງທີ່ບໍ່ມີໃຜຫລິ້ນນຳເລີຍ, ສະນັ້ນ ຂ້ານ້ອຍຈຶ່ງໄປຫລິ້ນນຳລາວ.” ນາງລິນດີໄດ້ເລົ່າວ່າ ການເປັນຜູ້ສ້າງຄວາມສະຫງົບສຸກແມ່ນການຊ່ວຍເຫລືອຄົນອື່ນ. “ຈາກນັ້ນ ເຈົ້າສົ່ງຕໍ່ມັນໄປ. ມັນຈະດຳເນີນໄປເລື້ອຍໆ.” ທ້າວລ່ຽມໄດ້ເວົ້າວ່າ, “ຢ່າໃຈຮ້າຍກັບຄົນອື່ນ, ເຖິງແມ່ນພວກເຂົາຈະໃຈຮ້າຍກັບເຈົ້າກໍຕາມ.” ທ້າວລິນດອນໄດ້ປະກາດວ່າ, “ຖ້າມີໃຜເວົ້າຢອກລໍ້ ຫລື ໃຈຮ້າຍກັບເຈົ້າ, ໃຫ້ເຈົ້າເວົ້າວ່າ, ‘ກະລຸນາຢຸດ.’” ທ້າວເທຣເວີ ໄດ້ສັງເກດວ່າ, “ຖ້າມີໂດນັດກ້ອນດຽວເຫລືອຢູ່ ແລະ ທຸກຄົນຢາກກິນ, ໃຫ້ແບ່ງກັນ.”
ຄຳຕອບຂອງເດັກນ້ອຍເຫລົ່ານີ້ເປັນຫລັກຖານຕໍ່ຂ້າພະເຈົ້າວ່າ ເຮົາທຸກຄົນໄດ້ເກີດມາພ້ອມກັບຄວາມໂນ້ມອຽງອັນສູງສົ່ງຕໍ່ຄວາມເມດຕາ ແລະ ຄວາມເຫັນອົກເຫັນໃຈ. ພຣະກິດຕິຄຸນຂອງພຣະເຢຊູຄຣິດບຳລຸງລ້ຽງ ແລະ ຖັກທໍຄຸນລັກສະນະອັນສູງສົ່ງເຫລົ່ານີ້, ລວມທັງການສ້າງຄວາມສະຫງົບສຸກ, ໄວ້ໃນໃຈຂອງເຮົາ, ເປັນພອນໃຫ້ແກ່ເຮົາທັງໃນຊີວິດນີ້ ແລະ ຊີວິດໜ້າ.
ການສ້າງຄວາມສະຫງົບສຸກຢູ່ທີ່ບ້ານ
ທີສອງ, ການສ້າງຄວາມສະຫງົບສຸກຢູ່ໃນບ້ານຂອງເຮົາ ໂດຍການໃຊ້ແບບແຜນຂອງພຣະຜູ້ເປັນເຈົ້າ ເພື່ອເປັນອິດທິພົນຕໍ່ຄວາມສຳພັນຂອງເຮົານຳກັນແລະກັນ: ການຊັກຊວນ, ຄວາມອົດກັ້ນ, ຄວາມອ່ອນໂຍນ, ຄວາມເມດຕາ, ຄວາມອ່ອນນ້ອມ, ແລະ ຄວາມຮັກອັນບໍ່ແກ້ງເຮັດ.
ນີ້ແມ່ນເລື່ອງລາວທີ່ດົນໃຈ ທີ່ສະແດງໃຫ້ເຫັນວ່າ ຄອບຄົວໜຶ່ງເຮັດໃຫ້ການສ້າງຄວາມສະຫງົບສຸກເປັນເລື່ອງຂອງຄອບຄົວແນວໃດ, ໂດຍນຳຫລັກທຳເຫລົ່ານີ້ໄປປະຕິບັດ.
ລູກໆໃນຄອບຄົວນີ້ກຳລັງດີ້ນລົນໃນຄວາມສຳພັນກັບຜູ້ໃຫຍ່ ທີ່ມັກຈະສະແດງກິລິຍາຫງຸດຫງິດ, ດູຖູກ, ແລະ ຫຍາບຄາຍ. ລູກໆ, ໂດຍທີ່ເຈັບປວດ ແລະ ຫງຸດຫງິດ, ເລີ່ມສົງໄສວ່າຫົນທາງດຽວທີ່ຈະກ້າວໄປຂ້າງໜ້າຄື ການເຮັດຕາມພຶດຕິກຳທີ່ຫຍາຍຄາຍແບບດຽວກັນນີ້ບໍ.
ແລງຄືນໜຶ່ງ ຄອບຄົວໄດ້ເວົ້າລົມກັນຢ່າງເປີດເຜີຍກ່ຽວກັບຄວາມຕຶງຄຽດ ແລະ ຜົນກະທົບທີ່ເກີດຂຶ້ນ. ແລະ ແລ້ວກໍເກີດມີຄວາມຄິດໜຶ່ງ—ບໍ່ແມ່ນພຽງວິທີແກ້ໄຂ ແຕ່ເປັນການທົດລອງ.
ແທນທີ່ຈະຕອບດ້ວຍຄວາມງຽບ ຫລື ການຕອບໂຕ້, ລູກໆຈະເຮັດບາງສິ່ງທີ່ບໍ່ຄາດຄິດ: ພວກເຂົາຈະຕອບດ້ວຍຄວາມເມດຕາ. ບໍ່ແມ່ນພຽງແຕ່ການຢັບຢັ້ງ ແຕ່ເປັນການຖອກເທຄຳເວົ້າທີ່ດີດ້ວຍຄວາມຈິງໃຈ ແລະ ການກະທຳທີ່ຮູ້ຈັກຄິດ, ບໍ່ວ່າພວກເຂົາຈະໄດ້ຮັບການປະຕິບັດຕໍ່ແນວໃດກໍຕາມ. ທຸກຄົນໄດ້ຕົກລົງທີ່ຈະລອງເຮັດຕາມຊົ່ວໄລຍະໜຶ່ງທີ່ກຳນົດໄວ້, ຫລັງຈາກນັ້ນພວກເຂົາຈະມາລວມຕົວກັນ ແລະ ໄຕ່ຕອງ.
ເຖິງແມ່ນບາງຄົນຈະລັງເລໃນຕອນຕົ້ນ, ແຕ່ພວກເຂົາກໍມຸ່ງໝັ້ນກັບແຜນນີ້ດ້ວຍຄວາມຈິງໃຈ.
ສິ່ງທີ່ໄດ້ເກີດຂຶ້ນຕໍ່ຈາກນັ້ນແມ່ນໜ້າປະຫລາດໃຈຫລາຍ.
ການປະພຶດທີ່ເຢັນຊາເລີ່ມອົບອຸ່ນຂຶ້ນ. ຮອຍຍິ້ມແທນທີ່ໜ້າບູດບຶ້ງ. ຜູ້ໃຫຍ່, ຄັ້ງໜຶ່ງເຄີຍຫ່າງເຫີນ ແລະ ແຂງກ້າວ, ເລີ່ມປ່ຽນແປງ. ລູກໆ, ທີ່ໄດ້ຮັບພະລັງຈາກການເລືອກທີ່ຈະນຳພາດ້ວຍຄວາມຮັກ, ໄດ້ພົບກັບຄວາມຊື່ນຊົມໃນການປ່ຽນແປງ. ການປ່ຽນແປງນັ້ນເລິກເຊິ່ງຫລາຍ ຈົນບໍ່ຈຳເປັນຕ້ອງມີການປະຊຸມຕິດຕາມຜົນທີ່ໄດ້ວາງແຜນໄວ້ເລີຍ. ຄວາມເມດຕາໄດ້ເຮັດວຽກຢ່າງງຽບໆຂອງມັນ.
ເມື່ອເວລາຜ່ານໄປ, ສາຍສຳພັນແຫ່ງມິດຕະພາບທີ່ແທ້ຈິງໄດ້ກໍ່ຕົວຂຶ້ນ, ຍົກລະດັບທຸກຄົນ. ໃນການເປັນຜູ້ສ້າງຄວາມສະຫງົບສຸກ, ເຮົາໃຫ້ອະໄພຄົນອື່ນ ແລະ ຈົງໃຈຍົກຄົນອື່ນຂຶ້ນ ແທນທີ່ຈະທຳລາຍພວກເຂົາ.
ການສ້າງຄວາມສະຫງົບສຸກໃນຊຸມຊົນຂອງເຮົາ
ທີສາມ, ການສ້າງຄວາມສະຫງົບສຸກໃນຊຸມຊົນຂອງເຮົາ. ໃນຊ່ວງຊຸມປີຮ້າຍແຮງຂອງສົງຄາມໂລກ ຄັ້ງທີສອງ, ແອວເດີ ຈອນ ເອ ວິດໂຊ ໄດ້ສິດສອນວ່າ: “ມີວິທີດຽວເທົ່ານັ້ນ ທີ່ຈະມີຄວາມສະຫງົບສຸກຢູ່ໃນຊຸມຊົນໄດ້ ຄືການສ້າງຊາຍ ແລະ ຍິງ ຜູ້ທີ່ຮັກຄວາມສະຫງົບ ແລະ ສ້າງຄວາມສະຫງົບ. ແຕ່ລະຄົນ, ໂດຍຄຳສອນຂອງພຣະຄຣິດ … ຖືສັນຕິສຸກຂອງໂລກ [ທັງໃບ] ໄວ້ໃນມືຂອງຕົນ.”
ເລື່ອງຕໍ່ໄປນີ້ສະແດງໃຫ້ເຫັນຄຳສອນນັ້ນໄດ້ຢ່າງງົດງາມ.
ເມື່ອຫລາຍປີກ່ອນ, ຊາຍສອງຄົນ—ຫົວໜ້າສາດສະໜາມຸດສະລິມ ແລະ ບາດຫລວງຄຣິດສະຕຽນຈາກປະເທດນີເຊເຣຍ—ໄດ້ຢືນຢູ່ຄົນລະຝັ່ງຂອງຄວາມແຕກແຍກທາງສາດສະໜາຢ່າງເຈັບປວດ. ຕ່າງຝ່າຍໄດ້ທຸກທໍລະມານຢ່າງແສນສາຫັດ. ແຕ່, ຜ່ານທາງພະລັງແຫ່ງການປິ່ນປົວຂອງການໃຫ້ອະໄພ, ທັງສອງໄດ້ເລືອກເດີນໄປດ້ວຍກັນ.
ຫົວໜ້າມູຫາມັດ ອາຊາຟາ ແລະ ບາດຫລວງ ເຈມສ໌ ວູຢີ ໄດ້ກາຍເປັນເພື່ອນ ແລະ ຄູ່ສັນຕິສຸກທີ່ບໍ່ໜ້າຈະເປັນໄປໄດ້. ໂດຍພ້ອມພຽງກັນ ພວກເພິ່ນໄດ້ກໍ່ຕັ້ງສູນໄກ່ເກ່ຍລະຫວ່າງສາດສະໜາ. ບັດນີ້ ພວກເພິ່ນສິດສອນຄົນອື່ນໃຫ້ແທນຄວາມກຽດຊັງດ້ວຍຄວາມຫວັງ. ໃນຖານະຜູ້ໄດ້ຮັບການສະເໜີຊື່ເຂົ້າຊີງລາງວັນໂນແບວສັນຕິພາບສອງຄັ້ງ, ເມື່ອບໍ່ດົນມານີ້ ພວກເພິ່ນໄດ້ຮັບລາງວັນ ຄອມມອນແວ້ວ ສັນຕິພາບ.
ອະດີດສັດຕູເຫລົ່ານີ້ ປະຈຸບັນໄດ້ຮ່ວມເດີນທາງຄຽງບ່າຄຽງໄຫລ່ກັນ ຟື້ນຟູສິ່ງທີ່ແຕກຫັກ, ດຳລົງຊີວິດເປັນພະຍານວ່າ ຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ທີ່ໃຫ້ເປັນຜູ້ສ້າງຄວາມສະຫງົບສຸກ ບໍ່ພຽງແຕ່ເປັນໄປໄດ້—ແຕ່ມັນມີພະລັງນຳອີກ.
ເມື່ອເຮົາມາຮູ້ຈັກລັດສະໝີພາບຂອງພຣະເຈົ້າ, ແລ້ວເຮົາ “ຈະບໍ່ມີຈິດໃຈທີ່ຈະເຮັດສິ່ງອັນຕະລາຍໃຫ້ຊຶ່ງກັນແລະກັນ, ແຕ່ຈະຢູ່ນຳກັນຢ່າງສັນຕິ.” ໃນໂບດ ແລະ ໃນຊຸມຊົນຂອງເຮົາ, ຂໍໃຫ້ເຮົາຈົ່ງເລືອກທີ່ຈະເຫັນກັນແລະກັນວ່າເປັນລູກຂອງພຣະເຈົ້າ.
ແຜນຜູ້ສ້າງຄວາມສະຫງົບສຸກໜຶ່ງອາທິດ
ໂດຍສະຫລຸບ, ຂ້າພະເຈົ້າຂໍສະເໜີຄຳເຊື້ອເຊີນ. ການສ້າງຄວາມສະຫງົບສຸກຮຽກຮ້ອງການປະຕິບັດ—ສຳລັບເຮົາແຕ່ລະຄົນ, ອາດເປັນແນວໃດຖ້າຈະເລີ່ມຕົ້ນໃນມື້ອື່ນ? ທ່ານຈະພິຈາລະນາແຜນຜູ້ສ້າງຄວາມສະຫງົບສຸກໃນໜຶ່ງອາທິດ ດ້ວຍສາມຂັ້ນຕອນນີ້ບໍ?
-
ບ້ານທີ່ປາດສະຈາກຄວາມຂັດແຍ້ງ: ເມື່ອຄວາມຂັດແຍ້ງເກີດຂຶ້ນ, ໃຫ້ຢຸດ ແລະ ເລີ່ມຕົ້ນດ້ວຍຄຳເວົ້າ ແລະ ການກະທຳທີ່ດີ.
-
ການສ້າງສະພານດິຈິຕ້ອນ: ກ່ອນໂພສ໌, ຕອບ, ຫລື ສະແດງຄວາມຄິດເຫັນໃນອອນລາຍ, ໃຫ້ຖາມວ່າ, “ສິ່ງນີ້ຈະສ້າງສະພານຫລືບໍ່?” ຖ້າບໍ່, ໃຫ້ຢຸດ. ຢ່າສົ່ງ. ໃຫ້ແບ່ງປັນສິ່ງທີ່ດີແທນ. ເຜີຍແຜ່ສັນຕິສຸກແທນຄວາມກຽດຊັງ.
-
ສ້ອມແປງ ແລະ ຄືນດີ: ສະມາຊິກຄອບຄົວແຕ່ລະຄົນສາມາດສະແຫວງຫາຄວາມສຳພັນທີ່ຕຶງຄຽດເພື່ອຂໍອະໄພ, ປະຕິບັດ, ສ້ອມແປງ, ແລະ ຄືນດີ.
ສະຫລຸບ
ເປັນເວລາສອງສາມເດືອນແລ້ວທີ່ຂ້າພະເຈົ້າຮູ້ສຶກປະທັບໃຈທີ່ບໍ່ສາມາດປະຕິເສດ ຊຶ່ງນຳໄປສູ່ຂ່າວສານນີ້: “ຜູ້ສ້າງຄວາມສະຫງົບສຸກກໍເປັນສຸກ.” ໃນສຸດທ້າຍນີ້, ຂ້າພະເຈົ້າຂໍແບ່ງປັນຄວາມປະທັບໃຈທີ່ກົດດັນໃນໃຈຂອງຂ້າພະເຈົ້າມາເປັນໄລຍະໜຶ່ງ.
ການສ້າງຄວາມສະຫງົບສຸກແມ່ນຄຸນລັກສະນະຂອງການເປັນເໝືອນພຣະຄຣິດ. ບາງຄັ້ງຜູ້ສ້າງຄວາມສະຫງົບສຸກຖືກໃສ່ຮ້າຍປ້າຍສີວ່າເປັນຄົນໂງ່ ຫລື ອ່ອນແອ—ຈາກທຸກຝ່າຍ. ແຕ່, ການເປັນຜູ້ສ້າງຄວາມສະຫງົບສຸກບໍ່ໄດ້ໝາຍຄວາມວ່າອ່ອນແອ ແຕ່ເຂັ້ມແຂງໃນແບບທີ່ໂລກອາດບໍ່ເຂົ້າໃຈ. ການສ້າງຄວາມສະຫງົບສຸກຮຽກຮ້ອງຄວາມກ້າຫານ ແລະ ຄວາມປະນີປະນອມ ແຕ່ບໍ່ຮຽກຮ້ອງການເສຍສະລະຫລັກທຳ. ການສ້າງຄວາມສະຫງົບສຸກຄືການນຳພາດ້ວຍໃຈທີ່ເປີດກວ້າງ, ບໍ່ແມ່ນຈິດໃຈທີ່ປິດກັ້ນ. ມັນຄືການເຂົ້າຫາກັນແລະກັນດ້ວຍມືທີ່ເດ່ອອກໄປ, ບໍ່ແມ່ນດ້ວຍການກຳກຳປັ້ນ. ການສ້າງຄວາມສະຫງົບສຸກບໍ່ແມ່ນເລື່ອງໃໝ່, ທີ່ຫາກໍພິມອອກມາ. ມັນຖືກສິດສອນໂດຍພຣະເຢຊູຄຣິດເອງ, ທັງສຳລັບຜູ້ຢູ່ໃນພຣະຄຣິສຕະທຳຄຳພີ ແລະ ພຣະຄຳພີມໍມອນ. ການສ້າງຄວາມສະຫງົບສຸກໄດ້ຖືກສິດສອນໂດຍສາດສະດາຍຸກປະຈຸບັນຕັ້ງແຕ່ສະໄໝເລີ່ມຕົ້ນຂອງການຟື້ນຟູ ຈົນເຖິງທຸກວັນນີ້ .
ເຮົາບັນລຸບົດບາດອັນສູງສົ່ງຂອງເຮົາໃນຖານະລູກໆຂອງພຣະບິດາເທິງສະຫວັນທີ່ຊົງຮັກ ເມື່ອເຮົາພະຍາຍາມກາຍເປັນຜູ້ສ້າງຄວາມສະຫງົບສຸກ. ຂ້າພະເຈົ້າເປັນພະຍານເຖິງພຣະເຢຊູຄຣິດ, ຜູ້ຊົງເປັນອົງສັນຕິລາດ, ພຣະບຸດຂອງພຣະເຈົ້າທີ່ຊົງພຣະຊົນ, ໃນພຣະນາມຂອງພຣະເຢຊູຄຣິດ, ອາແມນ.