ປະດັບດ້ວຍຄຸນນະທຳແຫ່ງການຢັບຢັ້ງຕົນ
ຂ້າພະເຈົ້າຂໍເຊື້ອເຊີນຢ່າງຈິງໃຈໃຫ້ເຮົາທຸກຄົນປະດັບຄວາມຄິດ ແລະ ຈິດໃຈຂອງເຮົາດ້ວຍຄຸນນະທຳແຫ່ງການຢັບຢັ້ງຕົນເໝືອນດັ່ງພຣະຄຣິດ.
ໃນເດືອນພຶດສະພາ ປີ 2021, ໃນຂະນະທີ່ໄປຢ້ຽມຢາມວຽກງານການສ້ອມແປງພຣະວິຫານເຊົາເລັກຄືນໃໝ່, ປະທານຣະໂຊ ເອັມ ແນວສັນ ຮູ້ສຶກປະຫລາດໃຈກັບຄວາມພະຍາຍາມຂອງຜູ້ບຸກເບີກ, ດ້ວຍຊັບພະຍາກອນທີ່ຈຳກັດ ແລະ ສັດທາອັນໝັ້ນຄົງບໍ່ຫວັ່ນໄຫວ, ໄດ້ສ້າງອາຄານທີ່ສັກສິດນັ້ນຂຶ້ນມາ, ຊຶ່ງເປັນຜົນງານອັນຍອດຍ້ຽມທາງດ້ານຮ່າງກາຍ ແລະ ວິນຍານທີ່ສາມາດທົນທານກັບການທ້າທາຍຂອງການເວລາ. ເຖິງຢ່າງໃດກໍຕາມ, ເພິ່ນກໍຍັງໄດ້ສັງເກດເຫັນຜົນກະທົບຂອງການກັດເຊາະ, ທີ່ເກີດຂຶ້ນກັບຊ່ອງວ່າງໃນຮາກຖານດັ້ງເດີມທີ່ເຮັດດ້ວຍຫີນ ແລະ ຄວາມບໍ່ໝັ້ນຄົງຂອງການກໍ່ສ້າງ, ຊຶ່ງເປັນສັນຍານທີ່ຊັດເຈນວ່າມີຄວາມຈຳເປັນໃນການເສີມໂຄງສ້າງຄືນໃໝ່.
ສາດສະດາທີ່ຮັກຂອງເຮົາໄດ້ສິດສອນຕື່ມອີກວ່າ ດັ່ງທີ່ມີຄວາມຈຳເປັນໃນການປະຕິບັດຕາມມາດຕະການສຳຄັນເພື່ອເສີມສ້າງຮາກຖານຂອງພຣະວິຫານໃຫ້ແຂງແກ່ນຕ້ານທານກັບພະລັງທຳມະຊາດໄດ້, ເຮົາກໍຈຳເປັນຕ້ອງໃຊ້ມາດຕະການພິເສດ—ບາງທີເປັນມາດຕະການທີ່ເຮົາບໍ່ເຄີຍໃຊ້ມາກ່ອນ—ເພື່ອເສີມສ້າງຄວາມເຂັ້ມແຂງໃຫ້ແກ່ຮາກຖານທາງວິນຍານສ່ວນຕົວຂອງເຮົາໃນພຣະເຢຊູຄຣິດ. ໃນຂ່າວສານອັນໜ້າຈົດຈຳຂອງເພິ່ນ, ເພິ່ນໄດ້ຖາມຄຳຖາມອັນເລິກເຊິ່ງສອງຄຳຖາມເພື່ອໃຫ້ເຮົາສະທ້ອນຄິດເປັນການສ່ວນຕົວວ່າ: ຮາກຖານ ຂອງທ່ານ ໝັ້ນຄົງຫລາຍປານໃດ? ແລະ ທ່ານຕ້ອງໃຊ້ສິ່ງໃດແດ່ເພື່ອຊ່ວຍເສີມສ້າງປະຈັກພະຍານ ແລະ ຄວາມເຂົ້າໃຈເລື່ອງພຣະກິດຕິຄຸນຂອງທ່ານ?”
ພຣະກິດຕິຄຸນຂອງພຣະເຢຊູຄຣິດໄດ້ມອບການດົນໃຈຈາກສະຫວັນ ແລະ ວິທີການທີ່ມີປະສິດທິພາບໃນການປ້ອງກັນການກັດເຊາະທາງວິນຍານໃນຈິດວິນຍານຂອງເຮົາ, ເສີມສ້າງຮາກຖານຂອງເຮົາຢ່າງມີພະລັງ ແລະ ຊ່ວຍໃຫ້ເຮົາຫລີກລ້ຽງຊ່ອງວ່າງໃນສັດທາ ແລະ ຄວາມບໍ່ແນ່ນອນທັງໃນປະຈັກພະຍານ ແລະ ຄວາມເຂົ້າໃຈຂອງເຮົາກ່ຽວກັບຄວາມຈິງອັນສັກສິດຂອງພຣະກິດຕິຄຸນ. ຫລັກທຳປະການໜຶ່ງທີ່ກ່ຽວຂ້ອງໂດຍສະເພາະສຳລັບການບັນລຸຈຸດປະສົງນີ້ສາມາດພົບເຫັນໄດ້ໃນ ພາກທີ 12 ຂອງຄຳສອນ ແລະ ພັນທະສັນຍາ, ການເປີດເຜີຍທີ່ມອບໃຫ້ຜ່ານທາງສາດສະດາໂຈເຊັບ ສະມິດ ໃຫ້ແກ່ໂຈເຊັບ ໄນ້, ຊາຍຊອບທຳຄົນໜຶ່ງທີ່ສະແຫວງຫາຄວາມເຂົ້າໃຈພຣະປະສົງຂອງພຣະຜູ້ເປັນເຈົ້າຢ່າງຈິງໃຈ, ບໍ່ແມ່ນເປັນພຽງແຕ່ເພື່ອການປ່ຽນແປງພາຍນອກເທົ່ານັ້ນ ແຕ່ເພື່ອຢືນຢັດຢ່າງໝັ້ນຄົງໃນການເປັນສານຸສິດຂອງເພິ່ນ—“ໝັ້ນຄົງດັ່ງເສົາຫລັກແຫ່ງສະຫວັນ.” ພຣະຜູ້ເປັນເຈົ້າໄດ້ປະກາດວ່າ:
“ຈົ່ງເບິ່ງ, ເຮົາກ່າວກັບເຈົ້າ, ແລະ ກັບທຸກຄົນຜູ້ປາດຖະໜາທີ່ຈະນຳວຽກງານນີ້ອອກມາ ແລະ ສະຖາປະນາມັນຂຶ້ນ;
“ແລະ ບໍ່ມີໃຜຈະສາມາດຊ່ວຍໃນວຽກງານນີ້ ຍົກເວັ້ນແຕ່ເຂົາຈະຖ່ອມຕົວ ແລະ ເຕັມໄປດ້ວຍຄວາມຮັກ, ໂດຍມີສັດທາ, ຄວາມຫວັງ, ແລະ ຄວາມໃຈບຸນ, ຢັບຢັ້ງຕົນໃນທຸກສິ່ງ, ບໍ່ວ່າອັນໃດກໍຕາມທີ່ຈະຝາກຝັງໄວ້ໃນການດູແລຂອງເຂົາ.”
ການນຳພາຂອງພຣະຜູ້ຊ່ວຍໃຫ້ລອດ, ທີ່ຖືກບັນທຶກໄວ້ໃນການເປີດເຜີຍອັນສັກສິດນີ້, ເຕືອນເຮົາໃຫ້ຮູ້ວ່າການຢັບຢັ້ງຕົນເປັນການເສີມສ້າງກຳລັງອັນສຳຄັນສຳລັບຮາກຖານອັນໝັ້ນຄົງໃນພຣະເຢຊູຄຣິດ. ນີ້ແມ່ນໜຶ່ງໃນຄຸນນະທຳທີ່ຂາດບໍ່ໄດ້, ບໍ່ແມ່ນພຽງແຕ່ສຳລັບຜູ້ທີ່ໄດ້ຮັບການເອີ້ນໃຫ້ຮັບໃຊ້ເທົ່ານັ້ນ ແຕ່ຍັງລວມທັງທຸກຄົນຜູ້ທີ່ໄດ້ເຮັດພັນທະສັນຍາອັນສັກສິດກັບພຣະຜູ້ເປັນເຈົ້າ ແລະ ຍອມຮັບທີ່ຈະຕິດຕາມພຣະອົງຢ່າງຊື່ສັດອີກດ້ວຍ. ການຢັບຢັ້ງຕົນສອດຄ່ອງ ແລະ ເສີມສ້າງຄຸນລັກສະນະອື່ນໆທີ່ເປັນເໝືອນພຣະຄຣິດ ທີ່ກ່າວໄວ້ໃນການເປີດເຜີຍນີ້ເຊັ່ນ: ຄວາມຖ່ອມຕົວ, ສັດທາ, ຄວາມຫວັງ, ຄວາມໃຈບຸນ, ແລະ ຄວາມຮັກອັນບໍລິສຸດທີ່ຫລັ່ງໄຫລມາຈາກພຣະອົງ. ຍິ່ງໄປກວ່ານັ້ນ, ການປູກຝັງການຢັບຢັ້ງຕົນຄືວິທີທີ່ມີຄວາມໝາຍໃນການປົກປ້ອງຈິດວິນຍານຂອງເຮົາຈາກການກັດເຊາະ ແບບເບົາບາງແຕ່ຕໍ່ເນື່ອງທີ່ເກີດຈາກອິດທິພົນທາງໂລກ ຊຶ່ງສາມາດເຮັດໃຫ້ຮາກຖານຂອງເຮົາໃນພຣະເຢຊູຄຣິດອ່ອນແອລົງໄດ້.
ໃນບັນດາຄຸນສົມບັດທີ່ປະດັບສານຸສິດທີ່ແທ້ຈິງຂອງພຣະຄຣິດ, ການຢັບຢັ້ງຕົນໄດ້ສະແດງໃຫ້ເຫັນພາບສະທ້ອນອັນໂດດເດັ່ນເຖິງພຣະຜູ້ຊ່ວຍໃຫ້ລອດພຣະອົງເອງ, ຄືໝາກໄມ້ປະເສີດແຫ່ງພຣະວິນຍານ, ທີ່ມີໃຫ້ກັບທຸກຄົນທີ່ເປີດຮັບເອົາອິດທິພົນແຫ່ງສະຫວັນ. ເປັນຄຸນນະທຳທີ່ນຳເອົາຄວາມສົມດຸນມາສູ່ຈິດໃຈ, ຫລໍ່ຫລອມຄວາມປາດຖະໜາ ແລະ ອາລົມດ້ວຍສະຕິປັນຍາ ແລະ ຄວາມສະຫງົບ. ໃນພຣະຄຳພີ, ການຢັບຢັ້ງຕົນຖືກນຳສະເໜີໃຫ້ເປັນພາກສ່ວນໜຶ່ງທີ່ສຳຄັນຂອງຄວາມກ້າວໜ້າໃນການເດີນທາງທາງວິນຍານຂອງເຮົາ, ທີ່ນຳເຮົາໄປສູ່ຄວາມອົດທົນ, ຄວາມເປັນເໝືອນພຣະເຈົ້າ, ແລະ ຄວາມເມດຕາ ໃນຂະນະທີ່ຫລໍ່ຫລອມຄວາມຮູ້ສຶກຂອງເຮົາ, ຄຳເວົ້າຂອງເຮົາ, ແລະ ການກະທຳຂອງເຮົາ.
ສານຸສິດຂອງພຣະຄຣິດຜູ້ທີ່ພະຍາຍາມປູກຝັງຄຸນລັກສະນະທີ່ເປັນເໝືອນດັ່ງພຣະຄຣິດນີ້ຈະກາຍເປັນຄົນຖ່ອມຕົນ ແລະ ເຕັມໄປດ້ວຍຄວາມຮັກຫລາຍຂຶ້ນ. ຄວາມເຂັ້ມແຂງອັນສະຫງົບງຽບເກີດຂຶ້ນໃນຕົວເຂົາເຈົ້າ, ແລະ ເຂົາເຈົ້າກາຍເປັນຄົນທີ່ມີຄວາມສາມາດໃນການຄວບຄຸມອາລົມຮ້າຍໄດ້ດີຂຶ້ນ, ບຳລຸງລ້ຽງຄວາມອົດທົນ, ແລະ ປະຕິບັດຕໍ່ຄົນອື່ນດ້ວຍຄວາມອົດກັ້ນ, ໃຫ້ຄວາມເຄົາລົບ, ແລະ ໃຫ້ກຽດ, ແມ່ນແຕ່ໃນເວລາທີ່ລົມພະຍຸຂອງຝ່າຍກົງກັນຂ້າມພັດເຂົ້າມາຢ່າງຮຸນແຮງກໍຕາມ. ເຂົາເຈົ້າພະຍາຍາມທີ່ຈະບໍ່ກະທຳຢ່າງຫຸນຫັນພັນແລ່ນ ແຕ່ເລືອກທີ່ຈະກະທຳດ້ວຍປັນຍາທາງວິນຍານ, ທີ່ຖືກນຳພາໂດຍອິດທິພົນທີ່ອ່ອນໂຍນ ແລະ ສຸພາບຂອງພຣະວິນຍານສັກສິດ. ດ້ວຍວິທີນີ້, ເຂົາເຈົ້າຈຶ່ງກາຍເປັນຄົນທີ່ມີຄວາມສ່ຽງໜ້ອຍກວ່າໃນການຖືກກັດເຊາະທາງວິນຍານ ເພາະວ່າ, ດັ່ງທີ່ອັກຄະສາວົກໂປໂລໄດ້ສິດສອນ, ເຂົາເຈົ້າຮູ້ວ່າ ເຂົາເຈົ້າສາມາດເຮັດທຸກສິ່ງໄດ້ຜ່ານທາງພຣະຄຣິດຜູ້ຊົງຊູກຳລັງເຂົາເຈົ້າ ແມ່ນແຕ່ການປະເຊີນໜ້າກັບການທົດລອງທີ່ສາມາດເຮັດໃຫ້ປະຈັກພະຍານຂອງເຂົາເຈົ້າທີ່ມີຕໍ່ພຣະອົງນັ້ນຕ້ອງສັ່ນຄອນກໍຕາມ.
ໃນສານຂອງເພິ່ນທີ່ຂຽນເຖິງຕີໂຕ, ໂປໂລໄດ້ຖ່າຍທອດຄຳແນະນຳອັນສັກສິດກ່ຽວກັບຄຸນສົມບັດຂອງຜູ້ທີ່ປາດຖະໜາຈະເປັນຕົວແທນຂອງພຣະຜູ້ຊ່ວຍໃຫ້ລອດ ແລະ ເຮັດຕາມພຣະປະສົງຂອງພຣະອົງດ້ວຍສັດທາ ແລະ ການອຸທິດຕົນ. ເພິ່ນໄດ້ກ່າວວ່າ ເຂົາເຈົ້າຄວນເປັນຄົນເອື້ອເຟື້ອເພື່ອແຜ່, ມີສະຕິ, ຍຸດຕິທຳ, ແລະ ບໍລິສຸດ—ຊຶ່ງເປັນຄຸນສົມບັດທີ່ສະທ້ອນໃຫ້ເຫັນເຖິງອິດທິພົນຂອງການຢັບຢັ້ງຕົນຢ່າງຈະແຈ້ງ.
ເຖິງຢ່າງໃດກໍຕາມ, ໂປໂລໄດ້ເຕືອນວ່າ ເຂົາເຈົ້າບໍ່ຄວນເປັນຄົນ “ຈອງຫອງ, ບໍ່ເປັນຄົນເລືອດຮ້ອນ, … [ແລະ] ບໍ່ເປັນຄົນອັນທະພານ.” ຄຸນລັກສະນະດັ່ງກ່າວແມ່ນຂັດກັບພຣະໄທຂອງພຣະຜູ້ຊ່ວຍໃຫ້ລອດ ແລະ ກີດຂວາງຕໍ່ການຈະເລີນເຕີບໂຕທາງວິນຍານທີ່ແທ້ຈິງ. ໃນບໍລິບົດຂອງພຣະຄຳພີ, “ບໍ່ຈອງຫອງ” ແມ່ນຜູ້ທີ່ປະຕິເສດທີ່ຈະກະທຳດ້ວຍຄວາມອວດດີ ແລະ ທະນົງໃຈ; “ບໍ່ເປັນຄົນເລືອດຮ້ອນ” ແມ່ນຜູ້ທີ່ຫລີກລ້ຽງແຮງກະຕຸ້ນຕາມທຳມະຊາດທີ່ເຮັດໃຫ້ກາຍເປັນຄົນບໍ່ມີຄວາມອົດທົນ ແລະ ຫງຸດຫງິດງ່າຍ; ແລະ “ບໍ່ເປັນຄົນອັນທະພານ” ໝາຍເຖິງຜູ້ທີ່ປະຕິເສດການໂຕ້ຖຽງ, ຮຸກຮານ, ແລະ ການກະທຳທີ່ໂຫດຮ້າຍບໍ່ວ່າຈະເປັນທາງວາຈາ, ຮ່າງກາຍ, ແລະ ອາລົມ. ຂະນະທີ່ເຮົາພະຍາຍາມປ່ຽນແປງພຶດຕິກຳຂອງເຮົາດ້ວຍສັດທາ ແລະ ຄວາມຖ່ອມຕົວ, ເຮົາສາມາດຍຶດໝັ້ນຢ່າງແໜ້ນໜາຢູ່ໃນສີລາແຫ່ງພຣະຄຸນອັນໝັ້ນຄົງຂອງພຣະອົງ ແລະ ກາຍເປັນເຄື່ອງມືອັນບໍລິສຸດ ແລະ ຖືກຂັດເງົາໃນພຣະຫັດອັນສັກສິດຂອງພຣະອົງ.
ໃນການສະທ້ອນຄິດເຖິງຄວາມຈຳເປັນໃນການປູກຝັງຄຸນນະທຳແຫ່ງການຢັບຢັ້ງຕົນ, ຂ້າພະເຈົ້າຄິດເຖິງຄຳເວົ້າຂອງນາງຮັນນາ, ມານດາຂອງສາດສະດາຊາມູເອນ—ຜູ້ຍິງທີ່ມີສັດທາຢ່າງໜ້າອັດສະຈັນທີ່, ແມ່ນແຕ່ຫລັງຈາກໄດ້ພົບກັບການທົດລອງທີ່ໜັກໜາສາຫັດ, ແຕ່ກໍຍັງຮ້ອງເພງສະແດງຄວາມກະຕັນຍູຕໍ່ພຣະຜູ້ເປັນເຈົ້າ. ນາງໄດ້ເວົ້າວ່າ, “ເຈົ້າຈົ່ງເຊົາເວົ້າຄຳໂອ້ອວດນັ້ນສາ; ຈົ່ງໃຫ້ຄຳເວົ້າຈອງຫອງຂອງເຈົ້າມິດງຽບ: ເພາະ [ພຣະຜູ້ເປັນເຈົ້າ] ເປັນພຣະເຈົ້າຜູ້ຮູ້ເຫັນ, ແລະ ພຣະອົງຕັດສິນທຸກການກະທຳຂອງມະນຸດ.” ບົດເພງຂອງນາງເປັນຫລາຍກວ່າຄຳອະທິຖານ—ເປັນການເຊື້ອເຊີນຕົວເອງໃຫ້ກະທຳດ້ວຍຄວາມຖ່ອມ, ການຄວບຄຸມຕົວເອງ, ແລະ ຄວາມພໍດີພໍຄວນ. ນາງຮັນນາເຕືອນເຮົາວ່າ ຄວາມເຂັ້ມແຂງທາງວິນຍານທີ່ແທ້ຈິງບໍ່ໄດ້ສະແດງອອກມາແບບຫຸນຫັນພັນແລ່ນ ຫລື ຄຳເວົ້າທີ່ຈອງຫອງ ແຕ່ດ້ວຍຄວາມຮູ້ຈັກຫ້າມຕົວເອງ, ມີທັດສະນະຄະຕິທີ່ຮອບຄອບສອດຄ່ອງກັບປັນຍາຂອງພຣະຜູ້ເປັນເຈົ້າ.
ຫລາຍຄັ້ງທີ່, ຝ່າຍໂລກແມ່ນຍ້ອງຍໍການປະພຶດທີ່ເກີດຈາກຄວາມຮຸນແຮງ, ຈອງຫອງ, ບໍ່ມີຄວາມອົດທົນ, ແລະ ຄວາມຫລາຍເກີນໄປ, ມັກຈະເປັນຂໍ້ອ້າງສຳລັບທັດສະນະຄະຕິເຊັ່ນນີ້ໂດຍການກົດດັນຈາກຊີວິດປະຈຳວັນ ແລະ ແນວໂນ້ມເພື່ອທີ່ຈະໄດ້ເປັນທີ່ຍອມຮັບ ແລະ ເປັນທີ່ນິຍົມ. ເມື່ອເຮົາຫັນໜ້າໄປຈາກຄຸນນະທຳແຫ່ງການຢັບຢັ້ງຕົນ ແລະ ບໍ່ສົນໃຈຕໍ່ອິດທິພົນອັນອ່ອນໂຍນ ແລະ ພໍປະມານຂອງພຣະວິນຍານສັກສິດ ໃນວິທີຂອງການກະທຳ ແລະ ການເວົ້າຈາແລ້ວ, ເຮົາຈະຕົກຫລຸມພາງຂອງສັດຕູ, ຊຶ່ງນຳເຮົາໄປສູ່ການເວົ້າຈາ ແລະ ຍອມຮັບທັດສະນະຄະຕິທີ່ເຮົາຈະຮູ້ສຶກເສຍໃຈຢ່າງທີ່ສຸດ, ບໍ່ວ່າຈະເປັນຄວາມສຳພັນໃນສັງຄົມ, ຄອບຄົວ, ຫລື ແມ່ນແຕ່ໃນທາງຝ່າຍສາດສະໜາຂອງເຮົາ. ພຣະກິດຕິຄຸນຂອງພຣະເຢຊູຄຣິດເຊື້ອເຊີນເຮົາໃຫ້ນຳໃຊ້ຄຸນນະທຳນີ້ ໂດຍສະເພາະຢ່າງຍິ່ງໃນເວລາຂອງການທ້າທາຍ, ດ້ວຍວ່າໃນໂອກາດເຫລົ່ານີ້ ລັກສະນະທີ່ແທ້ຈິງຂອງຄົນໆໜຶ່ງຈະຖືກເປີດເຜີຍອອກມາ. ດັ່ງທີ່ ມາຕິນ ລູເຕີ ຄິງ ຜູ້ລູກ ໄດ້ກ່າວໄວ້ວ່າ, “ການວັດອັນສູງສຸດຂອງຄົນຜູ້ໜຶ່ງບໍ່ໄດ້ແມ່ນວ່າລາວຈະຢືນຢູ່ຈຸດໃດໃນຊ່ວງເວລາແຫ່ງຄວາມສະດວກສະບາຍ, ແຕ່ຢູ່ທີ່ວ່າລາວຈະເລືອກຢືນຢູ່ຈຸດໃດໃນຊ່ວງເວລາແຫ່ງຄວາມທ້າທາຍ ແລະ ຄວາມຂັດແຍ້ງ.”
ໃນຖານະຜູ້ຄົນແຫ່ງພັນທະສັນຍາ, ເຮົາຖືກເອີ້ນໃຫ້ດຳລົງຊີວິດດ້ວຍຫົວໃຈທີ່ຝັງຮາກເລິກລົງໄປໃນຄຳສັນຍາອັນສັກສິດ ທີ່ເຮົາໄດ້ເຮັດໄວ້ກັບພຣະຜູ້ເປັນເຈົ້າ, ໂດຍປະຕິບັດຕາມແບບຢ່າງທີ່ພຣະອົງສ້າງໄວ້ ຜ່ານທາງການເປັນຕົວຢ່າງທີ່ດີພ້ອມຂອງພຣະອົງຢ່າງລະມັດລະວັງ. ໃນການຕອບແທນ, ພຣະອົງໄດ້ສັນຍາວ່າ, “ຕາມຈິງ, ຕາມຈິງແລ້ວ, ເຮົາກ່າວກັບພວກເຈົ້າ, ວ່ານີ້ຄືຄຳສອນຂອງເຮົາ, ແລະ ຜູ້ໃດກໍຕາມທີ່ສ້າງຢູ່ໃນຄຳສອນນີ້ ຍ່ອມສ້າງຢູ່ເທິງດານຫີນຂອງເຮົາ ແລະ ປະຕູນະລົກຈະເອົາຊະນະເຂົາບໍ່ໄດ້.”
Let Not Your Heart Be Troubled [ຢ່າໃຫ້ໃຈຂອງເຈົ້າທັງຫລາຍວຸ້ນວາຍໄປ], ໂດຍ ຮາວເວີດ ລີອອນ, ໄດ້ຮັບອະນຸຍາດຈາກ Havenlight
ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດຢູ່ເທິງໂລກນີ້ ແມ່ນໂດດເດັ່ນດ້ວຍຄຸນນະທຳແຫ່ງການຢັບຢັ້ງຕົນໃນທຸກແງ່ທຸກມຸມໃນລັກສະນະຂອງພຣະອົງ. ຜ່ານທາງຕົວຢ່າງທີ່ດີພ້ອມຂອງພຣະອົງ, ພຣະອົງໄດ້ສິດສອນເຮົາໃຫ້ “ອົດທົນໃນຄວາມທຸກທໍລະມານ, ຢ່າໝິ່ນປະໝາດຄົນທີ່ໝິ່ນປະໝາດ.” ດັ່ງທີ່ພຣະອົງສິດສອນໄວ້ວ່າ ເຮົາບໍ່ຄວນປ່ອຍໃຫ້ຄວາມໂມໂຫຄອບງຳ ຍ້ອນຄວາມຂັດແຍ້ງ ແລະ ໂຕ້ຖຽງ, ພຣະອົງໄດ້ປະກາດວ່າ, “ພວກເຈົ້າຕ້ອງກັບໃຈ, ແລະ ກາຍເປັນເໝືອນດັ່ງເດັກນ້ອຍເສຍກ່ອນ.” ພຣະອົງຍັງໄດ້ສິດສອນອີກວ່າ ຜູ້ທີ່ປາດຖະໜາທີ່ຈະມາຫາພຣະອົງດ້ວຍຈຸດປະສົງເຕັມທີ່ແຫ່ງໃຈ ຈະຕ້ອງຄືນດີກັບຜູ້ທີ່ເຮັດໃຫ້ຕົນເອງຂັດໃຈ ຫລື ຜູ້ທີ່ເຮັດໃຫ້ຄຽດແຄ້ນ. ດ້ວຍທັດສະນະຄະຕິທີ່ສະຫງົບ ແລະ ຫົວໃຈທີ່ມີຄວາມເມດຕາ, ພຣະອົງໄດ້ຮັບຮອງກັບເຮົາວ່າ ເມື່ອເຮົາຖືກປະຕິບັດຕໍ່ດ້ວຍຄວາມຮຸນແຮງ, ບໍ່ມີຄວາມເມດຕາ, ບໍ່ມີຄວາມເຄົາລົບ, ຫລື ບໍ່ໄດ້ຮັບການໃສ່ໃຈ, ຄວາມເມດຕາຂອງພຣະອົງຈະບໍ່ຖືກພາກໄປຈາກເຮົາ, ແລະ ພັນທະສັນຍາແຫ່ງສັນຕິສຸກຂອງພຣະອົງຈະບໍ່ຖືກລຶບອອກໄປຈາກຊີວິດຂອງເຮົາ.
ສອງສາມປີກ່ອນ, ຂ້າພະເຈົ້າ ແລະ ພັນລະຍາໄດ້ມີສິດທິພິເສດອັນສັກສິດໃນການພົບກັບສະມາຊິກຂອງສາດສະໜາຈັກຜູ້ຊື່ສັດຈຳນວນໜຶ່ງໃນເມືອງແມັກຊິໂກ. ຫລາຍຄົນໃນພວກເຂົາ, ບໍ່ວ່າຈະໂດຍສ່ວນຕົວ ຫລື ຜ່ານທາງຄົນທີ່ພວກເຂົາຮັກ, ລ້ວນແລ້ວແຕ່ໄດ້ພົບກັບການທົດລອງທີ່ເກີນບັນຍາຍ, ລວມທັງການລັກພາຕົວ, ການຖືກຄາດຕະກຳ, ແລະ ເລື່ອງໂສກເສົ້າທີ່ໜ້າສະຫລົດໃຈອື່ນໆ.
ເມື່ອພວກເຮົາແນມເບິ່ງໃບໜ້າຂອງໄພ່ພົນເຫລົ່ານີ້, ພວກເຮົາບໍ່ໄດ້ເຫັນຄວາມໃຈຮ້າຍ, ຄວາມຄຽດແຄ້ນ, ຫລື ຄວາມປາດຖະໜາທີ່ຈະແກ້ແຄ້ນໃດໆເລີຍ. ກົງກັນຂ້າມ, ພວກເຮົາໄດ້ເຫັນຄວາມຖ່ອມໃຈອັນງຽບສະຫງົບ. ສີໜ້າຂອງພວກເຂົາ, ເບິ່ງໂສກເສົ້າ, ສະແດງໃຫ້ເຫັນເຖິງຄວາມປາດຖະໜາຢ່າງຈິງໃຈທີ່ຈະໄດ້ຮັບການປິ່ນປົວ ແລະ ປອບໂຍນ. ເຖິງແມ່ນວ່າຫົວໃຈຂອງພວກເຂົາຈະແຕກສະຫລາຍຍ້ອນຄວາມທຸກທໍລະມານ, ແຕ່ໄພ່ພົນເຫລົ່ານີ້ກໍຍັງຄົງເດີນໜ້າຕໍ່ໄປດ້ວຍສັດທາໃນພຣະເຢຊູຄຣິດ, ໂດຍການເລືອກທີ່ຈະບໍ່ປ່ອຍໃຫ້ຄວາມທຸກທໍລະມານກາຍມາເປັນຊ່ອງວ່າງໃນສັດທາຂອງພວກເຂົາ ຫລື ເຮັດໃຫ້ເກີດຄວາມບໍ່ໝັ້ນຄົງໃນປະຈັກພະຍານຂອງພວກເຂົາກ່ຽວກັບພຣະກິດຕິຄຸນ.
ໃນການປິດການເຕົ້າໂຮມອັນສັກສິດນັ້ນ, ພວກເຮົາໄດ້ທັກທາຍພວກເຂົາແຕ່ລະຄົນ. ທຸກໆການຈັບມື, ທຸກໆການໂອບກອດ ໄດ້ກາຍເປັນປະຈັກພະຍານອັນມິດງຽບທີ່ວ່າ ດ້ວຍການຊ່ວຍເຫລືອຈາກພຣະຜູ້ເປັນເຈົ້າ, ເຮົາສາມາດເລືອກທີ່ຈະຕອບໂຕ້ດ້ວຍການຢັບຢັ້ງຕົນ ຕ້ານຄວາມຫງຸດຫງິດ ແລະ ຄວາມທ້າທາຍຕ່າງໆຂອງຊີວິດ. ຕົວຢ່າງອັນງຽບສະຫງົບ ແລະ ບໍ່ໂອ້ອວດຂອງພວກເຂົາໄດ້ເຮັດໜ້າທີ່ເປັນຕົວຢ່າງໃນການເຊື້ອເຊີນອັນອ່ອນໂຍນໃຫ້ຍ່າງຕາມທາງຂອງພຣະຜູ້ຊ່ວຍໃຫ້ລອດ ດ້ວຍການຢັບຢັ້ງຕົນໃນທຸກສິ່ງ. ພວກເຮົາຮູ້ສຶກເໝືອນກັບວ່າໄດ້ຢູ່ຕໍ່ໜ້າທູດສະຫວັນ.
ພຣະເຢຊູຄຣິດ, ຜູ້ຍິ່ງໃຫຍ່ທີ່ສຸດ, ໄດ້ທົນທຸກທໍລະມານຈົນວ່າໂລຫິດຂອງພຣະອົງໄດ້ໄຫລອອກຈາກທຸກຂຸມຂົນ, ແຕ່ພຣະອົງກໍຍັງບໍ່ເຄີຍຍອມໃຫ້ຄວາມໃຈຮ້າຍເຂົ້າມາຄອບງຳພຣະໄທຂອງພຣະອົງ, ທັງບໍ່ມີຄຳເວົ້າທີ່ຮຸນແຮງ, ຫຍາບຄາຍ, ຫລື ບໍ່ດີໃດໆຫລຸດອອກຈາກພຣະໂອດຂອງພຣະອົງ, ແມ່ນແຕ່ທ່າມກາງຄວາມທຸກທໍລະມານເຊັ່ນນັ້ນ. ດ້ວຍການຢັບຢັ້ງຕົນທີ່ດີເລີດ ແລະ ຄວາມອ່ອນໂຍນທີ່ຫາອັນປຽບບໍ່ໄດ້, ພຣະອົງບໍ່ໄດ້ຄິດເຖິງພຣະອົງເອງ ແຕ່ຄິດເຖິງລູກໆຂອງພຣະເຈົ້າແຕ່ລະຄົນ—ທັງໃນອະດີດ, ປະຈຸບັນ, ແລະ ອະນາຄົດ. ອັກຄະສາວົກເປໂຕໄດ້ເປັນພະຍານເຖິງທັດສະນະຄະຕິອັນສູງສົ່ງຂອງພຣະຄຣິດເມື່ອເພິ່ນໄດ້ປະກາດວ່າ, “ເມື່ອເຂົາກ່າວຄຳໝິ່ນປະໝາດພຣະອົງ, ພຣະອົງກໍບໍ່ໄດ້ຕອບຄືນ; ເມື່ອພຣະອົງທົນທຸກທໍລະມານ, ພຣະອົງກໍບໍ່ໄດ້ຂູ່ອາຄາດ; ແຕ່ພຣະອົງໄດ້ມອບຄວາມຫວັງໄວ້ກັບພຣະເຈົ້າຜູ້ຕັດສິນຢ່າງຍຸດຕິທຳ.” ແມ່ນແຕ່ໃນທ່າມກາງຄວາມທຸກທໍລະມານອັນແສນສາຫັດຂອງພຣະອົງ, ພຣະຜູ້ຊ່ວຍໃຫ້ລອດໄດ້ສະແດງໃຫ້ເຫັນການຢັບຢັ້ງຕົນຢ່າງສົມບູນແບບ ແລະ ສູງສົ່ງ. ພຣະອົງໄດ້ປະກາດວ່າ, “ເຖິງຢ່າງໃດກໍຕາມ, ລັດສະໝີພາບຈົ່ງມີແດ່ພຣະບິດາ, ແລະ ເຮົາໄດ້ຮັບເອົາ ແລະ ໄດ້ສຳເລັດການຕຽມຂອງເຮົາເພື່ອລູກຫລານມະນຸດ.”
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍເຊື້ອເຊີນຢ່າງຈິງໃຈໃຫ້ເຮົາທຸກຄົນປະດັບຄວາມຄິດ ແລະ ຈິດໃຈຂອງເຮົາດ້ວຍຄຸນນະທຳແຫ່ງການຢັບຢັ້ງຕົນເໝືອນດັ່ງພຣະຄຣິດ ເປັນການຕອບສະໜອງອັນສັກສິດຕໍ່ການເອີ້ນຂອງສາດສະດາທີ່ຮັກຂອງເຮົາ ປະທານຣະໂຊ ເອັມ ແນວສັນ. ຂະນະທີ່ເຮົາພະຍາຍາມດ້ວຍສັດທາ ແລະ ຄວາມພາກພຽນໃນການຖັກທໍຄວາມຢັບຢັ້ງຕົນ ເຂົ້າໃນການກະທຳ ແລະ ຄຳເວົ້າຂອງເຮົາ, ຂ້າພະເຈົ້າເປັນພະຍານວ່າເຮົາຈະເຂັ້ມແຂງ ແລະ ຍຶດໝັ້ນຊີວິດຂອງເຮົາໄວ້ຢ່າງແໜ້ນໜາຫລາຍຂຶ້ນເທິງຮາກຖານອັນໝັ້ນຄົງໃນພຣະຜູ້ໄຖ່ຂອງເຮົາ.
ຂ້າພະເຈົ້າເປັນພະຍານຢ່າງໜັກແໜ້ນວ່າ ການສະແຫວງຫາການຢັບຢັ້ງຕົນຢູ່ສະເໝີຈະຊຳລະຈິດວິນຍານຂອງເຮົາ ແລະ ເຮັດໃຫ້ຫົວໃຈຂອງເຮົາບໍລິສຸດຕໍ່ໜ້າພຣະພັກຂອງພຣະຜູ້ຊ່ວຍໃຫ້ລອດ, ຄ່ອຍໆດຶງເຮົາເຂົ້າໃກ້ພຣະອົງຫລາຍຂຶ້ນ ແລະ ກຽມເຮົາໃຫ້ພ້ອມ, ດ້ວຍຄວາມຫວັງ ແລະ ສັນຕິສຸກ, ສຳລັບວັນອັນຮຸ່ງເຫລື້ອມ ເມື່ອເຮົາຈະພົບກັບພຣະອົງໃນການສະເດັດມາຄັ້ງທີສອງຂອງພຣະອົງ. ຂ້າພະເຈົ້າແບ່ງປັນຄຳເວົ້າອັນສັກສິດເຫລົ່ານີ້ ໃນພຣະນາມຂອງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ອາແມນ.