ພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງ
ຂະນະທີ່ພຣະຜູ້ເປັນເຈົ້າເລັ່ງວຽກງານຂອງພຣະອົງ, ເຮົາຄວນຈະຮັກ, ບຳລຸງລ້ຽງ, ແລະ ຮັບໃຊ້ຜູ້ທີ່ຍອມຮັບພຣະກິດຕິຄຸນຂອງພຣະອົງ.
ຊາລ໌ ດິກເກັນສ໌ ໄດ້ເລີ່ມຕົ້ນປຶ້ມນິຍາຍຂອງລາວ A Tale of Two Cities ຢ່າງໂດ່ງດັງໂດຍຢືນຢັນວ່າ “ມັນແມ່ນຊ່ວງເວລາທີ່ດີທີ່ສຸດ, ມັນແມ່ນຊ່ວງເວລາທີ່ໂຫດຮ້າຍທີ່ສຸດ.” ໃນອີກແງ່ໜຶ່ງແລ້ວ, ນີ້ແມ່ນຄວາມຈິງໃນວັນເວລາຂອງເຮົາ.
ເຮົາມີຊີວິດຢູ່ໃນຍຸກທີ່ວຸ້ນວາຍ ເມື່ອ “ແຜ່ນດິນໂລກ [ແມ່ນ] ສັບສົນວຸ້ນວາຍ.” ຄຳຕັກເຕືອນຂອງປະທານຣະໂຊ ເອັມ ແນວສັນ ໃຫ້ເປັນຜູ້ສ້າງຄວາມສະຫງົບສຸກ, ໃນຖານະຜູ້ຕິດຕາມຂອງພຣະເຢຊູຄຣິດ, ໄດ້ເນັ້ນໜັກຢ່າງສວຍງາມໂດຍ ແອວເດີ ແກຣີ ອີ ສະຕີບເວັນສັນ ໃນເຊົ້າມື້ນີ້. ນີ້ແມ່ນພາກສ່ວນທີ່ສຳຄັນຂອງການເສີມສ້າງຄວາມສາມັກຄີ, ສັນຕິສຸກ, ແລະ ການປິ່ນປົວ ສຳລັບ “ຊ່ວງເວລາທີ່ຮ້າຍແຮງທີ່ສຸດ.”
ເຮົາກໍມີຊີວິດໃນ “ຊ່ວງເວລາທີ່ດີທີ່ສຸດ,” ຊຶ່ງຈະເປັນການເນັ້ນໜັກຂອງຂ້າພະເຈົ້າ. ພຣະຜູ້ເປັນເຈົ້າ, ໃນຄຳນຳຂອງ ຄຳສອນ ແລະ ພັນທະສັນຍາ, ພາກທີ 1 ວ່າ, ໄດ້ປະກາດເຖິງຄວາມສົມບູນແຫ່ງພຣະກິດຕິຄຸນຈະ “ຖືກປ່າວປະກາດ … ຈົນເຖິງທີ່ສຸດຂອງໂລກ.” ພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງຢ່າງແທ້ຈິງໃນວັນເວລາຂອງເຮົາ. ເຮົາຄວນຮູ້ສຶກກະຕັນຍູຢ່າງສຸດຊຶ້ງສຳລັບການເລັ່ງວຽກງານນີ້, ຊຶ່ງໄດ້ເກີດຂຶ້ນ ແລະ ກຳລັງເກີດຂຶ້ນເຖິງແມ່ນວ່າຈະຢູ່ໃນຊ່ວງເວລາທີ່ທ້າທາຍນີ້ກໍຕາມ. ເຮົາມີຊີວິດຢູ່ໃນສະໄໝທີ່ຜູ້ຕິດຕາມຂອງພຣະຜູ້ເປັນເຈົ້າມີສິດທິພິເສດທີ່ຈະໄດ້ຍິນສຸລະສຽງຂອງພຣະອົງ ແລະ ຕອບຮັບດ້ວຍຫົວໃຈ ແລະ ຈິດໃຈທີ່ເປີດກວ້າງ. ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຜູ້ທີ່ມີຄວາມມຸ່ງໝັ້ນໃນພຣະຜູ້ຊ່ວຍໃຫ້ລອດ ແລະ ພຣະບັນຍັດຂອງພຣະອົງ, ກຳລັງຊອກຫາຈຸດປະສົງ ແລະ ສັນຕິສຸກສ່ວນຕົວທີ່ເລິກເຊິ່ງ.
ໃນຫລາຍໆຊ່ວງເວລາໃນປະຫວັດສາດຂອງສາດສະໜາຈັກ, ໄດ້ມີຈຳນວນຜູ້ທີ່ເຂົ້າສູ່ເສັ້ນທາງແຫ່ງພັນທະສັນຍາເພີ່ມຂຶ້ນເປັນຈຳນວນຫລວງຫລາຍ. ຊ່ວງເວລາດັ່ງກ່າວເກີດຂຶ້ນລະຫວ່າງປີ 1837 ແລະ 1850. ອັກຄະສາວົກບາງທ່ານໃນຍຸກຕົ້ນຂອງສາດສະໜາຈັກຂອງພຣະຜູ້ເປັນເຈົ້າທີ່ຖືກຟື້ນຟູ ໄດ້ຮັບໃຊ້ເຜີຍແຜ່ໃນປະເທດ ສະຫະລາຊາອານາຈັກ ອັງກິດ. ວຽກງານເຜີຍແຜ່ເຫລົ່ານີ້ໄດ້ສົ່ງຜົນໃຫ້ຫລາຍພັນຄົນ ເຂົ້າຮ່ວມສາດສະໜາຈັກ, ແລະ ພາຍໃນປີ 1850 ໄດ້ມີສະມາຊິກຂອງສາດສະໜາຈັກທີ່ອາໄສຢູ່ສະຫະລາຊາອານາຈັກອັງກິດຫລາຍກວ່າ ຢູ່ໃນສະຫະລັດອາເມຣິກາ. ໃນເວລານັ້ນ, ພຣະຜູ້ເປັນເຈົ້າໄດ້ຊີ້ນຳໄພ່ພົນເຫລົ່ານີ້ໃຫ້ໄປເຕົ້າໂຮມກັນຢູ່ທີ່ລັດຢູທາ. ໄດ້ເກີດມີການອົບພະຍົບຄັ້ງຍິ່ງໃຫຍ່, ໂດຍທີ່ບາງຄົນໄດ້ຮັບເງິນກູ້ຜ່ານທາງກອງທຶນຖາວອນເພື່ອການອົບພະຍົບ.
ຂ້າພະເຈົ້າມັກເລື່ອງລາວຂອງການມາເຖິງຮ່ອມພູເຊົາເລັກຂອງຜູ້ປ່ຽນໃຈເຫລື້ອມໃສຈຳນວນຫລາຍຈາກປະເທດອັງກິດ ແລະ ແວວສ໌ ໃນປີ 1852. ກຸ່ມດັ່ງກ່າວໄດ້ຮັບການຕ້ອນຮັບຈາກຝ່າຍປະທານສູງສຸດທີ່ປາກທາງເຂົ້າຫຸບເຂົາ, ເອເກຣຊັນແຄນຢອນ, ພ້ອມດ້ວຍວົງດົນຕີຂອງກັບຕັນພິດ. ໜັງສືພິມ Deseret News [ເດເຊເຣັດນິວສ໌] ໄດ້ບັນຍາຍວ່າພວກເຂົາເປັນ “ນັກສະແຫວງບຸນ [ລວມມີ] ເອື້ອຍນ້ອງ ແລະ ເດັກນ້ອຍ, ກຳລັງຍ່າງໄປ, ຖືກແດດເຜົາ, ແລະ ຜ່ານຮ້ອນ ຜ່ານໜາວມາ, ແຕ່ກໍບໍ່ທໍ້ຖອຍ; ຫົວໃຈຂອງພວກເຂົາເບົາສະບາຍ ແລະ ເບີກບານ, ຊຶ່ງສະແດງໃຫ້ເຫັນຢ່າງແຈ່ມແຈ້ງດ້ວຍຄວາມສຸກ ແລະ ສີໜ້າທີ່ເບີກບານຂອງພວກເຂົາ.”
ຂະນະທີ່ພວກເຂົາ “ຍ່າງຜ່ານບໍລິເວນພຣະວິຫານ, … ຜູ້ຊາຍ, ແມ່ຍິງ, ແລະ ເດັກນ້ອຍຫລາຍພັນຄົນ, ລວມຕົວກັນ ຈາກສ່ວນຕ່າງໆຂອງເມືອງ, ເພື່ອຮ່ວມກັນຕ້ອນຮັບທີ່ມີສະຫງ່າລາສີ ແລະ ຄວາມຊື່ນຊົມຍິນດີ.” ປະທານບຣິກຳ ຢັງ ໄດ້ກ່າວກັບພວກເຂົາວ່າ: “ຂໍໃຫ້ພຣະຜູ້ເປັນເຈົ້າ ພຣະເຈົ້າແຫ່ງອິສະຣາເອນອວຍພອນພວກທ່ານ. … ພວກເຮົາໄດ້ອະທິຖານເພື່ອພວກທ່ານຢ່າງຕໍ່ເນື່ອງ; ຄຳອະທິຖານເປັນພັນໆໄດ້ຖືກຖວາຍເພື່ອພວກທ່ານ, ໃນແຕ່ລະມື້ລະວັນ, ຫາພຣະອົງຜູ້ທີ່ໄດ້ບັນຊາໃຫ້ເຮົາເຕົ້າໂຮມ ອິດສະຣາເອນ, ຊ່ວຍກູ້ເອົາລູກຫລານມະນຸດໂດຍການສັ່ງສອນພຣະກິດຕິຄຸນ, ແລະ ກຽມພວກເຂົາໃຫ້ພ້ອມສຳລັບການສະເດັດມາຂອງພຣະເມຊີອາ.”
ເນື່ອງໃນໂອກາດທີ່ຊື່ນຊົມຍິນດີນີ້, ຂ້າພະເຈົ້າຂໍຮັບຮອງກັບ ຜູ້ປ່ຽນໃຈເຫລື້ອມໃສໃໝ່ທຸກຄົນ ແລະ ຜູ້ທີ່ກຳລັງກັບຄືນມາສູ່ສາດສະໜາຈັກຂອງພຣະຜູ້ເປັນເຈົ້າວ່າ: ພວກເຮົາຮັກທ່ານ; ພວກເຮົາຕ້ອງການທ່ານ; ພຣະຜູ້ເປັນເຈົ້າຕ້ອງການທ່ານ. ພວກເຮົາອາດບໍ່ໄດ້ຕ້ອນຮັບທ່ານດ້ວຍວົງດົນຕີເດີນຂະບວນ, ແຕ່ພວກເຮົາອະທິຖານວ່າພອນແຫ່ງສະຫວັນຈະມາຊ່ວຍສະໜັບສະໜູນຄວາມພະຍາຍາມໃນການກ້າວໜ້າຂອງທ່ານໄປຕາມເສັ້ນທາງພັນທະສັນຍາ ທີ່ນຳໄປຫາພຣະເຈົ້າ ພຣະບິດາ ແລະ ພຣະເຢຊູຄຣິດ ໃນອານາຈັກຊັ້ນສູງ.
ມີຫລັກຖານທີ່ຊັດເຈນວ່າ ສັດທາໃນພຣະເຢຊູຄຣິດກຳລັງເພີ່ມພູນຂຶ້ນໃນວັນເວລາຂອງເຮົາ. ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ໄດ້ມີຈຳນວນຜູ້ປ່ຽນໃຈເຫລື້ອມໃສ ແລະ ການມີສ່ວນຮ່ວມຂອງຜູ້ປ່ຽນໃຈເຫລື້ອມໃສເພີ່ມຂຶ້ນຢ່າງໂດດເດັ່ນ. ໃນຊ່ວງ 36 ເດືອນທີ່ຜ່ານມາ, ມີຜູ້ປ່ຽນໃຈເຫລື້ອມໃສເກືອບ 900,000 ຄົນທີ່ໄດ້ເຂົ້າຮ່ວມສາດສະໜາຈັກ. ຜູ້ປ່ຽນໃຈເຫລື້ອມໃສເຫລົ່ານີ້ປະກອບດ້ວຍປະມານ 5 ເປີເຊັນຂອງຈຳນວນສະມາຊິກຂອງສາດສະໜາຈັກທັງໝົດ. ເຮົາຕ້ອນຮັບສະມາຊິກໃໝ່ດ້ວຍອ້ອມແຂນທີ່ເປີດກວ້າງ ແລະ ຄວາມຊາບຊຶ້ງໃຈຢ່າງສຸດຊຶ້ງສຳລັບເສັ້ນທາງທີ່ທ່ານເລືອກ.
ຜູ້ປ່ຽນໃຈເຫລື້ອມໃສ 900,000 ຄົນເຫລົ່ານີ້ ພາຍໃນ 36 ເດືອນທີ່ຜ່ານມາ ແມ່ນເກີນຈຳນວນສະມາຊິກຂອງສາດສະໜາຈັກໃນວັນຄົບຮອບປີທີ 110 ໃນປີ 1940, ຊຶ່ງມີສະມາຊິກພຽງແຕ່ ຫລາຍກວ່າ 860,000 ຄົນ. ນີ້ແມ່ນປີທີ່ ແອວເດີ ແຈັບຟະຣີ ອາ ຮໍແລນ, ແອວເດີ ດີເດີ ແອັຟ ອຸກດອບ ແລະ ຂ້າພະເຈົ້າເກີດ.
ຜູ້ປ່ຽນໃຈເຫລື້ອມໃສໃໝ່ທີ່ປະເສີດເຫລົ່ານີ້ໄດ້ມາຈາກທົ່ວທຸກພາກຂອງໂລກ. ໃນຊ່ວງຫົກເດືອນທຳອິດຂອງປີນີ້, ການປ່ຽນໃຈເຫລື້ອມໃສໄດ້ເພີ່ມຂຶ້ນຫລາຍກວ່າ 20 ເປີເຊັນ ເມື່ອທຽບໃສ່ປີກາຍນີ້ ໃນເອີຣົບ, ອາຟຣິກາ, ອາຊີ, ປາຊີຟິກ, ແລະ ອາເມຣິກາລາຕິນ. ຢູ່ທີ່ອາເມຣິກາເໜືອ ພວກເຮົາໄດ້ເຫັນການເພີ່ມຂຶ້ນ 17 ເປີເຊັນ. ວຽກງານຂອງພຣະຜູ້ເປັນເຈົ້າສືບຕໍ່ເດີນໜ້າຕໍ່ໄປຢ່າງມີພະລັງ. ຕົວເລກທີ່ກຳລັງເພີ່ມຂຶ້ນເຫລົ່ານີ້ເປັນພະຍານຢ່າງຊັດເຈນວ່າ ພຣະກິດຕິຄຸນກຳລັງສຳຜັດຫົວໃຈ ແລະ ປ່ຽນແປງຊີວິດຢູ່ທົ່ວທຸກຫົນແຫ່ງ.
ໃນວັນເວລາຂອງເຮົາ, ຜູ້ປ່ຽນໃຈເຫລື້ອມໃສທີ່ມີຄ່າເຫລົ່ານີ້ບໍ່ຈຳເປັນຕ້ອງລວມຕົວກັນຢູ່ສະຖານທີ່ສູນກາງອີກຕໍ່ໄປ. ຍ້ອນສັດທາ ແລະ ການອຸທິດຖວາຍຂອງສະມາຊິກຂອງສາດສະໜາຈັກ, ຈຶ່ງມີແຫລ່ງຊ່ວຍເຫລືອຕ່າງໆເພື່ອສະໜັບສະໜູນບ່ອນຊຸມນຸມ—ໂດຍມີການກໍ່ສ້າງອາຄານໂບດ ແລະ ພຣະວິຫານ—ຕະຫລອດທົ່ວໂລກ. ດ້ວຍຂໍກະແຈແຫ່ງຖານະປະໂລຫິດທີ່ຈຳເປັນ ແລະ ແຫລ່ງຊ່ວຍເຫລືອຕ່າງໆທີ່ມີໃຫ້, ບັດນີ້ ພິທີການແຫ່ງຄວາມລອດຈຶ່ງມີພ້ອມໃຫ້ບໍລິການໃນສ່ວນຫລາຍຂອງໂລກ.
ບໍ່ວ່າເຮົາຈະຢູ່ໃສກໍຕາມ, ສະມາຊິກໃນປະຈຸບັນຕ້ອງຕ້ອນຮັບສະມາຊິກໃໝ່ຫລາຍພັນຄົນ ດັ່ງທີ່ເຮົາໄດ້ຕ້ອນຮັບໄພ່ພົນຈາກອັງກິດ ແລະ ແວວສ໌ ດັ່ງທີ່ຂ້າພະເຈົ້າໄດ້ອະທິບາຍຈາກປະຫວັດສາດໃນຍຸກຕົ້ນ. ຂ້າພະເຈົ້າມັກຄຳປາໄສຂອງ ແອວເດີ ແກຣິດ ດັບເບິນຢູ ກອງ ໃນພາກນີ້ທີ່ເພິ່ນໄດ້ສິດສອນເຮົາວ່າ ບໍ່ຄວນມີໃຜນັ່ງຢູ່ຄົນດຽວ ບໍ່ວ່າຈະເປັນທາງອາລົມ ຫລື ທາງວິນຍານກໍຕາມ.
ໜ້າທີ່ອັນສັກສິດຂອງເຮົາກໍຄືຍອມຮັບ ແລະ ຕ້ອນຮັບສະມາຊິກໃໝ່ ແລະ ສະມາຊິກທີ່ກັບຄືນມາ. ຂະນະທີ່ພຣະຜູ້ເປັນເຈົ້າເລັ່ງວຽກງານຂອງພຣະອົງ, ເຮົາຄວນຈະຮັກ, ບຳລຸງລ້ຽງ, ແລະ ຮັບໃຊ້ຜູ້ທີ່ຍອມຮັບພຣະກິດຕິຄຸນຂອງພຣະອົງ. ເຮົາສາມາດຊ່ວຍສ້າງຜູ້ຄົນຂອງຊີໂອນ, ບ່ອນທີ່ເຮົາ “ມີໃຈດຽວ ແລະ ມີຄວາມຄິດດຽວ, ແລະ [ດຳລົງຢູ່] ໃນຄວາມຊອບທຳ.” ເພື່ອທີ່ຈະເປັນໜຶ່ງດຽວກັບພຣະຜູ້ເປັນເຈົ້າ, ເຮົາຈະຕ້ອງເປັນໜຶ່ງດຽວຢູ່ຕໍ່ໜ້າພຣະພັກຂອງພຣະຜູ້ເປັນເຈົ້າ. ສະມາຊິກທຸກຄົນ, ບໍ່ວ່າຈະຮັບບັບຕິສະມາວັນທີເທົ່າໃດກໍຕາມ, ຕ່າງກໍມີຄວາມຮັບຜິດຊອບຮ່ວມກັນໃນການຕ້ອນຮັບຄົນອື່ນ.
ຄຳແນະນຳຂອງຂ້າພະເຈົ້າໃຫ້ກັບສະມາຊິກຂອງສາດສະໜາຈັກກໍຄື ໃຫ້ໂອບກອດຜູ້ຄົນທີ່ຖືກເລືອກອັນມີຄ່າເຫລົ່ານີ້, ຜູ້ທີ່ໄດ້ຍອມຮັບພຣະກິດຕິຄຸນຂອງພຣະເຢຊູຄຣິດ.
ປະທານກໍດອນ ບີ ຮິງລີ ໄດ້ສິດສອນເຮົາວ່າຜູ້ປ່ຽນໃຈເຫລື້ອມໃສໃໝ່ຕ້ອງການ, “ໝູ່ເພື່ອນ, ໜ້າທີ່ຮັບຜິດຊອບ, ແລະ ການບຳລຸງລ້ຽງດ້ວຍ ‘ພຣະຄຳອັນປະເສີດຂອງພຣະເຈົ້າ’ (ໂມໂຣໄນ 6:4).” ເຮົາສາມາດຢູ່ທ່າມກາງໝູ່ເພື່ອນຜູ້ໃຫ້ແນ່ໃຈວ່າ ຜູ້ປ່ຽນໃຈເຫລື້ອມໃສໃໝ່ເຫລົ່ານີ້ຈະຮູ້ສຶກວ່າ ພວກເຂົາເປັນພາກສ່ວນ ແລະ ບໍ່ແມ່ນເປັນພຽງແຂກເທົ່ານັ້ນ. ເຮົາສາມາດຊ່ວຍພວກເຂົາໃຫ້ເຂົ້າໃຈວ່າພວກເຂົາຄືສານຸສິດຂອງພຣະເຢຊູຄຣິດ ຜູ້ທີ່ສາມາດປະຕິບັດສາດສະໜາກິດຕໍ່ຄົນອື່ນ ແລະ ຍອມຮັບການເອີ້ນຕ່າງໆເພື່ອຮັບໃຊ້. ຜູ້ປ່ຽນໃຈເຫລື້ອມໃສໜຸ່ມຄວນພິຈາລະນາທີ່ຈະຮັບໃຊ້ເຜີຍແຜ່ເຕັມເວລາ. ທຸກຄົນຄວນຕັ້ງໝັ້ນທີ່ຈະພະຍາຍາມດຳລົງຊີວິດທີ່ເໝືອນດັ່ງພຣະຄຣິດ.
ຫລາຍຄົນທີ່ເຂົ້າຮ່ວມສາດສະໜາຈັກດ້ວຍການເສຍສະລະສ່ວນຕົວຄັ້ງຍິ່ງໃຫຍ່ ແລະ ຕ້ອງການຄວາມຮັກ ແລະ ການສະໜັບສະໜູນຈາກໝູ່ເພື່ອນໄພ່ພົນຂອງພວກເຂົາເປັນຢ່າງຍິ່ງ.
ສຳລັບພວກທ່ານທີ່ເປັນສະມາຊິກໃໝ່ ຫລື ກັບຄືນມາສູ່ສັດທາອີກຄັ້ງ, ຍັງມີຄວາມທ້າທາຍຫລາຍຢ່າງທີ່ທ່ານອາດຈະຕ້ອງປະເຊີນໜ້າ. ຈົ່ງອົດທົນກັບຕົວເອງ. ຜູ້ສອນສາດສະໜາໄດ້ສິດສອນທ່ານກ່ຽວກັບຄຳສອນທີ່ສຳຄັນ ແລະ ໄດ້ອະທິບາຍກ່ຽວກັບພັນທະສັນຍາ ແລະ ພິທີການຕ່າງໆຂອງອານາຈັກຊຶ່ງໄດ້ຖືກກຳນົດຢູ່ໃນພຣະຄຳພີ ແລະ ໃນ ຈົ່ງສັ່ງສອນພຣະກິດຕິຄຸນຂອງເຮົາ.
ການຮັບເອົາພິທີການ ແລະ ພັນທະສັນຍາ ແລະ ການດຳລົງຊີວິດຕາມພຣະບັນຍັດເປັນສິ່ງທີ່ສຳຄັນ. ຈົ່ງສຸມໃຈໃສ່ຕໍ່ພັນທະສັນຍາທີ່ຈຳເປັນສຳລັບຄວາມສູງສົ່ງ. ພຣະກິດຕິຄຸນເຮັດໃຫ້ຄວາມສູງສົ່ງສາມາດເປັນໄປໄດ້, ຊຶ່ງຮຽກຮ້ອງໃຫ້ມີການເຮັດ ແລະ ການຮັກສາພັນທະສັນຍາອັນສັກສິດກັບພຣະເຈົ້າ. ຍົກເວັ້ນການບັບຕິສະມາ ແລະ ການຢືນຢັນ, ແລະ ການມອບອຳນາດຖານະປະໂລຫິດແຫ່ງເມນຄີເສເດັກສຳລັບຜູ້ຊາຍແລ້ວ, ພັນທະສັນຍາອື່ນໆທີ່ເຮົາເຂົ້າຮ່ວມແມ່ນຈະມີການປະກອບພິທີຢູ່ໃນພຣະວິຫານ. ສຳລັບຜູ້ທີ່ເສຍຊີວິດໄປແລ້ວ, ພິທີການແຫ່ງຄວາມລອດແຕ່ລະຂໍ້ແມ່ນຈະມີການປະກອບພິທີການທີ່ປະຕິບັດຢູ່ໃນພຣະວິຫານເທົ່ານັ້ນ. ອີງຕາມນັ້ນ, ການກຽມຕົວຂອງທ່ານສຳລັບພຣະວິຫານຄວນເປັນເປົ້າໝາຍທີ່ເລັ່ງດ່ວນ.
ທ່ານອາດຈະຮູ້ສຶກບໍ່ພຽບພ້ອມກ່ຽວກັບສິ່ງທີ່ທ່ານຮູ້. ຄວາມຮູ້ກ່ຽວກັບພຣະກິດຕິຄຸນເປັນພອນອັນຍິ່ງໃຫຍ່ທີ່ໄດ້ຮັບເພີ່ມຂຶ້ນເປັນແຕ່ລະໄລຍະຕາມການເວລາ, ແຕ່ມັນບໍ່ແມ່ນພິທີການແຫ່ງຄວາມລອດ. ພຣະກິດຕິຄຸນບໍ່ແມ່ນບົດທົດສອບຄວາມຮູ້. ເຖິງຢ່າງໃດກໍຕາມ, ດັ່ງທີ່ປະທານແນວສັນໄດ້ສັນຍາໄວ້ວ່າ: “ເມື່ອທ່ານສຶກສາພຣະຄຳພີມໍມອນດ້ວຍການອະທິຖານ ທຸກວັນ, ທ່ານຈະສາມາດຕັດສິນໃຈໄດ້ດີກວ່າເກົ່າໃນ—ທຸກວັນ. … ເມື່ອທ່ານໄຕ່ຕອງສິ່ງທີ່ທ່ານສຶກສາ, ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ.”
ນອກຈາກນັ້ນ, ໃນແຕ່ລະປີຈະມີການໝຸນວຽນຫລັກສູດຂອງສາດສະໜາຈັກໃນການປະຊຸມຕ່າງໆໃນວັນອາທິດທີ່ກວມລວມພຣະຄຳພີເດີມ, ພັນທະສັນຍາໃໝ່, ພຣະຄຳພີມໍມອນ, ແລະ ຄຳສອນ ແລະ ພັນທະສັນຍາ. ເມື່ອເວລາຜ່ານໄປ ທ່ານຈະມີຄວາມໝັ້ນໃຈຫລາຍຂຶ້ນເມື່ອຄວາມຮູ້ທາງດ້ານພຣະກິດຕິຄຸນຂອງທ່ານເຕີບໂຕຂຶ້ນ. ການສຶກສາພຣະຄຳພີເປັນປະຈຳຈະເປັນພອນ ແລະ ເສີມສ້າງຊີວິດຂອງທ່ານໂດຍການເຮັດໃຫ້ການປ່ຽນໃຈເຫລື້ອມໃສຂອງທ່ານຕໍ່ພຣະກິດຄິຄຸນຂອງພຣະເຢຊູຄຣິດເລິກເຊິ່ງຍິ່ງຂຶ້ນ.
ການຮຽນຮູ້ຄຳສອນອັນບໍລິສຸດຂອງພຣະເຢຊູຄຣິດ ເປັນການສະແຫວງຫາຕະຫລອດຊີວິດ, ທັງຄວາມເຂົ້າໃຈເຖິງຄຳສອນ ແລະ ການດຳລົງຊີວິດເໝືອນດັ່ງພຣະຄຣິດ. ພັນທະສັນຍາທີ່ສຳຄັນໃຫ້ເຄົ້າໂຄງຊຶ່ງເຮົາອະທິບາຍວ່າເປັນເສັ້ນທາງແຫ່ງພັນທະສັນຍາ. ຫລັກການເຫລົ່ານີ້ໄດ້ຖືກສິດສອນຢ່າງມີພະລັງໂດຍປະທານແນວສັນ. ສະມາຊິກທຸກຄົນ, ໂດຍສະເພາະສະມາຊິກໃໝ່ ແລະ ຜູ້ທີ່ກັບຄືນມາ, ຈະໄດ້ຮັບພອນໂດຍການສຶກສາ ແລະ ການປະຍຸກໃຊ້ຂ່າວສານແຫ່ງສາດສະດາຂອງເພິ່ນກ່ຽວກັບພັນທະສັນຍາ ແລະ ເສັ້ນທາງແຫ່ງພັນທະສັນຍາ.
ຖ້າທ່ານຕັ້ງເປົ້າໝາຍໃນການຮັບເອົາພັນທະສັນຍາແຕ່ລະຂໍ້ຢ່າງມີຄ່າຄວນ ທີ່ຈຳເປັນຕໍ່ຄວາມສູງສົ່ງ, ທ່ານຈະຢູ່ໃນເສັ້ນທາງທີ່ນຳໄປສູ່ອານາຈັກຊັ້ນສູງ. ພຣະວິຫານ ແລະ ພິທີການຂອງພຣະວິຫານຄວນເປັນຈຸດສຸມຂອງເຮົາ. ພັນທະສັນຍາສ່ວນໃຫຍ່ແມ່ນມີໄວ້ໃຫ້ແຕ່ລະບຸກຄົນ. ພັນທະສັນຍາຂໍ້ໜຶ່ງ, ຄືການແຕ່ງງານນິລັນດອນ, ແມ່ນກ່ຽວຂ້ອງກັບການລວມຄວາມພະຍາຍາມຂອງທ່ານກັບຄູ່ຊີວິດຂອງທ່ານ. ເປົ້າໝາຍຂອງເຮົາຄວນແມ່ນການຊອກຫາຄູ່ນິລັນດອນຄົນນັ້ນ.
ເຖິງຢ່າງໃດກໍຕາມ, ຈົ່ງຢ່າໄດ້ທໍ້ຖອຍໃຈ ຖ້າວ່າການແຕ່ງງານນິລັນດອນຂອງທ່ານຍັງເປັນໄປບໍ່ທັນໄດ້ໃນເວລານີ້. ສາດສະດາຫລາຍທ່ານໄດ້ສິດສອນວ່າ ບໍ່ມີພອນໃດທີ່ຈະຖືກກັກໄວ້ຈາກສະມາຊິກທີ່ຊື່ສັດ ຜູ້ທີ່ຮັກສາພຣະບັນຍັດ. ສາດສະດາໃນພຣະຄຳພີມໍມອນຄົນໜຶ່ງ, ກະສັດເບັນຢາມິນ, ໄດ້ກ່າວໄວ້ຢ່າງສວຍງາມວ່າ: “ຄົນທີ່ຮັກສາພຣະບັນຍັດຂອງພຣະເຈົ້າ … ໄດ້ຮັບພອນທຸກຢ່າງ, … ແລະ ຖ້າຫາກເຂົາ [ເປັນຄົນ] ຊື່ສັດຈົນເຖິງທີ່ສຸດແລ້ວ … ເຂົາຈະໄດ້ຢູ່ກັບພຣະເຈົ້າໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”
ທ່ານຈະພົບວ່າ, ຖ້າທ່ານຍັງບໍ່ໄດ້ພົບເທື່ອ, ສະມາຊິກບໍ່ໄດ້ແມ່ນຄົນດີພ້ອມ. ຄຳສອນທີ່ຖືກເປີດເຜີຍເຮັດໃຫ້ເຫັນໄດ້ຢ່າງຊັດເຈນວ່າ ໃນລະຫວ່າງການຢູ່ຊົ່ວຄາວຂອງເຮົາເທິງແຜ່ນດິນໂລກນີ້, ເຮົາຈະເຮັດຜິດພາດ. ເຮົາມີຊີວິດຢູ່ໃນໂລກທີ່ບໍ່ສົມບູນແບບ ແລະ ຕົກຕໍ່າ, ບໍ່ແມ່ນໂລກແຫ່ງອານາຈັກຊັ້ນສູງ. ຊີວິດນີ້ຄືເວລາແຫ່ງການທົດລອງ, ຊຶ່ງມີໂອກາດໃຫ້ກັບໃຈ ແລະ ພິສູດຕົວເອງຢູ່ສະເໝີ.
ເຮົາທຸກຄົນຮູ້ສຶກບໍ່ພຽບພ້ອມ ຂະນະທີ່ເຮົາພະຍາຍາມທີ່ຈະກາຍເປັນເໝືອນດັ່ງພຣະເຢຊູຄຣິດ. ການຊົດໃຊ້ຂອງພຣະອົງຊ່ວຍໃຫ້ເຮົາໄດ້ກັບໃຈໃນແຕ່ລະວັນ ເມື່ອເຮົາເຮັດຜິດພາດ. ດັ່ງທີ່ນີໄຟ, ສາດສະດາອີກທ່ານໜຶ່ງໃນພຣະຄຳພີມໍມອນ, ໄດ້ກ່າວວ່າ: “[ເຮົາ] ຕ້ອງມຸ້ງໜ້າດ້ວຍຄວາມໝັ້ນຄົງໃນພຣະຄຣິດ, ໂດຍມີຄວາມສະຫວ່າງຢ່າງບໍລິບູນຂອງຄວາມຫວັງ ແລະ ຄວາມຮັກຂອງພຣະເຈົ້າ ແລະ ຂອງມະນຸດທັງປວງ. ດັ່ງນັ້ນ, ຖ້າຫາກພວກທ່ານຈະມຸ້ງໜ້າຊື່ນຊົມດ້ວຍພຣະຄຳຂອງພຣະຄຣິດ ແລະ ອົດທົນຈົນເຖິງທີ່ສຸດແລ້ວ, ຈົ່ງເບິ່ງ, ພຣະບິດາໄດ້ກ່າວໄວ້ດັ່ງນີ້: ເຈົ້າຈະມີຊີວິດນິລັນດອນ.”
ຂະນະທີ່ເຮົາຕຶກຕອງເຖິງຄວາມທ້າທາຍໃນວັນເວລາຂອງເຮົາ, ເຮົາຕ້ອງຈື່ຈຳໄວ້ວ່າພຣະຜູ້ຊ່ວຍໃຫ້ລອດ, ໃນລະຫວ່າງການປະຕິບັດສາດສະໜາກິດຂອງພຣະອົງເທິງແຜ່ນດິນໂລກ, ກໍໄດ້ອາໄສຢູ່ໃນເວລາທີ່ວຸ້ນວາຍ ແລະ ຮຸນແຮງເຊັ່ນກັນ. ຈຸດສຸມຂອງພຣະອົງບໍ່ໄດ້ແມ່ນຄວາມທ້າທາຍທາງດ້ານການເມືອງຂອງສະໄໝນັ້ນ; ແຕ່ແມ່ນຄວາມສົມບູນແບບຂອງໄພ່ພົນ.
ການຕິດຕາມພຣະຜູ້ຊ່ວຍໃຫ້ລອດ ແລະ ຄຳສອນ ແລະ ການສິດສອນຂອງພຣະອົງ ບໍ່ເຄີຍເປັນເລື່ອງທີ່ງ່າຍເລີຍໃນໂລກທີ່ເຕັມໄປດ້ວຍຄວາມສັບສົນວຸ້ນວາຍຕະຫລອດເວລາ. ມັນບໍ່ແມ່ນເລື່ອງງ່າຍສຳລັບພຣະຜູ້ຊ່ວຍໃຫ້ລອດໃນໂລກທີ່ຜັນຜວນ ລະຫວ່າງການຢູ່ຊົ່ວຄາວທາງມະຕະຂອງພຣະອົງ, ມັນບໍ່ເປັນເລື່ອງງ່າຍສຳລັບຜູ້ນຳ ແລະ ສະມາຊິກສະໄໝເລີ່ມຕົ້ນ, ແລະ ມັນກໍບໍ່ແມ່ນເລື່ອງງ່າຍສຳລັບເຮົາ. ໂຊກດີທີ່, ສາດສະດາທີ່ມີຊີວິດຢູ່ໄດ້ໃຫ້ການຊີ້ນຳທີ່ເຮົາຕ້ອງການໂດຍສະເພາະໃນວັນເວລາຂອງເຮົາ. ປະທານດາລິນ ເອັຈ ໂອກສ໌ ຈະສືບຕໍ່ມໍລະດົກອັນມີພະລັງທາງວິນຍານນັ້ນ.
ຂ້າພະເຈົ້າເປັນພະຍານວ່າ ຄຳສອນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍແມ່ນເປັນນິລັນດອນ ແລະ ເປັນຄວາມຈິງ. ຂ້າພະເຈົ້າເປັນພະຍານຢ່າງແນ່ນອນ ແລະ ແນ່ໃຈວ່າ ພຣະເຢຊູຄຣິດຊົງພຣະຊົນ ແລະ ຍ້ອນການຊົດໃຊ້ຂອງພຣະອົງ, ເຮົາຈຶ່ງສາມາດເປັນໜຶ່ງດຽວກັບພຣະອົງໄດ້. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.