ພຣະຄຳພີມໍມອນ—ຊັບສົມບັດທີ່ບໍ່ສາມາດວັດແທກໄດ້ໃນການເດີນທາງຂອງເຮົາ
ເມື່ອເຮົາຊື່ນຊົມດ້ວຍພຣະຄຳຂອງພຣະຄຣິດທີ່ພົບເຫັນຢູ່ໃນພຣະຄຳພີມໍມອນ, ພຣະວິນຍານຈະຊ່ວຍເຮົາໃຫ້ເຂົ້າໃຈຄວາມຈິງນິລັນດອນ.
ທ່ານຈື່ຕອນທີ່ຄົນໃດຄົນໜຶ່ງມອບຂອງຂວັນທີ່ປ່ຽນຊີວິດຂອງທ່ານໄດ້ບໍ? ເດືອນຕຸລານີ້ແມ່ນຄົບຮອບ 40 ປີນັບຕັ້ງແຕ່ຂ້າພະເຈົ້າໄດ້ຮັບຂອງຂວັນທີ່ຍິ່ງໃຫຍ່ທີ່ສຸດໃນຊີວິດຂອງຂ້າພະເຈົ້າ. ຕອນຢູ່ໂຮງຮຽນມັດທະຍົມປາຍ, ຂ້າພະເຈົ້າໄດ້ສັງເກດເຫັນວ່າ ເພື່ອນຮ່ວມຮຽນຄົນໜຶ່ງໄດ້ມີຄວາມສະຫວ່າງທີ່ແຕກຕ່າງຈາກຄົນໜຸ່ມຄົນອື່ນໆຫລາຍຄົນ. ຂ້າພະເຈົ້າມັກຢູ່ກັບລາວ. ມື້ໜຶ່ງ ລາວໄດ້ບອກຂ້າພະເຈົ້າວ່າ ລາວເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ແລ້ວລາວໄດ້ສະເໜີມອບຂອງຂວັນໃຫ້ຂ້າພະເຈົ້າ: ປຶ້ມພຣະຄຳພີມໍມອນ. ລາວໄດ້ເຊື້ອເຊີນໃຫ້ຂ້າພະເຈົ້າອ່ານສອງສາມໜ້າ ແລະ ພົບກັບເພື່ອນສອງຄົນ ຜູ້ທີ່ສາມາດຕອບຄຳຖາມຂອງຂ້າພະເຈົ້າ. ເພື່ອນເຫລົ່ານັ້ນກໍແມ່ນຜູ້ສອນສາດສະໜານັ້ນເອງ.
ເມື່ອຂ້າພະເຈົ້າໄດ້ພົບກັບຜູ້ສອນສາດສະໜາ, ເຂົາເຈົ້າໄດ້ສິດສອນຂ້າພະເຈົ້າເຖິງຄຳສອນຂອງພຣະຄຣິດ ແລະ ໄດ້ເຊື້ອເຊີນຂ້າພະເຈົ້າໃຫ້ເຮັດຕາມຄຳເຊື້ອເຊີນຂອງສາດສະດາໂມໂຣໄນ ທີ່ວ່າ: “ແລະ ເມື່ອທ່ານໄດ້ຮັບເລື່ອງເຫລົ່ານີ້ແລ້ວ, ຂ້າພະເຈົ້າຂໍແນະນຳທ່ານໃຫ້ທູນຖາມພຣະເຈົ້າ, ພຣະບິດາຜູ້ສະຖິດນິລັນດອນໃນພຣະນາມຂອງພຣະຄຣິດ, ຖ້າຫາກເລື່ອງເຫລົ່ານີ້ບໍ່ຈິງ; ແລະ ຖ້າຫາກທ່ານທູນຖາມດ້ວຍໃຈຈິງ, ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ, ພຣະອົງຈະສະແດງຄວາມຈິງຂອງເລື່ອງນີ້ໃຫ້ປະຈັກແກ່ທ່ານ, ໂດຍອຳນາດຂອງພຣະວິນຍານບໍລິສຸດ” (ໂມໂຣໄນ 10:4).
ຂ້າພະເຈົ້າໄດ້ອ່ານຫລາຍໜ້າໃນ ພຣະຄຳພີມໍມອນ ແລະ ໄດ້ອະທິຖານ. ເຖິງແມ່ນວ່າຂ້າພະເຈົ້າຍັງບໍ່ທັນໄດ້ມີຄວາມເຂົ້າໃຈທີ່ເລິກເຊິ່ງເຖິງທຸກສິ່ງທີ່ຜູ້ສອນສາດສະໜາກຳລັງສິດສອນຂ້າພະເຈົ້າຢູ່, ແຕ່ຂ້າພະເຈົ້າໄດ້ຮູ້ສຶກໃນໃຈວ່າ ສິ່ງທີ່ຂ້າພະເຈົ້າກຳລັງອ່ານຢູ່ນັ້ນດີ ແລະ ມາຈາກພຣະເຈົ້າ. ຂ້າພະເຈົ້າໄດ້ຮັບການຢືນຢັນເຖິງຄຳສັນຍາຂອງໂມໂຣໄນ ທີ່ວ່າ: “ໂດຍອຳນາດຂອງພຣະວິນຍານບໍລິສຸດ ທ່ານຈະຮູ້ຈັກຄວາມຈິງຂອງທຸກເລື່ອງ” (ໂມໂຣໄນ 10:5).
ຫລັງຈາກຂ້າພະເຈົ້າໄດ້ຮັບບັບຕິສະມາເຂົ້າໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍແລ້ວ, ໝູ່ເພື່ອນບາງຄົນໄດ້ພະຍາຍາມຊັກຊວນຂ້າພະເຈົ້າວ່າຂ້າພະເຈົ້າໄດ້ເລືອກຜິດ. ແຕ່ທຸກເທື່ອທີ່ຂ້າພະເຈົ້າໄດ້ປະເຊີນໜ້າກັບຄວາມສົງໄສ ຫລື ການຕໍ່ຕ້ານ, ຂ້າພະເຈົ້າກໍໄດ້ຮັບການຢືນຢັນໃໝ່ຜ່ານທາງການສຶກສາພຣະຄຳພີ ແລະ ການອະທິຖານເພື່ອໃຫ້ຍຶດໝັ້ນຕໍ່ພັນທະສັນຍາທີ່ຂ້າພະເຈົ້າໄດ້ເຮັດກັບພຣະເຈົ້າ. ນັບຕັ້ງແຕ່ເວລານັ້ນມາ, ພຣະຄຳພີມໍມອນ ກໍໄດ້ເປັນເພື່ອນຂອງຂ້າພະເຈົ້າ ແລະ ໄດ້ກາຍມາເປັນຊັບສົມບັດທີ່ບໍ່ສາມາດວັດແທກໄດ້ໃນການເດີນທາງໃນຊ່ວງມະຕະຂອງຂ້າພະເຈົ້າ.
ພຣະຄຳພີມໍມອນມີຄວາມໝາຍຫລາຍກວ່າພຽງແຕ່ເປັນປຶ້ມເຫລັ້ມໜຶ່ງເທົ່ານັ້ນ. ມັນເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ, ຖືກຂຽນໄວ້ໂດຍສາດສະດາຫລາຍໆທ່ານໃນສະໄໝບູຮານ ຜ່ານທາງວິນຍານແຫ່ງການທຳນາຍ ແລະ ການເປີດເຜີຍ.
ເຫດການທີ່ສຳຄັນທີ່ສຸດທີ່ບັນທຶກໄວ້ໃນພຣະຄຳພີມໍມອນນັ້ນ ເປັນການປະຕິບັດສາດສະໜາກິດສ່ວນຕົວຂອງອົງພຣະເຢຊູຄຣິດເຈົ້າຕໍ່ບັນດາຊາວນີໄຟ ບໍ່ດົນຫລັງຈາກການຟື້ນຄືນພຣະຊົນຂອງພຣະອົງ. ພຣະຄຳພີມໍມອນ “ເວົ້າເຖິງຄຳສອນພຣະກິດຕິຄຸນ ແລະ ແຜນແຫ່ງຄວາມລອດ, ແລະ ບອກມະນຸດທຸກຄົນເຖິງສິ່ງທີ່ພວກເຂົາຕ້ອງເຮັດເພື່ອຈະໄດ້ຮັບສັນຕິສຸກໃນຊີວິດນີ້ ແລະ ຄວາມລອດນິລັນດອນໃນຊີວິດທີ່ຈະມາເຖິງ” (ຄຳແນະນຳຕໍ່ພຣະຄຳພີມໍມອນ).
ສະບັບທຳອິດຂອງພຣະຄຳພີມໍມອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ຖືກຈັດພິມຢູ່ໃນເມືອງນ້ອຍແຫ່ງໜຶ່ງໃນລັດນິວຢອກ ໃນເດືອນມີນາ 1830. ສາດສະດາໂຈເຊັບ ສະມິດ ມີອາຍຸພຽງແຕ່ 23 ປີຕອນເພິ່ນໄດ້ສຳເລັດການແປປຶ້ມນັ້ນໃນປີ 1829. ເພິ່ນໄດ້ແປປຶ້ມເກືອບໝົດທັງເຫລັ້ມໃນເວລາທີ່ໜ້ອຍກວ່າ 75 ວັນ, ແລະ ຂັ້ນຕອນການພິມໄດ້ໃຊ້ເວລາເຈັດເດືອນ.
ທຸກວັນນີ້, ຜູ້ສອນສາດສະໜາເຕັມເວລາປະມານ 80,000 ຄົນຢູ່ໃນຫລາຍກວ່າ 150 ປະເທດກຳລັງຮັບໃຊ້ເປັນອາສາສະໝັກ, ອຸທິດຊີວິດຂອງເຂົາເຈົ້າເພື່ອເປັນພະຍານວ່າ ພຣະຄຳພີມໍມອນນັ້ນຈິງ ແລະ ວ່າມັນເປັນພະຍານເຖິງພຣະເຢຊູຄຣິດ.
ໃນການສຳມະນາເທື່ອລ່າສຸດສຳລັບຜູ້ນຳເຜີຍແຜ່ຄົນໃໝ່ໃນເດືອນມິຖຸນາຂອງປີນີ້, ປະທານຣະໂຊ ເອັມ ແນວສັນ ໄດ້ແບ່ງປັນປະຈັກພະຍານທີ່ມີພະລັງຂອງເພິ່ນເຖິງພຣະຄຳພີມໍມອນວ່າ: “ພຣະຄຳພີມໍມອນເປັນ … ພຣະຄຳຂອງພຣະເຈົ້າ. ມັນສິດສອນຄຳສອນຂອງພຣະຄຣິດ ແລະ ອະທິບາຍກ່ຽວກັບການຊົດໃຊ້ຂອງພຣະຜູ້ຊ່ວຍໃຫ້ລອດຫລາຍກວ່າໜັງສືເຫລັ້ມອື່ນໆ.”
ຂ້າພະເຈົ້າຢາກຂໍສະເໜີໃຫ້ຄຳແນະນຳສາມຂໍ້ທີ່ສາມາດຊ່ວຍໃຫ້ການປ່ຽນໃຈເຫລື້ອມໃສຂອງເຮົາຕໍ່ພຣະເຢຊູຄຣິດເລິກເຊິ່ງຂຶ້ນ ຜ່ານທາງການສຶກສາພຣະຄຳພີມໍມອນ.
1. ໃຫ້ພາກພຽນ ແລະ ສະໝ່ຳສະເໝີໃນການສຶກສາປະຈຳວັນຂອງທ່ານ.
ເຊັ່ນດຽວກັບແອວມາ ແລະ ພວກລູກຊາຍຂອງໂມໄຊຢາ, ເຮົາກໍຕ້ອງ “[ຄົ້ນຄວ້າ] ພຣະຄຳພີຢ່າງພາກພຽນ, ເພື່ອ [ເຮົາ] ຈະໄດ້ຮູ້ຈັກພຣະຄຳຂອງພຣະເຈົ້າ” ແລະ ໄດ້ຮັບຄວາມເຂັ້ມແຂງໃນຄວາມຈິງ (ແອວມາ 17:2).
ຂະນະທີ່ຮັບໃຊ້ເປັນຜູ້ນຳເຜີຍແຜ່ໃນເຂດເຜີຍແຜ່ຈໍເຈຍ ແອັດແລນຕາ, ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ຊຸກຍູ້ຜູ້ສອນສາດສະໜາທຸກຄົນໃຫ້ສຶກສາພຣະຄຳພີມໍມອນຢ່າງໜ້ອຍ 30 ນາທີທຸກມື້. ຄວາມມຸ່ງໝັ້ນນັ້ນໄດ້ເພີ່ມສັດທາຂອງເຮົາ ແລະ ຊ່ວຍເຮົາໃຫ້ສະແຫວງຫາ ແລະ ຄາດຫວັງການອັດສະຈັນ.
ມັນເປັນໄປໄດ້ທີ່ຫລັງຈາກການເຜີຍແຜ່ ພວກເຮົາອາດບໍ່ມີເວລາຫລາຍແບບດຽວກັນນັ້ນສຳລັບການສຶກສາພຣະຄຳພີທຸກໆມື້, ແຕ່ຂ້າພະເຈົ້າສັນຍາວ່າ ຖ້າຫາກທ່ານຈັດໃຫ້ການສຶກສາພຣະຄຳພີມໍມອນເປັນລຳດັບຄວາມສຳຄັນແຕ່ລະມື້ດ້ວຍການອະທິຖານ, ທ່ານຈະພົບເຫັນພະລັງທາງວິນຍານ ແລະ ຄວາມໝັ້ນໃຈໃນພຣະຜູ້ເປັນເຈົ້າ ແລະ ຄຳສັນຍາຂອງພຣະອົງຫລາຍຂຶ້ນ.
2. ເຮັດໃຫ້ການສຶກສາຂອງທ່ານມີຄວາມໝາຍຫລາຍຂຶ້ນໂດຍການຊື່ນຊົມດ້ວຍພຣະຄຳຂອງພຣະຄຣິດ.
ນີໄຟໄດ້ສິດສອນວ່າ, “ຊື່ນຊົມດ້ວຍພຣະຄຳຂອງພຣະຄຣິດ; ເພາະຈົ່ງເບິ່ງ, ພຣະຄຳຂອງພຣະຄຣິດຈະບອກພວກທ່ານທຸກຢ່າງທີ່ພວກທ່ານຄວນເຮັດ” (2 ນີໄຟ 32:3).
ຊື່ນຊົມ ມີຄວາມໝາຍຫລາຍກວ່າພຽງແຕ່ອ່ານ—ມັນໝາຍເຖິງການອີ່ມເອີບ, ການໄຕ່ຕອງ, ແລະ ການນຳໃຊ້. ຂະນະທີ່ທ່ານສຶກສາພຣະຄຳພີມໍມອນ, ໃຫ້ພິຈາລະນາວິທີທີ່ຈະເຮັດໃຫ້ການສຶກສາພຣະຄຳພີຂອງທ່ານມີຄວາມໝາຍຫລາຍຂຶ້ນ. ຍົກຕົວຢ່າງ:
-
ໃຊ້ສິ່ງຊ່ວຍການສຶກສາທີ່ມີໃຫ້ໃນແອັບຫ້ອງສະໝຸດພຣະກິດຕິຄຸນ.
-
ລະບຸຄວາມຈິງນິລັນດອນທີ່ຊ່ວຍເຮົາໃຫ້ເຂົ້າໃຈແຜນຂອງພຣະເຈົ້າ ແລະ ນຳພາເຮົາໃຫ້ເຮັດ ແລະ ຮັກສາພັນທະສັນຍາກັບພຣະບິດາເທິງສະຫວັນຂອງເຮົາ.
-
ໝາຍສີວະລີທີ່ສຳຄັນ ແລະ ບັນທຶກຄວາມປະທັບໃຈຂອງທ່ານເພື່ອຮັກສາສິ່ງທີ່ທ່ານໄດ້ຮຽນຮູ້ລະຫວ່າງການສຶກສາຂອງທ່ານເອົາໄວ້.
ພຣະຄຳພີມໍມອນມີອຳນາດທີ່ຈະຕອບຄຳຖາມຂອງຈິດວິນຍານຂອງເຮົາ. ດັ່ງທີ່ນີໄຟໄດ້ກ່າວວ່າ, ເຮົາຄວນ “ປຽບທຽບພຣະຄຳພີທັງໝົດກັບຕົວຂອງພວກເຮົາ, ເພື່ອມັນຈະໄດ້ເປັນຜົນປະໂຫຍດ ແລະ ເປັນການຮຽນຮູ້ຂອງພວກເຮົາ” (1 ນີໄຟ 19:23).
ຂະນະທີ່ເຮົາຊື່ນຊົມກັບພຣະຄຳຂອງພຣະຄຣິດ, ມັນຈະເປີດປະຕູສູ່ການເປີດເຜີຍ ແລະ ສະແດງໃຫ້ເຮົາເຫັນສິ່ງທີ່ເຮົາຈຳເປັນຕ້ອງເຮັດໃນສະຖານະການຕ່າງໆໃນຊີວິດຂອງເຮົາ ເພື່ອຈະເຂົ້າໃກ້ພຣະອົງຫລາຍຂຶ້ນ.
3. ສະແດງປະຈັກພະຍານຂອງທ່ານເຖິງຄວາມຈິງຂອງພຣະຄຳພີມໍມອນ
ດັ່ງທີ່ລີໄຮໄດ້ປາດຖະໜາຈະແບ່ງປັນໝາກໄມ້ຈາກຕົ້ນໄມ້ແຫ່ງຊີວິດກັບຄອບຄົວຂອງເພິ່ນ (ເບິ່ງ 1 ນີໄຟ 8:12), ເມື່ອເຮົາໄດ້ຮັບປະຈັກພະຍານເຖິງພຣະຄຳພີມໍມອນ, ເຮົາກໍພັດທະນາຄວາມປາດຖະໜາທີ່ຈະແບ່ງປັນຄວາມຊື່ນຊົມທີ່ມາຈາກການຮູ້ຈັກພຣະກິດຕິຄຸນຂອງພຣະເຢຊູຄຣິດ.
ຜູ້ສອນສາດສະໜາຄົນໜຶ່ງຂອງພວກເຮົາ, ຊິດສະເຕີ ເບັນສັນ, ຜູ້ມາຮ່ວມກັບພວກເຮົາໃນພາກນີ້, ໄດ້ແບ່ງປັນຄວາມປາດຖະໜາຂອງລາວກັບຂ້າພະເຈົ້າທີ່ຈະຊ່ວຍນ້ອງຊາຍຂອງລາວ. ໃນເວລານັ້ນ, ລາວກຳລັງກຽມທີ່ຈະໄປຮຽນຢູ່ວິທະຍາໄລ, ແລະ ບໍ່ແນ່ໃຈກ່ຽວກັບການຮັບໃຊ້ເຜີຍແຜ່. ຂ້າພະເຈົ້າໄດ້ຮັບຄວາມປະທັບໃຈໃຫ້ເຊື້ອເຊີນ ຊິດສະເຕີ ເບັນສັນ ໃຫ້ອ່ານພຣະຄຳພີມໍມອນລະຫວ່າງສີ່ເດືອນທຳອິດຂອງການເຜີຍແຜ່ຂອງລາວ, ຂີດໝາຍຂໍ້ພຣະຄຳພີທີ່ໂປດປານຂອງລາວ, ແລະ ແລ້ວໃຫ້ສົ່ງເຫລັ້ມນັ້ນໄປໃຫ້ນ້ອງຊາຍຂອງລາວ.
ຊິດສະເຕີ ເບັນສັນ ໄດ້ສົ່ງພຣະຄຳພີມໍມອນເຫລັ້ມທີ່ຖືກຂີດໝາຍ ແລະ ໄດ້ເຊື້ອເຊີນນ້ອງຊາຍຂອງລາວໃຫ້ອ່ານຈາກເຫລັ້ມນີ້ແຕ່ລະຄືນ. ຕໍ່ມາລາວໄດ້ແບ່ງປັນກັບຂ້າພະເຈົ້າວ່າ: “ກ່ອນການເຜີຍແຜ່ຂອງຂ້ານ້ອຍ, ນ້ອງຊາຍຂອງຂ້ານ້ອຍບໍ່ແນ່ໃຈວ່າລາວຢາກໄປຮັບໃຊ້ເຕັມເວລາ. ຢ່າງຊ້າໆ, ເມື່ອເວລາຜ່ານໄປ, ຂະນະທີ່ລາວໄດ້ອ່ານພຣະຄຳພີມໍມອນ, ລາວໄດ້ພົບເຫັນຄວາມຊື່ນຊົມທີ່ເພີ່ມທະວີຂຶ້ນໃນຊີວິດຂອງລາວ ແລະ ໄດ້ເລີ່ມພິຈາລະນາທີ່ຈະຮັບໃຊ້ເຜີຍແຜ່.”
ສອງອາທິດ ກ່ອນຊິດສະເຕີ ເບັນສັນ ໄດ້ສຳເລັດການເຜີຍແຜ່ຂອງລາວ, ນ້ອງຊາຍຂອງລາວໄດ້ຮັບການເອີ້ນຂອງລາວ. ໃນເວລານີ້ລາວກຳລັງຮັບໃຊ້ຢູ່ເຂດເຜີຍແຜ່ ແມັກຊິໂກ ທຸກສະລາ ກູຕີແອເຣສ໌. ຜ່ານທາງພຣະຄຳພີມໍມອນ, ແອວເດີ ເບັນສັນ ໄດ້ເຫັນຊີວິດຂອງລາວດ້ວຍຄວາມຊັດເຈນທາງວິນຍານ, ຊຶ່ງໄດ້ນຳພາລາວໄປສູ່ການຮັບໃຊ້ພຣະຜູ້ເປັນເຈົ້າ ແລະ ໄວ້ວາງໃຈວ່າທຸກສິ່ງຈະເປັນໄປດ້ວຍດີ. ການຕັດສິນໃຈນັ້ນເປັນການອັດສະຈັນ—ທີ່ໄດ້ຮັບອິດທິພົນໂດຍອຳນາດຂອງພຣະຄຳຂອງພຣະຄຣິດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຊຸກຍູ້ທ່ານແຕ່ລະຄົນໃຫ້ສຶກສາພຣະຄຳພີມໍມອນຢ່າງເລິກເຊິ່ງ. ຂ້າພະເຈົ້າຮູ້ວ່າເມື່ອເຮົາຊື່ນຊົມດ້ວຍພຣະຄຳຂອງພຣະຄຣິດທີ່ພົບເຫັນຢູ່ໃນພຣະຄຳພີມໍມອນ, ພຣະວິນຍານຈະຊ່ວຍເຮົາໃຫ້ເຂົ້າໃຈຄວາມຈິງນິລັນດອນ ແລະ ແບ່ງປັນປະຈັກພະຍານຂອງເຮົາດ້ວຍຄວາມໝັ້ນໃຈກັບຜູ້ຄົນທີ່ພຣະຜູ້ເປັນເຈົ້າໄດ້ກະກຽມໄວ້ ເພື່ອຈະໄດ້ຍິນຂ່າວສານຂອງພຣະອົງ. ພຣະຜູ້ເປັນເຈົ້າໄດ້ກ່າວວ່າ, “ຜູ້ທີ່ຖືກເລືອກໄວ້ຂອງເຮົາ ໄດ້ຍິນສຽງຂອງເຮົາ ແລະ ບໍ່ເຮັດໃຈແຂງກະດ້າງ” (ຄຳສອນ ແລະ ພັນທະສັນຍາ 29:7). ຂ້າພະເຈົ້າເປັນພະຍານວ່າ ຜູ້ຄົນທີ່ທູນຖາມພຣະເຈົ້າດ້ວຍສັດທາຈະໄດ້ຮັບປະຈັກພະຍານເຖິງຄວາມຈິງ ແລະ ຄວາມສັກສິດຂອງພຣະຄຳພີມໍມອນ ໂດຍອຳນາດຂອງພຣະວິນຍານບໍລິສຸດ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມຂອງພຣະເຢຊູຄຣິດ, ອາແມນ.