Peresitene Timothy L. Farnes

Ina ua 14 tausaga o Peresitene Timothy L. Farnes, sa amata ona luiina e se uo o se isi faatuatuaga ona talitonuga faalelotu. Mo le taimi muamua i lona olaga talavou, na molimau atu ai Timothy o Iosefa Samita o se perofeta a le Atua ma e moni Le Ekalesia a Iesu Keriso o le Au Paia o Aso e Gata Ai.

“Sa faatumulia le potu i le Agaga. Sa iloagofie,,” o lana tala lea. “Sa matou lagonaina uma, ma sa suia uma i matou.,”

Na saunoa mai Peresitene Farnes e manao o ia i le autalavou o le Ekalesia ia iloa o i latou o ni ō o le aiga o le Atua.

“O i latou o fanau a le Atua ma fanau o le feagaiga,,” na ia saunoa ai, “ma e mafai ona avea i latou ma soo o Iesu Keriso pe afai latou te taliaina o Ia—talia le meaalofa ua latou maua ona o Lana Togiola.,”

Na fanau Timothy Lowell Farnes i le aso 29 Iuni, 1969, i Baltimore, Maryland, ia Gary William Farnes ma Mary Ellen Farnes. A o laitiiti o ia, sa siitia atu lona aiga i Iuta, lea na ola ae ai o ia. O ia o le ulumatua o le fanau e toafitu.

Sa auauna atu Peresitene Farnes o se faifeautalai i le Misiona a Pasila Porto Alegre. Sa ia a’oa’oina mataupu tau i tamaoaiga i le Iunivesite o Polika Iaga ma mulimuli ane amataina le tele o kamupani, e aofia ai le MedSource Direct, Aspire, ma le World Joy mo tagata e le faapisinisi.

Na ia faaipoipo ia Linsey Anne Farnes i le Malumalu o Sate Leki i le aso 27 o Aokuso, 1992. E toalima le la fanau ma fanau a fanau e toaono, ma e nonofo i Bountiful, Iuta.

Sa auauna atu Peresitene ma Sister Farnes o ni taitai misiona i le Misiona a Pasila São Paulo i Matu mai le 2014 i le 2017. O valaauga muamua o Peresitene Farnes e aofia ai le Fitugafulu Eria i le Eria a Iuta, peresitene o le siteki, fautua maualuga, epikopo, ma le epikopo o talavou nofofua matutua.