Ia Tutumau i Faatuatuaga Na Pele i O Tatou Matua

A o o’u asiasi ai i le Malumalu o Nashville Tennessee mo se toeiloiloga o le malumalu, sa ou maua ai le avanoa e asiasia ai e avea o se vaega o lenei tofiga, le toeiloiloina o lenei maota matagofie o le Alii. Sa faapitoa lo’u faagaeetia i le atavali a Mary Wanlass ua faaigoaina o le Carry On o loo tautau i luga o le puipui i le ofisa o le faatina.

O le tala lenei i tua atu o le atavali lea:

I Misuri i le 1862, sa folafola atu ai e Mary Wanlass e 14-tausaga le matua i lona tina-tausi o le a maliu, o le a ia faamautinoa e taunuu lona tama ma’i ma nai ona tei laiti e toafa, i le Vanu o le Vaituloto Masima Tele. Sa aveina e Mary povipo’a ma povi taususu na tosoina le taavaletoso lea sa taoto ai lona tamā, ma sa ia tausia nai ona tei. I le mavae ai o le malaga i aso taitasi, sa ia fafagaina le aiga e ala i lona sailia o laau ‘aina, fugalaau, ma vine. Na pau lana tapasā o faatonuga sa ia mauaina e malaga pea i sisifo seia oo ina avea ao ma mauga.

“Sa latou taunuu i le Vanu o Iuta ia Setema, i le malaga ai i le tautotogo ma le taumafanafana atoa. Sa maliu lona tamā ae le’i umi ona faamautu le aiga i le Itumalo o Iuta, lea na faaipoipo mulimuli ane ai Mary ma tausia ai lona lava aiga.”

O se tala maoae lenei o le faatuatua ma le malosi o se tamaitai talavou e 14 tausaga e mafai ona fesoasoani ia i tatou taitoatasi i le taimi nei ia “tau lava o le tumau pea.”

“Tau Lava o le Tumau Pea,” po o le faaliliuina i la’u gagana Take, Gewoon Doorgaan—o le anaga foi lea a lo’u tina ma lo’u tamā i le olaga atoa.

O o’u matua ma matua faaletulafono o paionia ia i lo matou aiga. Na latou sopoia foi o latou lava “laufanua valevalenoa” e faapei foi o i latou uma e o mai i le Ekalesia, le lafu a le Alii, i aso uma. O a latou tala e faalēai ni faiā i povipo’a ma taavaletoso ae e tutusa lava le aafiaga i tupulaga o le lumanai.

Sa latou taliaina le talalelei toefuataiina ma sa papatisoina i tausaga o lo latou talavou matutua. Sa taufai faigata le ola tuputupu a’e o o’u matua. Sa ola a’e lo’u tamā i le motu o Java i Initonesia. I le taimi o le Taua Lona Lua a le Lalolagi, sa tuueseese faamalosi ai o ia mai lona aiga ma taofia faamalosi ai i se tolauapiga faafalepuipui, lea sa ia mafatia ai i faigata e le mafaamatalaina i lona talavou.

Sa ola a’e lo’u tina i se aiga malepelepe, ma sa pagatia foi o ia i le fiaai ma faigata o le Taua Lona Lua a le Lalolagi. Sa i ai taimi na i’u ai ina ‘ai e ia fatu tulipe. Ona o faatinoga a lona tamā, ma le la tete’aga ma lona tina, sa faigata ai i nisi taimi mo ia ona vaai atu i le Tama Faalelagi o se Tamā alofa.

Sa feiloai o’u matua i se gaoioiga a le Lotu ma e lei umi ae tonu o le a faaipoipo ma faamauina i le Malumalu o Bern Suitiselani. A o faatalitali ai i le nofoaga o nofoaafi, ma le faaalu ai o si a la tupe itiiti na teu mo le malaga i le malumalu, sa la tomanatu ai pe o le a faapefea ona la ola, ae sa la mautinoa o le a lelei mea uma. Ma na sa’o lava.

Sa amata ona la tausia se aiga mai se potu faatauvaa e tasi i le pito i luga o se falemautotogi i le ogatotonu o Amsterdam. I le mavae ai o tausaga e tele o tatālima o la’ua lavalava, sa i’u ina lava se tupe na la sefeina e faatau ai se masini tamea. Ae toeitiiti fai le faatauga, sa asiasi atu le epikopo ia i la’ua, ma talosaga atu mo sa la’ua saofaga e fau ai se falelotu i Amsterdam. Sa tonu ia i la’ua e ave uma le tupe sa la sefeina mo le masini tamea, ae faaauau pea ona tālima la tagamea.

Sa matou feagai ma ni faigata o se aiga, e faapei foi o isi aiga. O nei mea sa na ona faamalolosia ai i matou ma faalolotoina ai lo matou faatuatua i le Alii o Iesu Keriso, e faapei foi o Alema ina ua ia faasoa mai lana tala i lona atalii o Helamana, lea sa ia ta’u atu ai ia te ia, sa lagolagoina o ia i tofotofoga ma faigata o soo se ituaiga, ona sa ia tuu lona faatuatuaga i le Alii o Iesu Keriso.

Na faapefea e ni tagata se toalua na feagai ma le tele o tofotofoga i le taimi o lo la talavou ona avea ma ni matua silisili e mafai ona ou momoo i ai? E faigofie lava le tali: sa o la’ua taliaina atoatoa le talalelei ma ola ai i a la’ua feagaiga e oo mai i le aso lenei!

I le mavae ai o le silia ma le 65 tausaga o le la faaipoipoga, sa maliu lo’u tina, o lē sa pagatia i le faama’i o le Alzheimer [Galo i le Mafaufau], ia Fepuari. O lo’u tamā, i le 92 ai o ona tausaga o loo nofo pea i le fale, sa asiasi soo pea i [lo’u tina] i le tele sa ia mafaia, seia oo ina maliu. Sa i ai se taimi sa ia ta’ua ai i o’u tei laiti e faapea o aafiaga matautia i le tolauapiga i Initoneisia i le Taua Lona Lua a le Lalolagi, sa saunia ai o ia e tausia ma le onosai lona toalua mo le tele o tausaga ina ua ma’i ma vaivai ai mai lenei faama’i leaga tele, ma le aso ese o le a tatau ai ona ia tuu atu lona tausiga autu i isi ma lē toe mafai ai ona i ai i ona autafa. O le la anavatau sa i ai ma o loo i ai pea o le “Tau Lava o le Tumau Pea,” ma se faamoemoe atoatoa ia Keriso ina ia toefaatutuina a’e ai i le aso gataaga ma mau faatasi ma Ia i le mamalu e faavavau.

O lo la faatuatua ma molimau o se malosiaga faatosina lea mo tupulaga na mulimuli mai ia i la’ua.

I le nuu na ola a’e ai lo’u toalua, o ona matua, o ē o ni tagata lolotu, sa la taliaina le talalelei toefuatai a o avea o se ulugalii talavou faatasi ai ma lo’u toalua o le la afafine e lua tausaga le matua, ma na o le pau foi lena o le la tama sa i ai. O la la’ua faaiuga e avea ma tagata o Le Ekalesia a Iesu Keriso o le Au Paia o Aso e Gata Ai, sa i ai se aafiaga tele i o latou olaga a o inosia i latou e tagata o le nuu ma lo latou aiga. Sa tele tausaga na alu ai, o tusi alofa i tagata o aiga, ma auaunaga i le nuu ona faatoa taliaina lea o i latou.

I se tasi taimi, a o avea le tamā o lo’u toalua ma epikopo, sa tu’ua’ia sese ai o ia i se mea ma sa faamalolo ai loa lava. Sa matua tiga lo’u tina faaletulafono ma sa ia fesili ai i lana tane pe tatau pea ona latou o i le lotu. Sa ia tali atu o le a latou o pea i le lotu ona e le o se lotu a tagata, ae o le ekalesia a Iesu Keriso.

Sa umi se taimi faatoa alia’e mai le mea moni ma faia ai ni faatoesega. O le mea na semanu e avea ma itu e motusia ai, na faaopoopo atu i lo la’ua malosiaga ma le tautinoga maumaututu.

Aisea e le talisapaia ai e nisi o i tatou le faatuatua ma molimau a o tatou matua o ē na tumau faamaoni i o latou faigata uma? Pe tatou te manatu ea e leai so latou malamalama manino i mea? Sa le’i ma e le o faaseseina i latou! Sa tele naua o latou aafiaga ma le Agaga ma e mafai ona fai atu faatasi ma le Perofeta o Iosefa, “Sa ou iloaina, … ma e lē mafai ona ou faafitia.”

Tou te le fiafia i le pese e uiga i le autau a Helamana o loo maua i le Tusipese a Tamaiti?

Tusa lava foi pe le o le tulaga lea, pei ona aafia ai lo’u tina a o laitiiti, e mafai foi ona avea oe o se tasi o nei “matua lelei e alolofa i le Alii” ma saunia se faataitaiga amiotonu mo isi.

Pe tatou te lagonaina le sa’o atoatoa o lenei mea pe a tatou usuina? Pe e te lagona ua outou “pei o le autau a Helamana” ma o le a outou “avea ma faifeautalai a le Alii e aumai i le lalolagi lana upumoni”? Sa ou lagonaina i le tele o taimi a o ou usuina lenei pese i le tele o faatulagaga o le MMA ma isi faatasiga a le autalavou.

Pe o a foi ni o tatou lagona pe a tatou usuina le viiga “Vaivai Ea Fanau a Siona”?

Ia i latou o le tupulaga faia’e, pe o fea lava o e i ai ma pe o le a foi le tulaga o e i ai, faamolemole ia aoao ma maua le malosiaga mai le faatuatuaga ma molimau a i latou na muamua mai ia te outou. O le a fesoasoani e te malamalama ai ina ia mafai ona maua pe tuputupu ae se molimau, o le a tatau ona faia ni osigataulaga ma o le “ositaulaga e aumaia ai faamanuiaga o le lagi.”

Mafaufau e uiga i se osigataulaga o le a faamanuia moni ai lou olaga, faamolemole mafaufau ma tatalo e uiga i le valaaulia a lo tatou perofeta pele, o Peresitene Russell M. Nelson, ina ua ia talosagaina “alii talavou agavaauma lava ma malolosi ia sauniuni mo, ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. …

“Mo … tuafafine talavou ma malolosi, o se misiona o se avanoa mamana foi, ae tuu i le faitalia.”

E mafai ona valaauina oe o se faifeautalai mo auaunaga pe tala’i. O ia ituaiga uma o faifeautalai e saofagā i le sini lava e tasi o le aumaia o agaga ia Keriso, e tofu tulagaese ma mamana le ala.

I ia ituaiga uma o auaunaga, o le a e faaali atu ai i le Alii e te alofa ia te Ia ma e te manao ia e iloa atili o Ia. Manatua, “aua pe faapefea ona iloa e se tagata le matai e lei auauna i ai o ia, ma o sē foi o se tagata ese ia te ia, ma ua mamao mai mafaufauga ma faamoemoega o lona loto?”

O i tatou uma, pe o le tupulaga muamua i le talalelei pe o le lona lima, e ao ona tatou fesili ifo ia i tatou lava pe o a tala o le faatuatua, malosi, ma tautinoga faaselesitila o le a ou pasi atua i le isi tupulaga?

Ia tatou taufai faaauau pea ia tatou taumafaiga ia iloa atili lo tatou Faaola, o Iesu Keriso, fai o Ia ma totonugalemu o o tatou olaga. O Ia o le papa e tatau ona tatou fauina ai i luga, a oo mai taimi faigata, o le a mafai ona tatou tutu mausali.

“Ia [tatou] tutumau i faatuatuaga na pele i [o tatou] matua, ma e na fasia, i poloa’i a le Alii, tumau pea ma faamaoni.” I le suafa o Iesu Keriso, amene.