Elder John D. Amos

I le 2020, na maua ai e Elder John D. Amos se valaauga e suia ai lona olaga e avea ma se peresitene o le misiona mo le Misiona a Baton Rouge Louisiana. E tele mea i lona olaga na manaomia ai se suiga ona o le valaauga, ae sa talia ma le agalelei e Elder ma Sister Amos le tofiga ma le faatuatua.

“O le faaiuga ma le tautinoga ua leva ona faia,” o le saunoaga lea a Elder Amos. “Pe a valaau mai le Alii, na o le tatou tali atu lava.”

Na fanau John D. Amos i le aso 2 o Novema, 1961, i Lafayette, Louisiana, ia John N. Amos Sr. ma Dorothy Victorian Amos. Na feiloa’i ma lona faletua mo le lumana’i, o Michelle Evette Wright, e ala i vasega na la aveina faatasi i le kolisi, ma le la mataupu autu o le faaenisinia eletise.

O Michelle, ua uma ona avea ma se tagata o le Ekalesia, na valaaulia John i se siva a le lotu i le la tafaoga faamasani muamua. Ina ua mavae lena, sa amata ona ia aoao atili e uiga i le Ekalesia ma le matafaioi tutotonu a le Faaola i le talalelei toefuataiina.

“O mea uma e faatatau ia Iesu Keriso,” o lana tala lea. O Ia o le totonugalemu o mea uma.

Sa faaipoipo Elder Amos ma Michelle i le aso 9 o Iuni, 1990, i le Malumalu o Atlanta Georgia. E toatolu le la fanau ma fanau a fanau e toaono.

Ua maua e Elder Amos ni faailoga i le faaenisinia eletise ma faaniukilia. I le taimi o lana galuega, sa tautua o ia i le Neivi a le Iunaite Setete, galue i le Siemens Energy Inc., ma faiaoga i le Iunivesite o Central Florida.

O ona valaauga muamua i le Ekalesia e aofia ai le Fitugafulu Eria (Eria a Amerika i Matu Sautesasae), peresitene o le misiona, fesoasoani i le au peresitene o le siteki, epikopo, fesoasoani i le au epikopo, peresitene o le Aoga Sa a le uarota, failautusi faapitoa a le uarota, taitai vaega o faitaulaga sili, ma le taitai o le vasega pepe.