Aua le Faamaaaina Lou Loto

Na amata le Toefuataiga o le talalelei a Iesu Keriso ina ua faaali mai le Atua le Tama ma Lona Alo Pele i le taulealea o Iosefa Samita, e tali mai ai lana tatalo faamaualalo. I le avea ai o se vaega o le Toefuataiga, na faaliliu e Iosefa Samita le Tusi a Mamona e ala i le meaalofa ma le mana o le Atua. O lea faamaumauga o loo i ai “fegalegaleaiga a le Atua ma tagata anamua o Amerika ma o loo i ai le atoatoaga o le talalelei tumau-faavavau.”

A o ou laitiiti, a o ou faitau i le Tusi a Mamona, sa masani ona ou mafaufau pe aisea na le talitonu ai Lamana ma Lemuelu i upumoni na tuuina mai ia i la’ua, e oo foi ina ua faaali mai se agelu a le Alii ma fetalai sa’o mai ia i la’ua. Aisea na le mafai ai e Lamana ma Lemuelu ona lotomaualalo atili ma usiusitai i aoaoga a lo la tama, o Liae, ma lo la uso laitiiti o Nifae?

Sa ou maua se tasi o tali i lenei fesili i le 1 Nifae, lea na faapea mai na “faanoanoa Nifae ona o le maaa o o la’ua loto.” Sa fesili atu Nifae i ona uso matutua, “E faapefea ona matua maaa o oulua loto, ma tauaso tele i o oulua mafaufau?”

O le a le uiga o le i ai o se loto e maaa?

O le faaliliuga faa-Korea o le “maaa” i le Tusi a Mamona o le 완악 (Wan-Aak: 頑惡). O lenei fasifuaitau o loo faaaoga ai le mataitusi Saina “Wan” (頑), o lona uiga o le “maaa,” ma le “Aak” (惡), o lona uiga o le “amioleaga.” Pe a tatou faamaaa o tatou loto, e faatauasoina i tatou, ma e le mafai ona oo mai mea lelei i o tatou loto po o o tatou mafaufau. E oo ina tatou faafiasili ma amata ona taulai atili atu i manaoga faalelalolagi, ma tapunia o tatou loto i mea a le Atua. Tatou te filifili e taulai atu i o tatou lava mafaufauga ae le taliaina manatu ma taitaiga a isi. Tatou te filifili e le tatala o tatou loto i mea a le Atua ae nai lo lena, i faatosinaga a mea o le lalolagi ma le fili. Pe a faamaaa o tatou loto, tatou te tetee atu i le faatosinaga a le Agaga Paia. Tatou te “telegese ona manatua le Alii,” ma i le aluga o taimi tatou te “le toe lagonaina” Ana afioga.

Sa aoao atu e Alema le nuu i Amonaea e faapea o nisi “o le a teena le Agaga o le Atua ona o le maaa o o latou loto.” Na ia aoao atu foi e faapea “ma o i latou o e e faamaaa o latou loto, e tuu mai ia i latou le vaega itiiti o le afioga, seia oo ina latou lē iloaina se mea e uiga i ana mealilo.” Mulimuli ane, e aluese le Agaga,ma o le a “aveese e le Alii [Lana] afioga” mai ia i latou o e ua faamaaa o latou loto e pei lava o Lamana ma Lemuelu. Talu ai ona sa faaauau pea ona faamaaa e Lamana ma Lemuelu o la’ua loto, tetee atu i lagona o le Agaga Paia, ma filifili e le taliaina upu ma aoaoga a lo la tamā ma Nifae, o lea na iu ai ina la teena upumoni e faavavau mai le Atua.

E ese mai ia Lamana ma Lemuelu, sa faaauau pea ona faamaualaloina e Nifae o ia lava, i le sailia o le taitaiga mai le Agaga o le Alii. O le taui, na faamaluluina e le Alii le loto o Nifae. Ua faasoa mai e Nifae e faapea sa ia “tagi atu i le Alii; ma faauta sa asiasi mai o ia ia te a’u, ma faamaluluina lo’u loto sa oo ina ou talitonu i upu uma na tautala mai ai lo’u tamā.” Na fesoasoani le Alii ia Nifae ia talia, malamalama, ma talitonu i mealilo uma a le Atua ma Ana afioga. Sa mafai e Nifae ona maua le mafutaga faifai pea a le Agaga Paia.

O a ni mea e mafai ona tatou faia ina ia le faamaaaina ai o tatou loto?

Muamua, e mafai ona tatou faatinoina le salamo i aso taitasi.

Na aoao mai lo tatou Faaola “Ai se e salamo ma sau ia te au e pei o se tamaitiiti, o ia lea o le a ou taliaina.” Na aoao mai lo tatou perofeta pele, o Peresitene Russell M. Nelson:

O le salamo o le ki lea i le alualu i luma. O le faatuatua mama e faatumauina lo tatou agai i luma i luga o le ala o feagaiga.

“Faamolemole aua ne’i fefe pe faatuai ona salamō. E fiafia tele Satani i ou faanoanoaga. … Amata i le asō ona lagona le olioli o le tuueseina o le tagata natura. E alofa le Faaola ia i tatou e le aunoa ae aemaise lava pe a tatou salamo.”

A o tatou o’o i le olioli ona o le faamaluluina o o tatou loto ma o mai i le Alii, e avea i tatou “e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā.”

Lona lua, e mafai ona tatou faatinoina le lotomaulalo.

O le salamo i aso taitasi o le a aumaia ai le lotomaualalo i o tatou loto. Tatou te mananao ia lotomaualalo i luma o le Alii, e pei o se tamaitiiti e usitai i lona tamā. Ona tatou maua ai lea o le Agaga Paia e faatasi ma i tatou, ma o le a faamaluluina o tatou loto.

Sa ma masani ma lo’u toalua o Sue i se ulugalii lelei mo le fa tausaga ua mavae. Ina ua ma feiloai muamua ia i la’ua, o le tane o se tagata fou o le Ekalesia, ma sa feiloai lona toalua ma faifeautalai e suesue i le talalelei. E toatele faifeautalai na feiloai ma ia e fesoasoani ia te ia e sau ia Keriso. Sa ma lagonaina sa ia te ia se molimau malosi o le talalelei ma sa iloa e moni le Ekalesia. Sa ia lagonaina soo le Agaga i le taimi o a matou asiasiga ma auai malosi i sauniga uma. Sa fiafia o ia e fegalegaleai ma tagata lelei o le uarota. Ae peitai, sa faigata ia te ia ona ia tuuto atu e ulu ifo i le vai o le papatisoga. I se tasi aso sa ia faitauina le Moronae 7:43–44, lea e faitauina:

“O lenei foi, faauta ou te fai atu ia te outou e le mafai ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.

“Afai e faapea, ua le aoga [lou] faatuatua ma le faamoemoe, ona e leai se tasi e ono talia i luma o le Atua, vagana ai i latou o e ua agamalu ma maualalalo i le loto.”

Ina ua uma ona ia faitauina nei fuaiupu, sa ia iloaina le mea e tatau ona ia faia. Sa manatu o ia ua malamalama i le uiga o le agamalu ma le lotomaualalo. Ae peitai, sa le lava lona malamalama e maua ai le faatuatua ma le faamoemoe e usitai ai i poloaiga a le Atua. Sa tatau ona ia lafoai lona lotomaaa ma lona lava atamai. Sa amata ona ia faamaualaloina o ia lava e ala i le salamo faamaoni. Na amata ona ia malamalama i le lotomaulalo i le silafaga a le Atua. Sa faalagolago o ia i le Tama Faalelagi ma tatalo e faamaluluina lona lava loto. E ala mai i nei tatalo, sa ia lagonaina ai le molimau a le Agaga ia te ia e finagalo le Tama Faalelagi ina ia papatisoina o ia.

Sa faasoa uma mai e le tane ma le ava e faapea, o le tele lava o lo la’ua lotomaualalo, o le tele foi lena o lo la malamalama ai i afioga a le Atua, ma sa faamaluluina o la’ua loto e mulimuli i aoaoga a lo tatou Alii o Iesu Keriso.

Lona tolu, e mafai ona tatou talitonu ma faalagolago i lo tatou Faaola.

O Nifae o se faataitaiga maoae o le faatagaina o lona loto ina ia faamaluluina e ala i le faalagolago i le Alii. Sa ia aoao mai, “ua ou faalagolago ia te oe, ma o le a ou faalagolago pea ia te oe e faavavau. O le a ou lē tuu atu loʼu faalagolago i le lima o le tagata.” E faapena foi, i se faaaliga na tuuina mai i le Perofeta o Iosefa Samita, na fetalai mai ai le Alii, “Ia tuu atu lou faalagolago i lena Agaga lea na te taitaiina e fai mea lelei—ioe, ia fai ma le amiotonu, ia savali ma le lotomaualalo.” Pe a tuu atu lo tatou faatuatuaga i le Alii ma faalagolago ia te Ia, o le a Ia faamaluluina o tatou loto, ma o le a lagolagoina i tatou i o tatou tofotofoga, faafitauli, ma puapuaga.

Afai tatou te salamo faamaoni, faamaualaloina i tatou lava, ma talitonu ma faalagolago i le Alii, o le a faamaluluina o tatou loto. Ona liligi mai lea o Lona Agaga ma faaali mai ia i tatou mealilo o le lagi. O le a tatou talitonu i upu uma ua Ia aoao mai, ma o le a faalolotoina lo tatou malamalama.

O lo tatou Faaola, o Iesu Keriso, o le faataitaiga sili lea o le agamalu. I le 2 Nifae 31:7, tatou te faitau ai, “Tou te lē iloa ea ua paia o ia? Ae e ui ina paia o ia, ua faaali mai e ia i le fanauga a tagata, ua ia faamaualaloina o ia lava e tusa ma la le tino i luma o le Tamā, ma molimau atu i le Tamā o le a ia usiusitai ia te ia i le tausia o ana poloaiga.” E ui lava ina paia ma atoatoa o Ia, ae sa Ia faamaualaloina o Ia Lava i luma o le Tama ma usiusitai ia te Ia e ala i le papatisoina.

I le faaiuga o Lona soifuaga faaletino, sa tuuina atu ai e Iesu Keriso Lona lava finagalo i Lona Tama e ala i le taumafaina o le ipu oona. O lea mafatiaga na afua ai ona “gatete ona o le tiga, …tafe toto ai pu afu uma, ma mafatia ai i le tino atoa ma le agaga.” Na ole atu le Faaola ina ia “aua ne’i inu i le ipu oona, ma mae’e’e.” “E ui i lea,” sa Ia fetalai, “ia i ai i le Tama le viiga, ma sa [Ia] inu ma faauma ai [Ana] tapenapenaga mo le fanauga a tagata.”

Uso e ma tuafafine, ua tuuina mai ia i tatou le faitalia e filifili ai le mea tonu. E mafai ona tatou filifili e faamaaa o tatou loto, pe mafai foi ona tatou filifili e faamaluluina o tatou loto. I o tatou olaga i aso taitasi, e mafai ona tatou filifili e fai mea e valaaulia ai le Agaga o le Alii e afio mai ma mau i o tatou loto. Ou te iloa o nei filifiliga, o loo i ai le filemu ma le olioli.

Ia tatou mulimuli i le faataitaiga a lo tatou Faaola, o Iesu Keriso, o le na mulimuli i le finagalo o le Tama. A o tatou faia lena mea, ua folafola mai e le Alii ia i tatou, “Aua, faauta, o le a ou faapotopotoina i latou e pei ona ofaofatai mai e le matuamoa lana toloai i lalo o ona apaau, pe afai latou te le faamaaa o latou loto.” I le suafa o Iesu Keriso, amene.