O Taimi o le Toefuataiga o Mea Uma

O le faatulagaga aloaia o Le Ekalesia a Iesu Keriso o le Au Paia o Aso e Gata Ai o le taualuga lea o se soloa’iga o aafiaga faavavega. O le uluai aafiaga muamua o nei aafiaga na tupu i le 10 tausaga i luma atu i le itu i matu o le setete o Niu Ioka.

I le tautotogo o le 1820, sa alu ai se taulealea e igoa ia Iosefa Samita i le vao e lata ane i lona fale e tatalo ai. Sa i ai ana fesili e tusa ai ma le faaolataga o lona agaga, ma sa ia naunau ia iloa “pe o le fea o [ekalesia] uma e sa’o, ina ia [ia] iloa pe o le fea e auai ai.” Sa talitonu Iosefa o le a tali mai le Atua i lana tatalo ma faatonuina o ia.

Faamolemole ia manatua e le’i tatalo Iosefa tau ina ia iloa ai le mea e sa’o. Ae, sa ia tatalo ia iloa le mea sa’o ina ia mafai ai ona ia faia le mea sa’o. Sa ole atu Iosefa i le faatuatua ma sa filimaoti e faatino e tusa ai ma tali na ia mauaina.

“I le [tali atu] i lana tatalo faamaoni, sa faaali mai ai le Atua le Tamā ma Lona Alo, o Iesu Keriso ia Iosefa ma amatalia ai loa le ‘toefuata’iga o mea uma’ (Galuega 3:21) e pei ona valo’ia mai i le Tusi Paia. I lenei faaaliga, sa ia aoao ai ina ua mavae le maliliu o ulua’i Aposetolo, sa leiloa ai le Ekalesia a Keriso o le Feagaiga Fou mai le lalolagi.” O le a avea Iosefa Samita ma meafaigaluega e toefuatai tasi mai ai le aoaoga faavae autu, le pule, ma feagaiga ma sauniga o le Ekalesia anamua a le Faaola.

Sa faamautinoa mai e Iosefa: “Sa ou vaaia ni Tagata e toalua, o lo la’ua pupula ma le mamalu e lē mafaamatalaina, o tutu mai i o’u luga ae i le ea. Sa fetalai mai le tasi o i la’ua ia te a’u, ma valaau a’u i lo’u igoa, ma fetalai mai, a o tusi ane i le tasi—O Lo’u Atalii Pele lenei. Faalogo ia te Ia!”

E ala mai i lenei faaaliga ma aafiaga faalelagi na sosoo mai ai, na malamalama ai Iosefa Samita e faapea, sa silafia o ia o se tagata patino e le Atua ma Iesu Keriso, e amana’ia lona faaolataga e faavavau, ma e i ai se misiona mo ia e faatino. Sa ia aoaoina ai foi lesona taua e uiga i uiga paia, amio, ma atoatoaga o le Aigaatua—ma o le Tamā ma le Alo e mavaevae ma o ni Tagata e ma’oti. O Iesu Keriso o le Alo totino o le Atua i le agaga ma i la le tino.

Na tautino mai e Iosefa Samita e faapea, o le Tama Faalelagi ma Iesu Keriso o ni tagata eseese e toalua. Fai mai a ia, “Ua i ai i le Tamā se tino o aano ma ivi e mafai ona paʼi i ai e pei o le tagata; ua faapea foi le Alo; ae o le Agaga Paia e leai se tino o aano ma ivi, ae o se peresona Agaga.”

Ou te molimau atu o le asiasiga a le Tamā ma le Alo ia Iosefa Samita o le gaoioiga faama’ite maoa’e lea i le “toefuataiga o mea uma na fetalaia e fofoga o perofeta paia uma talu mai le amataga o le lalolagi.”

O le lona lua i le soloa’iga o aafiaga faavavega na tau atu ai i le faatulagaina aloa’ia o le Ekalesia toefuatai a le Faaola, o le faaliliuga ma le oo mai o le Tusi a Mamona.

“O Iosefa Samita na tu’u i ai le meaalofa ma le mana o le Atua e faaliliu ai se faamaumauga anamua: le Tusi a Mamona—O Se Tasi Molimau ia Iesu Keriso. … O loo aofia ai i itulau o lenei anotusi paia se tala e uiga i le galuega patino a Iesu Keriso i tagata i le Itulagi i Sisifo i le faato’ā mavae ai o Lona Toetu. [O le Tusi a Mamona] o loo aoao mai ai le faamoemoega o le olaga ma faamalamalama mai ai le mataupu faavae a Keriso, lea e faatotonugalemu i ai lena faamoemoega. I le avea ai o se tusitusiga paia e soa ma le Tusi Paia, o loo molimau mai ai le Tusi a Mamona e faapea, o tagata soifua uma o ni atalii ma ni afafine a se Tamā i le Lagi alofa, ua i ai ia te Ia se fuafuaga paia mo ō tatou olaga, ma o Lona Alo, o Iesu Keriso, o loo fetalai mai i aso nei e pei foi ona i ai i aso anamua.”

I le avea ai ma tagata o le Ekalesia toefuatai a le Faaola, “Matou te talitonu o le Tusi Paia o le afioga ia a le Atua e tusa ma mea ua tonu ona faaliliuina; matou te talitonu foi o le Tusi a Mamona o le afioga ia a le Atua.” O le Tusi a Mamona o se tasi molimau ia Iesu Keriso, e faamautuina le moni o le Tusi Paia, ma toefuatai mai ai upumoni manino ma le taua ia na leiloloa mai le Tusi Paia.

Ua aoao mai e Le Ekalesia a Iesu Keriso o le Au Paia o Aso e Gata Ai e faapea, o le uluai Ekalesia na faavae e le Faaola, faatasi ai ma lona pule paia, aoaoga faavae autu, ma feagaiga ma sauniga, na leiloloa mai le lalolagi. E avea o se vaega o le toefuataiga o mea uma na valoia i aso e gata ai, sa faaee patino ai e perofeta ma aposetolo anamua le pule o le perisitua i luga o Iosefa Samita ma tuuina atu ki o le perisitua ia te ia. O le lona tolu lea i le soloa’iga o aafiaga faavavega na tau atu ai i le faatulagaga aloaia o le Ekalesia toefuatai a le Faaola.

O le pule o le perisitua e faataga ai auauna a le Atua “e fai ai ma sui o [Ia] ma galulue ai i Lona suafa.” “O ki o le perisitua o le pule lea e taitai ai le faaaogaina o le perisitua e fai ma sui o fanau a le Atua.”

I lalo o le taitaiga a le Tama ma le Alo, sa toefuata’i mai ai e Ioane le Papatiso, i le 1829, le pule e papatiso ai e ala i le faatofuina mo le faamagaloga o agasala. I lena lava tausaga, na toefuatai ai e le toatolu o ulua’i Aposetolo—o Peteru, Iakopo, ma Ioane—le tofi faaaposetolo ma le pule faaopoopo ma ki o le perisitua ki.

Ono tausaga i le mavae ai o le faatulagaina aloaia o le Ekalesia, i le Malumalu o Katelani, na tuuina atu ai e Mose, Elaia, ma Elia ia Iosefa le pule tatau e faataunuu ai le galuega a le Atua i aso e gata ai.

O Mose sa tuuina mai ki o le faapotopotoina o Isaraelu.

O Elaia na tuuina mai le tisipenisione o le talalelei a Aperaamo, e aofia ai ma le toefuataiga o le feagaiga faaAperaamo.

O Elia na tuuina mai ki o le mana faamau, e aumaia ai le pule e mafai ai ona fusifusia sauniga e faatino i le lalolagi i le faavavau, e pei o le tuufaatasia o aiga i sootaga faavavau e oo i talaatu o le oti.

A o faaliliu e Iosefa Samita le Tusi a Mamona, sa ia maua faaaliga e ta’u mai ai o le a toefaavae le Ekalesia a Iesu Keriso. Ae na faatonuina Iosefa e le Alii e aua nei faatulagaina loa lava le Ekalesia. Ae, “e ala i le agaga o valoaga ma faaaliga” na faaalia ai e le Alii ia Iosefa “le aso tonu lava … e tatau ai ona [ia] faaauau e [toe] faatulaga Lana Ekalesia i le lalolagi.”

Sa faatulaga le Ekalesia i le faagasologa tatau ina ua uma ona toefuatai mai le perisitua ma le lolomiina o le Tusi a Mamona. O uluai kopi o le Tusi a Mamona na maua i le aso 26 o Mati, 1830, ma sa faatulaga aloaia le Ekalesia i le aso 6 o Aperila.

“O Le Ekalesia a Iesu Keriso o le Au Paia o Aso e Gata Ai … o le Ekalesia lea o le Feagaiga Fou a Keriso ua toefuatai. O lenei Ekalesia ua taula i le soifuaga ato’atoa o lona ma’a tulimanu, o Iesu Keriso, ma i Lana Togiola lē i’u ma le Toetu moni. Ua toe valaauina e Iesu Keriso ia Aposetolo ma tu’u atu ia i latou le pule o le perisitua. Ua Ia valaaulia i tatou uma ia ō mai ia te Ia ma Lana Ekalesia, ia maua le Agaga Paia, o sauniga o le faaolataga, ma ia maua le olioli tumau.”

O le faaali ane o le Tamā ma le Alo ia Iosefa Samita, o le faaliliuga ma le oo mai o le Tusi a Mamona, ma le toefuataiga o le pule o le perisitua ma ki, o ni mea e tatau ai e manaomia mo le faatulagaina o le Ekalesia toefuatai a le Alii i le 195 tausaga talu ai i le asō.

I le Feagaiga Tuai, na faaliliuina ai e Tanielu se miti e uiga i se maa o le a tofia mai mauga ae le tofia e ni lima ma ufitia ai le lalolagi uma. E tasi le tausaga i le mavae ai o le faatulagaga o le Ekalesia, sa faatonuina ai Iosefa Samita e le Alii e faapea o ki o le malo o le Atua “ua tuu atu i tagata i luga o le lalolagi” ma o le “talalelei [a Iesu Keriso o le a] taavale atu i luma i tuluiga o le lalolagi, e pei o le maa na tofi mai le mauga e aunoa ma lima.”

Ou te molimau atu: O loo faataunuuina e le Alii Lana folafolaga. O le Ekalesia toefuatai a le Faaola ua faavaeina i le lalolagi atoa, ma o le meafaigaluega lea o le a “faapotopoto faatasi ai [e le Atua] ia tasi mea uma ia Keriso, o i latou uma lava o i le lagi, atoa ma i latou o i le lalolagi; ma ia te ia foi.”

O le galuega a le Alii i aso e gata ai “o se fuafuaga na faananau i ai le nuu o le Atua i tupulaga uma; ma o se manatu autu lea na tulimatai i ai ma se fiafia uiga ese ia perofeta, ositaulaga ma tupu; na latou tulimatai i ai ma se faamoemoega fiafia mo le aso lenei ua tatou ola ai; faatasi ai ma le uunaiga o faamoemoega faalelagi ma le fiafia na latou pepese ai ma tusitusia ma valoia lo tatou aso lenei.”

I lenei tisipenisione o le talalelei silisili ma le mulimuli, “o se tuufaatasiga atoa ma o’oo’o ma atoatoa, ma se sooga mau faatasi o tisipenisione, ma ki, ma mana ma mamalu, ma faaali mai e amata mai i aso o Atamu e oo mai lava i le taimi nei. Ma ua le gata i lenei, ae o mea na sa lei faaalia mai lava mai le faavaega o le lalolagi, … o le a faaalia … i le tisipenisione lenei o le atoaga o taimi.”

Na toe faamalamalama e le Perofeta o Iosefa, “O sauniga uma ma tiute ua manaomia i soo se taimi lava e le Perisitua, i lalo o le taitaiga ma poloaiga a le Silisiliese i soo se augatupulaga, o le a i ai uma lava i le augatupulaga faaiu, … e faataunuuina ai le toefuataiga na taua mai e fofoga o Perofeta Paia uma lava.”

Sa ou taumafai e aotele elemene faavae o le “tala lelei” e sili ona taua ma viia e mafai e soo se tasi i soo se mea i le lalolagi ona maua—o le savali e faapea, na toefuatai mai e le Alii o Iesu Keriso Lana talalelei ma le Ekalesia i aso e gata ai.

Ou te valaaulia tagata uma ia aoao ma faamaonia le savali lenei. Ou te folafola atu o tagata “e suesue ma le agaga tatalo i le sāvali o le Toefuata’iga ma galulue i le faatuatua o le a faamanuiaina [e ala i le mana o le Agaga Paia] e maua ā latou lava molimau e uiga i lona paia ma lona faamoemoega e saunia le lalolagi mo le Afio Mai Faalua o lo tatou Alii ma le Faaola, o Iesu Keriso, ua folafola mai.” A o e tatalo ma le lotofaamaoni faatasi ma le faamoemoe e maua ma galue i se tali mai le Atua, e faapei ona faia e le talavou o Iosefa Samita, o le a faateleina lou gafatia e iloa ai ma tali atu i lena molimau paia.

Ou te molimau atu o le Atua, le Tama e Faavavau, o lo tatou Tama. Ou te tautino ma molimau atu o Iesu Keriso o le Alo Pele o le Tamā ma Lona Alo e Toatasi na Fanaua i le tino. O Ia o lo tatou Faaola, ma lo tatou Togiola.

Ma ou te molimau atu ma le fiafia na faaali atu le Tama ma le Alo i le taulealea o Iosefa Samita, ma o lea na amata ai le Toefuataiga mai o le talalelei a Iesu Keriso i aso e gata ai. O le Tusi a Mamona o se tasi molimau ia Iesu Keriso ma o loo i ai le afioga a le Atua. Ua toe i ai i le lalolagi le pule o le perisitua e suitulaga i le Faaola ma galulue ai i Lona suafa. Ma O Le Ekalesia a Iesu Keriso o le Au Paia o Aso e Gata Ai, o le Ekalesia lava lea a Keriso o le Feagaiga Fou ua toefuata’iina mai. Ou te tuuina atu la’u molimau mautinoa o nei mea uma e moni, i le suafa paia o le Alii o Iesu Keriso, amene.