Ia Mauaina Lana Meaalofa

O le foai atu o meaalofa o se agaifanua faaagafesootai ua soo ai aganuu uma, malo, ma taimi uma. I le gasologa o taimi, ua tuu atu ai e tagata meaalofa i le tasi ma le isi e faamalolosia ai sootaga, faailoa atu le alofa ma le lotofaafetai, ma faailoga ai mea taua e tutupu e pei o faaipoipoga, aso fanau, ma aso malolo. Ma o tagata e le na o i latou o foafoaga a le Atua e foai atu meaalofa i le tasi ma le isi! I le tele o isi faataitaiga e mafai ona tatou faasino i ai, o penekuini ua lauiloa latou te tuuina atu iliili fe’ilafi i a latou paaga, ma bonobos (o tausoga o le manuki) e tuuina atu fua suamalie e faalautele ai la latou li’o o faigauo.

O a meaalofa ua e tuuina atu! Mafaufau i se taimi na e maua ai—pe sa faia ai—se meaalofa atoatoa mo se tasi e te alofa i ai. Faatoa e iloa o le meaalofa o le mea tonu lava lea sa manao ai lenei pele ma se mea o le a latou faatauaina. O le a le meaalofa? Pe sa mo lou tina? se uo? lau tama? se faiaoga? lou tamamatua? O a ni ou lagona ina ua e maua lenei meaalofa? Na faapeῑ ou lagona ina ua e mafaufau i lenei tagata e te alofa i ai o tatalaina le meaalofa? E faapena foi, o anafea na avatu ai e se tasi ia te oe se meaalofa talafeagai, ma o le a se faalogona i le mauaina o lena meaalofa?

Ina ua tusa ma le fitu o’u tausaga, a o nonofo ai ma o’u matua i Arapia, sa amata faaalia se atatifaga a tamaiti e igoa o le Chitty Chitty Bang Bang. O le atatifaga e faatatau i se taavale faamaneta lea e mafai ona aveina ia lava, faaopeopea i luga o le vai, e mafai foi ona lele! Sa ou iloaina i lo’u atunuu o Egelani, sa latou faia se tama’itaavale meataalo e pei lava o le Chitty Chitty Bang Bang, oka so’u manao i sa’u taavale! E mafai ona e tosoina le ‘au ona tulioso mai lea o apaau o le taavale meataalo! Sa alu lo’u tamā i sana malaga faapisinisi i Egelani ma sa fesili mai pe i ai se mea na ou manao e sau ma ia mo a’u, ma sa ou ta’u atu ia te ia lo’u manao tele i se tasi o na taavale Chitty Chitty Bang Bang.

Sa foi mai lana malaga, ae leai se taavale na aliali mai. Sa ou matuai faanoanoa lava ma ou faapea ifo ai na galo ia te ia. Peitai, pe tusa ma le 10 aso mulimuli ane o lo’u asofanau, ma sa i ai se tamai afifi na manaia lona afifiina, sa faatalitali mo au. Faatasi ai ma se naunautaiga tele, ma e faalē o tele se faamoemoe, sa ou tatalaina le meaalofa ma maua ai la’u taavale. O le tele naua o lo’u fiafia na ou tagi ai. Sa ou tosoina le ‘au, ma sa tulioso mai i fafo apaau, e faapei lava o le taavale i le atatifaga! Sa ou faafetai tele i lo’u tamā mo lenei meaalofa sili. Sa ou taalo i lena taavale mo le tele o tausaga, ma sa ou teuina mo nisi tausaga se tele. Ou te masalo sa fiafia lo’u tamā e foai mai ia te au lena taavale e faapei foi ona ou fiafia e taliaina.

E mafai ona tatou mafaufau i le foai atu o meaalofa faapea e tolu ni vaega o i ai:

1. O le foai atu o le meaalofa, lea e filifili ai le na te foai atu, fai, pe saunia le meaalofa ma tuuina atu i lē e alofa i ai. E aofia ai i lenei mea se manatu magafagafa a lē na foa’ia e avatu se mea ‘anoa.

2. O le taliaina ma le tatalaina o le meaalofa, pe a taliaina e le tagata e onaina ma aveese mai le meaalofa mai lē na foa’ia, —e tele ina faia ma faailoaga o le ofo, lotofaafetai, ma le sagisagi fiafia, a o le’i tatalaina, o nisi taimi o le se’iina o le lipine ma tatala le afifi ia iloa ai pe o le a le meaalofa.

3. Ona i ai lea atonu o le vaega aupito i taua o le mauaina o le meaalofa. O le mauaina ma le loto faamaoni o se meaalofa e matuai sili atu nai lo le taliaina ona tatalaina lea. E sili atu foi, nai lo le iloaina o le taua o le meaalofa ma le faailoa atu o le lotofaafetai i lē na foai atua. Ina ia mauaina moni se meaalofa, tatou te faatauaina mo i tatou lava, faaaoga atoa i o tatou olaga, ona manatua lea ma le lotofaafetai le tagata na foai atua.

O le mauaina o se meaalofa e lē o se mea e faifua ae o se faagasologa ma le loto i ai ma le anoa, e sili mamao atu i le na ona tatalaina o se afifi. Ina ia mauaina o le talisapaia ma faafesootai ai le meaalofa ma le loto o le na foa’ia, i se ala e faamalolosia ai noataga i le va o lē na te foa’ia ma lē na te talia. I le mafaufau ai i lena taavale meataalo e toe faafoi mai ai se anoanoai o manatuaga auro, a o o’u toe lagonaina le alofa loloto ma le amana’ia o a’u e lo’u tamā, na faaalia i lena meaalofa ma isi mau faatinoga alofa.

Ua i ai i lo tatou Tamā Faalelagi ni meaalofa e lemafaitaulia o le malamalama ma le upumoni ua saunia e liligi ifo i o tatou luga taitoatasi, o Ana fanau faapelepele. E tafe mai lo tatou Foai Agalelei e faapei o se vaitafe i le vao lafulafuā mai Lona finagalo agaalofa. “O mea lelei uma e foaifua mai, atoa ma meaalofa uma e atoatoa ona lelei, mai lugā lava ia, e alu ifo mai le Tamā o malamalama.” I la tatou maliega faalefeagaiga ma le Tamā, o Ia lava o Le e Foa’ia i taimi uma, a o tatou lava o ē faatauvaa e taliaina.

Ae e leai se mea e mafai ona tatou maua e aunoa ma le meaalofa aupito silisili o meaalofa uma a le Tamā, o Lana Tamai Mamoe Pele, Lona Alo o Iesu Keriso. O meaalofa uma a le Tamā e tafe mai ma ua faagaoioia e le taulaga naunauta’i a le Faaola i Ketesemane ma i luga o le satauro, ma Lona Toetu manumalo. O Iesu Keriso, lo tatou Togiola alofamutimutivale, o le meaalofa aupito i maualuga mai lo tatou Tamā o malamalama. “I le meaalofa a lona Alo ua saunia ai e le Atua [mo i tatou] se ala e sili atu ona lelei.”

Ou te fia talanoa atu i se meaalofa e tasi e aofia ai mea uma o upumoni e faavavau lea e lagolago ai lo tatou tomai e mauaina ai isi mea uma e finagalo lo tatou Tama e faaeeina mai ia i tatou—o se meaalofa taua o le malamalama lea, a taliaina ma le atoatoa ma a mauaina i le ta’ele o le agaga e mafaufau ai i le matalalaga o le olioli ma faigata o le olaga, ma a tatou fesili e le’i taliina: O i tatou moni o fanau a le Atua. O lena upumoni e maoae! E ofoofogia! Ma e lē faafaatusa.

Manatu faapea faatoa e faalogo i lenei mea mo le uluai taimi! O oe moni lava o Sona afafine faapelepele. O oe moni lava o Sona atalii faapelepele. O le ala foi o loo e i ai o Lana fuafuaga o le fiafia. Faatasi ai ma Lona alofa silisiliese, Na Te silafia lelei lou tagata a’o lei auina mai oe i le lalolagi ma le mea ua e oo i ai i lou olaga faitino, ma na Ia fuafuaina ma le alofamutimutivale mea uma mo lou lumanai atoa. Oi, ma Lona naunau ia i ai se aso e te toefoi atu ai ia te Ia, ia mauaina le faamoemoe laualuga o Ana meaalofa matagofie uma, o le ola e faavavau faatasi ma Ia.

O le fesili e lē o le, pe moni lenei meaalofa o le upumoni ae pe o le a tatou iloa ma mauaina. Ua uma ona faaee i o tatou luga le meaalofa e le Tamā. O le tau mo le faamoemoega laualuga o lea meaalofa ua uma ona totogi e le Faaola. Ae afai na aoaoina oe i lenei upumoni, ta’u atu, ma usuina mo le tele o tausaga, atonu la ua leva ona mou atu le maofa ofoofogia i lea mea, ma ua e le toe lagonaina lona mana ma le filemu.

Afai o lenei meaalofa e lemafaatauina o le malamalama—ma mea lelei uma, filemu, ma le faamoemoe lea e tafe mai ai—e taatitia e le taliaina, e le tatalaina, ma e le mauaina, se ma’imau ina a matautia mo i tatou! O se faanoanoaga tele mo Le Na Foa’ia. “Aua se a le aoga i se tagata pe afai ua foai atu ia te ia se mea alofa a e na te le talia le mea alofa? Faauta, e lē olioli o ia i le mea ua tuu atu ia te ia, pe olioli foi ia te ia o lē na tuuina mai le meaalofa.”

Ou te valaaulia outou a le o le taimi muamua, pe i se tulaga ua sili atu nai lo se isi taimi, le maoae o le iloaina o oe lava o se atalii/afafine pele o le Atua. E tatau ona e se’ia le lipine, sasae ese le pepa afifi, ma tatala le pusa, ma talia ma le naunautai faatasi ai ma le lotomaualalo faafetai se malamalama moni, ma le mamā a’ia’i o lenei upumoni faavae. E mafai e le Agaga Paia ona molimauina i lou loto o oe moni o se atalii/afafine o Le Silisiliese.

Pe a e talileleia ma le naunautai lenei mea moni malualii i lou lava agaga, e suia ou uiga ma le vaaiga masani! E mafai ona e lagonaina Lona alofa, faalogoina Lona siufofoga, ma iloa Lona aoao, tusa lava po o le a le mea o tupu, pe le o tupu i lou olaga. E mafai ona e toe faauigaina le ala e te vaai ai ia te oe lava ma isi. O le a oo ina malosi atu la oulua sootaga o feagaiga ma lou Faaola, ma e ala i tioata o lenei meaalofa ofoofogia, o le a maua ai e le olaga se susulu fou, matagofie, ma le faamoemoe.

Faamolemole, ia e tatalo ina ia malamalama pe ua e mauaina moni lenei liua malamalama loloto i lou agaga? E mafai faamolemole ona e taliaina le meaalofa? Pe e te faia ea i le loloto sili atu, saoloto sili atu, ma faateleina sili atu nai lo le taimi muamua—ma i le faia faapea ia sasaa sautualasi mai ai ma isi meaalofa uma e o mai faatasi ai?

E te ono manatunatu, “O le a se mea e tatau ona ou fai ia mauaina ai lenei meaalofa mai le Atua?” O le mea moni lava ia, e leai se mea. O se meaalofa mai Lē Foa’ia. Ua na o se mea moni lena. Na o le aumai lava i totonu. O oe o Lona afafine/atalii. E pele oe ia te Ia. Aua ne’i faafenumia’ia. Aua ne’i polokaina le mauaina o lenei meaalofa i mafaufauga faapea e le tatau ona e mauaina. O le mea moni, e leai se tasi o i tatou “ua tatau ai”—ia meaalofa uma a le Tamā e na o galuega, alofamutimutivale, ma le alofa tunoa o le Mesia Paia” e mauaina ai, ae maeu le naunau o Lona finagalo alofa mo Ana fanau taitoatasi ia mauaina! O lea la, a o oo mai lou malamalama fou pe faafouina ia te oe, ia olioli i le faafetai i lē Foa’ia maia lenei meaalofa.

Talu mai le mauaina o lo’u faatuatua i le 20 ma ona tupu o o’u tausaga, na fagua ai lava a’u e iloa o a’u moni o se atalii o le Atua. O le tele o le atoatoa o le teulotoina o lenei meaalofa, o le tele foi lea na ou iloa ai ma le naunautai pe o ai a’u, ma le atoatoa o le alofaina o a’u. O nisi o mea na fesoasoani ia te au e faatupula’ia ai lo’u malamalama o upu o tusitusiga paia, o lo’u faamanuiaga faapeteriaka, tapuai i le malumalu, auauna atu i isi, faaalia o le agaga faafetai, ma le tatalo paia i lo’u Tamā. Ou te maofa lava i le ala semanu e toe faatulagaina ai, faamafanafaina ma foia ai le tele o faanoanoaga, tiga ma le faavauvau i lo’u olaga, pe a na ou iloaina lenei upumoni matagofie.

Ua apoapoai mai Moronae ia i tatou ia “outou le faafitia meaalofa a le Atua,” ae ia “o mai ia Keriso ma taofimau i meaalofa lelei uma.” E mafai ona outou o mai ia Keriso ma le mautinoa i Lona alofa agalelei ma mauaina Ana meaalofa uma o le olioli, filemu, faamoemoe, malamalama, upumoni, faaaliga, atamai, ma le poto—ma o outou ulu o faaeaea i luga, o outou lima faaloaloa, ma o outou lima matala, ua saunia e mauaina. Ma e mafai ona e mauaina nei meaalofa ona ua mautu o ma faavae i le malamalama faapea o oe o se afafine pele o le Atua, o oe o se atalii faapelepele o le Atua, ma ua Ia ofoina atu ia te oe Lona Alo paia atoatoa e togiolaina oe, tauamiotonuina oe, ma faapaiaina oe.

O oe o se atalii/afafine o le Atua. Ua le na o se pese manaia lenei tatou te usuina. Faamolemole pe o le a e talia, tatala, ma maua lenei meaalofa o le atamai ma le malamalama mai ia te Ia? Pe o le a e taofimau i ai o se ‘oa taua? Toe-maua lenei meaalofa, pe atonu foi ia mauaina moni mo le uluai taimi, ma tuu atu e suia ai vaega uma o lou olaga. O le ala aupito sili lea ona lelei ua saunia e le Atua mo oe e ala i le meaalofa o Lona Alo. Ua e i ai ina ia e maua le olioli! I le suafa o Iesu Keriso, amene.