Auai ma Sauniuni mo le Toefoi Mai o Keriso

I le “taua tele o lenei tulaga ua tatou i ai,” a o faalautele atu le malo o le Atua ma ua tele malumalu i le lalolagi, o loo i ai se manaoga faatupula’ia mo agaga naunautai e auai i le galuega a le Atua. O le auauna atu ma le le manatu faapito o le ute tonu lea o le avea ma soo o Keriso. Peitai o le auauna atu e seāseā faigofie. O le mafuaaga lea ou te faamemelo ai ia te outou o soo tausi feagaiga, e aofia ai o tatou faifeautalai pele, o e ua faataatia ese o latou manao ma luitau ina ia auauna atu i le Atua e ala i le tautuaina o Ana fanau. E “fiafia le Atua e faamamaluina [outou mo le auauna atu ia te Ia] i le amiotonu.” Ua Ia folafola mai, “E sili lava lo latou taui, e faavavau foi lo [outou] mamalu.” Pe a tatou fai atu ioe e auauna atu, ua tatou fai atu ioe ia Iesu Keriso. Ma a tatou fai atu ioe ia Keriso, ua tatou fai atu ioe i le olaga sili ona tamaoaiga e mafai ona maua.

Sa ou aoaoina lenei mea a o o’u faigaluega ma a’oga faaenisinia kemikolo i le kolisi. Sa talosagaina a’u e avea ma tagata e fuafuaina gaoioiga mo se uarota a le au nofofua. Sa o se valaauga taufaafefe lea mo a’u. Ae, na ou taliaina lava, ma i le taimi muamua sa lē mālie. Ona oo lea i se tasi gaoioiga sa matuai ofo lava se teine lalelei i le auala na ou tufaina ai le aisakulimi. Sa fo’i faatolu mai ma lona faamoemoe ia ou āno atu. Sa logoitino lo ma alofa, ma e na o le lua vaiaso mulimuli ane ae faamalamalama mai o ia ia te a’u. Ia, atonu e lē o le vave lena, ma o a’u foi na faamalamalama, ae o le mea moni lenei: ou te gatete i le mafaufau i le misia o lo’u feiloai ia Heidi, pe a na ou fai atu leai i lena valaauga.

Tatou te punouai i le galuega a le Atua e le faapea ona e manaomia e le Atua i tatou, ae ona tatou te manaomia le Atua ma Ana faamanuiaga e tele. Ua Ia folafola mai, “Aua, faauta, o le a ou faamanuiaina i latou uma o e e galulue i lo’u tovine i se faamanuiaga tele.” Sei ou faasoa atu ni mataupu faavae se tolu o loo aoao mai ai le auala e faamanuiaina ai i tatou ona o lo tatou auai i le galuega a le Atua ma fesoasoani e saunia ai i tatou e feiloai ma le Faaola.

Muamua, a o tatou auai, tatou te aga’i atu ai i le “faataunuuina o le faamoemoe o [lo tatou] foafoaga”

Tatou te aoaoina lenei mamanu i le tala o le Foafoaga. I le mae’a ai o aso taitasi o le galuega, sa faamaonia e le Atua le agai i luma na faia i le faapea atu “Ua lelei.” Sa lei fetalai o Ia ua mae’a le galuega pe ua atoatoa. Ae o le mea sa Ia fetalai ai e faapea, sa alualu i luma, ma i fofoga o le Atua, ua lelei lea!

O valaauga e le filima’otia ai pe faamautu ai le taua po o le agavaa o se tagata. Ae, a o tatou galulue ma le Atua i soo se mea e finagalo ai o Ia, tatou te tuputupu a’e i le faataunuuina o le faamoemoega o o tatou lava foafoaga.

E olioli le Atua i lo tatou alualu i luma, ma e tatau foi ia i tatou, e tusa lava pe o i ai pea ni a tatou galuega e faia. E i ai taimi, e ono leai so tatou malosi po o mea e auauna ai i se valaauga. Ae, e mafai lava ona tatou auai i le galuega ma puipui a tatou molimau e ala i auala anoa e pei o le tatalo ma le suesueina o tusitusiga paia. E le tausalaina e lo tatou Tama Faalelagi alofa i tatou pe a tatou loto i ai ae ua le mafai ona auauna atu.

Lua, o le auauna atu e siitia ai o tatou fale ma falesa o ni nofoaga paia e mafai ona tatou faata’ita’ia ai le ola i feagaiga.

Mo se faataitaiga, o la tatou feagaiga ia manatua pea Keriso e faia taitoatasi, ae e faatino lenei feagaiga a o tatou auauna atu i isi. O valaauga e siomia ai i tatou i avanoa e “tauamo … avega a le tasi ma le isi, ma faataunuu ai le tulafono a Keriso.” A tatou auauna atu ona tatou te alolofa i le Atua ma mananao e ola i a tatou feagaiga, o auaunaga ia e foliga mai o se tiute ma faavaivaia ai, e avea o se mea fiafia ma suia ai.

E lē faasaoina i tatou e sauniga ona latou te faataunuu ai se lisi faalelagi o mea e fai. Ae, a tatou ola i feagaiga e fesootai ma nei sauniga, e avea i tatou ma ituaiga o tagata e mananao ia i ai i le afioaga o le Atua. O lea malamalama e faatoilalo ai le faatuatuai e auauna atu po o le filimana’o e le galue. O la tatou tapenaga e feiloai ma Iesu Keriso e saoasaoa pe a tuu lo tatou fesili pe o a mea o le a faataga e le Atua ae amata ona fesili pe o a mea e finagalo ai le Atua.

Tolu, o le auai i le galuega a le Atua e fesoasoani tatou te maua ai le meaalofa a le Atua o le alofatunoa ma lagona ai Lona alofa tele.

Tatou te le maua ni taui tautupe mo le auauna atu. Ae, ua aoao mai le mau e faapea mo a tatou “galuega [e tatau ona tatou] maua le alofa tunoa o le Atua, ina ia mafai ona [tatou] tutupu malolosi i le Agaga, [maua] le malamalama o le Atua, [ma] aoao atu ma le mana ma le pule mai le Atua.” O se galuega lelei tele lena!

Ona o le alofa tunoa o le Atua, o o tatou gafatia po o ni lē gafatia e le o le faavae autu lea o le tuuina atu po o le taliaina foi o se valauga. E le o faamoemoe le Atua i se faatinoga atoatoa, po o se taleni iloga e auai ai i Lana galuega. A na fai o lea, semanu e le faasaoina e le Masiofo o Eseta lona malo, semanu e le ta’ita’ia e Peteru le uluai Ekalesia, ma semanu foi e le avea Iosefa Samita ma perofeta o le Toefuataiga.

A o tatou galulue i le faatuatua e faia se mea i talaatu o lo tatou mafai, e aliali ai lo tatou vaivaiga. E le lagolelei lava lenei mea, ae e tatau mo i tatou ona “iloa o le alofa tunoa o le [Atua], … tatou te maua ai le mana e fai ai nei mea.”

O le a tele taimi tatou te pauu ai a o tatou auai i le galuega a le Atua. Ae i a tatou taumafaiga, e sapo i tatou e Iesu Keriso. Na Te siiae malie i tatou ia iloa le laveaiga mai le toilalo ma le fefe ma mai lagona e pei o le a le lava lava lo tatou lelei. Pe a tatou tuuto atu a tatou taumafaiga faalē’a’u’a’u ae aupito sili, e faateleina e le Atua. Pe a tatou ositaulaga mo Iesu Keriso, Na te faapaiaina i tatou. O le mana faaliliu lea o le alofa tunoa o le Atua. A o tatou auauna atu, tatou te tuputupu a’e i le alofa tunoa seia oo ina tatou saunia e “si’i a’e e le Tamā, e tutu i luma [o Iesu Keriso].”

Ou te le iloa mea uma o le a fesili mai ai le Faaola ia te au pe a ou tu i Ona luma, ae atonu o se tasi fesili o le, “O ai na e sau ma aumai?” O valaauga o ni meaalofa paia mai se Tama Faalelagi alofa e fesoasoani e aumaia ai isi faatasi ma i tatou ia Iesu Keriso. O lea ou te valaaulia ai taitai ma i tatou taitoatasi, e saili atili ma le loto i ai mo i latou e leai ni valaauga. Faamalosiau ma fesoasoani ia i latou ia auai i le galuega a le Atua e fesoasoani latou te saunia ai mo le toefoi mai o Keriso.

Sa le’i toaga Ioane i le Lotu i le taimi na asiasi i ai lona epikopo ma ta’u atu ia te ia, o loo i ai se galuega a le Alii mo ia e fai. Sa ia valaaulia Ioane e tuu le ulaula. E ui ina sa tele taimi na taumafai ai Ioane e tuu, ae sa ia lagonaina i le taimi lea se mana e lē mavaaia o fesoasoani ia te ia.

Na o le tolu vaiaso mulimuli ane, ae asiasi atu le peresitene o le siteki ia Ioane. Sa ia valaauina o ia e galue i le au epikopo. Sa te’i Ioane. Sa ia ta’u atu i le peresitene o le siteki, o lea faatoa tuu lana ulaula. Afai la o lona uiga o le a tatau ona ia lafoa’ia lana tumasani o le alu i taaloga soka faapolofesa i le Aso Sa, o lona uiga la, ua matuai tele naua mea e tatau ona tuu. O le tali musuia a le peresitene o le siteki sa faigofie: “Ioane, ou te le o fesili atu ia te oe; o le Alii.”

Lea na tali atu ai Ioane, “Afai la o lea, o le a ou auauna atu.”

Sa ta’u mai e Ioane ia te au, o nei osigataulaga e auauna atu o itu ia na tosina ai le suiga faaleagaga mo ia ma lona aiga.

Ou te le iloa pe i ai ni itu tatou te tauaso ai, o le lē mafai ona tuuina atu valaauga i tagata o ē e foliga mai i la tatou vaai faaletagata e le fetaui pe lē agavaa. Pe atonu foi tatou te popole tele i se faamoemoega i se aganuu o faatinoga nai lo le aoaoga faavae autu o le alualu i luma, ma lē amana’ia ai ona vaai i le auala e faateleina ai e le Faaola le gafatia i le lē fetaui po o le lē agavaa ma le lē faamaonia e ala i le tuuina atu i ai o avanoa e auauna atu ai.

Ua aoao mai e Elder David A. Bednar le taua o le poloaiga faaletusipaia e “tuu atu i [tamaitai ma] alii uma e aoao o latou] tiute, ma ia galulue.” O tatou faia lea mea? Pe a tuu atu e taitai ma matua ia isi e aoao ma galulue mo i latou lava, latou te fuga mai ma lauusiusi. E ui atonu o le ala faigofie o le avatu i tagata faamaoni o le au paia se valaauga lona lua, ae o le ala aupito silisili o le valaaulia lea o ē foliga e le galulue, ma tuu atu ia i latou e aoao ma tuputupu a’e ai.

Pe ana i ai tino Keriso iinei, semanu e asiasi o Ia i ē mama’i, faiaoga i vasega o le Aoga Sa, saofafai ma le tamaitai talavou lotonutimomoia, ma faamanuia i tamaiti. E mafai e Ia ona fai Lana lava galuega. Ae e soifua o Ia i le mataupu faavae lenei o le tuu mai ia i tatou e galulue ma aoao, o lea Na Te auina atu ai i tatou e suitulaga ia te Ia.

Faatasi ai ma le auai i le galuega a le Atua e oo mai ai “le aia tatau, avanoa, ma le tiutetauave e fai ma sui o le Alii o Iesu Keriso].” Pe a tatou auauna atu e faalautele Keriso ae le o i tatou lava, e oo ina avea a tatou auaunaga o se mea fiafia. A oo ina tuua e isi le tatou vasega, fonotaga, asiasiga o auaunaga, po o se gaoioiga ua latou atili manatua ai Keriso nai lo le manatuaina o i tatou, o loo olaola le galuega.

I le saili ai ma le naunautai e fai ma sui o le Faaola, tatou te avea atili ai e pei o Ia. O le tapenaga aupito sili lea mo le taimi paia pe a tofu tootuli i tatou ma ta’uta’u atu o Iesu o le Keriso, lea ou te molimau atu ai o Ia moni lea, ma o Peresitene Russell M. Nelson o Lona “siufofoga i tulu’iga o le lalolagi” e fesoasoani ia i tatou e “saunia ai … mo mea o le a oo mai.” I le suafa paia o Iesu Keriso, amene.