Olioli E Ala i le Avea ma Soo i le Feagaiga

I se tasi aso i le 2023, sa faigaluega Uyanga Altansukh i le aai i matu o Monokolia o Darkhan, ina ua ulufale atu le peresitene misiona i lona ofisa. I ana upu:

“Sa ou vaai ia te ia ma mafaufau sa i ai ia te ia lenei malamalama susulu i ona foliga. Sa agalelei lava o ia ma mālie ia i latou sa siomia o ia, ma sa ou lagona le mafanafana. A o le’i aluese o ia, sa ou fai atu ia te ia ni nai fesili. I ni nai aso mulimuli ane, sa toe sau o ia i la’u galuega ma fesili pe mafai ona ou auai atu i lana lotu. Sa ou manatu atonu e aoga. Sa ou popole mo le lumanai o la’u fanau, ona sa pei ua tumu tagata i le popolevale ma le pogisa. Sa ou manao i la’u fanau ia pei o lenei tamaloa e i ai se malamalama i ona foliga, ma faasalalau atu ai le olioli i isi na latou faatasi.

“I se tasi aso sa aoao ai i matou e faifeautalai i le tulafono o le sefuluai. Sa sagisagi fiafia la’u fanau ma fai mai, “E tatau ona totogi a tatou sefuluai, Mama.’ Sa mafai ona ou vaaia le faatuatua o la’u fanau i lena taimi. Ae ou te lei auai i le Ekalesia, sa ou matamata i le konafesi aoao ma faalogologo o saunoa Peresitene Russell M. Nelson. Sa ia faasilasila maia ni malumalu fou i le lalolagi atoa ma faapea mai o le a fausia se malumalu fou i Ulaanbaatar, Monokolia. Sa ou fiafia ma loimata, e ui ina sa ou le malamalama pe aisea. Faatasi ai ma lea olioli, sa mafai ona ou iloa ua faatupula’ia lo’u faatuatua ma le molimau.”

O Uyanga, pei o le miliona o isi, o se vaega o le faapotopotoina tele o Isaraelu i le tapenaga mo le Afio Mai Faalua o Iesu Keriso. Na amata lana malaga i luga o le ala o feagaiga ma avea ai o se so’o o Keriso. O le a le uiga o le avea ma se soo o Keriso? Ou te talisapaia le upu faaIapani mo le so’o—deshi—de o lona uiga o le tuagane laitiiti, ma le shi o lona uiga o le tamaitiiti.

Na tautino mai e Iesu Keriso, “Sa ou i ai i le amataga faatasi ma le Tama, ma o A’u o le Ulumatua na Fanaua.” Ona o lē avea ai o Ia, ma le mea sa Ia faia, ua tatou tapuai ai ia te Ia, tatou te āva ia te Ia, tatou te avatu le mamalu ia te Ia, ma tatou mulimuli ia te Ia. Ua togiolaina i tatou e Keriso, ma e faavavau ona tatou faafetai mo Lana taulaga togiola e lē gata.

Ua i ai so tatou Tama Faalelagi, o lē e alofa ia i tatou o Ana fanau. O Lona alofa mo i tatou e atoatoa. O Iesu Keriso ma Lana misiona ua faaalia ai le alofa o le Atua mo i tatou. E pei ona tusia e Ioane, “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”

I la tatou tulimataiga ia malamalama i mea tatou te le iloa, o nisi taimi atonu tatou te faalagolago ai i o tatou aafiaga ua masani ai, po o mea ua tatou iloa. Mo se faataitaiga, e mafai ona tatou aoao e uiga i le Atua le Tamā e ala i o tatou lava tulaga faamātua ma sootaga faaleaiga i le olaga nei. Peitai, e ao ina tatou faaeteete i le soona faaaogaina o nei faatusatusaga i a tatou taumafaiga ia malamalama i lo tatou Tama Faalelagi. O uiga paia o le Atua le Tamā e sili mamao atu i nisi lava uiga e lē-taitai-atoatoa o se tagata pa’ū. O le Atua le Tamā o le Tamā e atoatoa. E atoatoa Lona alofa, agalelei, onosai, ma malamalama ma atoatoa le mamalu. E mafai ona tatou faatuatuaina ma le atoatoa o Ia. O le alofa o Keriso e atagia mai ai le alofa o le Atua le Tamā ma o se faatusa o lena alofa.

O Iesu Keriso o le faaa’oa’o ma le ala. Iā Keriso, e mafai ai ona tatou malamalama sili atu i uiga paia atoatoa o le Tamā ma Lana fuafuaga. E ala ia Keriso, ua tuuina mai ai ia i tatou le mana e mafai ai ona faatoilalo aga’iga a alii ma tamaitai natura ina ia tatou avea atili ai e faapei o le Tamā.

E faapei lava o lo tatou Tama Faalelagi, e alofa mutimutivale ma faamaoni atoatoa Iesu Keriso. O nei uiga paia o le faamasinotonu ma le alofamutimutivale e le feteenai. E galulue felagolagoma’i. O le faamasino tonu ma le alofamutimutivale ua faaalia ai le atoatoa alofa o le Atua mo Ana fanau. E mafai ona tatou talitonuina le Tamā ma Iesu Keriso ona La te faamaoni ma e le faaitu’au ia i tatou uma.

O le Atua le Tamā ma Lona Alo, o Iesu Keriso, e ogatusa atoatoa i le faamoemoega ma le alofa. Ona e alolofa le Atua ma Iesu Keriso ia i tatou, ua tatou maua ai le avanoa ma le faamanuiaga o ni soo moni e osifeagaiga ma i La’ua. O lo tatou faia o lena mea, ua faalauteleina ai lo tatou sootaga ma Keriso: “Ma o lenei, ona o le feagaiga ua outou faia, o le a taʼua ai outou o le fanau a Keriso, o ona atalii, ma ona afafine; ona faauta, o le asō ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine.”

I le avea ai o ni soo, a tatou osia ma tausia feagaiga paia, e faamanuiaina i tatou i le mana faaleagaga. Tatou te fesootai ia Keriso ma le Atua le Tamā i se sootaga faapitoa ma mafai ai ona tatou iloa lo La’ua alolofa ma olioli ai i se fuataga ua faapolopolo mo i latou o ē ua osia ma tausia feagaiga. O lo tatou mafaia ona lagonaina o se fuataga atoa o le alofa o le Atua, pe tumau ai pea i Lona alofa, e faalagolago i luga o o tatou manaoga ma faatinoga amiotonu.

I le Ioane, mataupu 15, fuaiupu 9, tatou te faitau ai, “Faapei ona alofa mai o le Tama ia te au, e faapea lava ona ou alofa atu ia te outou.” Ona tatou maua ai lea o se valaaulia: “ia tumau pea outou i lo’u alofa.”

I le fuaiupu e sosoo ai, ua tuuina mai ia i tatou le auala e faaauau ai i Lona alofa: “Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.”

Pe a tatou vaai i le faamoemoega o le tausiga o feagaiga i le fuaiupu e 11: “Ua ou fai atu nei mea ia te outou ina ia tumau ai lo’u olioli ia te outou, ia atoatoa foi lo outou olioli.”

E ala i le avea ma soo moni i le feagaiga, e mafai ai ona tatou malamalama sili atu i le natura o le Atua ma le olioli e finagalo o Ia ia iloa e Ana fanau uma. E mafai ai foi ona tatou amata malamalama i nisi o mataupu faavae e foliga fenumiai i le taimi muamua. Mo se faataitaiga, e mafai faapefea e le Atua ona maua se atoaga o le olioli ae o loo mafatia naua nisi o Ana fanau? O le tali o loo taoto i le silafaga atoatoa a le Atua ma i Lana fuafuaga atoatoa. Na Te silafia i tatou mai le amataga e o’o i lo tatou lumanai mamalu e mafai ona tatou maua. Ua Ia saunia se ala, e ala atu i Lona Alo o Iesu Keriso, mo i tatou uma, o Ana fanau, e faatoilalo ai tiga, mafatiaga, agasala, ta’usalaga, ma le tuuatoatasi o lo tatou olaga nei. Ua saunia e le Atua le ala mo i tatou ma le filifiliga.

O faataitaiga o i latou ua iloa le olioli e ala i le avea ma soo e mafai ona fesoasoani tatou te malamalama lelei ai i lenei manatu faavae. Atonu ua outou faalogo i le fasifuaitau faapea, ua na ona tatou fiafia e faapei o la tatou tamaitiiti e aupito lē fiafia. Ua ou vaai e le tatau ona faapena. O lo’u tina ua 94-tausaga ua silia ma le 200 i latou e tupuga mai ai o loo soifua. E i ai a se taimi, pe a itiiti e i ai a se toatasi o le 200 o le a lē fiafia. Afai e moni lea faaupuga, o le a i ai lo’u tina i se tulaga faifaipea o le lē fiafia, ae e leai. O i latou e silafia o ia, ua iloa lona fiafia tele.

O le a ou faasoa atu nei se isi aafiaga. Ia Ianuari o le 2019, sa valaaulia ai i ma’ua ma lo’u toalua, o Debbie, i le ofisa o Peresitene Nelson. Sa ia tuuina se nofoa e latalata mai ia i ma’ua, ma sa matou saofafai toetoe ina a fesootai tulivae. I le mae’a ai o le tuuina mai o lo ma’ua valaauga ua i ai nei, sa liliu mai Peresitene Nelson ia Debbie ma taulai atu ia te ia. Sa agalelei, alofa, agamalu, ma tumu i le olioli o ia, e pei o le tamā po o le tamāmatua atoatoa. Sa ia u’u le lima o Debbie ma pōpō, ma faamautinoa atu ia te ia o le a lelei ma o le a faamanuiaina lo ma aiga. Sa foliga mai ia i ma’ua o lena taimi, o i ma’ua o ni tagata ua sili ona taua ia te ia, ma sa lava lona taimi atoa i le lalolagi mo i ma’ua. Sa ma tuua lona ofisa i lena aoauli o le Aso Faraile ua lagona le toefaamautinoaina, alofaina, ma le olioli.

I le Aso Gafua na ma vaaia ai le talafou. I le aso foi lava lena na faaalu e Peresitene Nelson faatasi ma i ma’ua, sa maliu ai se tasi o ona afafine i le kanesa. Sa ma taufai ofo. Sa tutumu o ma’ua loto a o ma faavauvau mo ia ma lona aiga. Sa tutumu foi o ma’ua loto i le faafetai mo lana gauai faaKeriso mo i ma’ua, a o faavauvau ai mo lona afafine o lē sa mafatia.

A o ma manatunatu loloto i lenei aafiaga, sa ma fesili ifo ia i ma’ua lava, “Na mafai faapefea ona ia agalelei naua, alofa, ma olioli i se taimi faigata tele?” O le tali o le, ona ua ia silafia. Ua ia silafia na manumalo Keriso. Ua ia silafia o le a la toe faatasi ma lona afafine ma o le a faaalu se faavavau ma ia. O le olioli ma le vaaiga e faavavau e maua i le noatia i le Faaola e ala i le osia ma le tausia o feagaiga ma le avea ai ma soo faapei o Keriso.

Na aoao mai e Peresitene Nelson: “E pei lava foi ona ofo mai e le Faaola le filemu lea e ‘silisili lava i mea uma e manatu i ai’ [Filipi 4:7], Ua Ia ofoina mai foi le malosi faateleina, loloto, ma le lautele o le olioli lea e tetee i manatu faaletagata po o le malamalama faaletino. Mo se faataitaiga, e lē mafai ona e lagona le olioli pe a mafatia lau tama i se ma’i e leai se togafiti, pe ua leai sau galuega po o ua faalata oe e lou toalua. Ae o le olioli tonu lava lena o loo ofo mai e le Faaola.”

A tatou osia ma tausia feagaiga, o le a tatou liliu atu lava i fafo ma i ai se naunautaiga e fesoasoani i isi ia lagona le fuataga o le olioli ma le alofa tatou te lagonaina i a tatou sootaga faalefeagaiga. E mafai ona avea i tatou o se vaega o le galuega silisili i le lalolagi i le taimi nei—o le faapotopotoina o Isaraelu. E mafai ona tatou fesoasoani e aumaia fanau a le Atua ia Keriso. E pei ona aoao mai le perofeta o Iakopo, “Ma amuia outou; talu ai sa outou filiga e galulue faatasi ma a’u i lo’u togaolive, ma tausi a’u poloaiga, ma toe aumai ia te a’u le fua moni, … o le a outou maua le olioli faatasi ma a’u ona o le fua o lo’u togaolive.”

A o tatou noatia i tatou lava e galulue o ni soo o le feagaiga, i soo se maualuga o lo tatou gafatia, e faamauoaina la tatou sootaga ma le Tamā ma le Alo, e faateleina lo tatou olioli, ma e faalauteleina la tatou vaaiga faavavau. Ona faaeeina lea o i tatou i le mana ma mafai ona tatou lagonaina le olioli i se fuataga ua faapolopolo e le Atua mo soo moni o le feagaiga. I le suafa paia o Iesu Keriso, amene.