Tapenaga Patino e Feiloai ma le Faaola

Ou uso e, ma tuafafine pele, ia Oketopa talu ai, na aoao mai ai Peresitene Russell M. Nelson, “O le taimi lava lenei mo oe, ma a’u, e saunia ai mo le Afio Mai Faalua o lo tatou Alii ma le Faaola, o Iesu le Keriso.” A saunoa Peresitene Nelson e uiga i le Afio Mai Faalua, e faia lava i taimi uma ma le olioli o le faamoemoe. Peitai, sa fai mai talu ai nei ia te au se teineitiiti o le Peraimeri, e popole lava o ia i soo se taimi e ta’ua ai le Afio Mai Faalua. Fai mai a ia, “Ou te fefe ona o le a tutupu mea leaga a o le’i toe afio mai Iesu.”

Ua le na o tamaiti e ono faapea o latou lagona. O le fautuaga sili mo ia, mo oe, ma mo a’u foi o le, ia mulimuli i aoaoga a le Faaola. O Ana aoaoga e le o ni mea faalilolilo pe lavelave foi. A tatou mulimulita’ia, tatou te le tau fefefe pe atuatuvale.

I le aga atu i le faaiuga o Lana misiona faaletino, sa fesiligia ai Iesu Keriso pe o afea e toe afio mai ai. I le tali atu i ai, sa Ia aoao atu ai faataoto e tolu, o loo tusia i le Mataio 25, e uiga i le ala e tapena ai e feiloai ai ma Ia—pe i Lona Afio Mai Faalua pe o le a foi le taimi tatou te tuua ai lenei lalolagi. E taua nei aoaoga aua o tapenaga patino e feiloai ma Ia, e totonugalemu i le faamoemoega o le olaga.

Sa muamua faamatala e le Faaola le faataoto i taupou e toasefulu. I lea faataoto, sa o atu ai taupou e toasefulu i se tausamaaga o se faaipoipoga. Na aumaia e le au popoto e toalima suauu e faatutumu ai a latou lamepa, ae toalima e valelea e le’i aumaia ni suauu. Ina ua mānu mai le taunuu mai sa tālia o le faatoafaiavā, sa o taupou valea e faatau suauu. Ina ua latou toefoi mai, sa tuai tele; ua tapunia le faitotoa i le tausamaaga.

Sa faailoa mai e Iesu itu e tolu o le faataoto e fesoasoani ai ia i tatou. Na ia faamatalaina mai:

“Ma i lena aso, pe a Ou alu atu i loʼu mamalu, o le a faataunuu ai le faataoto na Ou tautala atu ai e faatatau i taupou e toasefulu.

“Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a gafatia le aso.”

I se isi faaupuga, sa lei moomia ona latou fefefe pe atuatuvale aua o le a latou ola ma manuia. O le a latou manumalo.

Afai tatou te popoto, tatou te maua le upumoni e ala i le taliaina o le talalelei a Iesu Keriso e ala i sauniga ma feagaiga faaleperisitua. O le isi, tatou te finafinau e tumau ma le agavaa mo le mauaina e le aunoa o le Agaga Paia e faatasi ma i tatou. O lea tomai e tatau ona mauaina e tagata taitoatasi ma le tagata lava ia, i lea matāua ma lea matāua. O faatinoga faifaipea, a le tagata lava ia, ma patino o le tuuto e valaaulia ai le Agaga Paia e taiala i tatou.

O le elemene lona tolu na faamamafa mai e Iesu o le aloese lea mai le faaseseina. Sa lapata’i mai le Faaola:

“Ia outou, nei faaseseina outou e se tasi.

“Aua e toatele o le a o mai i loʼu igoa, ma faapea, o aʼu o Keriso; ma o le a faaseseina ai le toatele.”

Sa silafia e le Faaola o le a taumafai le ‘aufaavalea e faasese le ‘au filifilia ma e toatele le au soo o le a faavaleaina. E le tatau ona tatou talitonu ia i latou o ē fai mai o talitonuga ma faatinoga a se tagata ua faatagaina e se mana paia, pe ō i toafa faavaliata po o ni afeafe lilo e aoao mai ai i ni meataufaavalea.

Ua aoao mai i tatou e le Tusi a Mamona i le ala e mafai ai ona tatou iloa le eseesega o le au taufaasese mai so’o. O so’o e faalauiloaina i taimi uma le talitonu i le Atua, auauna atu ia te Ia, ma faia mea lelei. O le a lē faaseseina i tatou pe a tatou saili ma talia fautuaga mai tagata faatuatuaina, o ni so’o faatuatua i latou lava o le Faaola.

E mafai foi ona tatou aloese mai le taufaasese e ala i le tapuai e le aunoa i totonu o le malumalu. E fesoasoani lea mea tatou te tausisia ai se vaaiga e faavavau ma puipuia ai i tatou mai tosinaga e ono faalavelave ai pe tata’iese ai i tatou mai le ala o feagaiga.

O le lesona e tatau ai o lenei faataoto i taupou e toasefulu e faapea, tatou te popoto pe a tatou talia le talalelei, saili ia mafutaina i tatou e le Agaga Paia, ma aloese mai le faaseseina. Sa le mafai e taupou popoto e toalima ona fesoasoani ia i latou e leai ni suauu; e leai se tasi e mafai ona talia le talalelei, avea le Agaga Paia e fai ma taiala, ma aloese mai le faaseseina e fai ma sui mo i tatou. E tatau ona tatou faia lenei mea mo i tatou lava.

Ona faamatala mai lea e le Faaola o le faataoto i taleni. I le faataoto lenei, sa avatu ai e se alii le aofaiga eseese o tupe, o loo ta’ua faapea o taleni, i auauna e toatolu. I le tasi auauna sa ia tuuina i ai taleni e lima, i le isi na ia tuuina i ai le lua, ma i le lona tolu na ia tuu atu i ai le tasi. I le mavae ai o se taimi, sa faaluaina e le toalua muamua mea na la mauaina. Ae o le auauna lona tolu sa na ona tanumia lana taleni e tasi. I auauna e toalua na ta’ifaaluaina a la taleni, na fai atu i ai le alii, “Ua lelei ia, le auauna lelei e, ma le faamaoni: ua e faamaoni i nai mea iti, ou te tofia oe e pule i mea e tele: ina ulufale mai ia i le fiafia o lou alii.”

Ona otegia lea e le alii le auauna na alu ma tanu lana taleni, i lona “leaga ma le paie.” Na aveesea le taleni a lenei auauna, ma sa faaāunuua o ia. Ae, a na faapea na faaluaina e lenei auauna lana taleni, semanu na te maua le faamālō lava lea e tasi ma le taui e pei o isi auauna.

O le tasi savali o lenei faataoto e faapea, o loo faamoemoe le Atua ia tatou faalauteleina tomai na tuuina mai ia i tatou, ae e le finagalo o Ia tatou te faatusatusaina o tatou tomai i tomai o isi. Mafaufau i le malamalamaaga lenei na aumaia e le sikola o le Mau Faaiutaia o Zusya o Anipola, i le seneturi lona 18. O Zusya o se faiaoga iloga o lē sa amata ona fefe ina ua lata ina oti. Sa fesili ona soo, “Le matai e, aisea ua e gatete ai? Sa e ola i se olaga lelei; e mautinoa foi o le a avatu e le Atua ia te oe se taui tele.”

Sa fai atu Zusya: “Afai e faapea mai le Atua ia te au, ‘Zusya, aisea na le avea ai oe o se isi Mose?’ O le a ou fai atu, ‘Ona e te le’i aumaia ia te au le agaga silisili na e avatu ia Mose.’ Ma afai ou te tu i luma o le Atua ma Ia faapea mai, ‘Zusya, aisea na le avea ai oe o se isi Solomona?’ O le a ou fai atu, ‘Ona e te le’i aumaia ia te au le poto o Solomona.’ Ae, talofa e, o le a sa’u tala e fai atu pe a ou tu i luma o le na faia a’u ma Ia fetalai mai, ‘Zusya, aisea na le avea ai oe o Zusya? Aisea na le avea ai oe ma tagata na ou avatu ia te oe le gafatia e avea ai?’ Oi, o le mafuaaga lena ua ou gatete ai.”

E moni, o le a le fiafia le Atua pe afai tatou te le faalagolago i mana, alofamutimutivale, ma le alofatunoa o le Faaola e faalautele ai tomai na tatou maua mai le Atua. Faatasi ai ma Lana fesoasoani alofa, ua faamoemoe o Ia ia avea i tatou ma le ituaiga silisili o i tatou lava. Ina ia tatou amata i tomai eseese e le talafeauga ia te Ia. Ae e tatau ai ia i tatou.

Ma le mea mulimuli, na faamatala e le Faaola le faataoto i mamoe ma ‘oti. Pe a toefoi o Ia i Lona mamalu, “e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma oti: ma o le a ia tuu mamoe i lona itu taumatau, ae o ‘oti i le itu agavale.”

O i latou i Lona itu taumatau e avea ma suli i Lona malo, ma i latou i Lona itu agavale e leai so latou tofi. O le uiga tulagaese o le, pe sa latou fafagaina o Ia ina ua fia taumafa o Ia, faainu ia te Ia ina ua fiainu o Ia, faaafe o Ia i le fale a o avea o Ia ma tagata ese, faaofu ia te Ia ina ua leai ni Ona lavalava, sa asiasi foi ia te Ia ina ua ma’i pe faafalepuipuiina o Ia.

Sa fememea’i tagata uma, i latou uma sa i le itu taumatau ma i latou sa i le itu tauagavale. Sa latou fesili pe o anafea na latou faia ai, pe na latou le’i faia foi le avatu ia te ia o meaai, meainu, ma lavalava pe sa fesoasoani ia te Ia ina ua vaivai o Ia. I le tali atu i ai, na fetalai le Faaola, “E moni, ou te fai atu ia te outou, aua na faia e outou i le tasi o e aupito itiiti o ou uso nei, o au lea na outou faia i ai.”

E manino le savali a le faataoto: pe a tatou auauna atu i isi, ua tatou auauna atu i le Atua; a tatou le faia, ua tatou le faamalieina. Ua faamoemoe o Ia tatou te faaaogaina a tatou meaalofa, taleni, ma tomai e faamanuia ai olaga o fanau a le Tama Faalelagi. O le uunaiga paia e auauna atu i isi o loo faapupula mai i se solo na tusia i le seneturi lona 19 e le tusisolo Finelani o Johan Ludvig Runeberg. Na matou faalogo soo ma nai o’u tei i le solo e ta’ua o le “Faifaatoaga o Paavo” a o matou laiti. I le solo, o Paavo o se faifaatoaga mativa sa nonofo ma lona toalua ma le fanau i le itulagi o le vaituloto o Finelani tutotonu. I le tele o tausaga sosoo, o le tele o fua o lana faatoaga sa faatama’iaina, pe ala i le ōsaōsa o le kiona liusuavai mai le tautotogo, timu’aisa o le taumafanafana, po o se vave ufitia i le ‘aisa o le tauāfu. O taimi taitasi na oo mai ai le seleselega itiiti, sa tagitu’i ai le avā a le faifaatoaga, “Paavo, Paavo, lou toeaina lē manuia, ua tuulafoa’iina i tatou e le Atua.” I le tali atu o Paavo, na fai atu ma le faalēano, “Palu le pa’ulaau ma le falaoamata rai [rye] e fai ai falaoa ina ia aua ne’i fiaaai tamaiti. O le a ou galue malosi atu e faamātū laufanua faataufusi. O loo tofotofo i tatou e le Atua, ae o le a Ia saunia mea tatou te manaomia.”

O taimi taitasi sa faatama’ia ai fua o le faatoaga, sa faatonu ai e Paavo lana avā e faaluaina le tele o le pa’u laau na te palua i le falaoamata e aveese ai le fiaaai. Sa galue malosi atu foi o ia, e eli alavai e faamātū ai le eleele ma faaitiitia ai le afāina o ona fanua i le ōsaōsa o le ‘aisa i le tautotogo ma se ‘aisa e vave to’a i le tauāfu.

I le mavae ai o le tele o tausaga faigata, sa i’u ina selesele e Paavo se anoanoa’i o fua o le faatoaga. Sa alaga lana avā, “Paavo, Paavo, o taimi fiafia nei! Ua oo i le taimi e tia’i ai le pa’ulaau, ae tao falaoa e faaaoga ai na o le rai [rye].” Ae sa tago atu Paavo ma le faamaoni i le lima o lana avā ma fai atu, “Palu le ‘afa o le falaoamata ma le pa’ulaau, ona ua ufitia le fanua atoa o lo tatou tuaoi i le ‘aisa.” Sa ositaulagaina e Paavo le tamaoaiga o lona aiga e fesoasoani ai i lona tuaoi lofituina ma lē tagolima.

O le lesona o le faataoto a le Faaola i mamoe ma ‘oti e faapea, e tatau ona tatou faaaogaina meaalofa ua tuuina mai ia i tatou—o taimi, taleni, ma faamanuiaga—e auauna atu ai i fanau a le Tama Faalelagi, aemaise o i latou e sili ona vaivai ma manaomia le fesoasoani.

O la’u valaaulia i le tamaitiiti Peraimeri atuatuvale sa ou ta’ua muamua, ma outou taitoatasi o le, ia mulimuli ia Iesu Keriso ma ia faalagolago i le Agaga Paia e pei ona e faia i se uo faapelepele. Faalagolago ia i latou e alolofa ia te oe ma alolofa i le Faaola. Saili le taitaiga a le Atua e atina’e ai ou lava gafatia tulagaese, ma fesoasoani i isi, tusa lava pe le faigofie. O le a e saunia e feiloai ma le Faaola, ma mafai ona e auai faatasi ma Peresitene Nelson i le faamoemoe ma le olioli. O le faia o lea, ua e fesoasoani ai e tapena le lalolagi mo le Afio Mai Faalua o Iesu Keriso, ma o le a faamanuiaina oe i le faamoemoe ua lava e ulufale atu ai i le malologa ma le olioli o le Alii, i le taimi nei ma i le lumanai.

E pei ona tatou usuina i se tasi o a tatou viiga fou:

I le suafa o Iesu Keriso, amene.