Elder Clement M. Matswagothata

A o laitiiti Elder Clement M. Matswagothata i Botswana, na te faitauina leotele le Tusi Paia i lona tinamatua. Na ia tau atu i le 1 Samuelu 3, lea na fetalai mai ai le Atua ia Samuelu, o le na mulimuli ane valaauina o se perofeta.

“O la’u fesili masani o le, ’Pe o faia pea e le Atua le mea lava lea e tasi?’”

O lena fesili na amata ai lana malaga o le taumafai e saili se Atua o loo fetalai pea. Sa ia feiloai i faifeautalai o le Au Paia o Aso e Gata Ai ina ua 16 ona tausaga, sa ia faitauina le Tusi a Mamona i ni nai aso, ma valaau atu ia i latou i le 3:00 i le vaveao e ta’u atu ia i latou ua manao e papatiso.

Mulimuli ane, sa avea o ia ma uluai peresitene o le siteki na valaauina i Botswana, ona avea ai lea ma uluai Fitugafulu Eria, ma ua avea nei ma uluai Fitugafulu Pulega Aoao.

“E i ai sa’u molimau loloto o loo soifua le Atua ma e fetalai mai ia i tatou i nei aso e gata ai ma o loo tatou ola i se aso ma se taimi e savavali ai perofeta i le lalolagi,” na ia saunoa ai.

Na fanau Clement Mosiame Matswagothata i Middlepits, Botswana, i le aso 8 Ianuari, 1980, ia Bojotlhe J. ma Rachel M. Matswagothata. Ina ua uma ona auauna atu i le Misiona a Aferika i Saute i Cape Town, sa ia feiloai ai i lona faletua, o Novelty Busisiwe Buthelezi, i se tauaofiaga a talavou nofofua matutua i le eria. Na faamauina i la’ua mulimuli ane i le Malumalu o Johannesburg Aferika i Saute i le aso 28 Fepuari, 2004. E toatolu le la fanau.

Na ia mauaina se tikeri o le tagata malaga i le faafilosofia. Sa galue o ia i pisinisi tautaavale ma ituaiga taavale eseese, o loo umia le tele o tulaga taitai, e aofia ai le pule o fefaatauaiga, pule sili, ma le pule o le atunuu mo le Barloworld Motor.

I le taimi o lona valaauga, sa auauna atu Elder Matswagothata o se tagata faigaluega i sauniga o le malumalu i le Malumalu o Johannesburg Aferika i Saute ma o se tagata tomai faapitoa mo le ola tutoatasi i le eria.