Faatuatua: O Se Sootaga Mafana o le Faatuatuaga ma le Lotonuu
E oso tatupu o le faatuatua a o tatou talitonu ia Iesu Keriso ma fuga mai a o tatou faamaoni ma lotonuu ia te Ia.
Ina ua 17 o’u tausaga, sa ou faia se maliega ma la’u uo o José Luis e aoao o ia e ‘a’au. I se tasi la taeao, sa tuuto ai so ma taimi e faataitai ai. Ina ua mae’a le ma lesona, ma a’o ou tuua le vaitaele, sa ou faalogoina la’u uo o taumanuō mo se fesoasoani. O la ua amata ona malemo i le pito loloto o le vaitaele.
Sa ou puna ifo i le vai ma ‘a’au agai atu ia te ia a’o ou tatalo mo se fesoasoani. Sa ou tago atu i lona lima ma toso mai i luga, ma sa pe’a mai la’u uo atuatuvale i lo’u papatua ua mau i lo’u ua ma puni ai la’u mānāva. Lea la ua ma taufai malelemo uma. I lo’u faia o le mea sili ia ou ea i luga, sa ou tatalo ai ma lo’u malosi atoa mo se vavega mai le Atua. Ona, faaalia mālie ai lea ma le mautinoa, o le mana o le Atua a’o ou faalogoina se lima o tuleia a’u agai i le itu papa’u o le vaitaele, ma aumaia ai i ma’ua i le saogalemu.
O lea aafiaga na faamautu ai se lesona maoae a Peresitene Russell M. Nelson na ia aoao mai: “Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le a avea le mana mai ia Iesu Keriso ma ou mana.”
Le fanau ma le autalavou pele, o le asō ou te fia talanoa atu ai ia te outou e uiga i le mataupu faavae e tatau ai o le faatuatua ia Iesu Keriso.
O Le Faatuatua ia Keriso o Lona Uiga o le Talitonuina o Ia
O le a le uiga o le faatuatua ia Keriso? Pe o le uiga ea tatou te talitonu ia te Ia pe ia i ai se molimau e moni o Ia? E mafai ona avea lena o se amataga, ae e tele atu i le na o lena. Pe ua e mafaufau ea i se taimi i le faatuatua o le talitonu? Mafaufau i le tagata e sili ona e talitonuina—atonu o se tagata o le aiga po o se uo. Aisea e te talitonuina ai i latou? Atonu ona ua e vaaia le faifaipea o lo latou alofa ma le fesoasoani.
A tatou faatuatua ia Keriso, tatou te iloaina Ana faamanuiaga ma atina’e se sootaga ma Ia o le faatuatuaga.
E Mafai Faapefea Ona E Faateleina Lou Faatuatuaga ia Keriso?
I se faigalotu talu ai nei a le autalavou, sa valaaulia ai outou e mafaufau filemu i se taimi o lou olaga na e maua ai se ‘ave o le malamalama faalelagi. Faataitai le gaoioiga lenei!
Amata i le mafaufau filemu e uiga ia Keriso ma le fiafiaga ua aumaia e Lana Togiola ma le talalelei i lou olaga. E le gata i lea, tusifaamaumau “manatuaga musuia faaleagaga” o mea sa i ai le Atua iina mo oe, mo e pele ia te oe, ma mo tagata i tusitusiga paia. Ia, o nei molimau o le a le aumaia ai le mana i lou olaga, seia vagana ua uuna’ia e le Agaga i “papatusi aano” o lou loto. O lea la ia manatunatu loloto ma tusifaamaumau mea uma e fuafua ma tapena e le Atua ina ia tino mai ai nei vavega i le taimi tonu e tatau ai.
O le isi, faaaoga lenei gaoioiga o se avanoa e latalata atili ai i le Atua. Tatalo i lou Tama Faalelagi e faapei o le uluai taimi lea. Faaali atu lou alofa ma le lotofaafetai mo Ana faamanuiaga. Fesili foi ia te Ia pe o le a Sona lagona e uiga ia te oe ma le itu o agai i ai lou olaga.
Afai e te faamaoni ma lotomaualalo, o le a e faalogo i Lana tali ma amata se sootaga patino ma le tumau ma le Tama Faalelagi ma Iesu Keriso. E le gata i lena, ae o le a ‘anoa ou mausa faalelotu! Mo se faataitaiga, o le a e sagisagi atu i au tatalo, suesuega a oe lava ia, ma le tapuai i le malumalu o ni avanoa e iloa ai i La’ua ma mafuta ma i La’ua.
E Lauusiusi le Faatuatua i le Lotonuu
Matau e oso tatupu o le faatuatua a o tatou faalagolago ia Iesu Keriso ma fuga mai a o tatou faamaoni ma lotonuu ia te Ia. A e manao i se sootaga moni ma Keriso, faaali atu ia te Ia e ala i le osia o feagaiga ma faamamaluina ma le faamaoni ma le lotonuu. O le osia o feagaiga ma Iesu Keriso e fausia ai le faamoemoe. O le faamamaluina o na feagaiga e fausia ai le faatuatua.
Se’i ou faaaogaina se faataitaiga patino: A o ou laitiiti, sa ou maua lo’u tina o tagi na o ia i se tasi aso. Ina ua ou fesili i ai pe aisea, sa ia fai mai lemu, “Ou te manaomia oe ia e tama lelei.” E ui ina sa ou iloa e le o le mafuaaga lena o lona faanoanoa, ae sa ou alofa ma talitonuina lo’u tina faapei e leai lava ma se isi, ma sa ou manao ia tuuitiitia le faigata o lona olaga. O lea, faatasi ai ma loimata ma le faamaoni a’ia’i uma sa mafai e se iva-tausaga ona maua, sa ou folafola atu ai ia te ia i lena aso, o le a ou tauivi i taimi uma e avea ma atalii aupito sili e mitamita ai o ia.
E mafai ona outou iloa le mamana na i ai lena folafolaga—ma o loo i ai pea—ia te au?
O lena folafolaga ia te ia o le a taiala ai lo’u olaga. A o lei faia ni faaiuga, ou te mafaufau lava pe o le a faafiafiaina o ia i mea ou te faia. O le sootaga mafana o lea folafolaga ma le sootaga ma lo’u tina, o taula ia o la’u amio i lo’u olaga atoa.
I tausaga mulimuli ane, ina ua oo ina ou iloa lelei Iesu Keriso, ua uma ona ou iloa le ala e faavae ai lo’u faatuatua ia te Ia. Sa ou osia feagaiga ma le Alii, ma ina ua ou saili e faamamaluina na feagaiga, sa Ia faamagalo a’u agasala, taiala lo’u olaga, ma “sa faatumuina a’u i Lona alofa” e oo i o’u o’oo’oga. Sa ūluūlu malie e Keriso ia te au se alofa loloto, faaaloalo, ma le lotonuu mo Ia.
Pe tou te malamalama i le mafuaaga ua avea ai le “faatuatua o se mataupu faavae o le faatinoga” ma “a aunoa foi ma le faatuatua e le mafai ona faamalieina le [Atua]”?
A o e taumafai e fai mea e faamalieina ai o Ia, o le a faapea atu pei o Iosefa i Aikupito, ina ua faaosoosoina o ia e le avā a Potifara, “Pe faapefea ona ou faia lenei mea leaga tele ma ou agasala ai i le Atua?” Ma afai tatou te feagai ma lenei faafeagai, o le a e faapea atu e pei o le Perofeta talavou o Iosefa, “Sa ou iloa lena mea, ma sa ou iloa sa silafia e le Atua lena mea, ma e lē mafai ona ou faafitia lena mea; … sa ou iloa lava o le faia o lea mea o le a ou faatausuai ai i le Atua.”
O le faatuatua la ia Iesu Keriso o se sootaga mafana o le faatuatuaga o loo fauina i totonu o le lotonuu ma le alofa. I se isi faaupuga, i le lotofaafetai mo le alofa mutimutivale o le Atua (hesed), tatou te faaalia ai lo tatou alofa lotonuu (emunah) i le tausiga o Ana poloaiga.
Ua folafola mai Keriso, “O le ua ia te ia a’u poloaiga ma tausi i ai, … e alofaina o ia e lo’u Tama, ou te alofa foi ia te ia, ma ou faaali ia te ia.” Afai e te tuuto i lou lotonuu ia te Ia, o le a faaalia Lona alofa ia te oe.
Faatuatua i le Feagai ai ma Puapuaga
Ae faapefea ona e tali atu i na ituaiga o tulaga faafeagai e moomia ai Ana vavega? E ui ina le maalofia luitau ma o nisi foi taimi e taufaafefe, tau lava ina savali ma le le fefe agai atu ia te Ia, pei ona valaaulia ai e le autu o le FSY 2025: “Vaai mai ia te a’u i mafaufauga uma; aua le masalosalo, aua le fefefe.”
E Mafai Faapefea Ona e Savali Ma le Le Fefe ia te Ia?
Mafaufau faapea o oe o se tagata sailiili meafou i se itulagi e le tapasāina. Ina ia ‘alofia faalavefau o i luma, e te manaomia se faapogai o le malamalama. O lou faatuatua i le Atua ma au fegalegaleaiga faifaipea ma Ia, o le suauu lena o lau lamepa. A oulua fetaiai la ma tulaga pogisa ma matautia, nai lo lou savali tauaso la i ai, o le a e kiina lau lamepa ua faatumuina i le suauu o le faatuatua i a Keriso e aumaia ai aloiafi o le faamoemoe i luga o se ala lēmautinoa. O ou aafiaga ua mavae o le a faateleina ai lou faamoemoe o le a lagolagoina oe e le Alii i lau malaga.
O Le A Le Mamao O Le A E Alu ai ma Lou Faamoemoe ma le Faatuatua ia Keriso?
Manatua la’u tala i le vaitaele? I lena taimi o le lemautonu, na oo mai le vavega i le ala sa ou faamoemoeina, ae e le faamautinoa maia e le Atua faapea o le a faia pea e tusa ma o tatou manao. E tatau ona totonugalemu lo tatou faatuatua ia Keriso, ma lo tatou faamoemoe i Ana faamanuiaga, a o Ia filifili e auina mai. “Faamoemoe e tutupu vavega,” ae “tuu ia manumalo le Atua i o tatou olaga.”
O Folafolaga a le Atua i Ona Tagata Faatuatua
A’u uo talavou e, matou te alolofa tele ma faatuatuaina outou! O outou o ni ō o le aiga o le Atua ma o fanau o le feagaiga. Talitonu ma faalagolago ia Iesu Keriso. O le a Ia faia ia outou mafai ona avea moni o Ona soo.
Ou te valaaulia outou ia amata i le asō ona faafailele la outou sootaga ma Iesu Keriso. Fai se tautinoga e te le lafoa’ia lava o Ia.
O lou lotonuu, alofa, ma le talitonu ia Keriso, o le a mamanu ai lou tagata ma lou faasinomaga e pei o Lona. O le a e maua le talitonuga mautinoa ma le malosi e faatoilalo ai osofaiga a Satani. Ma a e faia ni mea sese, o le a e faanaunau atu mo Lana faamagaloga. Ma le mea mulimuli, o le a susulu lou faamoemoe mo le lumanai. O le a Ia tuuina atu ia te oe Lona mana e faataunuu ai soo se mea ua Ia faamoemoeina mai ia te oe, e oo lava i le mana e toefoi atu ai i Lona afioaga.
Ou te molimau atu ia te outou i le olioli e maua mai i le usuina “o le pese o le alofa togiola” ma le “siosiomia e faavavau i aao o lona alofa.” I le suafa paia o Iesu Keriso, amene.